蘑菇辣肉腸螺絲粉 ( 21-APR-2017 )

( 21-APR-2017  FRI )

尋晚瞓到 2 點幾   個胃痛到我死死下   想大叫同埋喊出來呀 ~

之後里奧大人都醒咗   佢望我個樣咁辛苦   嚇死佢   我話個胃好痛呀   但就唔係胃酸倒流   之後我就繼續再瞓 ~

但真係好很痛啦   根本瞓唔到   最後去咗嘔   叫做舒服啲 ~

頂   之後以為自己頭暈暈   見到粒黑嘢郁郁下   原來係巨強   即刻同里奧大人講啦   之後我入番房休息   見佢搞咗好耐咁   佢入房嘅時候   我問佢消滅咗未 ?!   佢話已經淥死咗去 ~

個胃仍然痛痛哋   但都唔敢同里奧大人講喇   因為佢已經係咁問駛唔駛入醫院 ?!   我話咁又唔駛   同埋唔駛佢咁擔心呢 ~

瞓到 7 點 25 分   好在又唔係話好攰   同埋最緊要個胃無再痛 ~

我話唔知係咪尋晚食咗凍嘅糯米雞   里奧大人好大反應話: 唔係熱㗎 ?!   我話唔係喎   之後佢話做咩唔整番熱   妳要食熱嘢家嘛   我話費事一陣你又話我多多要求嘛   同埋尋日姑奶 4 點已經番到屋企   我哋又成 8 點幾先開飯   唔凍先奇啦   其實我都好唔明   正路係會整熱番比人食囉   唔明點解呢個 Step 佢係唔會做   驚我辣親喉嚨 ?!   我同媽咪家姐食飯   食完飯飲湯   都只係個幾鐘嘅事   但媽咪會問駛唔駛再整熱番啲湯囉   知道凍咗無益嘛   就算喺家姐屋企食飯都係   家姐又係成日問駛唔駛整熱番啲湯囉 ~               

咁我再同里奧大人講囉   話其實餐餐飯   除咗魚同飯   基本上樣樣都係凍   所以我唔鍾意食飯   但點都要食啖熱飯囉 ~

我問佢唔覺得凍嘅咩 ?!   佢話有時都覺凍   一陣會同姑奶講   叫佢唔好咁早煮定   唔想我又唔舒服 ~

同埋叫佢清潔下間屋啦   我唔想再見到巨強囉   我真係從來無見過啲屋係咁污糟 ~

咁今日早咗出門口   估唔到同 8 卦一齊搭車   之後一齊去另一間茶餐廳食嘢   咁問佢味道如何呢 ?!   佢又話食開果間好食啲   哈哈 ~

菇場忙下停下   不過個人好似輕飄飄咁   唔係咁願郁囉 ~

差唔多 12 點就好餓呀   所以 Lunch Time 即飛去買車仔麵呢   其實我都係鍾意買嘢食番菇場慢慢食   但有時又好想出去行   真係好矛盾呢   哈哈 ~



好嘢   又可以 Hea 過等放工 ~

放工即番屋企喇   本來想煮炒油麵   不過真係好攰咁   都係唔整喇   清哂屋企啲螺絲粉算呢 ~

拖埋地就抖陣   堅唔想郁 ~     

里奧大人 7 點 45 分放工   我都預備煮嘢 lu ~

是日懶餐 - 蘑菇辣肉腸螺絲粉

蘑菇辣肉腸螺絲粉 - 想飲粟米湯   不過費事比里奧大人話個胃唔舒服仲食粟米囉   咁唔想辣肉睇咁齋   所以加罐細蘑菇   平時煮 2 條辣肉腸就夠   但今晚要清埋半盒螺絲粉   所以覺得唔多夠餸咁   哈哈 ~

里奧大人個樣超級攰   我問佢係咪瞓得唔好   佢話佢尋晚成 5 點先敢瞓   要 Stand-by 狀態呀   驚我要入院   好在我呃佢話唔痛咋   唔係佢仲更加瞓唔着呢 ~      

搞掂哂都 9 點幾   沖埋個涼   食埋個橙都休息喇 ~

今晚 11 點唔夠都瞓 lu   勁攰呢   哈哈 ~

糯米雞 + 餃子 (外賣) @ 姑奶屋企 ( 20-APR-2017 )

