Food Court @ APM + 瑜珈 ( JUL-2008 )

尋晚同家姐 CC 一齊去工聯會中心上瑜珈堂   好開心呀   因為可以見到家姐 朋友   又有得玩   一舉兩得   不過有啲動作都好高難度   其中一個係坐低攬住右腳   然後伸高掂左邊耳仔   第一堂咋   點做呀   掂人哋嘅耳仔就得 ~

最慘係個環境好靜   我做唔到啲動作就忍唔住笑   唔出聲咁笑到好辛苦呢   同埋又聽到自己啲骨頭喺度 "烈烈勒勒" 聲咁   好肉酸呀 ~

做完瑜珈就同家姐去 APM   諗住去板長   點知好多人   所以唔等   但又唔知想食咩好   最後去咗 Food Court   估唔到都要等位   好在等咗一陣就有位   食越式雜錦湯檬 + 雜錦壽司   家姐太想食壽司   但呢盒壽司係前所未有咁難食囉   啲飯又涷又硬   家姐一路食一路好唔開心係度話啲壽司仲衰過百佳嗰啲呀   咁又係呀   好想好想食   點知咁難食又真係好唔開心嘅   食完就各自歸家喇 ~

一上車就有個 Voice Mail   原來里奧大人話佢依家放咗工等車   咁即係佢等緊架車就係我坐緊架車啦   所以我哋就係咁一齊坐車番屋企喇   真係好搞笑呢 ~

~~~

今朝好大鑊   因為屋企附近爆水管   所以短短一條馬路已經塞咗 20 分鐘   見啲水湧出嚟咁   真係好恐怖 ~

出到九龍已經 8 點 52 分   就係咁   我要急急腳去 KFC 食鬆餅 + 奶茶 ($11)   再急急腳行番公司   因為我想食勁多蜜糖嘅鬆餅呀 ~

晏晝里奧大人同同事食 Fairwell Lunch   所以我又去媽咪屋企食飯喇 ~

番到屋企好開心   因為朱朱撲我呀   同埋依家唔肯咁 "順灘" 比我抱好耐喇   係都要跳上媽咪張床呀   咁即係代表佢有番啲氣力喇   真要感謝神呀 ~

蒜泥手撕雞 + 菜心 + 跑步機 ( JUL-2008 )

呢排做咩呀   焗到呢   最慘係連坐巴士時都熱到飛起呀 ~

真係好唔想煮飯   因為實在太熱喇 ~

但為人妻子嘅   梗係唔想個丈夫日日食味精家嘛   所以我都會煮嘅 ~

去到街市   好想買通菜   但話食得多會腳抽筋   都係唔好買喇   所以改為買 1 斤菜心 ($8)   本來想買西瓜   但實在太重   所以要放棄 lu ~

番到屋企換衫去做機喇   太耐無做運動   做完覺得好舒服呢 ~

之後沖涼   成個人爽哂   勁正呀   不過拖完個地之後又成身熱哂呢 ~

里奧大人 8 點 半放工   番到屋企都要 9 點幾   所以有好多時間比我 Ready 晚餐 ~

是日懶餐 - 蒜泥手撕雞 + 菜心

蒜泥手撕雞 - 用雪藏雞肶   隔水蒸熟   放涼後手撕   但原來手撕好難整到一絲絲   唔知係咪雪藏雞關係呢    一心諗住用醬油膏唔駛左溝右溝調味料   點知支醬油膏過咗期   好激心呀    因為仲有大半支未用過嘛   星期日真係要的起心肝   Check 哂所以醬料嘅 Expiry Date   好過嘥哂啲嘢嘛   依家咩都貴   無以前買得咁豪㗎喇   依家去超市買個出前一丁要 $3.7   合味道要 $7.3 添呀   做咩貴咗咁多㗎 ~

菜心 - 唔甜嘅   唔通因為自己好想食粟米   所以覺得咩菜都唔好食呢 ~

尋晚一路食飯一路行雷閃電   好恐怖呀   希望落場雨之後無咁焗啦 ~

"家好月圓" 終於做喇   可能係第一集關係   所以覺得無咁好睇 ~

再睇埋 "向世界出發"   我見到老虎仔   我都腳震震咁呀   太大隻喇    N 年前同里奧大人去泰國   本來已排隊同老虎仔影相   但後尾我都唔敢呀   好怕佢咬我呢 ~

~~~~

今朝天氣一樣又焗又熱   由落車行到公司附近   已經用咗一張紙巾抹汗喇   熱到吖 ~

早餐食蘑菇腸片蛋治烘底 + 奶茶 ($15)   真係想飲涷嘢   但朝早飲涷嘢對身體唔好呢 ~

番到菇場又係好忙呀   應該旺季開始來臨了 ~

晏晝同里奧大人去茶餐廳食盅頭飯 + 點心   人太多喇   所以好似無冷氣咁   真係食得好辛苦   食完仲要行番公司   真係成身汗呢 ~

鹵水雞翼 + 粟米湯 + 皮蛋酸薑 ( JUL-2008 )

尋日晏晝去水姑屋企   去到將軍澳   天氣突然驟變   好大風同好多沙   要合埋對眼行呀   好恐怖呀   因為出門口時好好天家嘛 ~

上到水姑屋企   里奧大人就傾請工人比奶奶嘅事   而我就玩貓貓   唔知係咪因為係波斯貓關係   所以啲毛好滑   抱住佢真係好似抱住個毛公仔咁㗎   好可愛呢 ~

之後就同里奧大人去美心食 Tea   份量超細啊   所以要叫 3 個 Tea Set ~

食食下居然見到里奧大人舊公司同事 "濛芝芝"   最邪係朝早提過佢嘛 ~

食完就同里奧大人搭車番屋企喇   因為我好想好想好想煮飯呢 ~

是日懶餐 - 鹵水雞翼 + 粟米湯 + 皮蛋酸薑

鹵水雞翼 - 用樽裝鹵水汁整   燜咗半個鐘   不過覺得無咩味同埋唔夠色咁   真係要整多幾次先得呢 

粟米湯 - 無買菜嘛   所以就要飲粟米湯喇   本來加罐頭蘑菇   但一開見到有啲黑色一點點咁   嚇到即刻掉咗   下年 2 月先係 Expiry Date   點解會咁㗎 ~

