粟米燴魚塊 + 鮮果咕嚕肉 (外賣) ( 25-AUG-2023 )

咕嚕肉都唔係炸嘅   我本來係想食京都豬扒   不過無哂   但我仍然好想食酸酸咪咪嘢囉

( 25-AUG-2023  FRI )

尋晚 12 點半電話響   原來係里奧大人 Set 錯 Reminder   之後再瞓又熱醒咗   好在好快瞓得番咋 ~

不過里奧大人都話尋晚熱醒   我估係食咗炸雞熱氣呀 ~

早餐仍然食芝士甜餐包   仍然覺得好味道 ~

菇場唔忙   又做下自己嘢先 ~

BG 派 4 盒口罩   同事以為係口罩公司送   但其實係公司比錢買㗎   因為我哋無諗過咁靚呀   同埋無諗過依家仲派呀   感恩感恩   

Lunch Time 出去行陣   之後買牛雜河番菇場食   本來諗住食炒麵   但呢排 8 卦成日講牛雜   搞到我都好想食呀   哈哈 ~

唔忙就傾偈等放工   所以時間過得勁快 ~

放工即走   番到屋企諗住煮晚餐   點知棵福花有啲發霉   咁唔煮喇   反正我都攰 ~

買比家姐㗎   因為放喺紙袋焗住   怕有倒汗水   所以我再焗熱呢

咁我都即沖涼   里奧大人要 6 點半放工   所以叫佢買外賣番屋企食呢 ~

里奧大人食完就番公司做嘢   我就睇 Youtube 啦 ~

一路睇都唔知原來已經 10 點   係咁啱里奧大人番到屋企先望下個時間咋 ~

同佢傾下偈又已經 11 點   係時候瞓覺喇 ~

歡樂桶 + 肉醬意粉 + 香芒蜜桃批 (外賣) ( 24-AUG-2023 )

歡樂桶 (6件樂脆脆雞) & 肉醬意粉 2 份 & 中汽水 2 份 & 香芒蜜桃批 (2 個) (+$4) - 好感恩有限定優惠   所以 $115 就可以買到呢個套餐   平過平時好多呀

( 24-AUG-2023  THU )

感恩一覺瞓天光呀   如果日日係咁就好喇 ~

早餐食芝士甜餐包   依家試下韓國芝士   兩包折咗都只係接近 $40   比起 Kraft 同芝士樂真係平好多啦 ~

菇場唔忙   所以好靜   咁小雪同阿怪又鬧交   今次係阿怪問題啦   因為 System 嘅 Data Base 都未整好   佢就格硬入資料   點知所有 Number 都錯哂   依家要佢全部 Delete   佢條氣唔順   仲話入資料係阿輸叫佢咁做   之後小雪話佢點解有問題又唔出聲   自把自為   佢仲話翻小雪黐線   唔知係咩人   小雪話唔係個個都就妳㗎   我覺得真係鬧得好 ~

我真係每次見阿輸叫阿怪做嘢   佢都講一大輛嘢先做   做要係跟佢自己方法做   尋日就係咁   但阿輸話小 A 都做到喎   點解妳做唔到 ?!   之後佢直接搵虫傾   阿虫又問番輸點樣 ?!   輸又唔知阿怪同阿虫傾咗啲咩 ?!   佢正路係應該問小 A 點做   真係做唔到先搵虫嘛   所以係人都覺得佢麻鬼煩囉 ~

Lunch Time 出去一田買嘢   之後買魚片頭米就番菇場喇 ~

唉   應該又尿道炎   因為個人成日想去廁所   最終真係半個鐘頭一次   諗住睇屋企附近醫生   不過佢放假   所以睇番家庭醫生了 ~

唔忙就更加想快快放工   好想快啲睇完醫生番屋企呀 ~  

尋日家姐比咗條片我睇   係工人拍比佢睇   咁 Berry 瞓緊覺   工人拍佢   仲係咁話起身啦起身啦   之後仲話火燭要起身喇   呢句真係笑死   真係啋過妳呀   哈哈

放工即走   我同醫生講話尿道炎   佢問我經期幾時 ?!   我話死喇唔記得   佢話唔駛死   之後問我有無發燒 ?!   又拍我背脊   又問呢度嗰度有無痛 ?!   感恩樣樣都無痛呢 ~

買埋晚餐就番屋企   放低嘢就即沖涼同開機洗衫 ~

里奧大人今晚 7 點 15 分先放工呀   不過我都叫佢沖埋涼先食   都唔爭嗰 10 分鐘 ~

睇下電視同 Youtube   但個人沾寒沾凍咁   所以 10 點 10 分瞓覺喇 ~

春田冰室 @ 紅磡 ( 23-AUG-2023 )

