炸雞 & 肉醬意粉 + 自家制朱古力餅 ( 23-JAN-2021 )

( 23-JAN-2021  SAT )

感恩一覺瞓天光呀   今朝起身完全唔覺得凍喇 ~

今朝食飽啲   但比錯奶茶   唉 ~

菇場唔忙   係咁同 8 卦 Skype   所以好快放工   哈哈 ~

我去一田買嘢   等過馬路見到有人同我揮手   原來係 Ivy   咁傾咗 5 分鐘左右都走人喇   唔係咁想喺街邊傾偈   寧願 Whatsapp 好過 ~

買完嘢就搭車番屋企   咁去麥記買 Lunch   因為好想食薯條   哈哈 ~

里奧大人今日突然番晏晝   所以家姐就約今日同朋友食飯   佢約之前都問我邊日好㗎喇   諗住星期六有人陪我   點知里奧大人番工   佢話好似好衰咁   我話關咩事   咁我今日大清潔屋企咪得囉   大把嘢做 ~

不過突然一個人喺屋企   感覺又好似好孤單咁   以前我一個人就肯定搵媽咪陪   依家真係一個人就一個人   所以嗰一刻係好想喊   我唔係怕悶   係好想時間可以番轉頭有媽咪陪呀   嗚嗚嗚嗚 ~

2 點半開始大清潔屋企   抹哂所有嘢   大清潔廚房同廁所   搞掂哂即沖涼 ~

已經 5 點 15 分喇   其實今日勁熱   一開始做嘅時候又好攰咁   感恩做做下又好 OK 喎   真係命苦   哈哈哈哈 ~

諗住 5 點半靈修   點知家姐打嚟傾咗半個鐘   傾完都即刻網上崇拜喇 ~

完畢就預備晚餐   今晚里奧大人 8 點唔夠就番到屋企   開心開心 ~

是日晚餐 - 炸雞 & 肉醬意粉 + 自家制朱古力餅

炸雞 & 肉醬意粉 - 尋晚食剩架   不過下次唔會再叫多份炸雞   因為食完好口渴呀 ~

自家制朱古力餅 - 里奧大人問同事係咪比佢 ?!   同事答係比你太太   呢下好笑呀   以前係答比你太太你都有份食啦   依家直頭無佢份食   哈哈   好感恩呢排好想食甜嘢   今晚又可以食到呢 ~

洗埋碗就沖涼   抖陣就追劇喇 ~ 

本身 10 點 45 分瞓覺   但睇睇下又好緊張   所以 11 點幾先瞓呀 ~

CHUBBY'S PIZZA (外賣) ( 22-JAN-2021 )

星期一套餐 ($165) - 環球世界薄批 (普通批) & 肉醬意粉 & 炸雞 2 件 & 汽水+ 炸雞 2 件 (+$32)

( 22-JAN-2021  FRI )

里奧大人今日 WFH   又陪我食早餐喇 ~

一路食一路傾   佢整鬼我話又想食部隊鍋   我話部隊鍋都要好多功夫噃   又要洗   里奧大人好驚訝咁話乜唔係全部一齊煮熟嘅咩 ?!  要洗嘅咩 ?!?!   我話腸仔同金菇要沖一沖啦   洋蔥又要切   佢話就咁午餐肉咪得囉   我話不如就咁煮午餐肉辛辣麵好過啦   佢自己都忍唔住笑 ~

今朝里奧大人早咗去買早餐   我可以抖耐啲先出發番工 ~

菇場唔忙呀   咁啱家姐打嚟   又可以傾下偈   呵呵 ~

傾傾下   佢仲教我點煮粟米墨魚滑添   佢朋友教佢墨魚滑熟就等如粟米熟   但我話包住咗嘅粟米無咁快熟㗎喎   家姐話糟糟都咁講   之後又教我幾個餸   笑到我死死下   雖然我唔叻   但佢啲煮法真係好搞笑   原來糟糟又係咁講   佢好想教工人煮新嘢   但我話妳上網睇下點煮先好喎 ~

之後講去銅鑼灣   我話北角可以行去銅鑼灣   我話咁咁咁去到北角   我已經唔知點行   因為我坐巴士喺橋   唔知地面係點行   家姐話以為係教佢點行呀   哈哈哈哈 ~

佢話想去 Ikea 買 Zipper 袋   我話妳用 Zipper 袋裝比我嘅米通呢   我都未講完佢就話係咪腍哂呀 ?!   我話仲好脆呀   之後佢話痴痴哋   啲語氣講到好似腍哂咁   大佬   菇場咁鬼靜   講嘢嘅語氣係比較陰陰沉沉㗎啦 ~