皮蛋酸薑 - 覺得一樣餸好似好孤寒咁   所以求其加多碟小食比自己 ~

食完就洗碗同沖涼   之後一路食薯片一路睇獎門人   但啲組合就唔好笑囉 ~

之後再做 Mask   睇一陣報紙   10 點半就瞓覺 lu ~

~~~~

今朝食芝蛋治烘底 + 奶茶 ($15)   太耐無食   好似麻麻哋好食咁嘅 ~

番到菇場忙呀   所以要做哂嘢先 MSN ~

晏晝同里奧大人食水餃河 + 韭菜餃麵   我碗水餃河得 3 隻水餃咋   而里奧大人嘅韭菜餃就有 5 隻   梗係啦   成隻都係得韭菜   好似食齋素餃咁呀 ~

依家成日同里奧大人一齊食晏   雖然搽咗防曬   但我朝早又曬   晏晝又曬   真係好驚有雀斑同埋會曬黑啲皮膚呀   妳知啦 一白遮三醜嘛 ~

上海菜飯 + Blog 友 (噹媽) 再聚 + 跑步機 ( JUL-2008 )

晏晝同里奧大人出尖沙咀食米線   其實真係好驚熱   但又好想食米線   所以唔理咁多   照食可也   同里奧大人事先聲明   千其唔好食得咁大動作   要慢慢食   唔係食到身水身汗唔關我事呀 ~

我 Order 出事喇   要多酸多芽菜多蔥   點知酸到唔想食   仲要係啲酸菜多到成個碗底都係   即係變相配料仲多過米線   我覺得全程食咗幾啖米線咁咋 ~

食完要行一大條路去清真寺出面   因為約咗 Blog 友噹媽   一齊行去麻布茶房飲嘢 ~

好在去到唔駛等位   一埋位就傾   傾咗陣先叫嘢飲呢   女人真係好多嘢講呀 ~

噹媽第一時間又係比手信我   多謝哂呀   去旅行都記得我   我真係好感動呢 ~

係咪我個樣天生為食呢   Blog 友 冰顛菇 同 老卡菇  又係請日要比嘢我食   其實我唔係咁為食㗎咋 ~

里奧大人要探奶奶   所以坐到 4 點幾就走 lu   而我同噹媽當然會繼續傾啦   難得出嚟喎   雖然係第二次見面   但就覺得好老朋友咁   咩都傾   唔需要避忌任何嘢   好舒服呢 ~

我哋傾到 5 點幾再行一陣 City'super 就搭地鐵走 lu   因為賢妻噹媽要番屋企煮飯比少爺食啊   少爺好有福呀 ~

之後我就探奶奶   順便陪里奧大人嘛   諗諗下   其實我都幾好喎 ~

探完奶奶就同埋 2 姑奶 + 佢老公一齊落佐敦食上海飯   我就覺得啲嘢食唔掂   但里奧大人同佢哋話都 OK 喎 ~

番到屋企成 11 點   即刻沖涼瞓覺呀 ~

~~~~

今朝無番教會呀   所以同里奧大人去大家樂食早餐~

食完番屋企抖陣就一齊去做機 lu ~

住家飯 @ 媽咪屋企 ( JUL-2008 )

尋晚超開心啦   因為番媽咪屋企食飯呀 ~

放工就去 Italian Tomato 買咗 3 件 Cake   Chocolate Mousse Cake + Mango Strawberry Quarter + Strawberry Cheese Tart  ($79) 之後就番媽咪屋企 lu ~

去到第一時間攬住朱朱啦   其實攬親朱朱都好心痛   因為佢瘦咗好多呀   得 2 Kgs 咋   皮包骨咁   行路都無力咁呀   真係心痛到爆   希望佢食嘢之後肥番啲啦   咁我就開心喇 ~

是日晚餐係 薑蔥炒蜆 + 煎釀三寶 + 合掌瓜紅蘿蔔粟米豬骨湯

食完再食生果同 Cake   一齊食嘢真係好開心呢 ~

9 點走喇   之後就去麥記等里奧大人   因為佢仲未放工呀   所以順便陪佢食埋先番屋企囉   差唔多 11 點先番到屋企   好攰呢 ~

~~~~

今朝 6 點 45 分起身喇   因為我想同媽咪同朱朱一齊食早餐   最開心係家姐唔駛番工都晨咁早起身過嚟陪我哋食早餐呀   之後上媽咪屋企坐到 9 點幾就打的番工 lu ~

番到菇場好忙呀   但內心有強勁嘅 Holiday Mood   邊有 Mood 做嘢喎 ~

晏晝同里奧大人出尖沙咀   之後再 Join 埋噹媽吹水呀 ~

被老點 ( JUL-2008 )

我好慶幸俾老友小公主 老點我回答以下問題 :

規則如下

被點到名字的要把所有的問題像我一樣回答出來發一篇日志在自己的頁面上。所有的問題都要答喔．寫一篇我這樣的日誌。最後刪除一條你不喜歡的問題, 再提一個自己問的問題。再點出另外10個人繼續回答～～～到這10個人的blog留言通知對方——你被點名 被點名者不得拒絕回答問題，然後再點大約10人繼續遊戲, 不完成游戲的人會是一個無義氣的人...

1) 現在最討厭是什麼?

無得 MSN 同無得睇 Blog 

2) 你鍾意狗仔嗎?

鍾意   但就好驚大狗囉   

3) 如果有美好的東西, 你首先想留給誰呢?

里奧大人

4) 到目前為止, 有乜令你最難忘?

朱朱心臟病發入院   

5) 如果能回到過去, 你會選擇那個階段? (如有原因)
小朋友時代   因為到我依家想起都覺得童年好開心呢

6) 喜歡一個人你會主動追求嗎?

可能

7) 結婚後想生幾多個細路?

兩個

8) 你認為男女朋友分手後還可以真心做朋友嗎?

絕對無可能

9) 一生最愛係邊個 ?

媽咪 家姐 里奧大人 朱朱

10) 畢生志願係咩野?

唔駛做   而生活過得充實同有意義呀

下面呢 10 位老友我老點左喇  

卡姑 / 冰姑 / 通少 / Shell / BigDragon / B仔 / 鬼妹 / See's Kitchen / 晴天娃娃 / 噹媽

車仔麵 ( JUL-2008 )

尋晚同里奧大人探完奶奶就同兒生女一齊番屋企附近食嘢   番到去都 9 點幾   所以食車仔麵 就算喇   唔可以令自己太飽嘛 ~

今餐係兒生女請呀   因為佢做緊暑期工   啱啱出咗糧呢   啲感覺好得意   但同時覺得自己老餅咗好多囉 ~

呢排頻頻樸樸   搞到周身骨痛   最慘係個背脊痛   好似比火燒咁   勁辛苦啊   但我又唔可以去 "練" 骨   因為我會好想嘔的   唔知點解 ~