咖哩鍋貼 - 姑奶喺八方雲集買嘅   我覺得啲咖哩一陣味 



佢買咗熟嘅白菜餃子同招牌餃子   但居然可以唔蒸熱番去   救命   真係幾好食都係假   



羅漢齋又係凍冰冰   有茨汁真係唔可能凍食   所以我無食  



糯米雞當然都係凍   啲糯米凍到有啲硬添呀        



唐記買嘅鹹魚肉餅飯   我最怕啖啖肉   但都食咗半件   因為得呢個餸係熱啊



( 20-APR-2017  THU )

感恩尋晚都瞓得好   因為前幾晚瞓得麻麻地   再瞓得唔好   我會顛   哈哈哈哈 ~

今朝好晏先到茶餐廳   所以 8 卦幫我叫定   我去到佢已經食完喇   幾咁快 ~



菇場忙呀   好在夠精神   可以好快搞掂   不過搞掂哂都已經差唔多 12 點 lu ~

好想食酸辣米線呀   所以一到 Lunch Time 即飛落去買呢 ~



仍然忙下停下   又同冰姑阿 mi 傾下偈   話咁快就放工 lu ~

今晚去商場等里奧大人放工   但今晚我一定要行呀   晏畫食完碗米線勁飽   真係要郁一郁囉 ~

我自己行商場   多數睇完衫就睇嘢食   里奧大人成日唔陪我睇嘢食㗎   不過有佢陪仲煩   成日話無益㗎   肥㗎   唔怪得妳成日病呀咁   睇下零食啫   又無話買   我話你夠成日食出前一丁啦   咁好有益咩   佢話點都好過零食 ~

行咗成個鐘   所以要坐下喇   其實如果唔駛揹住背囊   都可能行多陣呢 ~

里奧大人 7 點 45 分先放工   咁 Join 埋佢一齊去姑奶屋企 ~

本來姑奶買咗排骨飯比里奧大人   但佢話一開個盒有陣 "叔" 味   所以我哋再去唐記買盒鹹魚肉餅飯 ~

食下傾下都 9 點幾   夜放工啲時間真係唔好駛   哈哈 ~

執嘢嘅時候   姑奶話將盒 "叔" 咗嘅排骨飯餵狗   我就即刻話唔好啦   "叔" 咗比狗食點得㗎   一陣佢哋肚屙就慘啦   佢話比狗食之嘛   我好慶話   我就最憎妳啲咁嘅人   將食剩嘅比狗   仲講到自己餵狗   對啲狗好好咁   其實你哋食唔哂咋   唔係特登留比啲狗食囉   之後里奧大人都話點可能比啲 "叔" 嘅飯比狗食㗎   真係好賤格囉 ~

抖多陣就沖涼   差唔多 11 點先瞓 ~

紅椰樹 @ 官塘 ( 19-APR-2017 )

香茅雞翼冬蔭公檬粉 ($55) - 佢哋用越南檬   係幼身嘅   所以初初以為佢比錯咗米粉   哈哈   估唔到個冬蔭公湯都辣呀   得個辣字囉



特色牛腩配椰漿飯套餐 ($65) - 牛腩好"林   都幾好味   不過份量太少啦   Sambal 醬又係勁少   衰過唔比



蘆薈特飲 (+$7) - 蘆薈 + 糖漿 + 水 = 特飲也



( 19-APR-2017  WED )

里奧大人話尋晚發咗個夢   好真實呀   佢話夢見我叫佢起身   以為我好好人啦   點知之後話如果遲幾分鐘仲唔起身   再霸住間房   就要罰錢喎   黐根   真係連發個夢   我都係要衰過人   哈哈 ~

今朝里奧大人 10 點要去機場博覽會見客   所以又可以陪我食早餐呢 ~





菇場忙下停下   係咁行來行去   有啲攰   哈哈 ~

Lunch Time 諗住瞓陣   又瞓唔到   到想瞓嘅時候已經 1 點 15 分   咁唔駛瞓 lu   咁就食個包啦   今朝特登買定個吞拿魚包㗎   唔駛又要去買嘢食呢 ~