原來傾咗 40 分鐘   衰 8 卦話請我番來傾偈   哈哈   咁得閒先咁傾啫 ~

話咁快又 Lunch Time   出去行陣先   其實依家覺得 11 點 45 分放飯都唔錯   真係迫自己可以行 15-25 分鐘   但衰在一樣嘢係成日會買嘢囉 ~

行完就買燒賣+腸粉   咁就已經 12 點 15 分   時間過得好快呢 ~

同 BG 喺 Pantry 傾咗 15 分鐘   佢話佢都有經痛   仲試過一次暈咗   之後話都知我以前成日痛   因為我要攬住個暖包 ~

有次我合埋眼休息   阿齋同另一個同事講話我唔舒服   因為咁啱個同事想叫我 ~

8 卦同坐我附近嘅同事都知我係痛到死嗰隻   所以佢哋好好㗎   咩都叫我慢慢   又幫我買嘢食   我可以多啲時間休息呢 ~

今日仍然唔忙   放工可以即走 ~

里奧大人 5 點半 Order Pizza   估唔到 5 點 50 分就到   感恩我今晚趕到班車   如果唔係肯定 6 點先番到屋企呀 ~

快快手手沖涼   之後開餐喇   我極之肚餓呀 ~

8 點半開組   10 點 15 分左右完畢 ~

之後同里奧大人傾陣偈   就再睇 "驚奇的傳聞"   終於睇到 11 點半先瞓   哈哈 ~

燒汁洋蔥牛仔骨 + 瑤柱扒豆胚 + 芫茜皮蛋魚片湯 ( 21-JAN-2021 )

好想食臘腸   所以每人半條

( 21-JAN-2021  THU )

感恩瞓得唔錯   最開心係隻左手無痺痛喇   真的要感謝神 ~

今日里奧大人 WFH   又陪我食早餐喇 ~

食緊嘅時候   佢話唔記得開電視   我話特登唔開咁樣可以傾偈   佢話相對無言喎   神經病   哈哈 ~

食完抖陣先番工   咁其實都唔錯㗎   因為巴士無咁多人坐呢 ~

菇場唔忙呀   可以抖下 ~

里奧大人次次一睇到關於食極唔肥嘅字眼呢   就會好開心話好啱妳呀   快啲埋嚟睇啦   肯定唔方好嘢   

呢啲 "吃不胖" 同 "能瘦" 字眼   擺明就係為為食嘅人而設   所以里奧大人必定會買比我呢   我話見到咁多嘢食   會越睇越肚餓喎   我眼中只見到食物㗎咋   哈哈哈哈

好得意呀

Lunch Time 去銀行入票   之後再行陣   買埋鯪魚球米就番菇場喇 ~

呢排無咁忙喇   可能年尾 ~

今日放工即走人   感恩趕到班車   可以早 15 分鐘番到屋企㗎 ~

放低袋就即預備晚餐   咁我拎咗三包沙爹湯底出嚟   同里奧大人講話放心   幾時打邊爐都有湯底㗎喇   里奧大人笑住話妳自己想打邊爐之嘛   講到好似我想打咁   哈哈哈哈   咁佢又無講錯嘅 ~

6 點唔夠預備   7 點鬆啲先可以開餐 ~

是日晚餐 - 燒汁洋蔥牛仔骨 + 瑤柱扒豆胚 + 芫茜皮蛋魚片湯

燒汁洋蔥牛仔骨 - 今次色水唔夠   同埋影完相先知無落到汁   哈哈 ~

瑤柱扒豆胚 - $20 份咋   所以即買 ~

芫茜皮蛋魚片湯 - 好耐無飲魚湯   又係時間飲喇 ~

洗埋碗就沖涼   之後睇福音電影   因為聽晚開組要分享 ~

睇完再即睇 "驚奇的傳聞"   但睇咗半集都瞓   原來只係 10 點 45 分   咁都好   早啲瞓好啲 ~

水餃雲吞拚蝦滑 & 炸魚皮 (外賣) ( 20-JAN-2021 )

( 20-JAN-2021  WED )

今朝起身又凍咗好多喎   真係要小心身體 ~

早餐食芝腿治烘底   唔想食甜嘢 ~

菇場唔忙   咁都好   因為隻左手仍然痛   好煩呀 ~

家姐打嚟傾偈   我話我左手痺痛   佢停咗一停   之後好驚咁話係咪中風   佢同里奧大人講嘅一樣   話中風先兆   但我話我覺得似發炎嘅痛   因為呢兩個星期係咁追劇   我又成日挨左手邊梳化   想唔痺都難啦 ~

