泰式打拋豬 + 自家制麵包 ( 22-SEP-2020 )

( 22-SEP-2020  TUE )

依家都適應正常時間番工   起身唔會話好辛苦   哈哈 ~

拎早餐嘅時候見到辣姐   又傾咗陣   佢話 6 月開始唔見我   之後話茶記阿姐問佢見唔見夾荷包蛋嘅姐姐   佢諗咗好耐係邊個   之後先記得係講緊我   因為我之前夾荷包蛋髮夾   哈哈 ~

今朝想食鹹嘢   所以食腿蛋治 ~

菇場勁忙呀   一望個鐘已經 11 點半 ~

呢排都飲北芪水   好似好瞓啲

Lunch Time 出去買罐裝咖啡比里奧大人   順便買麻糬比佢做早餐   之後再買炒麵番菇場食   已經 12 點半喇 ~

呢兩日 4 點幾就同 8 卦一齊食月餅   佢係都要我陪佢食   雖然食 1/4   但真係年紀大喇   開始覺得好滯   哈哈 ~

美心嘅雙黃白蓮蓉真係超級勁好味

今日全日都好忙   所以好快放工咁 ~

走咗一班車呀   咁買埋雞骨草比里奧大人先去搭車 ~

其實放 5 點半係算早   但番到屋企再沖埋涼   都已經 6 點幾   真係要快快手手咁呢 ~

是日晚餐 - 泰底打拋豬 + 自家制麵包

泰底打拋豬 - 里奧大人非常鍾意呢個餸   不過呢個餸好易啫   就咁開包醬汁就搞掂   哈哈 ~

自家制麵包 - 今次里奧大人同事講明只係比我㗎   真係勁搞笑   其中 1 個係芝士包   可能知我上次話要芝士包   所以特登留比我食呢 ~

洗埋碗就大清潔廚房   之後即沖涼喇 ~

睇下電視   好快又 11 點   我自己都瞓先 lu ~            

蠔皇花菇肉絲扒豆腐 + 菠蘿咕嚕肉 + 燒鴨 & 油雞 (外賣) ( 21-SEP-2020 )

( 21-SEP-2020  MON )

感恩瞓得都唔錯   咁我想起身嘅時候   原來係 7 點 29 分   鬧鐘就 7 點半響   時間啱啱好 ~

早餐食奶醬多   呢個星期都應該 11 點 45 分 Lunch Time   所以都唔想食咁飽 ~

菇場又嚟無冷氣   我覺得簡直係熱添呀   以前凍到死   依家熱到死   哈哈 ~

估唔到今日咁忙   所以好快  Lunch Time ~

又未餓   所以去萬寧睇嘢   點知測溫機又響   其實我都無為意   係兩個職員行來   我先知 37.3 度   佢問我係咪好熱 ?!   我答佢我真係好熱   哈哈   之後再量都只係 37 度 ~

咁打比里奧大人   我話喺萬寧又係 37.3 度   佢以為話期寧口罩跌到 $37.3 呀   怪不得佢無反應咁啦   笑鬼死   佢話如果真係跌到 $37.3 真係接受唔到囉   哈哈哈哈 ~

買埋牛雜河就番菇場喇   呢碗粉食咗 45 分鐘   因為我唔餓但又想食牛雜   加上無咩冷氣   仲肯定要慢慢食呢 ~

我食牛雜河   一定係走腸少河多蔥   再加埋辣椒油同紅醋   真係好鬼正㗎

無啦啦又勁忙   不過咁都好   好快放工 ~

里奧大人話餓   所以我都唔煮喇   買埋外賣就即番屋企喇 ~

沖埋涼就開機洗衫   之後即開餐喇 ~

8 點幾睇反黑路人甲   睇到 10 點半就要睇 "你還好嗎?"   講幾個國家受疫情嘅影響   人民生活係點樣過 ~

今集講泰國   真心欣賞佢哋   疫情期間唔會賺盡所有錢   反而仲會幫人   有個人開咗間少少型超市   每日開放比市民拎 5 樣嘢   全部係免費   喺香港真係無可能發生   咁泰國人嘅質素都好好   唔會搶唔會貪   見到街邊嘅食物櫃   真係只拎 1 支水同餅乾   唔會拎拎埋埋番屋企   咁等有需要嘅人可以一齊享用   施比受更有福   希望所有人都會明白啦 ~