~~~~

今朝係 Happy Friday   所以我要食得豐富啲   食五香肉丁蛋麵 + 咖啡 ($19) ~

番到菇場   幾個同事都咳   好驚呀   因為我喉嚨都唔係咁舒服   唔好假期先嚟病喎   我極度需要喺假期時食零食 Relax 喎 ~

晏晝里奧大人約咗同事飲茶   所以我買車仔麵算喇   清清哋食豬紅 (補血) + 豬皮 (有膠質) + 蘿蔔 (清涼) + 辣魚蛋 (增強食慾) + 米線   都係 $17 咋   真係好抵   不過唔係咁飽囉 ~

八爪魚卷 + 腸仔 + 薑蔥蓉 + 節瓜魚湯 + 跑步機 ( JUL-2008 )

呢排唔掂   發覺自己真係肥咗好多咁   無無聊聊   摸下個肚嚟行   啲腩肉係可以左搖右擺咁㗎   唔知係咪食得太多 KFC 嘢   啲肉走哂出嚟咁呢   好可怕呀 ~

不過又無動力去減肥喎   咁點算好呢 ~

廢話講完   尋日雖然心口痛   但覺得里奧大人好耐無湯水咁   所以點都要煮   最多煮易啲囉   所以去街市買條大眼雞魚 ($21) + 3 條細節瓜 ($10) 就番屋企喇   估唔到滾餐湯都要 30 蚊   我覺得好貴呀 ~

是日懶餐 - 八爪魚卷 + 腸仔 + 薑蔥蓉 + 節瓜魚湯

八爪魚卷 + 腸仔 - 煎到香一香   再喺碟底搽滿蜜糖   好好味呢   食落好有 BBQ Feel 呀 ~

薑蔥蓉 - 硬係覺得得一碟餸好似好少咁   所以用佢嚟扮前菜   好睇啲嘛 ~

節瓜魚湯 - 有瓜有魚一煲過   唔駛再買菜超方便   不過見到成條魚湧上嚟咁   有啲透不過氣呀 ~

食完抖陣就同里奧大人去做機   不過佢話對腳好攰喎   所以做咗 15 分鐘就番屋企 lu   其實佢個心都唔係做機嘅   因為佢拎咗文件番屋企做   梗係想快啲番屋企做嘢啦 ~

~~~~

今朝唔食 KFC 包喇   太多肉唔掂囉   所以食奶油多 + 奶茶 ($13)   夠齋喇化 ~

番到菇場即刻好眼瞓   呆下呆下咁   但又要做嘢喎   最慘係個心成日只掛住同 卡顛菇 同  冰顛菇 MSN   同佢哋 MSN 簡直係我生活最重要嘅部份呀   唔見佢哋真係會心掛掛   每日都會傾一大餐   真係好開心呢   唔好睇佢哋顛顛得得   佢哋都會同我分析問題㗎   我覺得好得意   由一個唔識嘅人   變咗為一個咩都傾嘅老友   Yahoo Blog 真係掂呀 ~

星期一我阿 Head 喺美國渡假完番工   送咗個 Be Happy 鎖匙扣比我呀   我覺得好窩心呢   可能係我 Email 通知佢   我話家有急事   因奶奶入院要請假 Stand by   所以送呢個鎖匙扣比我   等我 Be Happy 啦 ~

晏晝同媽咪去美心皇宮飲茶   食乳豬切雞飯 + 牛雜蘿蔔豬皮 + 煎堆 + 鳳爪 + 紫米露   埋單 $160   媽咪係都要請   我有呢個媽咪真係好幸福呀   值得感恩 ~

朱朱覆診 + 一品香上海菜 @ 佐敦 ( JUL-2008 )

尋晚放工即去媽咪屋企帶朱朱覆診   時間尚早   可以同埋媽咪同朱朱坐公園吹吹風   見到媽咪隔離有杯水   仲以為媽咪咁滋陰   帶埋杯水嚟慢慢飲   原來媽咪係帶比朱朱㗎   因為 5 點鐘已經出咗門口   驚朱朱口渴喎   估唔到媽咪咁細心呢 ~

其實朱朱有病以嚟   媽咪真係好照顧朱朱   瞓又望   醒又望   食食下飯又望   總之無時無刻都 Check 住 ~

仲有係朱朱有時唔肯食嘢   要用針筒慢慢必啲狗糧落朱朱個口度   好花時間呢   要成一個鐘頭㗎   所以媽咪話電視劇都睇少咗呀   但無辦法啦   心肝寶貝要緊嘛   而最感恩係媽咪終於為朱朱同奶奶而學會祈禱 ~

講番朱朱   尋晚同佢去覆診   雖然 Book 咗   但都要等呀   不過咁都好   因為可以等到家姐一齊聽嘛 ~

醫生話朱朱精神過之前   最緊要係肯食嘢   但朱朱比媽咪寵壞   一日唔食自己嘢之後   媽咪就會比人嘢佢食   次次都係咁   但依家當然唔會啦   因為對肝唔好嘛   醫生聽完都笑   話朱朱真係揀飲擇食 ~

依家媽咪就就比新鮮魚 雞肉 蛋之類嘅嘢   再強迫性食健康狗糧   飲葡萄糖水食雲芝   醫生話可以比寵物糊仔粉同 Baby Food 朱朱食   總之當 BB 咁湊就得㗎喇 ~

家姐話想同朱朱抽血   但醫生話唔駛   因為結果都係一樣   唔好浪費金錢喎   聽完點會唔喊吖 ~

神呀   求你繼續保守朱朱身體   讓朱朱每日都有強健嘅身體過每一日   讓朱朱可以繼續陪伴我咃

  求神你真係保守帶領朱朱 ~

之後我同家姐就一齊搭的士   我就喺 QE 落車先   因為要探奶奶呀 ~

同里奧大人去佐敦嘅一品香上海菜    食咗小籠包 + 鍋貼 + 回鍋肉客飯 + 酒釀丸子  + 1 罐涼茶 ($99)   呢間食店無咩人   其一位置唔好   其二啲嘢食唔掂   無翻單呢   食完就番屋企 lu ~