我叫家姐唔駛擔心喎   佢話妳梗唔駛擔心   係我哋擔心啫   估唔到佢咁講   不過我上次剪傷手指   佢真係連續幾日咁問痛唔痛就真嘅   但佢自己手痛真係唔同我講㗎   不過次次都比我無意中發現囉   之後我就好擔心   雖然我口衰同惡   但佢同里奧大人有咩頭暈身慶   我真係超級擔心呢 ~

影完呢張相

之後就瞓着

Lunch Time 出去行陣   今日特別餓咁   所以買燒賣+炒麵番菇場食 ~

仍然唔忙   放工即走 ~

去街市買餸   已經同自己講唔好買咁多   但最後都買咗一大袋 ~

同里奧大人差唔多時間番到屋企   我就即刻預備晚餐   咁叫佢沖涼先喇 ~

是日懶餐 - 水餃雲吞拚蝦滑 & 炸魚皮 (外賣)

水餃雲吞拚蝦滑 & 炸魚皮 (外賣) - 買咗 $20 (4 兩) 蝦滑   我覺得好味過墨魚滑   今晚又用旺菜做湯底   真係超級方便   個湯又甜 ~

洗埋碗就開機洗衫   沖埋涼就食生果 ~

8 點 45 分開始睇劇   睇到 10 點半都瞓喇 ~

韓國辣醬牛仔骨 + 粟米蘑菇蛋花湯 ( 19-JAN-2021 )

好想食牛耳同花生米通   所以當餐前小食   雪咗一晚嘅茄汁豆又好味喎   唔會咁腍劈劈

( 19-JAN-2021  TUE )

感恩一覺瞓天光   一起身又唔係話好凍   之前又話凍一星期嘅 ~

早餐食奶醬多   尋晚嘅辛辣麵仲未落格   哈哈 ~

菇場忙下停下   但左手痺痛   一舉起隻手就痛   今晚要里奧大人幫我按按呀 ~

Lunch Time 出去行陣   其實有啲餓   但都想行 15 分鐘   之後買牛腩河番菇場食   冷氣又好凍   我要食熱嘢 ~

仍然忙下停下   可以放工即時走 ~

諗住去超市買 Pizza   不過無囉   所以番屋企   喺屋企樓下見到里奧大人   佢嚇一嚇   問我做咩咁遲   好在喺樓下見到   如果一陣番到屋企唔見我   又以為我暈 ~

呢排都無沖涼就預備晚餐   天氣太凍喇   同埋我着長袖衫   感覺無咩掂到塵   哈哈 ~

是日晚餐 - 韓國辣醬牛仔骨 + 粟米蘑菇蛋花湯

韓國辣醬牛仔骨 - 半個洋蔥墊牛仔骨   咁樣焗真係唔錯   起碼洋蔥會軟身   之後再加埋意粉落鑊加燒汁煮   勁方便 ~

粟米蘑菇蛋花湯 - 加咗兩隻蛋同一罐細蘑菇   煮出來好似湯羹咁   所以好飽肚   哈哈 ~

洗埋碗就開機洗衫   之後即沖涼喇 ~

8 點 45 分開始追劇   但今次追得有節制   最多睇個半鐘   我覺得命仔緊要啲   哈哈 ~

我問里奧大人係咪甩跤呀 ?!   真係好痛呀   佢話甩跤隻手係郁唔到囉 ~

佢幫我按下又好啲   之後我又熱敷   佢話我唔夠瞓喎 ~

今晚又凍咗咁   所以一齊 10 點半都瞓喇 ~

小型部隊鍋 ( 18-JAN-2021 )

我覺得就咁淥熟嘅午餐肉好好味呀

今次無加豚肉同年糕   我其實有糯米粉的   但原來過期四個月   激死我

( 18-JAN-2021  MON )

今朝一起身   覺得凍咗好多呀 ~

早餐食奶醬多   今次好味道 ~

菇場唔太忙   咁就好喇 ~

Lunch Time 去一田買年糕同芝士腸   但只有辣醬年糕   咁諗住買一大 Pack 嘅金妹牌芝士腸   又 1 月 21 日到期   點食得哂喎   最後只買 Pack 日本大洋蔥   3 個只係 $16   都抵呀   平時街市都要 $6 一個   之後買埋炒麵就番菇場喇 ~