台式肉燥煎雞扒飯 ($68) - 肉燥份量好多   但可惜超級鹹

馬拉盞通菜炒肉片配飯 ($78) - 味道都唔錯   可能我鍾意食馬拉盞醬汁   哈哈  

蒜蓉炒菜心 (+$38) - 啲菜好甜   難得難得 

瑞士雞翼 - 我無食呀   不過顏色唔夠吸引 

田園雜菜紅菜頭羅宋湯 - 雖然都好味道   但個湯係凍嘅

( 23-AUG-2023  WED )

感恩一覺瞓天光呀   好耐無試過喇 ~

早餐食糙米芝士包   之前唔見有㗎   仲以為唔出添   所以見到即買喇 ~

   

菇場唔忙   輕輕鬆鬆等放飯 ~

Lunch Time 出去一田買嘢   用埋信用卡餘額就取消佢   唔想有太多卡呀 ~

買完就去買燒賣炒麵   之後即番菇場   因為已經 12 點半   開始餓喇 ~

仍然唔忙   好在唔悶咋   唔係都幾慘   哈哈 ~

放工即走   搭 Lift 嗰陣   我隔離女人用手輕輕推開我前面個女仔   可能滴水啦   之後我前面個女仔講唔該哂   個女人話: 妳唔講廣東話   我仲以為妳係賓妹添   我聽到都呆咗   妳講呢兩句係有咩意思呢 ?!

今晚約咗水姑食飯   所以買埋麵包就去餐廳喇 ~

本身去金滿庭食片皮鴨   但得 3 個人就唔去啦 ~

食下傾下   差唔多 7 點 15 分就走喇 ~

里奧大人公司有 Urgent 嘢要搞   所以佢要即番公司   我就番屋企喇 ~

沖埋涼就抖下   等埋里奧大人番嚟就食蛋糕 ~

之前送盒朱古力百力滋比榴槤   佢又買番包零食比我

睇陣 Youtube   今晚 10 點半瞓覺   點知同里奧大人傾偈傾到 11 點 15 分先瞓 ~

友義氣。酸菜魚 @ 紅磡 ( 22-AUG-2023 )

麻辣烤魚 ($238) - 我唔記得係咩魚   但成條魚都好多肉呀   魚肉唔腥   我哋要小辣   但越食越辣   好在係香香辣辣咋   下次我一定會再食   因為我好鍾意食烤魚呢

要滾多 10 分鐘先可以食   一路滾住一路聞到陣香辣味   所以勁餓呀

魚嘅底部仲有雲耳同芽菜

都算厚肉

鮮果咕嚕肉 ($88) - 呢個絕對有驚喜   有一層好薄好薄嘅炸粉   一咬落好似有層卜卜脆喺面咁   我唔太識形容   真係要自己試下先知   哈哈   估唔到仲有新鮮菠蘿肉   我最鍾意呢  

( 22-AUG-2023  TUE )

今朝瞓到 6 點半起身去廁所   之後先醒起唔記得包好生日利是比里奧大人   不過唔想開櫃桶拎利是封   因為驚嘈醒里奧大人   好在後尾都瞓到 7 點 25 分先起身 ~

早餐食糙米芝士包   里奧大人仍然食花生醬肉醬牛油排包 ~

比里奧大人同家姐嘅利是   一定係用蠟筆小新   咁佢哋就知係我比㗎喇

家姐尋日以為我今日會請假   但我話無呀   無咩地方想去   咁里奧大人公司部門又無人   所以佢話要番工   咁無所謂喎   我又可以儲下假   呵呵 ~

菇場忙咗陣   之後又 Hea 過 ~

Lunch Time 出去又落雨   所以買完手打牛丸米都即番菇場 lu ~

12 點 57 分勁眼瞓   估唔到真係瞓得着   仲瞓到 1 點 05 分   我聽到有人刮我張枱   原來係阿花   佢話頭先西瓜行過   我話好日唔會咁瞓   點知比佢見到   但好在阿爽佢哋都未番到咋   唔係我就樣衰啦 ~

仍然唔忙   所以好想快啲放工 ~

今晚同里奧大人出去食飯慶祝佢生日   佢話我想食咩就去食喎   本來想同佢食印度菜   不過今日佢 3 點幾出去幫公司整嘢   咁唔想佢之後又周圍行去搵食店   所以我話食烤魚喇 ~