~~~~

今朝仲係好想食 KFC   所以又食番雞扒芝士包 + 咖啡 ($15)   今次件雞好厚   太多肉喇   所以有啲驚 ~

晏晝里奧大人要去銀行拎 Card   所以唔可以行得遠   所以又係去咗食 KFC 喇   我食雞翼餐   里奧大人食辣雞包餐   我個餐明明 Show 有薯格   但都無嘅   不過今次就無所謂   因為我覺得連續食兩餐 KFC 好熱氣呢   哈哈 ~

水餃米 + 水餃福麵 + 炒粟米 + 跑步機 ( JUL-2008 )

尋日熱辣辣  食完 Lunch 番工都幾辛苦   加上唔夠瞓   所以超眼瞓呀 ~

好在里奧大人話夜晚想食麵   我就咁去街市買 2 條粟米 ($7) 同富士蘋果 ($12) 就搞掂    呢排發覺自己好似無咩食生果   再唔食就唔掂㗎喇 ~

難得唔駛探奶奶   番到屋企又再洗衫 lu   因為成日一唔喺屋企就會積埋積埋幾堆衫   之前已經拎咗兩袋衫去洗㗎喇   都唔明點解會咁多衫   熨衫熨到人都顛呀 ~

是日懶餐 - 水餃米 + 水餃福麵 + 炒粟米

水餃米 + 水餃福麵 - 超易   唔駛講啦 ~

炒粟米 - 無難度   又唔駛講啦   不過我發覺唔用牛油炒啲粟米係好易燶   同埋無咁甜   可惜可惜 ~

9 點幾同里奧大人去做機   太耐無做   所以做 20 分鐘就算 lu ~

沖完涼見到幾堆衫真係好恐怖   所以走去熨衫   熨完即刻放入衣櫃   唔駛咁阻掟呀 ~

~~~~

今朝無啦啦想食 KFC 嘅 雞扒芝士包 + 奶茶 ($15)   好正呀   但就比較油啲囉 ~

番到菇場都有少少嘢做   不過就唔係 Urgent 嘅   可以慢慢做 ~

里奧大人上咗大陸   所以晏晝買咗雙餸飯 (茄子魚柳拚薯仔雞翼) 去媽咪屋企食   超難食呀   不過可以陪媽咪   又可以睇朱朱就無所謂啦 ~

朱朱心太野   又係唔願瞓   瞓喺我對腳度陪我食飯   真係開心到爆呀 ~

但其實佢係呢個時候係瞓緊覺㗎   但我一嚟咗就即刻唔瞓   中下中下咁   搞到我阻住個老人家休息添 ~

food court @ 紅磡都會 ( JUL-2008 )

尋日里奧大人先行去探奶奶   我就同家姐喺媽咪屋企休息   呢排實在太攰喇 ~

朱朱好嗲喎   我抱咗佢 3 個鐘都唔走   仲喺我身上作瞓覺添呀   不過就瞓得唔林   一抱番上媽咪床就已經想瞓喇   不過就心野唔瞓住   因為咁多人喺屋企嘛 ~

坐到 6 點半就去探奶奶 lu   今次又精神咗   感謝神 ~

之後同姑奶佢哋坐的士去紅磡火車站   再行去都會 Food Court 食晚飯   我同里奧大人喺度苦笑    因為幾年前食過一次唔好食   但今次佢哋再提議去 Food Court 食  咁無計啦   跟大隊嘛   今次食泰式炒金邊粉 + 炒什菜   難食到爆   又油又無味嘅 ~

~~~~

今朝瞓到 11 點   所以無番祟拜   梳洗完同里奧大人去食早餐   食燒賣  + 腸粉 + 餈飯 + 豆漿 ~

食完再去 Jusco 買嘢   因為有 95 折呀   之後再去街市買餸   買 2 個蕃茄 + 1 個薯仔 ($9) + 1 條大眼雞 ($21) + 5 塊肥牛 ($12) 就番屋企 lu ~

沙茶金菇肥牛 + 蕃茄薯仔魚湯 ( JUL-2008 )

尋日 2 點幾同里奧大人食 Tea   食墨丸魚皮餃金邊粉 + 干炒牛河 + 油醬多   其實仲未係肚餓   但里奧大人趕住探奶奶就無辦法啦 ~

之後里奧大人自己去探奶奶   而我就留喺屋企執屋 + 吸塵 + 拖地 + 洗衫 + 熨衫   再煲菊花茶    雖然好攰   但屋企乾淨哂   人都舒服啲呀 ~

是日晚餐 - 沙茶金菇肥牛 + 蕃茄薯仔魚湯

沙茶金菇肥牛 - 本來想用沙爹汁整嘅   但原來屋企無喎   所有改用沙茶醬   費事特登落街買呀   今次仲衰   啲牛肉唔記得用白鑊迫油   落咗油去炒   所以成個餸就油到爆 ~

蕃茄薯仔魚湯 - 用大眼雞魚滾嘅   因為無咁多骨   可以食埋唔浪費嘛 ~

太耐無煮飯   煮完隻右手有啲痛呀 ~

~~~~

今朝無啦啦好好好肚餓   所以食五香肉丁雪菜肉絲公仔麵 + 咖啡 ($19)   食完都唔覺飽呀 ~

番到菇場忙咗陣就等食 Lunch 喇   同里奧大人去茶餐廳食中式牛柳飯餐 + 炒麵 + 煎堆  ($51.5)   出面熱到爆炸   又食得飽   所以好想瞓呀 ~

太耐無一次過寫幾篇網誌   真係有啲吃力呀 ~

南記粉麵 @ 銅鑼灣 ( JUL-2008 )

尋晚同里奧大人探完奶奶   之後去銅鑼灣南記食米線   再去 Sogo 攞西褲   諗住行 Supermarket   但見里奧大人咁攰   咁唯有忍痛離開銅鑼灣啦 ~

感謝神   好在有小巴   所以好快番到屋企休息 ~

