菜脯炒肉粒 + 上湯娃娃菜 + 蔥花蛋炒飯 + 隔夜湯 + 徑步 ( MAR-2009 )

依家多數會喺假期嘅時候抽幾張 Recipe   作為一個星期嘅餸菜   咁就唔駛日日諗食咩啦   同埋我覺得醃肉嘅時間耐啲會入味啲咁囉 ~

是日懶餐 - 菜脯炒肉粒 + 上湯娃娃菜 + 蔥花蛋炒飯

菜脯炒肉粒 - 用韓燒醬汁醃一晚    由於醬汁差唔多到期   所以落咗成半枝   啲醬汁係浸哂所有肉粒   所以肉粒甜甜哋   菜脯爽爽哋   加少少辛辣粉   勁正呀 ~

上湯娃娃菜 - 其實用雞粉扮上湯   但一落啲雞粉   啲水就會 "沙" 一聲同埋起哂泡   有啲恐怖囉   所以下次都係少落雞粉為妙 ~

蔥花蛋炒飯 - 里奧大人好鍾意食炒飯   仲激讚我啲炒飯唔熱氣添呀   因為我炒到啲飯腍劈劈   唔係一粒粒呀 ~

唔知點解   食完啲娃娃菜覺得個肚漲漲咁   唔係飽喎   下次都係咪整喇 ~

整好哂所有嘢   就同里奧大人去徑步 lu ~

~~~~

今朝又食麥皮 + 菠蘿油 + 鴛鴦   菠蘿油又甜甜鹹鹹香香咁   真係好味   不過我係食好少牛油   剩番嘅牛油仲多過食落肚㗎 ~

次次番到菇場都覺得好凍   但一出街就好熱   真係麻煩呀 ~

晏晝同里奧大人去茶餐廳食粉麵   今日好多地方都有即沖奶茶派呀   所以我都拎杯試下   慳番熱飲錢呢   醒呀 ~

梅菜蒸鯇魚 + 粉葛赤小豆眉豆豬展湯 + 齋鴨腎 + 徑步 + Blog 友 (噹媽) 小聚 ( MAR-2009 )

難得同里奧大人一齊放工   所以真係好開心呢   啲人成日覺得日又見夜又見會好悶   但我又唔覺喎   是我太黐身嗎 ?!   哈哈 ~

番到屋企附近食 Tea   今次我終於忍唔住試食冬蔭公炸魚片頭河粉   里奧大人就食干燒伊麵   其實冬蔭公嘅賣相真係好吸引   但我都唔係太接受到咁重椰奶嘅味道呀 ~

食完就去買生果   呢期鍾意食橙   所以難得有里奧大人相伴   就買 8 個橙 + 3 個細木瓜番屋企喇 ~

星期六啲時間真係超級快過呀   話咁快又到  4 點半   又要出門口去番教會 lu ~

夜晚就去姑奶屋企 BBQ   好在雨粉粉之後無落雨咋 ~

~~~~

( 29-MAR-2009  SUN )

今朝同里奧大人食早餐   他他條條一路食一路睇雜誌   真係好 Relax   之後去徑步   如果平時都可以咁就好喇 ~

徑完步又去逛超市   假期嘅生活真係好平淡呢   但我鍾意喎   人到中年都無咩激情咯   呵呵 ~

今次去一間新開嘅泰式餐廳食 Tea   我食肥牛湯濛 + 椰汁亞塔子冰   里奧大人就食越式炒飯 + 椰汁紅豆冰   食物都 OK   不過飲品就唔好味   可能期望太高啦 ~