感恩訂位仲有 8 折添呀   我同里奧大人講話我比錢   但佢話佢比咗先   之後比番佢   不過我話唔好囉   因為佢實唔收   咁我唔想咁呢 ~

食到好飽   所以行多陣就番屋企   但諗緊用咩藉口話拎蛋糕好   但點知我突然間肚痛   要即刻番屋企 ~

好記得當時係 7 點 23 分   我即刻叫里奧大人拎部手機比我   因為我 Set 咗 7 點 25 分去拎蛋糕呀   如果手機響   里奧大人一定睇到   到時佢就知我去拎蛋糕 lu   變咗無哂驚喜呢 ~

我係咁叫佢沖涼    之後我話落去幫家姐買嘢先   但見佢食緊甜餅   勁驚佢唔沖涼住啦   之後我話我番到嚟想即刻沖涼   你記得快啲去沖涼喇下 ~

拿拿聲急步拎蛋糕   拎完先醒起無火機   又要去買   好在只係 $2   哈哈 ~

番到屋企聽到水聲   即係里奧大人仲沖緊涼   我即影相先 ~

影完之後   里奧大人啱啱沖完涼吹頭   咁我即刻拎住個生日蛋糕行入房   之後佢突然間停咗一停   勁驚佢發現   佢吹完頭出嚟   我好大聲唱 Happy Birthday   佢真係嚇一嚇咁呀   因為佢唔知我番咗嚟呀   哈哈 ~

鮮忌廉朱古力蛋糕 12cm

點咗蠟燭係開心好多嘅   哈哈

 我最鍾意係 Chocolate with Cereal   個朱古力牌都好食㗎   唔甜呢

里奧大人話個盒好實淨   講咗好多次   哈哈

佢話好驚喜呀   仲係咁問我幾時訂蛋糕 ?!   我話星期六訂㗎啦   因為之前想睇多幾間先   不過最後都係訂番 Chateraise   因為夠近   我又論盡   好怕 Fing 到個蛋糕變型呀   哈哈 ~

我沖埋涼先一齊食蛋糕   之後我講番買蛋糕嘅經過   里奧大人話用爐頭咪得囉   係喎   上次家姐都係咁    所以個人一急就諗唔到嘢 ~

食完就開機洗衫   睇多陣電視   今晚係 10 點半即瞓   係一合埋眼就會瞓着嗰隻 ~

韓國辣肉醬汁焗豬扒 + 節瓜粉絲 ( 21-AUG-2023 )

( 21-AUG-2023  MON )

今朝沖完涼   見里奧大人起身咁   以為佢去廁所啦   原來真係起身   所以陪我食早餐喇 ~

早餐食牛油排包   我自己就係搽花生醬   里奧大人就花生醬肉鬆   等佢唔駛咁悶   哈哈 ~

菇場忙咗陣   之後就休閒咁過 ~

買麵包再買雞翼酸辣米線   但食完之後勁眼瞓   咁我托住塊臉中眼瞓   但應該真係瞓着咗啦 ~

仍然唔忙   繼續 Skype ~

放工即走   番到屋企即預備晚餐 ~

好奇怪個爐頭咁熱   原來里奧大人無燜火呀   應該係佢唔小心將個制擰咗   擰到最細火   但我諗諗下係佢可能佢用最細火蒸嘢   所以心急拎嘢上嚟無熄火   但真係好危險啦   最怕有啲太細火係變咗無火又唔知   同埋好在無燒爆個玫瑰鍋 ~

我話真係好彩今晚煮飯   唔係大家一鑊熟 ~

是日晚餐 - 韓國辣肉醬汁焗豬扒 + 節瓜粉絲

韓國辣肉醬汁焗豬扒 - 今次醃得好入味   同埋我又鍾意食蒜頭   所以覺得好味道呀 ~

節瓜粉絲 - 將節瓜切條其實仲易入口   因為一粒粒就要用匙更嘛   一條條就可以用筷子夾   今次都係落蒜蓉豉油   就咁簡單調味已經好味道 ~

洗埋碗就沖涼   之後食生果 ~

同里奧大人一齊睇 "驅魔麵館 2"   可能期望大啦   但我哋覺得有啲悶 ~

今晚 10 點半都瞓覺   個生理鬧鐘真係好準   哈哈 ~ 

泡菜豚肉炒烏冬 + 小元貝節瓜湯 ( 20-AUG-2023 )

( 20-AUG-2023  SUN )

