叉燒炒麵 ( 31-AUG-2025 )

我主力食尋晚嘅嘢   但食剩幾件雞   咁就帶埋飯啦

( 31-AUG-2025  SUN )

今朝同里奧大人一齊起身食早餐   但有啲攰   同埋我尋晚傾偈傾到把聲都拆埋呀   佢啲同事唔好以為我病就得喇   哈哈 ~

幫手做哂嘢就番崇拜喇   我係咁流鼻水同埋覺得凍   唔係真係病呀嘛 ~

崇拜完畢就去黃埔買餸   因為想去 360 買童星點心麵比里奧大人呀 ~

買完先去買麵包同菜   再先買叉燒同水餃   最後買埋炒麵餅就番屋企 lu ~

栗子千層包   如果屋企附近間惠康有得買就好啦

感恩個人又無咩嘢喎   見有時間就大清潔啦   依家真係每一個月先做一次大清潔   因為體力唔同以前咁喇   除咗吸廛係每日會做   其他家務都係分開時間做呢 ~

搞掂就開機洗衫   沖埋涼抖陣再燜餸 ~

望下個鐘已經 2 點   里奧大人啱啱放工   我又要煮午餐喇 ~

大孖買嘅大地魚粉   我落咗 1 湯匙   但唔覺得有味道咁噃   定我真係太重味呢 ?!

買 $30 叉燒整炒麵

洗埋碗再睇陣 Youtube   里奧大人就瞓晏覺   我都入房瞓   咁唔駛開廳冷氣嘛   哈哈 ~

3 點半瞓到 4 點半   又開始執下嘢   里奧大人 5 點幾起身   我都預備晚餐 lu ~

是日晚餐 - 叉燒炒麵

叉燒炒麵 - 我食咗一啖   覺得今次炒得好好味呀   啲麵唔太濕又唔太乾   最緊要有口感   因為我好多時都覺得煮得腍   但里奧大人又話唔係喎 ~

洗埋碗就抹雪櫃啲層格   成日想做又無動力   今晚真係忍唔住喇 ~

搞掂就同里奧大人去做機   今晚做咗 25 分鐘都夠皮了 ~

沖埋涼就抖下   之後同里奧大人一路食生果一路睇 "臥底旅行團 5.0" 喇   星期日最期待嘅節目   哈哈 ~

睇多陣 Youtube   今晚 10 點半都瞓覺 lu ~

玉桃軒酒家 @ 官塘 ( 30-AUG-2025 )

鴻運燒味拚盤 - 青瓜同木耳好味   因為酸酸哋好開胃   叉燒都好味   鴨胸同油雞就無食喇

廚神炒飯 - 因為比細路仔食飯先   所以第二個就上炒飯   我食咗啖   炒得好乾身呀

上湯波士頓龍蝦伊麵 - 味道 OK 呀

職員分好哂就最好

富貴蘭花蝦仁 - 我以為蘭花係西蘭花添

黃金百花球 - 呢期好想食蝦   咁姑奶話唔食   我話我唔客氣食埋佢嗰粒喇   之後剩番 4 粒   我話打包

紅燒竹笙海皇生翅 - 夠熱   食完好舒服   可能飲咗汽水個人好凍呀   哈哈

蠔皇花菇伴鮑螺 - 無食   但食唔哂就我打包

清蒸沙巴龍躉斑 - 豉油無味嘅

脆皮金蒜燒雞皇 - 無食   又係剩番   所以我又打包喇   唔好嘥嘛

精選合時甜品 - 好多紅豆同埋唔係死甜

桃包 - 我無食呀   但打包咗 4 個   今晚啲嘢好多都剩   不過我唔拎咁多喇

( 30-AUG-2025  SAT )

感恩一覺瞓天光呀   瞓到 7 點都醒咗   不過繼續瞓到 7 點半先起身呢 ~

今朝同里奧大人一齊出去食早餐   食完就去佢公司坐陣先番工 ~

頭先里奧大人撳錢   佢開銀包睇下要撳幾多 ?!   之後我話依家買嘢貴咗好多   所以拎咗佢 $1,000 再話好開心呀   佢話有邊個拎人錢都唔開心㗎 ?!   哈哈 ~