仍然忙下停下   咁都好   唔係驚瞓着   哈哈 ~   

里奧大人喺灣仔見客   5 點半左右都到官塘   所以我放工都即走呢 ~

行咗陣官塘廣場   之後再去東廣場睇下有咩嘢食   見到紅椰樹有椰漿飯   所以就試下喇 ~

食完就番屋企   抖多陣就拎埋啲嘢去姑奶屋企 lu ~

睇多陣電視   差唔多 10 點先沖涼   沖完涼   吹埋個頭都 10 點半   今日好攰呀   所以都即刻瞓覺喇 ~

黑椒炒豚肉 + 蕃茄南瓜粟米湯 ( 18-APR-2017 )

( 18-APR-2017  TUE )

放咗 4 日假   但好似無咩點抖到咁噃   哈哈 ~

今朝有啲熱   不過我又未敢着短袖   菇場太凍喇   真係諗起都驚 ~

早餐食腿蛋治   幾好味 ~



菇場忙呀   不過都預咗呢 ~

Lunch Time 出去食牛丸米   因為個人實在太凍喇   但其實唔餓   不過又想行   所以慢慢食   食完再周圍行 ~



買埋南瓜同粟米就番菇場喇   抖多陣又忙啦   忙到 4 點幾就可以 Hea 喇 ~

放工即走   番到屋企即煲湯   之後開機洗衫 ~

里奧大人 7 點幾喺九龍塘   咁我都預備 lu ~

尋晚姑奶又比咗隻豉油雞肶同大半盒叉燒比我   咁我將啲叉燒炒熱   豉油雞肶就咁蒸熱就算喇   最緊要快 ~

咁今晚煮出前一丁比里奧大人   我就食餸算喇 ~

真係慘   諗住煮嘢嘅時候   發現洗衣機漏水   好在及時發現   即刻拖地   不過都來來回回好多次   個地先無水   攰到我呢 ~

是日懶餐 - 黑椒炒豚肉 + 蕃茄南瓜粟米湯 

黑椒炒豚肉 - 將煲湯嘅半條粟米剩起   好在今次易拻咋   之後加埋黑椒醬同豚肉一齊炒   估唔到幾好味 ~

蕃茄南瓜粟米湯 - 5 個蕃茄 + 2 條粟米 + 半個南瓜   煲埋好好飲呀 ~

家姐 8 點幾嚟搵我   咁我又炒翻熱啲黑椒豚肉比佢食   估唔到佢話好味   哈哈 ~

咁我煮完飯   成身立黐黐   所以等家姐食埋飯   我都要沖涼   叫里奧大人同家姐傾下偈先 ~

傾呀傾   傾到成 11 點   快快叫家姐走喇 ~

等埋家姐報平安   我都即刻瞓 lu ~

滿小廚 @ 九龍灣 ( 17-APR-2017 )

涼瓜斑腩煲 - 我發覺我唔係咁鍾意食炸咗嘅斑腩   食到成口油咁
  


京都肉排 - 唔好味嘅
   


( 17-APR-2017  MON )

今朝 9 點幾電話響   里奧大人話家姐打嚟   我個心離一離   因為放假一定唔會咁早打比我家嘛   咁我一聽   係一個男人來嘅   咁我又未瞓醒喎   以為聽錯   再喂多一聲啦   個男人話唔好意思   我係里奧大人同事   之後即比番里奧大人聽啦   真係佢工廠同事   暈 ~

咁我問里奧大人做咩話係家姐打嚟   佢話個來電顯示係公仔   以為係家姐   更加暈 ~

之後再瞓   瞓到 11 點 15 分呀   好在都醒咗   因為 Feel 到再瞓就會頭痛呢 ~



梳洗完就去食早餐   食完就番屋企抖下 ~

一陣要搬洗衣機   所以里奧大人要去姑奶屋企   再跟車番屋企 ~

本來約 4 點   之後話 3 點半   但等等下都 3 點 45 分 lu   真係呢 ~

家姐 3 點幾上到屋企   傾陣偈   師傅都到了   家姐就跟佢車番屋企了 ~

搞掂哂都 4 點幾   餓到我呢   咁去舖頭附近食嘢   之後我去舖頭幫手   里奧大人就去姑奶屋企整其他嘢 ~





里奧大人 7 點左右搞掂   咁即過嚟幫手整嘢   不過佢聽日要上大陸要好早起身   所以幫到 9 點都走人喇   拿拿聲食完飯就番屋企休息 lu ~

沖埋涼   11 點都瞓喇 ~ 

海逸皇宮大酒樓 @ 紅磡 ( 16-APR-2017 )