番到屋企要 Ready 煲湯   一日最辛苦嘅時刻終於開始喇 ~

是日懶餐 - 梅菜蒸鯇魚 + 粉葛赤小豆眉豆豬展湯

梅菜蒸鯇魚 - 整咗 N 次   終於覺得今次唔腥喇   食得好開心呢 ~

粉葛赤小豆眉豆豬展湯 -  天氣潮濕   所以煲去濕湯水   飲完去哂濕   個人無咁攰㗎   材料有粉葛斤半 + 豬展 $22 + 粟米 2 條 + 紅蘿蔔 1 條 + 果皮 1 塊 + 赤小豆 + 眉豆各 3 湯匙 + 蜜棗 3 粒   煲 2.5 至 3 個鐘   超甜呀 ~

之前瞓得唔好   所以索性 10 點半瞓覺 lu ~

~~~~

( 30-MAR-2009  MON )

今朝嘅早餐   對於我黎講係好特別   係食啲平時唔食嘅嘢 ~

就係牛奶麥皮 + 菠蘿油 + 奶茶   只係 $16 咋   估唔到咁平呢   食麥皮係想降膽固醇   所以唔好食都要食呢   至於菠蘿油   估唔到好好味喎   不過我只係食咗手指甲咁上下 Size 嘅牛油   因為我真係好驚肥呢 ~

今日好特別   因為 豬豬妹 (噹媽) 約我食 Lunch   本來里奧大人都有份架   但佢臨時要同客食飯   所以嚟唔到   咁仲好   可以多啲嘢傾   哈哈 ~

同豬豬妹去夏麵館   但豬豬妹話同 Elements 嗰間唔同   但我就唔知呢   因為我無去過夏麵館食嘢嘛 ~

之後豬豬妹點菜   繼續疑惑哋問 Waitress 點解唔同 Elements 嘅 Menu   個 Waitress 尷尷尬尬細細聲話唔同老細喎   終於知答案喇   所以豬豬妹再無疑惑 lu ~

我哋叫咗炸豬扒擔擔麵 + 麻醬粉皮 + 鍋貼 + 炒年糕    點完菜豬豬妹就比泰國手信我呀   原來豬豬妹個人都好細心㗎   買咗個小手袋 For 我出去食 Lunch 用   又買 Hand Cream   又有個豬豬手制化妝盒同芒果乾   今勻真係有食有拎呀   超開心勁感動呀 ~

一路食一路傾   超開心呀   今餐係豬豬妹請我食   話生日飯喎   認真客氣呀   之後仲送埋我番公司添   好有屋企人 Feel 呀 ~

雲南桂林過橋米線 @ 荃灣 ( MAR-2009 )

真係食開有感情呀   尋晚去表妹度電髮   電完諗住番屋企睇芯姐   但里奧大人幫我錄咗   所以唔駛咁急番屋企 ~

條街又超凍喎   所以諗諗下都係食埋嘢先走   又去雲林食酸辣米線喇 ~

今次係食豬軟骨 + 豬紅酸辣米線 (小辣走肉碎)   初初睇個樣仲以為唔辣   點知食咗兩啖 Feel 都開始辣   越食越辣   真係越食越刺激呀 ~

~~~~

尋晚真係撞鬼   啲米線辣得滯   搞到我胃痛   幾辛苦先瞓得着呀 ~

今朝落雨   所以車程會比較耐啲家嘛   9 點去食早餐   點知遠處見到老細就走入嚟   終於又要一齊坐 ~

番到菇場忙忙哋   所以都幾開心㗎   好過番工等放工嘛 ~

晏晝里奧大人被同事約食飯   而我為咗幫家姐儲印花   所以就去 7-11 買常餐 (4 粒燒賣 + 撈麵 + 碗仔翅 + 奶茶)   $18 超抵   不過食完肚屙呀 ~

住家飯 @ 媽咪屋企 ( MAR-2009 )