番到菇場即去洗杯   見到西瓜個揹背囊放喺梳化   咁睇嚟都唔會咁快番嚟 lu ~

唔忙就上網   阿花話又有陣味   佢好驚呢隻味   咁佢每次講親   我都聞唔到   咁行去佢位問邊個位噴啦 ?!   佢好驚咁指住阿爽   哈哈   因為阿爽坐我隔離但隔住條河   佢驚阿爽聽到呀 ~

之後同阿花傾整牙   叫佢介紹比我呀   之前我睇嗰個退咗休   有個都好好但搬咗喺荃灣就太遠啦   我覺得旺角最方便   又可以行下   一舉兩得 ~

傾完都已經 12 點 45 分   係時候執嘢預備放工喇 ~

放工去一田買嘢   其實諗咗要買啲咩㗎喇   所以好快就搞掂 ~

韓國梨 3 個裝 ($48 原價 $59.9) - 阿齋話抵   咁我都買先

日本洋蔥 ($23.9/2 包 原價 $18) - 呢個真係抵喇   所以即買 2 包

智利珍寶巨無霸葡萄乾 ($48/2 包 原價 $38/包) - 里奧大人鍾意食葡萄乾  所以買嚟孝敬佢   呢樣零食一定唔會同佢爭   哈哈

SNYDER'S 蝴蝶脆餅水牛城雞翼味 ($31.9 原價 $43.9) - 喺做一田夏日購物賞之前嗰日   突然間好想買嚟食   但 $43.9 好貴咁   所以拎起又放番低   好感恩今次有做特價   咁就要買嚟食喇

盛惠 $151.8   如果諗住換米   呢個總蚊都夠絕喇   哈哈   求其買反而買到最接近 $150

買完落大雨   所以我都避咗一陣雨先   感恩細雨嘅時候   架車啱啱到呀 ~

番屋企放低哂嘢再去里奧大人公司   之後就一齊去食午餐 ~

咖哩雞扒飯 - 雞扒好 "鞋"   咖哩汁又無咩味   之前咖哩好味家嘛

華田脆脆雪山西多士 - 里奧大人尋日經過話想食西多士   咁今日同佢食啦

好似臭豆腐   哈哈

食完去惠康買嘢   里奧大人就番屋企瞓晏覺 ~

買完即番屋企沖涼洗頭呀   抖陣就熨衫   睇 Youtube 聽啲娛樂新聞   有時真係得啖笑   唔知以為你識嗰個明星咁 ~

惠康買嘅韓國網紋瓜   只係 $42 咋   雖然我唔係咁鍾意食生果   但我又覺得屋企點都要有啲生果食下咁㗎

里奧大人 5 點左右起身   咁都出發去 APM 行下 lu ~

今晚同 Y 姑慶祝生日   我哋 6 點 15 分左右去到酒樓   啲人都嚟到七七八八   之後開始傾偈   兒甥仔個仔好黐我呀   勁開心   因為我覺得佢個樣好得意   個樣成日笑咪咪又怕羞咁   我好鍾意呀   哈哈 ~

本來話 7 點至 7 點半開席   但最後 8 點 15 分先開席   其實我都唔知咁晏   掛住傾偈無提到時間呢 ~

開席前食生日蛋糕   佢哋話食完一件都飽飽哋   好在我唔食咋

嫲嫲每次見到我都會特登行過嚟   好開心好肉緊咁捉住我對手   對其他人唔係咁㗎   所以每次里奧大人都話覺得嫲嫲見到我好開心咁   真係唔知點解   可能我笑容夠啩   哈哈 ~

食完又有啲活動環節   所以 9 點 50 分先散席   我同里奧大人都走先喇 ~

沖埋涼再睇陣 Youtube   今晚 11 點 45 分先瞓呀 ~

五香肉丁出前一丁 + 菜心苗 ( 29-AUG-2025 )

( 29-AUG-2025  FRI )

