環遊世界 (薄批) + 炸雞 + 招牌肉醬意粉 (外賣) ( 24-MAR-2022 )

環遊世界 (薄批) - 好耐無食   覺得好好味呀

炸雞 (4件) - 我忍唔住食咗 1 件   但真係好熱氣   哈哈

招牌肉醬意粉 - 留番聽晚食

( 24-MAR-2022  THU )

今朝里奧大人陪我食早餐   我同里奧大人講   話如果我自己喺屋企   食嘢多過番工嘅時候   里奧大人即話唔好睇咁多食嘢嘅 Youtube 啦   呢句好笑呀   我話可能番工午餐食正正經經咁食   所以會飽   喺屋企食 Lunch 係分開食   唔係一次過食哂咁呢 ~

落毛毛雨又凍咗   真係好記得上星期又焗又熱又濕   最驚啲天氣時冷時熱   咁樣好容易病㗎 ~

菇場唔係好忙   又可以全程投票喇 ~

Lunch Time 出去買菜蕃茄薯仔   買埋麵包又再買啲立立雜雜   終於又買咗 2 大袋嘢   好鬼重 ~

好想食熱嘢   咁就食魚片頭米粉啦 ~

忙咗陣又可以抖   今日隻右手好痛呀   可能呢排一出去就買好多嘢   同埋每次都好重   依家又勞損了 ~

家姐 Send 比我睇   我話 Berry 無眼睇妳   哈哈哈哈

放工即走   番到屋企沖埋涼就開機洗衫 ~

今晚 6 點半可以開餐   唔駛洗碗真係好開心   哈哈哈哈 ~

抖到 8 點半就跳舞   今晚點都要跳啦 ~

沖埋涼就睇 Youtube   之後家姐打嚟   好開心話今日喺 MUJI 買咗啲咩咩咩   其實佢今日係咁問我要唔要 ?!   我話唔要囉 ~

家姐同我口味差唔多   咁樣就最好啦   即係我鍾意食=佢鍾意食嘛   哈哈   

家姐話工人都好鍾意食呢款朱古力架   佢哋就好啦   成日可以 Share 食   里奧大人食朱古力會好燥熱   所以得我自己食㗎咋

其實呢款餅乾超級好味   不過呢排都唔敢食咁多熱氣嘢   如果唔係實叫家姐買 2 包比我   哈哈

棉花糖同軟糖都好味

今晚差唔多 12 點先瞓   依家真係下下 11 點幾先眼瞓   希望遲啲可以早番少少瞓覺啦 ~

泡菜汁豚肉鍋 + 雞扒夜貓大碗飯 (外賣) ( 23-MAR-2022 )

泡菜汁豚肉鍋 - 仍然未食厭   因為我鍾意食啲菜同黃蘿蔔   哈哈

 

雞扒夜貓大碗飯 - 呢個唔熱氣   所以里奧大人都係揀呢個

( 23-MAR-2022  WED )

今朝 9 點幾都要醒   不過今朝只係焗熱麵包就搞掂   方便好多啦 ~

之前里奧大人話其實唔駛整雞蛋腸仔都得   咁就好喇   唔係我想懶喎   係我其實食麵包都夠飽   我以為里奧大人要食飽啲先整雞蛋腸仔咋   見佢平時早餐都係米粉餐嘛   點知佢話食包都飽   咁我梗係就咁整包就算啦   哈哈 ~

食完又休息下   之後沖涼   始終習慣每日沖涼洗頭   就算全日喺屋企   都要咁做呢 ~

里奧大人 12 點都出發番工   咁我溫下書啦 ~

1 點幾食午餐   之後又睇 Youtube ~

里奧大人今晚好夜放工   所以我陪佢食晚餐喇 ~

差唔多 6 點就出發   買埋晚餐就去里奧大人公司 lu ~

食完好想郁   所以就去買下嘢   哈哈 ~

感恩里奧大人 8 點半可以放工   可以番到屋企抖下就開始跳舞呢 ~

沖埋涼就休息   今晚難得 11 點幾有睡意   所以即去瞓覺   里奧大人就要做埋少少公司嘢先可以瞓呢 ~

XO 醬炒豚肉刀削麵 + 自家制麵包 ( 22-MAR-2022 )

( 22-MAR-2022  TUE )

尋晚熱醒咗   但最搞笑發夢係凍醒囉   不過當我凍醒嘅時候   我係有蓋被   我真係諗住自己無蓋被㗎 ~

今朝里奧大人出門口   我瞓多廿分鐘左右都起身 lu ~

9 點番到菇場   可以有半個鐘頭食早餐 ~

菇場一般忙   咁就好喇   因為我雙手有啲酸酸痺痺呀   哈哈哈哈 ~

Lunch Time 出去買螺絲粉同濕紙巾   之後買埋 Lunch 就番菇場喇 ~

我食艇仔粥同炸兩   8 卦話我食咁多   家姐又話做咗運動食多啲   佢哋不約而同咁講   即係我大食咗啦   哈哈   但諗諗下又係   我應該食白粥同炸兩   但我又好想食艇仔粥   所以先咁叫   下次都係食白粥算喇   哈哈 ~