大紅乳豬全體 - 切到好大嚿   同埋好鹹 



上湯老虎蝦球 (送伊麵底) - 無食啊  



西蘭花炒帶子 - 個茨汁有啲蒜蓉   好味呀   自己識整就好了
        

清蒸十石斑 - "鞋烚烚" 好味道   哈哈   如果多啲蔥更加好呢  



紅燒竹笙雞絲翅 - 飲咗杯汽水   所以飲番碗熱嘢   成個人當堂舒服哂 
 

野菌鮮翡翠 - 以前最憎食鮮冬菇   依家好鍾意食呀   同家姐一樣了   

蜜桃柚子一字骨 - 家姐同表妹都話個汁 OK   不過我覺得啖啖肉咁   唔想食呢   



幸福炒飯 - 個名掂呀   我其實飽   但都食兩啖   因為啲餸好鹹   咁啲飯甜甜哋嘛   中和番呢 

生燒玫瑰雞 - 食咗 1 件   因為好想食炸雞   哈哈
  


合時甜品 (紅豆沙 / 麥米) - 我食麥米   呢碗夠哂健康   因為完全無味



( 16-APR-2017  SUN )

今朝 10 點左右自己醒 lu   咁都起身沖涼   搞掂哂就出發去新都城海港飲茶 ~

約咗家姐同姐夫 11 點半到酒樓   飲到 12 點半都要走喇 ~





終於食番羅漢齋鴨掌   啲齋好香南乳味   好味道呀







呢個豬腳薑都好味   酸酸甜甜   唔係一味死甜咁呢  



約咗 1 點半去到玄德堂   咁我哋坐巴士去   但家姐記錯落車位置   所以又要轉多程巴士   真係好驚同佢哋搭車   真係佢斷估我痛苦囉   哈哈 ~

本來 1 點半都到   但家姐又帶錯我哋去玄德堂   無啦啦上咗樓   我話唔對路喎   之後又行番前少少   終於搵到   原來係地舖 ~

我哋差唔多 1 點 40 分到   無耐就見到大舅父 大姨 細姨同細姨丈   佢咃話 1 點半其實到咗   不過唔敢咁早入來   因為 2 點先開始儀式   咁即係如果我哋頭先無行錯路   基本上係一齊入嚟   哈哈 ~

差唔多 2 點左右開始儀式了   咁要寫所有人嘅全名   咁有啲我哋真係唔知   所以打電話問   之後個個都笑住話   全名真係好少會叫   不過我哋同啲表就會叫全名   叫慣咗   好難改口   哈哈 ~

今次好奇怪   假期前發咗個夢   夢到媽咪好開心同我傾電話   之後話: 記得聽日到呀   但最奇怪就係   我都成日記錯咗打齋係星期六囉   即係好似媽咪同我想法係一樣咁 ~  

儀式一開始   一聽到啲念經聲   我就即刻諗起當日個畫面   所以我由細到大   次次都會逃避有念經聲嘅地方   咁我一聽就即刻喊唔停   細姨即刻過嚟安慰我   話都一年喇   唔好再喊喇   不過佢個樣都係好傷感呢 ~

無耐二舅父舅母都到咗   又一齊摺金銀 ~

我係無參與儀式   就算接金銀都無   其實大家都係一路摺金銀一路傾下偈   氣氛唔係太傷感 ~

咁有 4 個師傅 + 1 個 "啲打佬"   佢哋唔係成日坐喺度念經   總知到咁上下   佢哋就一齊出嚟念經   之後叫家姐裝香   又叫大家裝香咁   有一 Part 係每人要跪喺媽咪面前   等師傅比嘢佢哋   再鞠躬 3 次就起身   我見到有蘋果   其他真係唔識 ~