今晚有啲攰   睇完都即刻瞓 lu ~

清蒸西星斑 + 西蘭花 + 老黃瓜紅蘿蔔粟米豬骨湯 ( 20-SEP-2020 )

( 20-SEP-2020  SUN )

今朝里奧大人番工之後   我其實都瞓得唔係咁好 ~

瞓到 9 點 40 分就醒咗   梳洗完就去街市買嘢 ~

買完就番屋企   沖埋涼就整早餐   所以 10 點半先食 ~

食完早餐都 11 點   今日主力執鞋櫃   咁都執咗 1 個鐘   本來諗住執埋衣櫃同書櫃   但個人好鬼攰   所以留番下星期先執 ~

好在之前已經大清潔廚房同廁所   咁今日可以做少兩樣嘢咋 ~

煲完湯就開機洗衫   沖埋涼就休息   又已經 1 點幾 ~

同里奧大 2 點 45 分食嘢   之後佢就繼續做公司嘢   我就睇 Youtube ~

百佳買嘅蔥油餅勁大塊   真係好鬼飽肚   今餐真係非常乾爭爭咁呢   

里奧大人 4 點幾瞓晏覺   我都有啲眼瞓   不過唔瞓喇   夜晚瞓唔到仲慘 ~

6 點開始預備晚餐   里奧大人就 6 點半起身 ~

今晚非常之簡單   我覺得唔駛開鑊炒嘢就係好簡單㗎喇 ~

是日懶餐 - 清蒸西星斑 + 西蘭花 + 老黃瓜紅蘿蔔粟米豬骨湯

清蒸西星斑 - 家姐尋晚比我㗎   估唔到咁厚肉   我都好耐無食魚喇   所以覺得勁好味   哈哈 ~

西蘭花 - 又係西蘭花喇   食埋聽日就要隔一排先會見到佢 ~

老黃瓜紅蘿蔔粟米豬骨湯 - 1 個老黃瓜要 $17   仲唔係好大條   再買埋 $40 西施骨 + 紅蘿蔔粟米 ($10)   呢煲湯都算平   但今次西施骨份量都唔少喎   唔通豬肉平咗 ?!

洗埋碗就沖涼   食埋生果就睇 "反黑路人甲" ~

今晚我 11 點鬆啲都瞓先喇   聽日要番工   唔想咁夜瞓 ~  

黑胡椒豬肉包 & 韭菜豬肉包 (外賣) + 蔥阿伯豬肉餃子 + 西蘭花 + 自家制麵包 & 蛋糕 ( 19-SEP-2020 )

家姐又比鮑魚比我   其實佢都唔知屋企有鮑魚   有罐阿一鮑已經過期 2 年   咁一定唔要啦   之後佢話其實唔比我   又分分鐘擺到過喎

( 19-SEP-2020  SAT )

今朝同里奧大人 9 點半自然醒   我就梳洗   里奧大人就去買早餐   之前覺得食呢啲早餐食到厭   但今日覺得好似好耐無食咁   哈哈 ~

食完就抖陣   之後沖涼喇 ~

里奧大人今日有好多嘢做   所以 11 點半都出門口   家姐就 12 點左右嚟接我 ~

去街市買鴨胸同日本蕃薯比 Berry   咁我順便買老黃瓜同波子提子   買完就經過百佳   家姐話今日有 92 折   想買三文魚扒比 Berry   咁入去買啦   買下買下又買咗二百幾   依家啲錢真係好唔見駛 ~

買完都 1 點幾   之後買埋 Lunch 就番屋企   估唔到又已經 2 點幾了 ~

Berry 今次完全唔理家姐   係咁跟住我   真係衰女包   唔可以咁對家姐家嘛 ~

我哋坐喺茶几食嘢   Berry 係咁索   我仲更加衰   成日引佢   但唔會比佢食   呵呵 ~

越式春卷撈檬 + 熱蜂蜜生薑茶 ($48)