唔係咁忙   又做下自己嘢   4 點半準時放工 ~

今晚去姑奶屋企拎嘢   傾咗一陣偈都要走人喇 ~

去埋街市買 6 支豆漿同牛肉豬肉等等   之後都即番屋企   呢兩日買親都係重嘢   勁攰 ~

番到屋企都即沖涼   無耐里奧大人都番到屋企了 ~

今晚 7 點半開餐   其實如果我無醃咗豚肉   肯定買外賣算數   哈哈 ~

是日晚餐 - XO 醬炒豚肉刀削麵 + 自家制麵包

XO 醬炒豚肉刀削麵 - 加埋豆乾同金菇一齊炒   口感比較豐富   其實想快啲清埋幾塊豆乾 ~

自家制麵包 - 好耐無食喇   今次仍然蒸熱   煙煙韌韌真係好鬼正   哈哈 ~

洗埋碗就抖下先跳舞   尋日我跳咗 2 次舞   唔知係咪 Over 咗   今日其實膝頭哥都痛呀   但唔想又停囉   所以今晚轉另一個導師嘅減肥舞   呢個跳 35 分鐘   但動作無咁大   不過爆汗仲勁    跳完坐定定   都仍然繼續爆汗   我要抖 15 分鐘先沖涼呀 ~

沖埋涼就即開機洗衫   之後睇下 Youtube ~

今晚差唔多 12 點先眼瞓   好在聽日 WFH 咋 ~

燒汁炒豆乾豚肉 + 雞翼泡菜拉麵 + 菜心苗 ( 21-MAR-2022 )

( 21-MAR-2022  MON )

里奧大人尋晚叫我今日瞓到自然醒   我話我今日 WFH 唔係放假喎   哈哈哈哈 ~

今朝 9 點幾都起身整早餐   不過里奧大人叫我自己食先   佢話想瞓多陣喎   咁之得我唔整腸仔同雞蛋啦   最慘係今朝拎蛋嘅時候   跌咗一隻落地下呀   都怪自己衰啦   應該刷牙洗臉   等自己精神啲先開始煮早餐嘛 ~

里奧大人 10 點半起身   又要再整早餐比佢   所以我基本上鍾意一齊食   如果早午晚三餐分開食   我即係要整 6 次   我肯定唔會   哈哈哈哈 ~

10 點幾溫總 Whatsapp 問我嘢   里奧大人以為我又要即番工   所以雖然我 WFH   但真係要成日昅住部手機㗎   始終真係可能隨時要番工嘛 ~

抖多陣就自己跳舞   爆汗真係勁爽呀   感覺食多啲嘢都唔驚   哈哈哈哈 ~

呢包陳皮炒米元氣茶係家姐比我   因為有圓肉   我覺得甜甜哋幾好味   

沖埋涼就休息   差唔多 2 點幾就要食午餐 lu ~

里奧大人話唔想全部係蟹柳   想要 2 粒黑椒牛丸   佢食湯麵真係要食兩樣餸   我就無餸都可以   以前會加雜豆   但依家少買雜豆   所以無得加   哈哈 ~

食完就休息   之後溫書 ~

6 點幾預備晚餐   所以今晚 7 點 15 分就可以開餐喇 ~

是日懶餐 - 燒汁炒豆乾豚肉 + 雞翼泡菜拉麵 + 菜心苗

燒汁炒豆乾豚肉 - 炒到唔知炒咩好   記得冰格有豆乾   咁即拎出嚟炒喇   好在燒汁煮咩都好味   唔係都幾頭痕   哈哈哈哈 ~

雞翼泡菜拉麵 - 尋晚我食剩 2 隻雞翼   今晚做餸都唔錯 ~

菜心苗 - 終於食哂   又要買第啲菜嚟食   依家瓜類仲係貴   明明買開 $12 變 $26   我想食都唔會買囉 ~

洗埋碗   抖到 8 點幾就開始跳舞 ~

沖埋涼就休息   今晚最遲 11 點幾要瞓㗎喇   因為聽日要番工呢 ~

燒汁焗雞翼 + 酸辣螺絲粉 + 菜心苗 ( 20-MAR-2022 )

( 20-MAR-2022  SUN )