因為細舅父要番工   佢同舅母差唔多 4 點幾先到呢 ~   

之後有個唔知係咪大師傅出嚟   因為頭先唔見佢嘛   佢企喺個台中間   念一輪經就落番嚟 ~   

最後就係有個 "啲打佬" 將啲生米整成福祿壽嘅公仔   蝙蝠就代表幅   鹿仔代表祿   壽就真係唔知咩公仔喇 ~

佢哋每人拎啲米同銅錢   家姐再派利是比每個人   咁儀式就完結了   但就要去埋大酒店燒嘢呢 ~

搞掂哂就分頭行事   我同家姐姐夫 大姨 二舅父舅母一齊去麥當勞食啲嘢   細姨姨丈就去買嘢   大舅父就番屋企湊啲孫 ~



差唔多 6 點就起行去酒樓   咁剪髮表妹都話嚟到呀   因為佢本身驚有嘢做   趕唔到出嚟   但好感恩   佢都嚟到   好難得咁齊人嘛   開心開心 ~

去到婆婆屋企附近又見到細姨姨丈   咁又一齊行啦   咁我再打比里奧大人喺邊   佢又啱啱到婆婆屋企附近   咁我等埋佢一齊   我行番去地鐵站   又見到細舅父舅母婆婆同大食   大食就陪我去接里奧大人   佢好乖啦   驚婆婆唔開心   所以 3 點陪到佢 6 點 ~

咁我去洗手間又見到護士表妹   真係去到邊都撞到屋企人   搞笑 ~

今晚大細舅父一家同婆婆坐   大舅父檸哂頭話坐錯位   無計啦   你哋 9 個人   本來細姨姨丈同婆婆坐   但大舅父一家到齊哂   無理由分開佢哋坐嘛 ~

咁大食講到明要同我坐   所以佢隔住我同里奧大人   細姨就笑住話佢   點解要隔住表姐㗎   不過我哋都無咩所謂   佢同里奧大人都好好傾   一講手機就講唔停口咁呢 ~

食到 9 點就走人喇   圍埋傾偈   玩下 BB 又玩咗 15 分鐘 ~

家姐姐夫走先   我同里奧大人同埋大食剪髮表妹大姨   一齊搭地鐵番屋企 ~

同剪髮表妹傾偈   佢問阿婆多唔多打比我 ?!   我話無喎   我番工唔方便傾電話   同埋我會忍唔住發火話佢成日打來   咁佢話上次表弟一見到佢   就問: 婆婆有無打比妳 ?!   笑死我呀   好似終於到佢發生啲不幸事情咁   婆婆又係   駛唔駛朝早 8 點就打比表弟呀 ~

我哋傾到落車   不過佢哋喺油麻地轉車   阿姨笑哂口話   不如一齊落車啦   哈哈 ~

番到屋企即沖涼喇   好攰呀 ~

呢餐真係口渴到暈   里奧大人話要食個橙   最搞笑家姐又 Whatsapp 問我口唔口渴 ?!   我話勁口渴啦   食完個橙無耐咋   佢話姐夫又係話要食個橙   其實應該個個都覺口渴   因為每人都飲咗 1 罐汽水 ~

整呢樣嗰樣   今晚又 12 點先瞓呢 ~

豉汁蒸鯧魚 + 鹹蛋節瓜鯪魚肉湯 ( 15-APR-2017 )

( 15-APR-2017  SAT )

今朝 10 點幾起身   呢個月里奧大人都好攰   所以假期呢幾日都唔會行山 lu   比佢多啲休息好過 ~

又無咩地方好去   所以去 mega BOX 飲茶啦   順便睇下買唔買到飛睇戲 ~

沖埋涼就即出發喇   一去到咁啱有巴士   咁叫里奧大人快啲跑去問到唔到 mega BOX 啦   點知佢 PK   佢話見唔到有樓梯喎   又話未瞓醒   雖然佢着長褲   但都整損咗囉   同埋膝頭哥都痛呀   所以去到 mega BOX 即去超市買消毒藥水同噴嘅膠布   快快處理傷口呢 ~

去到酒樓都 11 點半   唔怪得咁餓啦   哈哈 ~

紅油抄手 - 今次無咩汁啊   



鮑魚菇鴨掌 - 叫錯咗添   以為有羅漢齋  



春風得意腸粉 - 腸粉包住春卷   所以係好飽肚   

蔥花蝦米煎腸粉 - 錯開有條路   里奧大人想食煎薄撐   但剔錯咗蝦米腸粉   我最驚食嘅蝦米腸粉   但都幫佢手食啦   咁我比張單家姐睇   家姐話我哋咁鍾意食腸粉   笑死我呀   我話剔錯咋   