~~~~

今朝同里奧大人一齊出門口   因為約咗媽咪同朱朱食早餐 ~

諗住番到公司他他條條寫 Blog   點知勁多嘢做   做到 12 點 45 分先可以抖下   好在 1 點放工咋 ~

晏晝同里奧大人 家姐去媽咪屋企樓下飲茶   之後就去探朱朱喇   里奧大人瞓到 4 點就探奶奶   而我就晏啲先去 ~

翠華 @ 佐敦 ( JUL-2008 )

Hi 各位親愛嘅 Blog 友好嘛   今日心情好好多喇 ~

其一朱朱出咗院   又肯食又肯瞓   仲喺媽咪張床瞓   瞓到流口水添呀 ~

其二醫生話奶奶情況穩定   出院要住療養院一星期左右   因為要做物理治療呀 ~

尋晚同埋媽咪 里奧大人打的去醫院探奶奶   感謝神   奶奶都精神   可以講到嘢   但始終年紀大   有好多少問題   所以都仲係有啲擔心呢 ~

經過今次嘅經歷   我會對奶奶更好   因為我覺得以前對奶奶唔好   我成日覺得係同佢無緣   佢有咩病痛我唔會話好掛心   我仍覺得佢有咩事我都唔會喊   但原來唔係   當見到佢咁辛苦時   我個心都好痛   我會喊   我會掹自己點解唔對奶奶好   點解有事先嚟後悔   所以我向神嘅承諾   奶奶係我半個阿媽   我會好錫佢   我要佢出院日日打電話比我   佢鍾意食咩我會帶佢去   唔駛驚自己行唔行到   我會用強勁嘅臂彎比佢扶實   洗錢係我強項   我覺得最緊要佢開心   最多叫里奧大人慳自己囉 ~

仲有就係多啲時間睇朱朱   因為朱朱係我個超級寶貝   我唔會再計較自己夠唔夠時間休息   只要比我見到朱朱就得㗎喇   我決定每逢番工嘅星期六就會同朱朱食早餐   橫掂番半日   下晏可以番屋企休息嘛  ~

尋晚同埋媽咪   里奧大人打的探奶奶   奶奶都精神   感謝神 ~

探到 8 點就要走喇   之後同媽咪 里奧大人 姑奶一齊去佐敦翠華食晚飯   食鮮茄豬扒飯 + 文昌雞飯 + 韮菜花 ($110)   我覺得最好食係啲紅辣椒汁   酸酸哋咁   好開胃呀 ~

食完媽咪同姑奶就打的番屋企   我同里奧大人就坐地鐵再轉巴士番屋企   真係好攰 ~

~~~~

今朝瞓到唔願起身   瞓多 3 分鐘就要面對現實   刷牙沖涼番工 ~

早餐食炸菜肉絲米 + 腸仔蛋 + 多士 + 奶茶 ($18)   好似好多嘢咁   但其實碗米粉係好少   10 啖食完   所以唔係好飽咁 ~

晏晝同里奧大人食粉啦   雖然好熱   但濕濕哋易入口嘛   食蝴蝶腩米線 + 水餃米線 + 腐乳通菜 + 涷奶茶 ($48)   太熱喇   食完真係要慢慢行番公司呀 ~

感謝神 朱朱出院了 ( JUL-2008 )

感謝神恩典   感謝神嘅保守帶領   讓朱朱可以精神出院   今日講番朱朱今個星期情況先 ~

( 13-JUL-2008  SUN )

同家姐一齊探朱朱   姑娘話朱朱終於肯食少少有啲香味嘅狗糧   雖然係油啲   但好過唔食喎    咁我同家姐就抱朱朱出去吸吸新鮮空氣   我哋坐咗兩個幾鐘先走   因為朱朱要吊鹽水   所以都唔好出嚟咁耐喎 ~

( 14-JUL-2008  MON )

胰臟驗血報告唔好   所以要留院再觀察   家姐由 7 點幾探到 9 點幾就走   感謝神   診所無人   姑娘可以比家姐探耐啲 ~

( 15-JUL-2008  TUE )

請咗半日假探朱朱   如果唔係就會無時間探奶奶   我 3 點 10 分去到   3 點 40 分就比我入去探朱朱   佢轉咗獨立房   所以可以坐耐啲   之後問醫生朱朱情況   醫生話啲藥好似無咩效   但最緊要精神同肯食嘢   醫生話朱朱都可以食雲芝   但就唔知有無功效喎 ~

之後朱朱肯飲大量水   仲屙一大篤尿   夜啲家姐就買咗個腸仔包   一聞到就搶住嚟食   但就走腸    醫生同姑娘都話好呀   佢肯食嘢就得㗎喇   食多啲啦   如果肯食嘢第日可以出院㗎喇   食完仲屙臭臭添   真係好臭嗰隻喎   因為焗住喺間房到揮之不去呀   家姐陪到朱朱 7 點 40 分就比姑娘趕呀   話我哋陪咗好耐喇   妳哋已經破哂探病嘅記錄喇   搞笑 ~

其實啲姑娘真係好好好好人   因為探病時間係 12:30 - 13:30 / 16:00 - 17:00  / 19:00 - 20:00   我哋次都探兩個幾鐘都無比人趕真係好好㗎喇   但我覺得係因為我同家姐次次都攬住朱朱喊到豬頭囉   所以醫生姑娘都怕咗我哋呀   哈哈 ~

( 16-JUL-2008  WED )

朱朱開始食雲芝丸   感謝神   家姐夜晚可以接朱朱出院   番到屋企肯食嘢肯飲水   最重要係肯彩媽咪   哈哈 ~

( 17-JUL-2008  THU )

晏晝番屋企睇朱朱   媽咪話朱朱食咗一大嚿蒸魚腩   肯飲水肯食嘢   瞓到覺   真的感謝神 ~

再次感謝神對朱朱嘅保守同醫治 !!
仍再次衷心感謝各 Blog 友對朱朱嘅祝福及支持 !! 
各位 Blog 友   唔好意思呀   無回應妳哋   因為我之前真係無心情呀   請大家見諒 !!

在人這是不能的   在神凡事都能 (太 19 : 36)

With men this is impossible; but with God all things are possible. (Matthew 19 : 36)

多謝各 Blog 友對朱朱嘅關心 ( JUL-2008 )

多謝各位 Blog 友對朱朱嘅關心 ~

朱朱依家仲未出院   因為驗血嘅報告差咗少少   所以醫生想話好啲先出院 ~

尋日奶奶因心臟衰竭入 ICU   真係好擔心   依家真係心力交瘁呀 ~

應當一無掛慮   只要凡事藉着禱告   祈求和感謝你們所要的告訴神
神所賜出人意外的平安   必在基督耶穌裡   保守你們的心懷意念

(腓 4 :7)

御家 @ 旺角 + 探朱朱 + 沉重打擊 ( JUL-2008 )

尋晚同埋媽咪同家姐探朱朱   順便睇朱朱嘅肝臟報告 ~

結果係肝硬化   肝臟同埋腎同肝中間有個瘤   不過無生命危險   但要有心理準備   可能只有幾個月生命 ~

其實我都預感朱朱身體係有嘢   無可能唔食嘢唔飲水   所以我聽醫生講報告嘅時候   都比較平靜   但其實好想大喊但唔可以   因為媽咪同家姐已經啜泣   如果我再係咁   會唔知道醫生講咩   好在朱朱都精神   肯食少少嘢   但都係繼續要留院觀察同吊鹽水   好啲就會比佢出院   咁媽咪可以餵食嘢同行街吸新鮮空氣嘛 ~

媽咪話買靈芝粉比朱朱   因為佢啲貓友話食咗好好喎   醫生又話 OK   所以會買寵物靈芝粉比朱朱食喇 ~

探完朱朱就一齊去食 "御家" 食壽司   可能心情唔好啦   我哋覺得唔係咁好食   之後就各自回家喇 ~