又係半夜去廁所   之後好快瞓得番   感恩感恩 ~

早餐食甜餐包搽芝麻醬   里奧大人就食提子麥包   佢今日放假㗎   但話起咗身就食埋早餐   咁一陣唔駛餓醒喎 ~

菇場唔忙   無啦啦收到阿仔 Whatsapp   之後又傾咗個幾鐘   傾到啱啱好 Lunch Time 就唔傾喇   因為我要去一田呀 ~

同船頭 阿花一齊行去一田   不過我就唔買住   所以行咗半個鐘都番菇場開餐喇 ~

船頭特登過嚟我個位睇我隻杯   之後佢話要隻紅色   阿齋又話要   我叫佢估幾錢 ?!   佢話 $20   我話無咁平呀   佢笑住話妳個樣講到好平咁   哈哈   里奧大人又係成日咁話我㗎 ~

估唔到忙咗成個鐘   最邪係頭先同阿仔講話 2 點再傾   我問佢得唔得閒先 ?!   佢話傾到咪傾囉   點知一陣得唔得閒   哈哈 ~

同佢傾咗陣都唔傾喇   因為佢好忙   咁我同阿齋傾人偈啦   佢會買份員工優惠嘅保險   因為唔喺度做或者退休都帶得走   其實係吸引   所以我上年都買咗   但今年保額貴咗 ~

放工去一田買嘢   因為好想換金鳳泰國頂級香米呀   所以諗住買牛肋條同雞肶   但估唔到牛肋條咁快比人買哂   咁轉買和牛粒   最搞笑我本身都係諗住買和牛粒呢 ~

無試過泰國 J.Farm 呢個牌子   但買 2 包 ($119.9) 幾抵咁   因為我平時買開 Royal Farm   價錢都係咁上下   所以買 2 包急凍雞下肶喇

買完即番屋企   感恩好快有車   因為拎住兩袋米同雞肶好鬼重呀 ~

番到屋企都 6 點 10 分   要即刻預備晚餐喇 ~

澳洲急凍和牛粒 (特價 $99 原價$149)

買滿 $150 就可以用 $46 換購   我換咗 2 包

是日晚餐 - 五香肉丁出前一丁 + 菜心苗

五香肉丁出前一丁 - 本身諗住買燻蹄   但要去一田買嘢就唔買啦   好在諗起屋企有五香肉丁   咁可以整丁丁   里奧大人最鍾意食㗎 ~

菜心苗 - 見 $10/包就買啦   好似好耐無食青菜咁   但依家都係鍾意食瓜類多啲 ~

洗埋碗抖陣就同里奧大人去做機   里奧大人本身話陪我去惠康買嘢唔做機   唔想我行咁多   不過我話想做機呀   最多做 25 分鐘就可以 ~

原來落咗場雨   好在真係做完機先去惠康咋 ~

諗住買無花果   不過唔係食開嘅牌子   所以轉買 ENVY 蘋果 ($26./4 個)   我覺都抵呀   買完即番屋企沖涼喇 ~

諗住沖完涼即刻搞啲中藥   估唔到里奧大人幫我搞咗   算佢啦   唔駛叫都主動幫 ~

差唔多 9 點 45 分就同里奧大人一齊睇 "麻雀樂團" 大結局   我覺得都算無爛尾呀   同埋結局都好感人   我話唔知有無續集呢 ?!   里奧大人話啲人都走哂啦   應該無續集㗎喇   不過我成日覺得續要有原班人馬先好睇呢 ~

再睇多陣 Youtube   今晚 11 點 10 分先瞓覺 ~

焗海鮮卷拚墨魚卷 + 辣椒蒜蓉蒸脆肉瓜粒 + 炸魚皮 (外賣) ( 28-AUG-2025 )

尋晚食唔哂嘅生炒骨   今晚再焗熱嚟食   一樣咁好味

( 28-AUG-2025  THU )