8" 招牌法包 ($28 抗疫價) - 味道唔錯   我最鍾意食酸嘅白蘿蔔呢   家姐話以為係洋蔥   咁我拎一條出來食   食到一半就引 Berry   嚇到家姐以為我比佢食   呵呵   不過我都覺得自己好衰   咁樣整鬼 Berry

烤雞全翼 ($18/2隻)

頭先買咗 2 包薯片   家姐一開櫃就話依家會分類   薯片要擺落零食籃   真係好珍惜我幫佢整理好個柜呀   我有種老懷安慰嘅感覺   哈哈 ~

我成日話嘛   我結婚嘅時候   媽咪話好唔捨得我   我聽完幾感動   但之後嗰句係話: 第時無人執屋   哈哈哈哈   嗰時家姐都係買買買之後就求其放囉 ~

好耐好耐以前   同里奧大人同 2 個朋友一齊上堂   阿 Sir 話我最鍾意執嘢   得閒就會執嘢   無嘢執都會執   到依家為止   我咃都好奇怪佢點解會知我鍾意執嘢   哈哈 ~

同家姐執埋啲環保袋   之後原來仲有一個箱未執   咁一次過執埋   咁真係全屋嘅柜都已經比我執好哂  依家仲有套廁同家姐衣櫃未執   等下星期先 ~

姐夫一開個櫃就: 嘩    之後好滿足咁笑呀   我第一次睇佢咁笑法   佢可能都好渴望個櫃無哂嘢 ~

家姐掉咗十幾對鞋   但仲成有十幾對鞋   最搞笑姐夫同我講正想買鞋   好在我幫佢執咗鞋櫃   佢今年買咗 2 對貴鞋都無着過   真係求其放到都唔記得自己買咗   之後我話第時妳哋買咩就問咗我先   家姐喺度笑   咁我真係有印象佢哋屋企有啲咩嘛 ~

我已經幫家姐執哂雜物房   所有大櫃   仲有廚櫃鞋櫃雪櫃   下星期會執家姐嘅衣櫃同套廁嘅櫃   再等冬天先執露台嘅櫃   我就完成哂所有任務喇   哈哈哈哈 ~

對眼好似好眼瞓咁

行埋啲影佢咋   眼神想殺死我咁   哈哈   真係惡到不得了   

一咬呢件玩具就好鬼驚   因為比佢 Fing 落嚟都好痛㗎

咁樣都幾乖   肯比我摸耳仔   哈哈

我幫家姐抹緊梳化嘅時候   咁啱妹妹打比家姐   咁就啱喇   過嚟幫手   哈哈 ~

佢話今日係特登嚟探我喎   其實佢呢排幾乎每日都去家姐屋企   食月餅又飲檸檬茶   一係食雪糕同飲汽水   所以佢最鍾意喺家姐屋企   有得食又有得玩狗   我都鍾意啦 ~