~~~~

今日 Off   所以同里奧大人去大快活食早餐   再去銀行取消保險箱   之後再去大昌同百佳買嘢就番屋企喇 ~

好在今日我 Off   因為喊到眼腫腫 ~

我其實好驚自已甲狀腺又翻發呀   因為我情緒一唔好    呢個病就好鍾意搵我㗎喇 ~

神呀   求神繼續保守朱朱有強健嘅身體   有精神力氣   健健康康過每一日   阿門    

韭菜豬肉水餃福字麵 + 台灣 A 菜 + 紅棗黑木耳 + 跑步機 ( JUL-2008 )

尋晚自己安排得啲時間都幾好   可以去買米通同豬肉乾之後   再去街市買油墨菜 ($9) + 梨 ($12) ~

番到屋企我就換衫去做機先喇   因為里奧大人要晏啲番   可能無時間做呀   之後仲可以洗衫同睇電視   等里奧大人一打電話嚟就 Ready 晚餐喇 ~

是日懶餐 - 韭菜豬肉水餃福字麵 + 台灣 A 菜

韭菜豬肉水餃福字麵 - 今次水餃牌子係 T & T   我朋友話呢隻牌字無味精喎   同埋標榜不含防腐劑   所以買黎試試   價錢好似平灣仔碼頭水餃少少   但就大隻過灣仔碼頭好多囉   不過食完真係覺得無咁口渴喎 ~

台灣 A 菜 - 其實係油墨菜 + 隔夜肉燥   無咩好講 ~

我最鍾意淥麵同淥菜   因為唔駛咁油   洗碗舒服啲 ~

實在太飽喇   沖涼之後就熨衫當做運動喇 ~

~~~~

今朝天黑黑   但好在無雨啫   如果唔係 Happy Friday 都唔係咁 Happy 呀 ~

早朝食奶油多 + 咖啡 ($13)   今朝無咩胃口   所以份量啱啱好 ~

番到菇場忙到震   但唔做唔得   因為我聽日 Off 嘛 ~

晏晝同里奧大人去食墨丸麵 + 墨丸牛腩麵 + 腐乳通菜 ($43)   食完再飲杯楊桃雪梨汁 ($10)  超清潤呀 ~

尋晚家姐探朱朱都精神   姑娘仲話朱朱咬佢   點解病都會咁好火喎   搞笑呀   今日朱朱要照超聲波   Check 下個肝有無事   求神保守朱朱身體一切正常呀 ~

掃街 + 探朱朱 + 跑步機 ( JUL-2008 )

尋晚放工約埋家姐去探朱朱   但探病時間改咗   所以見咗醫生先再探   醫生話朱朱仲未肯食嘢   同埋肝唔係咁好   如果再唔食嘢就會係星期五照超聲波   Check 下個肝有無事喎   醫生仲好風趣話   唔知點解朱朱一番屋企就有事 ?!   又話朱朱喺度瞓得好林好精神   唔願走喎   我真係 Choi Choi Choi 呀 ~

見到朱朱精神好   我都放下心頭大石   但都係擔心佢仲未肯食嘢囉 ~

第一日朱朱見到我係無咩反應   應該係嬲啦   到尋晚呢   又唔同哂喎   要我抱   仲興奮到個心口仔卜卜跳   所以我就抱咗佢半個鐘頭喇   但因為探病時間係 15 分鐘   所以護士話佢哋要做嘢喇   探多一陣要走喇   咁我哋當然識做啦 ~

同家姐去掃街   就係食 Q 餅   呢個 Q 餅係 Blog 友卡姑介紹㗎   佢話好好食   我信佢㗎   仲跟足佢指示   一定要食芝士吞拿魚多汁   真係好好味喎   熱辣辣脆卜卜   $15 一件   真係食得飽人呀 ~

食完再去家樂坊對面食臭豆腐  + 魷魚鬚  + 1 豌蘿蔔韭菜豬紅豬腸   好在有位坐   唔係都食得幾麻煩 ~

好似仲未夠飽咁   所以再食冷冷撈   咁就飽哂喇 ~

之後就同家姐一齊行去搭車喇   全程掃街都係家姐比錢   但佢又全程夾實個手袋   我好難有機會攝番啲錢落去   所以最後都係話下次我啦   多謝哂家姐呀 ~

里奧大人就可憐啲   因為有人 Interview   所以搞到 9 點先喺公司附近麥記食包咋 ~

估唔到番到屋企仲有時間去做機   所以即刻換衫去做呀   比咗會費   真係好有原動力去做機   如果唔駛錢   我就會搵好多籍口唔做㗎喇 ~

尋晚比啲雨同啲雷嘈到瞓得唔好   所以好希望一開電視就係黑雨警告   但得黃雨呢   面對現實沖涼番工啦   喺等巴士期間   聽到後面個女人話依家黑色雷暴   問男友 / 老公咁其實駛唔駛番工   個男好大反應話咩叫黑色雷暴呀 ?!   妳想問係黑雨定係雷暴警告呀 ?!   個女就答話係唔駛番工嗰啲囉   真係搞笑呀   不過我覺得黑色雷暴個名好勁呀   哈哈 ~

