荔枝柴燻乳鴿 (外賣) + 燒汁燜雞下肶 + 勝瓜大蝦乾湯 ( 24-AUG-2025 )

( 24-AUG-2025  SUN )

今朝同里奧大人一齊食早餐   之後我就去家姐屋企喇 ~

Berry 係咁撲我   之後捉住佢對手仔行去梳化先停呀 ~

衰眼咁望住我

又避開唔望我

家姐要做公司嘢   我話無問題喎   我可以睇戲   呵呵 ~

我覺得 Berry 咁樣好似隻狐狸

看住門口

偷懶   哈哈

我睇 "鬼租客" 呀   家姐話係咪有人陪住無咁驚 ?!   雖然都係得一個人睇   我話真係呀   無人陪唔會睇㗎   家姐話睇鬼戲唔係驚啲鬼   係驚啲聲   即係突然間好大聲咁叫呀拍門咁呢 ~

呢套唔算恐怖喎   因為有時夜晚會睇啲恐怖戲片頭   我係真係閉住氣咁睇㗎   但呢套無呢啲感覺囉 ~

家姐先搞笑   間唔中又睇下   仲問我啲人物係咩 ?!   我話無認真睇喎   最勁係佢同我講番呀   因為我做嘢係唔可以一心二用呢 ~

瞓咗個幾鐘喇   但仲想瞓

家姐做完嘢都 12 點半   之後佢又睇下 "再見，福寶"   咁我一路睇都係喊緊嘅   之後聽到家姐飲泣   無諗過就咁睇少少都咁   哈哈 ~

我講哂寶家族啲名   同埋熊貓本性係點點點   家姐話我好有記性   如果讀書係咁就好 lu   哈哈

好記得當年同里奧大人去北京旅遊   有個行程係去睇熊貓嘅   我以為可以抱嚟影相㗎   即係好似去泰國抱住老虎仔影相咁呢

抖多陣就同埋家姐 Berry 去街   佢哋送埋我搭車都要即番屋企喇   因為個天好似想落雨咁呀 ~

好在 Berry 似柴柴身型   咁我都無咁驚   哈哈

我又唔係咁餓   但想食肉絲炒麵   所以叫里奧大人放工去買外賣   我就番屋企沖涼   因為想一陣入房瞓晏覺呀 ~

里奧大人 2 點半番到屋企   本身叫佢沖涼先啦   但佢話個麵熱辣辣都係食咗先 ~

我哋食炒麵一定加甜醬辣醬   真係好食好多㗎

家姐話呢包新加坡製造嘅豬肉乾 $55/包好抵   所以買咗 1 包比我

3 點半入房瞓   真係 5 秒入睡仲要係沉睡狀態   瞓到 4 點 10 分   之後精神哂喇 ~

有氣力就熨衫啦   搞掂又抖下   之後就醃排骨同燜餸   眨下眼就 5 點半   里奧大人都起咗身   咁我就開始預備晚餐喇 ~

是日晚餐 - 荔枝柴燻乳鴿 (外賣) + 燒汁燜雞下肶 + 勝瓜大蝦乾湯

荔枝柴燻乳鴿 (外賣) - 尋晚食唔到   所以今晚點都要食喇   焗熱之後脆卜卜   仲要外脆內嫩好味道呀   不過里奧大人就唔係咁想食   佢覺得好恐怖呀   所以影完相都即刻剪開一件件   我話當燒鴨咁食就得啦   哈哈   佢勉為其難食咗 2 件 ~

燒汁燜雞下肶 - 諗住啲乳鴿無咩肉唔夠食   所以煮多個雞下肶   但最後都無食過   咁可以留番做 Lunch Box 喇 ~

勝瓜大蝦乾湯 - 難得今日有時間就滾湯   呢個湯係最方便同埋又好味 ~

洗埋碗就開機洗衫   之後沖涼休息   里奧大人就去做機 ~

一路睇 "臥底旅行團 5.0" 一路食提子   今次啲提子都爽甜呀 ~

睇多陣 Youtube   今晚 10 點半瞓覺 lu ~