今朝要 6 點幾起身   因為要早啲食完嘢就即刻去里奧大人公司幫手喇 ~

真係忙到呢   行嚟行去行到成身汗呀 ~

有姊妹認錯我   佢問阿邊佢哋點樣 ?!   我笑住話妳認錯人呀   佢再問我係咪 xx ?!   我話唔係呀 ~

上次番自己教會   我同 Ivy 傾緊計   有個姊妹笑住埋嚟   再打咗我手臂一拳   我好愕然望住佢啦   因為我真係唔識佢   之後佢都好驚話認錯人   我笑住話我成日比人認錯   哈哈 ~

見到尋日認錯阿妹係我嘅姊姊   咁一齊傾偈啦   真係傾咗成 20 分鐘   好在趕得切崇拜呢 ~

崇拜完之後要幫手   差唔多 1 點幾就買午餐去里奧大人公司食喇 ~

里奧大人食完就開會   我就去買生果同涼粉   番到屋企沖個涼就即刻醃完肉   搞掂就熨 3 機衫   一做就做到 5 點呀   勁攰 ~

5 點幾開始預備晚餐   里奧大人差唔多 7 點先開完會   等佢沖埋涼就開餐 lu ~

今日又有零食同芒果布甸比我食   開心呢      

是日晚餐 - 泡菜豚肉炒烏冬 + 小元貝節瓜湯

泡菜豚肉炒烏冬 - 唔想煮飯   特登買 1 磅手打烏冬嚟炒呢 ~        

小元貝節瓜湯 - 好想快啲清哂啲小元貝   所以即刻滾湯   哈哈 ~ 

洗埋碗又再沖多次涼   休息一陣就食生果 ~

同里奧大人一齊睇 "思家大戰   佢睇完就做功課   我就睇 Youtube ~

今晚靈修咗 15 分鐘   又係 10 點半瞓覺 ~

焗煙鴨胸 + 麻醬拍青瓜 ( 19-AUG-2023 )

終於用到支鰹魚汁

尋晚食剩嘅韭菜蒸餃子   今晚加醋加辣加蔥同芫茜   勁重口味

( 19-AUG-2023  SAT )

今朝 7 點 08 分去廁所   又係好似尋日朝早咁   諗住懶床   但最後又瞓到 ~

臨醒前個夢又係見到里奧大人班同事呀   連續兩日都發夢見到佢哋   肯定好掛住佢哋啦   哈哈 ~

今日起碼 1 點半先食午餐   所以里奧大人去買早餐呢 ~

早餐食豬扒米線餐   里奧大人唔係咁鍾意食米粉   不過 8 卦又係唔鍾意食米粉   但女同事就多數食米粉㗎喎 ~

菇場 3D   做咩唔放我哋假呀   大家開心嘛   哈哈 ~

網吧繼續經營到 1 點   所以 12 點 58 分全人類一齊執好嘢等放工 ~

我同阿花一出門口見有 Lift 就行快啲啦   我哋見住阿怪入 Lift   但阿怪係咁大力按關 Lift 制呀   因為我喺條罅隻睇到佢係咁按呀   真係佢唔開門都無咁慶   離哂譜 ~

我買埋午餐就番屋企   之前買咗 $400 Cash Coupon 終於用哂   其實好在 8 卦幫手要 $100   咁我唔駛成日記住要食呢 ~

里奧大人食完就即刻做功課   我就要出去整嘢   番到屋企都 4 點幾 lu ~

沖埋涼就抖陣   今晚簡單煮   但都差唔多 7 點先可以食得 ~

是日晚餐 - 焗煙鴨胸 + 麻醬拍青瓜

焗煙鴨胸 - 唔知煮咩   又唔想食外賣   記得之前買咗件煙鴨胸   所以即刻焗熱喇   估唔到配蕎麥麵都唔錯   因為里奧大人好快咁食哂成碟蕎麥麵呢   比面比面 ~

麻醬拍青瓜 - 之前買嘅青瓜   又食埋去啦 ~

食完飯洗碗   里奧大人就要番公司整嘢 ~

里奧大人做咗一個鐘就番屋企   佢話頭先有人認錯阿妹係我   仲係咁同佢傾偈添   之後咁啱阿妹同時 Whatsapp 比我   話有人認錯佢係我呀   我話里奧大人同我講咗呀   話佢臨走都係咁話似得咁緊要嘅   其實佢哋係咪兩姊妹嚟㗎 ?!

阿妹話好多人話我哋似都算   但今次直頭認錯   仲要話係咪真係兩姊妹 ?!   咁我哋真係好似   哈哈 ~

里奧大人拎比我食   我都好耐無食花生糖喇   開心開心

里奧大人仍然做功課   我就睇陣 Youtube   今晚都係 10 點半瞓覺 ~