~~~~

今朝食芝腿菠蘿包 + 涷奶茶 ($17)   又無同我叮個包   所以啲芝士唔溶   無咁好味呀 ~

番到菇場都忙喎   但都要寫 Blog 先   因為唔想一次過寫咁多呀   同埋 Yahoo 呢排傻傻哋   儲喺草稿好過要從新再打過吖嘛 ~

晏晝同里奧大人去海皇食艇仔粥 + 糉 + 炒麵 ($34.5)   個粥就麻麻哋  其他都 OK 啦 ~

神呀   求祢用大能嘅恩手醫治朱朱   讓朱朱可以快啲食嘢   快啲好番   可以快啲出院   讓我哋唔駛咁擔心   求神去保守看顧朱朱   急切禱告   奉主命求   阿門 !!

應當一無掛慮   只要凡事藉着禱告   祈求和感謝你們所要的告訴神   神所賜出人意外的平安   必在基督耶穌裏  保守你們的心懷意念 (腓 4 : 7)

度小月辣味肉燥 + 蘑菇粟米湯 + 紅棗黑木耳 + 探朱朱 + 跑步機 ( JUL-2008 )

尋晚放工即去探朱朱喇   一見到朱朱我就忍唔住喊   但啲護士又望住哂   搞到我好想大喊又唔敢大喊   費事嚇親朱朱同護士啦 ~

感謝神   朱朱都幾精神   但就要聞氧氣吊鹽水   我唔可以抱佢   所以一路摸住佢   但佢勁想我抱   因為想走呀   嚇到我探佢 10 分鐘就走喇 ~

希望朱朱快啲食番嘢啦   咁就可以快啲出院唔駛我哋咁擔心嘛   之後就搭小巴番屋企 lu ~

是日懶餐 - 度小月辣味肉燥 + 蘑菇粟米湯

度小月辣味肉燥 - 喺台灣食嘅肉躁係甜甜哋   但呢罐可能係辣味   所以係鹹啩   但我鍾意食甜多啲 ~

蘑菇粟米湯 - 1 罐細蘑菇 + 1 罐粟米湯   又好味又飽肚 ~

食完就同里奧大人去做機喇   一齊做真係無咁悶呀 ~

番到屋企沖涼   睇電視   飲紅棗黑木耳   食埋龍眼就瞓覺 ~

尋晚又比行雷嘈醒   所以今朝好攰呀 ~

~~~~

早餐食炒米粉 + 咖啡 ($13)   飲咗咖啡都仲係好攰咁   好想番屋企瞓覺呀~ 

番到菇場有嘢做   但一望住啲數字就好眼瞓呀 ~

晏晝同媽咪同里奧大人去美心皇宮飲茶   如果家姐都係同一區做嘢就發達喇   咁樣我番工都番得開心啲呀 ~

媽咪煲咗清保涼川貝鱷魚肉豬展湯   所以只係食咗排骨蒸陳村粉 + 干蒸牛肉 + 叉燒包 + 素粉果 + 鳳爪排骨飯   因為飲湯食渣都好飽 ~

鹵水雞膇 + XO 醬炒脆肉瓜 + 隔夜湯 + 朱朱再入院吊鹽水 ( JUL-2008 )

依家去做機嘅體育會延開到 10 點   咁就可以等埋里奧大人一齊去做機   而我又唔駛咁趕頭趕命做完機去買餸煮飯   啲時間好駛好多呀 ~

一早已經醃好咗雞膇   所以就咁去街市買脆肉瓜 ($5 份) 就番得屋企 lu ~

番到屋企第一時間拖地   因為一個星期無拖地喇   覺得好污糟咁 ~

里奧大人 7 點幾可以收工   但等咗半個鐘頭車都上唔到車   所以最終無位坐都要上車   如果唔係唔知再要等幾耐   聽見都可憐 想喺車度休息洽下都唔得 ~

是日晚餐 -  鹵水雞膇 + XO 醬炒脆肉瓜 + 隔夜湯

鹵水雞膇 - 用豉油醃咗雞膇一晚   鹵水汁係李錦記嘅   但見啲雞膇唔上色   所以加埋老抽   個色都 OK 啦   但就鹹咗啲囉 ~

XO 醬炒脆肉瓜 - 太抵喇   $5 有 3 條喎   里奧大人又鍾意食   所以就整喇 ~

隔夜湯 - 煲湯實有隔夜湯剩嘅   咁都好   可以飲多晚嘛 ~

諗住炒飯比里奧大人食   但唔夠時間   所以蒸熱就算   而自己就食撈麵   巴東牛肉味嘅   但啲味好濃   勁似 "格甩底" 味咁   所以我係閉氣大啖大啖食   直吞落肚   依家仲有 3 包存倉   點算好呀 ~

諗住食完洗完就去做機   但里奧大人番到屋企仲未有得食   成 9 點先開飯   食完抖埋   人哋都 cCose 啦   所以最後里奧大人話慢慢食好過 lu   唔好成日咁趕喎 ~

食完他他條條洗碗   沖涼之後再敷 Mask   食埋生果   睇多陣電視就瞓 lu ~