嘩   無諗過會勁忙   仲要忙到 5 點半呀 ~

放工即走   去埋超市買辛辣麵同韓國維也納香腸同辛辣麵就即走喇 ~

番到屋企都接近 6 點半   要快快手預備了 ~

我諗住煎香午餐肉同香腸   但里奧大人話唔駛   用邊爐鍋煮熟就得啦   唔駛咁麻煩 ~

平時又話煎香先好食嘛   不過咁都好   慳番時間同埋唔駛大清潔廚房 ~

第一次見里奧大人咁積極幫手   真係動作好快   感覺佢好期待咁架   搞到我都緊張埋  哈哈 ~

其實里奧大人好鍾意食辛辣麵   又話想食部隊鍋   咁整比佢食啦   等佢開心下 ~

今次個鍋又有泡同出哂煙喎   可能本身個蓋個孔太大   轉咗另一個蓋就好啲 ~

今晚真係睇得出里奧大人超級開心   氹佢都真係好易   哈哈 ~

諗住一品鍋好快洗完碗   點知都要 8 點半先搞掂 ~

沖埋涼就抖陣   之後睇 "驚奇的傳聞"   不過睇到 11 點都瞓喇   唔會再睇哂一集先瞓呢 ~

蒜香金沙骨 + 旺菜粉絲煲 ( 17-JAN-2021 )

其實呢餐仲有包芝士腸仔包 + 兩條腐皮卷 + 兩隻鹹水角   里奧大人見到個包都喺度笑   哈哈   

( 17-JAN-2021  SUN )

今朝 9 點 10 分起身   梳洗之後就整早餐   食完就大清潔屋企 ~

今次個包真係燶咗

拖埋地就小清潔廚房   沖埋涼就出發去姑奶屋企拎嘢 ~ 

拎完就同水姑一齊走   好在佢教我點去搭巴士   咁樣快好多 ~

家姐 Whatsapp 話買咗花生米通同牛耳   比一半我   仲話好味到停唔到口   我話唔要   留番比妳自己食啦 ~

幾分鐘後   無啦啦話係其實唔好食先比多啲我   我話太假啦   如果妳咁諗   簡直唔係人   之後佢答 Yes   哈哈哈哈 ~

12 點半同里奧大人食 Lunch   食到 1 點半左右就走喇   佢要開會 ~

我差唔多 2 點半去到家姐屋企   今日真係四圍滕   所以去到即灘喺梳化 ~

真係好掛住 Berry 姐   呢兩次佢好乖   肯比我抱呀

好大塊雞肉零食   好重手㗎

我搓佢個身   感覺到佢已經全身放軟   之後都瞓咗陣 

瞓咗陣又起身聞來聞去

眼瞓都唔瞓   

上年家姐買咗片糖比我   家姐話個店主叫佢買多啲   因為唔係成日有㗎   仲見到喺個瓦入面拎出嚟   咁我話係增城片糖喎 ~

咁今次又叫家姐幫我買片糖   佢話去另一個街市買   話買咗增城片糖   要 $28/斤   佢買咗接近 $70   其實我唔知家姐會幫我買增城片糖㗎   因為佢都唔知係咩   哈哈   所以好開心佢買咗比我   最搞笑問我夠唔夠食 ?!   我話可以食一年啦 ~

咁我之前又叫佢幫我買 Legging   因為條褲已經幾年前買㗎喇   但真係着過一兩次   上次我再着覺得超勁舒服   所以又好想再買   仲要係 $100/3條   我買兩薄一厚   唉   我喺 H&M 買一條要 $79.9 㗎   所以叫家姐下次幫我買多 3 條呀 ~

同家姐傾下偈又同 Berry 玩下   又好快 5 點   之後姐夫細佬一家人嚟咗   Berry 嚇到即刻震哂咁   仲撞玻璃邊縮入梳化底   我已經坐喺地下陪佢   佢都仲咁驚   陰功豬 ~

鼻哥下面損咗   陰功豬   

我 5 點半左右都走 lu   因為里奧大人放工喇 ~

番到屋企 6 點   即預備晚餐喇 ~

是日懶餐 - 蒜香金沙骨 + 旺菜粉絲煲

蒜香金沙骨 - 第一次整呢個餸   里奧大人話好味道呀   最衰我炒蒜頭嘅時候行開咗   一番埋位見到蒜頭已經燶唒   嗚嗚嗚嗚 ~

旺菜粉絲煲 - 開咗 2 包金象牌粉絲   完全唔掂   煮出嚟係散修修   口感又腍 ~

洗埋碗就大清潔廚房   之後沖涼喇 ~

今晚同里奧大人一齊睇 "驚奇的傳聞"   一集係一個鐘多少少   我同里奧大人講話最多睇到 11 點 15 分要瞓   唔想追劇追到成日夜瞓呀   我覺得今次自己可以節制好叻   哈哈 ~