千層薑汁糕 - 獨享真係好飽囉   哈哈   不過里奧大人係都唔食   知我鍾意食喎 

蛋黃千層糕 - 佢無啦啦又話想食甜嘢   佢自己食哂呢個點心 

飲到 1 點幾就走人   最衰戲院無位啦   唔係可以去睇戲 ~

咁去大眾睇陣書啦   里奧大人再買埋本投資書就走 lu ~

坐 Shuttle 去德福   睇下有咩旅行團   不過又無咩心水 ~

話咁快又 4 點   里奧大人話要食嘢喎   咁去美心食啦   我又唔餓   叫杯凍奶茶比我飲就可以了   凍飲要加 $5   好貴呀 ~



食完去街市買魚同橙   之後番屋企喇 ~   

一落車家姐就打嚟問食唔食乳豬 ?!   不過我唔要啦   啱啱買完餸   無啦啦打嚟   仲以為咩急事添   嚇死   哈哈 ~

番到屋企都抖陣   咁家姐又打嚟   原來話婆婆打比佢   同佢講聽日咩都唔搞呀可 ?!   就咁食飯係咪呀 ?!   家姐好慶話: 係呀   聽日咩都唔搞呀   就咁食飯呀   咁婆婆就話: 哦   之後收線 ~

好少聽見家姐咁慶對婆婆   婆婆又係煩   我哋為媽咪做點心意啫   妳忌諱唔想去   無問題喎   而我哋根本都無叫妳去參與儀式   只係諗住難得齊人   開開心心食餐飯   就係咁簡單   但點解成日要我哋唔好提打齋呢兩個字 ?!

老實講   我都唔明打齋係咩   只係知一個儀式   家姐就話今次嘅儀式   係知道媽咪收到哂啲嘢喎 ~

但我都好想講   收唔收到哂啲嘢   佢哋會知 ?!   我真係唔知媽咪收唔收到哂啲嘢   我只係知道幫妳做法事嘅人   就收到哂佢哋想要嘅嘢囉 ~

上次打齋又係咁   話姐夫個唔知咩話要咁咁咁做   人云仍云   姐夫識嗰個人   梗係想比生意佢做啦   我感覺係咁囉 ~

對一個人好   係要生前做   而死後對先人做任何嘢   只係做比人睇   人哋覺得你好好咁   但我真係覺得好無意思 ~

婆婆今次確實好麻煩   所以家姐都喺群組同舅父阿姨佢咃講   如果怕婆婆比說話佢哋聽   可以唔去   阿姨話唔提個死字就唔駛死咩 ?!   大舅父話我同家姐喺家族中係侍親至孝   以我哋為榮   我不敢當啦   我成日口賤鬧媽咪   佢哋唔知啫 ~

無耐大食就打嚟   傾咗半個鐘   佢都 Feel 到家姐好慶   同埋佢知婆婆成日玩嘢   係要問齊哂所有人答案要一致   佢先安樂 ~

其實我一路睇 Whatsapp 已經一路喊   令我好掛住媽咪   同埋又好感激舅父阿姨佢哋嘅支持安慰   里奧大人見我喊   叫我比佢睇 Whatsapp 講咩   我話無嘢   仍都無比佢睇   佢唔參與   唔需要知咁多嘢 ~

傾完都已經 6 點幾   係時間煮飯喇 ~

是日懶餐 - 豉汁蒸鯧魚 + 鹹蛋節瓜鯪魚肉湯 

豉汁蒸鯧魚 - 好想食呀   所以又整 ~

鹹蛋節瓜鯪魚肉湯 - 上星期日買嘅節瓜   今晚真係要清埋去啦   咁今次條鯧魚唔係好大條   好似無咩餸咁   所以買 $10 鯪魚肉   好過買瘦肉嘛   鯪魚球蘸辣椒豉油都好好味㗎 ~

搞掂哂就開機洗衫   沖埋涼就休息喇   睇多陣電視   11 點幾都瞓 ~