~~~~

今朝出門口無雨架   點知番到公司附近就落雨 ~

早餐食炸菜肉絲腸仔出前一丁 + 奶茶 ($19)  超飽呀 ~

10 點幾媽咪打嚟   話朱朱兩日都無咩點食嘢同飲水   個身軟 Lai Lai 又無厘精神   所以同埋工人即刻去診所睇醫生   原來朱朱嚴重脫水呀   所以又要入院吊鹽水   不過放低朱朱嘅時候   佢抓門要走呀   不過無辦法啦   診所有醫生護士看住安全啲嘛   等我今晚放工探探朱朱先 ~

晏晝同里奧大人去 Ikea 食 Lunch   食茄汁海鮮意粉餐 + 肉丸 ($45)   碟意粉超級搵笨   得 3 粒細細嘅魚同 1 條魷魚鬚   意粉又少   個汁又無味 ~

路經泰昌   突然好想食沙翁   好油   但又幾好味噃 ~

蔥花蒸鯇魚 + 蒜蓉油麥菜 + 清補涼豬展湯 ( JUL-2008 )

尋日啲雨未停過   真係有啲煩   但其實又好似影響唔到我㗎喎 ~

星期日食 Tea 時間   度度都好多人   所以都係去大家樂就算喇 ~

今次我食油雞翼 + 春卷配熱奶茶    里奧大人食豬扒包配可樂   其實就唔係好飽   不過又唔想食咁多嘢 ~

食完就去百佳買餸   買咗鯇魚 + 油墨菜 + 鹵水汁 + 指天椒就走喇 ~

 
番到屋企就開機洗衫   熨衫   熨到腰骨痛   好在里奧大人幫手熨   唔係真係要分兩日呀~

尋日突然覺得自己真係要收歛下啲脾氣   事緣係咁   里奧大人知我貧血又欠鐵質   所以特登煲黑木耳加紅棗比我飲   我飲咗一啖就話唔甜嘅   里奧大人就話我上次話唔落紅糖都 OK   所以無落度   咁我話算啦   都 OK 啦   然後我就入書房整嘢   出嚟嘅時候   見到里奧大人幫我加紅糖再煲過   嗰刻好感動   同埋覺得自己好衰   煲埋比妳飲仲嘈嘈閉   好在里奧大人都頂得我住   唔係就慘喇 ~

是日晚餐 - 蔥花蒸鯇魚 + 蒜蓉油麥菜 + 清補涼豬展湯

蔥花蒸鯇魚 - 好耐無蒸魚   所以蒸完先知唔記得加大量薑絲   好在唔腥咋   其實我好鍾意食魚   但次次整親魚   包括急涷都覺得好腥   好唔想食   食完硬係覺得周身唔舒服咁   所以下次都係叫里奧大人幫手整嚟食算喇 ~

蒜蓉油麥菜 - 又係好耐無食過   求其放蒜蓉就算   因為我想用埋淥菜啲水嚟蒸魚   唔駛煩嘛 ~

清補涼豬展湯 - 里奧大人話熱氣   所以煲清補涼湯   又方便呢   唔駛洗洗切切 ~

食完沖涼   又到睇獎門人喇 ~

~~~~

今朝又落雨   再加上係星期一   咩 Mood 都無哂 lu ~

早餐食芝蛋治烘底 + 涷咖啡 ($17)   食得超趕 ~

晏晝同里奧大人去茶餐廳食 Lunch   食炒麵 + 京都排骨飯 + 涷檸茶 ($45)   食完行番公司   有適當嘅運動量   唔錯唔錯 ~

住家飯 @ 媽咪屋企 + 朱朱出院 ( JUL-2008 )

尋日放工就同里奧大人各自去銅鑼灣   因為里奧大人放 12 點   咁可以早啲去交功課嘛 ~

之後再一齊去南記食米線   我食豬腩肉小窩米線 (辣) + 兩條春卷   里奧大人食春卷魚片頭米線   再加一杯涷奶茶 ~

幾年前嘅南記真係好好味   但每食一次  水準都下降一次咁   我食呢個米線唔酸唔辣   好失望囉   但春卷就好好味喇   里奧大人就話啲米線太腍   好似淥咗好耐咁喎   以前喺糖街好好味㗎   雖然地方勁窄   食得好辛苦   但都值得   但依家地方大咗   質素差咗   可惜可惜 ~

食完之後就行 Sogo   多人到呢   好似全香港得一個 Shopping Mall 咁 ~

人真係好奇怪   越想買嘢呢   就永遠買唔到   唔想買嘅呢   就會執到筍嘢   點解咁講呢   因為無意中發現 Boss 做 Sale   里奧大人就買咗套西裝 Suit 同皮帶喇   半價喎   所以真係好抵   就係因為咁抵   所以吸引好多自由行買嘢呀   我發覺啲自由行好得意   因為個個男嘅都係買 Polo Tee   仲要係好大件喎   根本就係衣不稱身   都唔明點解要咁大件呢 ~

又試又等   用咗成個鐘頭喺 Boss 度   但又趕住出旺角接朱朱出院喎   所以要摩打腳行 Supermarket   買咗啲零食就走人喇 ~

突然好肚餓   所以買咗個 Chocolate Puff ($13)   都好好味   但我都係鍾意食 Cookie Puff 多啲 ~

之後即搭地鐵去旺角接朱朱喇   一心諗住朱朱會好高興 Fing 手 Fing 腳撲我   點知唔多彩我呀   肯定嬲我送佢去診所啦 ~

醫生話朱朱肝臟同胰臟酵素正常喇 (1,2xx)   但個肝唔好   所以貧血要食維他命丸呀   陰公 ~ 

今次埋單 4 千幾   我覺得好貴   但最緊要係朱朱無事 ~

之後打的去媽咪屋企   媽咪見到朱朱開心到震呀   之後就食飯   6 點幾咋   所以仲未肚餓   食少少算喇 ~

食完飯坐陣就走喇   因為都好攰下   番到屋企就整個撈麵比里奧大人   自己就食少少零食同埋生果 ~

~~~~

今朝 10 點起身喇   同里奧大人打的番教會附近食早餐   落雨濕濕   真係好麻煩 ~

崇拜完就去 Jusco 買黑豆漿 + Dryers + 豬𦟌   買完就走 lu ~