尋晚半夜去完廁所都好快瞓得番   感恩感恩 ~

今朝鬧鐘未響都醒咗   但點都等到鬧鐘響先起身 ~

早餐仍然食魚肉燒賣   本身燒賣好大粒   所以我會剪開一半   咁會快熟啲同埋易入口呢 ~

依家多數 8 點 35 分就番到菇場   我覺得幾好   其實放低哂嘢又放埋飯盒   之後去 Pantry 洗杯再沖嘢飲   番到埋位又要抹下張枱   咁樣都要 10 分鐘㗎   如果 8 點 45 分番到嚟   有其他同事洗杯斟水   雖然唔係等好耐   但都唔想等囉   哈哈 ~

好多時見到阿蟲食通粉   佢都會加水   我話係想熱啲定淡啲 ?!   佢話係想多啲   哈哈 ~

菇場唔忙   可以抖下 ~

Lunch Time 蒸好飯就出去買菜   之後去 759 行下   最後買埋炸魚皮就番菇場開餐喇 ~

唔忙繼續做自己嘢   所以好快就放工 lu ~

今晚里奧大人話 7 點先番到屋企   我諗住做機但點知 Full 哂   所以都係番屋企煮飯喇 ~

是日晚餐 - 焗海鮮卷拚墨魚卷 + 辣椒蒜蓉蒸脆肉瓜粒 + 炸魚皮 (外賣)

焗海鮮卷拚墨魚卷 - 唔知煮咩好又無醃到肉   所以尋晚就買咗呢兩樣   就咁焗熱就搞掂 ~

辣椒蒜蓉蒸脆肉瓜粒 - 我夜晚多數食多啲瓜菜   咁就唔駛食飯喇 ~

炸魚皮 (外賣) - 好想食呀   所以即刻去買   里奧大人話鍾意食呢啲薄身嘅炸魚皮   我就薄同厚都鍾意食呢 ~

洗埋碗就開機洗衫  搞掂就即刻沖涼休息   里奧大人就熨衫 ~

今晚一齊食提子   里奧大人係食最後嗰粒嘅   但個碗放喺度無洗   我話做咩唔洗個碗㗎 ?!   佢話又要幫我倒垃圾   咁做得邊樣 ?!   我就慶喇   我話搵嚟講啦   食到最尾嗰個就一定好自己會洗個碗㗎啦   你覺得一定有人幫你洗嘅咩 ?!   呢啲係家教囉   等如你最後一個放工   你都會熄燈熄冷氣啦   又唔見你唔熄就走 ?!

我話唔好成日話幫我咩幫我咩   呢個家兩個都有份嘅   唔係得我一個做哂嘅   咁我係咪要講話我幫妳煮飯 我幫你洗碗 我幫你洗衫 ?!   本身好鬼想話我自己熨番自己衫   第時你自己煮你自己食嘅飯餸   但都係唔好   最多叫佢洗碗   每人做啲家務好過   呵呵 ~

睇多陣 Youtube 又打下機   今晚 10 點 50 分先瞓 ~

生炒骨 + 蘿蔔牛腩拚糖醋骨飯 (外賣) ( 27-AUG-2025 )

我見新鮮炸起成盤拎出嚟   所以買一盒喇   炸到脆卜卜真係好好味呢

( 27-AUG-2025  WED )

尋晚又係半夜去廁所   之後都好快瞓得番   感恩感恩 ~

又係發咗好多夢呀   個夢係同里奧大人 CC 阿濤去日本同澳門旅行   我去 Muji 買麵包   我見到朱古力窩夫就影相   之後就想買比里奧大人   點知比人夾咗呀 ~

另一個夢係去食晚餐   CC 訂嘅係 M2 餐   里奧大人同 CC 坐   我就唔知同邊個坐   個位係面壁思過位嚟嘅   好記得一口氣上咗幾碟菜式   其中一碟係咖哩同埋一條好長嘅油炸鬼   咁我拎相機出嚟影相但跣手跌咗落地下   個鏡頭爆哂呀   當下勁唔開心因為我本身有帶相機套但唔用囉 ~