6 點幾就走人   番到屋企就大清潔廚房同拖地   之後沖涼   抖到 8 點就預備晚餐 ~

是日懶餐- 黑胡椒豬肉包 & 韭菜豬肉包 (外賣) + 蔥阿伯豬肉餃子 + 西蘭花 + 自家制麵包 & 蛋糕

黑胡椒豬肉包 & 韭菜豬肉包 (外賣) - 喺百佳買㗎   食一個都超級飽肚   所以韭菜豬肉包留番聽日食 ~

蔥阿伯豬肉餃子 - 唔想呢餐咁乾爭爭   所以煮啲水餃 ~

西蘭花 - 喺百佳買   好似 $9.9 有 3 個   真係好耐無食西蘭花   又係好飽肚   怪不得減肥一定食佢啦 ~

自家制麵包 & 蛋糕 - 里奧大人另一個同事又整麵包   原來佢哋咁多人識整嘢食   所以依家都唔會驚里奧大人會餓親呢   哈哈 ~

食完再洗埋碗   之後即沖涼喇   望下個鐘又已經 9 點半 ~

繼續睇 "反黑路人甲"   我同家姐講話呢套戲真係好好笑   估唔到佢都有睇最尾 5 集   又係話好好笑   頭先妹妹又話呢套戲好睇同好好笑 ~

我同里奧大人都好少追劇   但呢套真係會追嚟睇   我哋真係笑到卡卡聲㗎 ~

今晚都係睇到 11 點幾都瞓   難得有睡意 ~

辣椒芝士腸意粉 + 忘不了通菜 + 角瓜元貝湯 ( 18-SEP-2020 )

( 18-SEP-2020  FRI )

今朝鬧鐘響   仲以為今日係星期六   我仲問里奧大人邊個鬧鐘響   哈哈   起身嘅時候係溫溫燉燉咁嘅狀態 ~

買埋早餐就番菇場   呢排菇場嘅冷氣有啲問題   好在依家唔算最熱嘅時候   唔係就死得 ~

呢排朝早都唔係咁忙   間唔中又做下 Email Filing   依家仲係適應緊正常上班時間   我覺得個人仲未回復狀態咁呢 ~

里奧大人超級忙   但我都會間唔中打下比佢   咁佢聽電話   佢以為我有事呀   話把聲做咩咁   可能戴咗口罩   把聲係細聲啲 ~

不過喺菇場都唔會大聲啦   菇場咁鬼靜   好記得有次打去銀行   個職員好惡咁叫我講大聲啲呀   有時打比家姐   佢直頭問我係咪唔舒服   哈哈   因為我蓋住個電話講嘛   把聲就變咗好沉重咁   哈哈 ~

忙下停下又 Lunch Time   今日出去行陣   再買埋燒賣 + 米粉就番菇場   本來諗住就咁買炒麵   但今朝家姐 Whatsapp 燒賣比我睇   搞到我又想食   我 Send 比家姐睇我嘅 Lunch   佢都話係咪見佢食燒賣所以買嚟食呀 ?!   所以里奧大人成日話我受人影響   哈哈 ~

又係 2 點幾先嚟勁忙   一忙就忙到 4 點幾 ~

放工即走   之後里奧大人話佢都放工   仲話唔記得同我講今晚 8 點開會   我話好在今晚簡簡單單咋 ~

番到屋企即沖涼   之後即預備晚餐 ~

是日懶餐 - 辣椒芝士腸意粉 + 忘不了通菜 + 角瓜元貝湯

辣椒芝士腸意粉 - 成日以為包芝士腸係 10 月到期   原來係 8 月尾   只怪自己之前買太多急凍食物   完全遮住包芝士腸   咁今晚煮咗半包先   今次煮多啲茄汁   里奧大人勁鍾意食   居然食咗大半碟呀   佢真係好鍾意食茄汁意粉 ~

忘不了通菜 - 終於食哂啲通菜  只係 $5 嘅通菜就可以食 4 晚   真係難以想像   哈哈哈哈 ~

角瓜元貝湯 - 呢排買嘅角瓜同絲瓜都有渣   真係激死我 ~

洗埋碗就大清潔廚房   之後再大清潔廁所   搞掂哂就沖涼 ~

里奧大人 8 點開會   今晚 9 點幾開完會   之後又可以一齊睇 "反黑路人甲" 喇 ~

睇到 11 點幾都瞓   雖然聽日 Off   但都好想正常時間瞓覺呢 ~

麻辣手撕雞 (外賣) + 腐乳通菜 ( 17-SEP-2020 )

依家里奧大人見我擺生果係枱面   就問我係咪用嚟影相   我話啲餸唔吸引   咪擺多啲生果   咁樣睇落豐富啲咁囉   我都頂自己唔順   哈哈

( 17-SEP-2020  THU )