今朝 8 點左右都醒咗   咁起身煮早餐喇   里奧大人食完都要即開工了 ~  

食完早餐就抖下   之後就網上崇拜 ~

2 點唔夠都要食午餐   因為里奧大人 2 點 15 分要開會 ~

我就睇 Youtube 同打機   依家多數睇收納嘅視頻   真係見到乾淨整齊就最開心㗎   哈哈 ~

里奧大人 7 點半先開完會呀   好在喺屋企開會咋 ~

今晚 8 點半先開餐   真係算夜了 ~

是日懶餐 - 燒汁焗雞翼 + 酸辣螺絲粉 + 菜心苗

燒汁焗雞翼 - 屋企儲備一定有雞翼   懶起上嚟就咁焗就可以   同埋雞翼點煮都好味   呢下先吸引   哈哈 ~ 

酸辣螺絲粉 - 里奧大人好鍾意食呀   不過我話米線要浸好耐   佢聽完之後話咁煩   下次唔好煮喇   我話唔緊要   浸軟之嘛   都唔係煩呢 ~

我哋唔食筍   所以唔會有陣臭味   哈哈

菜心苗 - 呢排食咗好多餐菜心苗   因為兩斤可以食幾餐   哈哈 ~

洗埋碗就抖下   今晚開始喺屋企跳減肥舞   本身諗住聽晚先開始㗎   但見家姐今日喺屋企做滑步機   我都要急急開始喇   哈哈哈哈 ~

跳 20 分鐘已經爆汗   真係勁爽呀   我徑步都無咁多汗呀 ~

抖下先沖涼   之後睇 Youtube   又睇到 11 點幾先瞓 ~

水餃雲吞拚韭菜餃 (外賣) ( 19-MAR-2022 )

( 19-MAR-2022  SAT )

感恩一覺瞓天光   所以 8 點半左右可以同里奧大人一齊食早餐喇 ~

里奧大人食完早餐都即刻番工   我就抖陣先做大清潔 ~

做做下收到阿爽 Whatsapp 叫我做快測   原來尋日同事中招   唔怪得聽同事把聲唔同咗啦   唉   佢尋日仲同我係咁傾偈添 ~

拿拿聲做完快測就繼續做家務   拖埋地就即沖涼喇 ~

難得有時間   即煲無花果雪梨乾羅漢果茶   搞掂哂又已經 11 點幾了 ~

睇 Youtube 又投票又打機   今日 2 點要食午餐喇   頭先體力勞動   所以好快餓 ~

又過期了   再睇清楚日子係 2 月 30 日   哈哈哈哈

3 點幾瞓咗陣   之後溫書同睇聖經 ~

差唔多 6 點就熨兩機衫   因為好想郁下   哈哈 ~

熨完就抖下啦   家姐打嚟比我   叫我今晚睇 8:30   我話有咩好戲睇 ?!   佢話 "猛鬼差館"   哈哈   今朝阿喂先叫我睇呢套片 ~

里奧大人番到屋企已經 9 點   所以要快快開餐了 ~

是日懶餐 - 水餃雲吞拚韭菜餃 (外賣) 

水餃雲吞拚韭菜餃 (外賣) - 用白蘿蔔做湯底   再加少少菜心苗   其實食白蘿蔔都幾飽肚   不過唔想又剩半個咁囉 ~

洗埋碗就即沖涼   之後坐定定睇 "猛鬼差館"   哈哈哈哈   依家最唔慣睇廣告   但都好嘅   廣告時間又可以投票 ~

終於睇哂成套戲   家姐話好搞笑   我覺得佢呢句先搞笑   哈哈哈哈   以前睇可能會驚   依家就當笑片睇咁囉 ~

睇多陣 Youtube   差唔多 12 點先瞓 ~

辣汁炒紅腸豚肉 + 菜心苗 ( 18-MAR-2022 )

( 18-MAR-2022  FRI )

呢排瞓得麻麻哋   有時熱醒有時凍醒   但唔想咁早開冷氣   始終有時開風扇都覺凍   咁即係唔係熱到要開冷氣咁囉 ~

今朝同里奧大人一齊食早餐   本身佢今日 WFH   但又有突發事要番公司處理   最搞笑尋晚整定 Lunch Box 等佢喺屋企食   點知依家唔食得 lu   佢好驚我唔開心   我話留番今晚食都無問題㗎喎 ~

菇場忙呀   咁就好喇 ~

Lunch Time 就咁買麵包   再行多陣就買魚片頭河粉番菇場食喇 ~

里奧大人同事煮咗蕃薯糖水   佢話同我煮嘅一樣   只見蕃薯不見糖水   哈哈

仍然忙呀忙   好在忙到 4 點左右就搞掂 ~

放工去街市買餸   番到屋企附近   里奧大人問我喺邊 ?!   話過嚟幫我拎嘢   咁實在太好喇   因為真係買咗好多嘢   我拎得比較辛苦 ~

其實本身唔駛咁重   但我話因為見到佢今日食蕃薯糖水   搞到我又想買蕃薯   佢話我痴痴哋   關佢咩事 ?!   哈哈哈哈 ~

沖埋涼抖陣就要預備晚餐   今晚 7 點鬆啲都可以開餐 ~

是日懶餐 - 辣汁炒紅腸豚肉 + 菜心苗

辣汁炒紅腸豚肉 - 我想清埋啲紅腸同年糕   所以加埋一齊炒   家姐話咁得意嘅   因為佢唔敢講咁奇怪   哈哈哈哈   之後再話係我自創菜式 ~

菜心苗 - 以前好唔鍾意食菜心苗   因為要拻啲芯   但其實菜心苗甜過菜心   又無菜渣   所以依家都好願意花時間拻芯   哈哈 ~

洗埋碗就開機洗衫   之後沖涼休息喇 ~

睇下 Youtube 又亡命投票   所以好攰   今晚仲要喺 11 點已經眼瞓   真在太好   因為好耐無試過 11 點瞓喇 ~