雖然兩個夢都係食嘅   但唔係 Happy Ending 噃   哈哈 ~

今朝食魚肉燒賣   煲仔飯豉油都係李錦記好味啲   淘大就比較淡味同稀身啲 ~

依家天氣咁熱   所以都早咗出門口   咁落車唔駛行咁遠喇 ~

菇場唔忙   BG 話 M 嚟所以頭痛   嗰種痛係無吹頭之後嘅痛   我話點都好過經痛啦   但我再話呢種頭痛會痛好耐㗎   佢話唔好咁講啦   哈哈 ~

Lunch Time 蒸完飯就周圍行下   雖然唔駛買菜   但都想出街囉   去雜貨店買咗醬料同辣菜脯   買完又行下 759   之後就番菇場開餐喇 ~

唔想夜晚食太多提子   所以拎啲番嚟做飯後果

喺 759 買㗎   望落幾好味咁   好似 $15/包

忙咗一個鐘又做自己嘢   但今日啲時間過得好快咁呀 ~

放工去睇中醫   感恩唔駛等呀 ~

醫師話我淋巴有啲塞所以水腫   因為血氣唔夠   下星期要再睇呢 ~

睇完就去買晚餐同糖水就番屋企   里奧大人仲開緊會   所以我都沖涼先 lu ~

里奧大人 7 點半番到屋企   都即刻開餐喇 ~

食完抖陣   等埋里奧大人沖涼   之後就一路食糖水一路睇 "麻雀樂團" ~

其實仲有芋圓同珍珠   下次倒落碗嚟影先   咁樣應該好睇啲   哈哈

睇多陣 Youtube   今晚我哋 10 點 20 分都瞓覺 lu ~

蠔油燜雞下肶 + 瑤柱蒸節瓜 ( 26-AUG-2025 )

( 26-AUG-2025  TUE )

尋晚半夜去廁所   感恩好快瞓得番 ~

臨醒前發夢番去另一間屋住嘅   但間屋已經無住 3 年   有啲開關制都有問題   最恐怖係我瞓喺床度   隻門自己關呀   我即刻行去開番   之後里奧大人沖涼嘅時候   有個鬼公仔出現呀   我大聲叫奉主名求行開   隻公仔消失咗   我仲心諗隻公仔會跌落地下   估唔到無消失咗   之後鬧鐘響 lu ~

我同里奧大人講番個夢   覺得間屋 3 年無住個場景好熟面口   原來係前晚睇個 Youtuber   因為疫情關係   3 年上唔到大陸   到入到間屋嘅時候   張梳化發哂霉   好在雪櫃無問題   因為入面有菜有肉   但變哂色同乾哂咁囉 ~

今朝食菠蘿包   間唔中就想食㗎喇   以前有間茶餐廳係芝腿菠蘿包   鹹鹹甜甜好鬼正㗎 ~

菇場唔忙   可以做自己嘢 ~

Lunch Time 蒸完飯就出去行商場   行下行下又半個鐘   要即番菇場開餐 lu ~

唔忙就做自己嘢   輕輕鬆鬆又放工 ~

番到屋企即預備晚餐   里奧大人差唔多 6 點半先番到屋企   咁可以即刻食得喇 ~

是日晚餐 - 蠔油燜雞下肶 + 瑤柱蒸節瓜

蠔油燜雞下肶 - 本身啲汁好稀   所以我加生粉水   之後當堂杰哂喇   下次都咁煮先   里奧大人話睇個色都已經覺得好食   真係比面 ~

瑤柱蒸節瓜 - 我用浸瑤柱嘅水加埋燜雞肶嘅蠔汁   一汁兩用勁方便呀   哈哈 ~

洗埋碗就抖就去做機   感恩今晚無人做呀   咁我同里奧大人講啦   之後佢就話嚟做機   所以一齊做咗半個鐘喇 ~

番到屋企就開機洗衫   之後沖涼休息 ~

一路食睇子一路睇 "麻雀樂團"   今晚好感人   又忍唔住喊   明明呢套戲係好搞笑家嘛   哈哈 ~

睇多陣 Youtube   今晚 10 點 40 分瞓覺 lu ~