尋晚算係瞓得幾好   但都唔係叫好   呢排睡眠質素好差咁 ~

早餐食餐蛋治烘底   食到一半都好飽   好在有時間慢慢食 ~

菇場唔太忙   又係同 8 卦係咁傾偈   所以好快又到 Lunch Time ~

今日 12 點半先食 Flakes + 乳酪   因為朝早實在太飽 ~

仍然唔忙   所以 Hea 住等放工 ~

放工即走   去完超市買嘢就買手撕雞就番屋企   沖埋涼就預備晚餐 ~

呢兩晚好似無咁熱   咁沖涼就用熱少少嘅水   但點知一煮飯就洗哂汗   下次都係用暖水好啲 ~

里奧大人 7 點唔夠番到屋企   佢見我整哂就話可唔可以比佢沖完涼先食   我話實預埋你沖涼先食啦   但佢沖完都未食得   因為煲飯未煲好   要等多 5 分鐘   今晚我真係好遲先記得煲飯   如果唔係可以早啲開餐   哈哈 ~

是日懶餐 - 麻辣手撕雞 (外賣) + 腐乳通菜

麻辣手撕雞 (外賣) - 呢排真係好想食濃味嘢   唔知係咪個人比較攰   感覺口淡淡咁   食番 d 刺激嘢   又真係好好多咁   哈哈 ~

腐乳通菜 - 連食 3 晚通菜   不過食埋聽晚又食哂㗎喇   一份通菜食 4 晚   仲只係買咗 $5 一份   真係超級抵食呀 ~

洗埋碗就開機洗衫   之後沖涼 ~

依家追緊 "反黑路人甲"   所以 9 點 25 分已經坐定定等到 9 點半   里奧大人話我真係好鍾意睇   咁又係   我好少會坐定睇電視呢 ~

11 點唔夠又再追 "反黑路人甲"   不過睇到 11 點半都瞓 lu ~

燒汁金沙骨 + 通菜 + 芫茜皮蛋魚片湯 ( 16-SEP-2020 )

里奧大人見到碟意粉話好乾   我話今日唔係咁舒服   唔好咁多要求   之後佢話唔舒服唔好煮嘛   我都覺得自己幾衰   成日發脾氣

( 16-SEP-2020  WED )

感恩一覺瞓天光   但尋晚瞓到半夜   左邊手好痛   好在無耐之後就瞓得番呢 ~

今朝無啦啦又搞肚痛又暈   真係要抖抖先出門口 ~

買埋早餐就番菇場   原來已經 8 點半   但都唔駛慢慢食   因為已經喺菇場嘛   哈哈 ~

菇場唔忙呀   同 8 卦係咁傾偈   我哋成日覺得依家做一大輪嘢   但都只係過咗一個鐘   可能之前番 10 點   所以啲時間過得好快咁呢 ~

Lunch Time 出去行陣   之後買魚皮餃番菇場食   由熱食到凍   哈哈哈哈   我覺得啲魚皮餃好油   定係因為凍食所以咁呢 ?!

又係 2 點幾先忙   搞掂哂都已經 4 點幾   可以抖下了 ~

放工即走   咁買啤酒先番屋企   一入屋先醒起今晚要滾湯 ~

沖埋涼就即煮晚餐喇   里奧大人又已經放工   好似好趕咁 ~

是日晚餐 - 燒汁金沙骨 + 通菜 + 芫茜皮蛋魚片湯

燒汁金沙骨 - 唔知點解焗完之後好多汁咁   同埋完全好似蒸排骨咁款   本身諗住焗到乾身家嘛   之後唯有落鑊再加汁去燜 10 分鐘啦   但估唔到又幾好味   哈哈 ~

通菜 - 買咗好多   今晚又食啲先   但唔整腐乳喇   加甜豉油就算 ~

芫茜皮蛋魚片湯 - 要清熱氣   咁就煲呢個簡單嘅湯水 ~

洗埋碗就大清潔廚房   之後拖埋地就沖涼 ~

食埋生果就休息喇   里奧大人就熨衫   呢樣佢最主動   咁我可以做少一樣家務   嘻嘻 ~

睇埋 "你還好嗎 ?!" 都瞓覺   里奧大人就睇陣書先瞓呢 ~