咖哩陳皮魚蛋 + 焗鯖魚 + 唐生菜 ( 15-AUG-2025 )

( 15-AUG-2025  FRI )

感恩又一覺瞓天光呢   臨醒又係發緊夢   記得係我要開舖頭   仲同大眼表妹一齊傾買啲咩好   傾傾下就鬧鐘響 lu ~

早餐食腸仔包+茄汁薄餅   咁樣 Share 食都唔錯   因為就咁食一個茄汁薄餅會好滯咁呢 ~

菇場唔忙   不過星期五啲時間過得特別快啲咁㗎 ~

喺 Pantry 同船頭傾偈   佢話尋日黑雨起咗身   之後去街市買雞肶同魚   我話唔係仲開埋機洗衫呀 ?!   佢話妳點知㗎   哈哈   佢晾埋衫就諗住切配料   但 11 點 10 分紅雨   所以佢都即番工   其實我哋喺兩個小時之內番到公司就得   不過我哋都算賺咗半日㗎喇 ~

Lunch Time 蒸完飯就出去行陣再買菜   之後買埋花生就番菇場開餐喇 ~

真係有 SALTED CARAMEL 味道㗎   第時都係睇清楚先好比錢   哈哈

唔忙就上網   又同阿妹 Whatsapp 傾下偈   因為頭先有個人嘅背面好似佢呀   所以比佢睇下   佢話 "阿姐妳唔駛番工咩"   好搞笑呀   家姐呢排又係好鍾意叫我阿姐㗎   哈哈 ~

今日先記得打去問 "子宮細胞報告"   感恩報告正常   感謝主 ~

放工即走   今晚里奧大人起碼 6 點 45 分先番到屋企   所以我都去街市買雞翼同雞扒喇 ~

番到屋企都即預備晚餐   里奧大人 6 點 50 分先番到屋企   我叫佢沖涼先   因為我煮出前一丁要啲時間 ~

是日晚餐 - 咖哩陳皮魚蛋 + 焗鯖魚 + 唐生菜

咖哩陳皮魚蛋 - 之前買咗包陳皮魚蛋   係時候清埋佢喇   因為唔想留番聽晚   咁我食咗好多   食完真係好脹胃   下次都唔好格硬食喇 ~

焗鯖魚 - 終於清哂喇   下次唔會再去惠康買鯖魚   因為真係太多細骨呢 ~

唐生菜 - 尋晚剩咗嘅佛跳牆   我覺得用嚟煮唐生菜就最夾 ~

洗埋碗就做小清潔   之後沖涼休息喇 ~

我比里奧大人睇話似阿妹張相   佢話知啦   阿妹入嚟同佢講話妳老婆偷影我呀   之後里奧大人真係以為係阿妹嚟㗎   哈哈 ~

依家多數同里奧大人一齊睇 "麻雀樂團"   因為錄完先睇   所以次次睇完到接近 10 點半   哈哈 ~

再睇多陣 Youtube   11 點半先瞓覺 ~