尋晚勁開心啦   因為番媽咪屋企食晚飯呀 ~

放工嘅時候又落雨又大風   加上天氣又潮濕   連朱朱都無哂心機呀   因為幾日無出過街街呢 ~

坐坐下好想食雪糕   之後又飲湯   終於又搞肚痛呀   辛苦到暈咁滯 ~

等埋家姐同里奧大人番屋企就開飯 lu ~

~~~~

今朝潮濕又大霧   搞到個人好攰   好在今朝可以有時候慢慢噗早餐   食完精神好好多呢 ~

酸辣米線 @ 大埔 ( MAR-2009 )

唔知點解   女人真係藉口多多嘅呢 ~

我其實暗中 Plan 好咗   一係煮飯唔做家務   一係就唔煮飯做家務   不過就要睇番到屋企時嘅身體狀況而定喇 ~

好衰㗎   唔知點解   想下唔煮啫   到最後真係唔想煮喎   真係奇怪 ~ 

不過我就好慳家嘅   所以都係 Cheap Cheap 哋食酸辣米線好喇 ~

~~~~

今朝好鬼凍呀   冬天咁凍呀   好在無落雨   唔係大風又大雨真係好煩呢 ~

凍呀   要食多脂肪嘅食物保暖呀   所以今朝食蛋牛治烘底 + 奶茶 ~

番到菇場無嘢做   所以上網周圍昅   隔離位同事一見我上網睇嘢就會 MSN 嚟話好得意呀   邊個嚟㗎   咁咁咁   總之我一睇嘢佢就會咁講   真係好 Q 煩   男人老狗咁 Q 八嘅   我最憎人咁八   仲要係男仔添 ~

食 Lunch 嘅時候即刻同里奧大人呻呀   把幾火 ~

天氣咁凍   真係唔想行咁遠   所以又去 Shake 喇   超好味呀 ~

休息 + 炒飯 ( MAR-2009 )

( 21-MAR-2009  SAT )

自己嘅早餐

里奧大人嘅午餐

里奧大人嘅晚餐

~~~~

( 22-MAR-2009  SUN )

每月一到喎   所以全日喺屋企休息   瞓下舒服啲   之前食咗啲中藥同埋食咗 2 個星期白鳳丸    今次個肚又唔係好痛   感謝神 ~

唔知點解   次次每月一到都無哂胃口   一講食就好想嘔   今次唔例外   都係全日無食過野   仲唔覺肚餓   勁呀 ~

~~~~

( 23-MAR-2009  MON )

肚唔痛   但胃痛 + 頭痛 + 超級想嘔   一早已經洗頭沖涼預備番工   但一出門口已經勁想嘔   所以最後都要請 S/L   留喺屋企瞓覺休息   全日只係靠杯熱菜蜜吊命咋 ~

~~~~

星期二 ( 24-MAR-2009  TUE )

終於要番工啦   如果唔係會比同事詐型呢 ~ 

早餐食燒賣 + 奶茶   飲番杯奶茶就精神好多呢   不過都係好攰 ~ 

番到菇場唔願郁   幾經辛苦先捱到 Lunch Time 呀   同里奧大人 Share 食香茅豬扒飯   我仲係唔想食嘢   咬幾啖豬扒算喇 ~

夜晚里奧大人自己整前日食剩嘅炒飯   仲炒到變飯焦   脆卜卜又幾好味喎 ~

~~~~

( 25-MAR-2009  WED )

今朝突然好想食沙爹牛肉米粉 + 奶茶   我好鍾意一路食一路飲湯   真係好好味呢 ~

落雨濕濕   雖然坐喺菇場   但都覺得好醃悶呀 ~

Lunch Time 落雨真係好煩   同里奧大人喺菇場附近茶餐廳食嘢就算   行 10 分鐘咋   已經成身濕哂喇   好凍呀 ~

今日睇報紙勁唔開心   我真係好憎好憎好憎好憎愛護動物協會   點解成日救完啲狗狗   就話身體好弱點點點   之後就話好無奈要人道毀滅   咁點解唔比長啲嘅時間   睇睇狗狗嘅身體會唔會日漸好轉   而係要咁快做人道毀滅呢個決定呢 ?!   貓貓狗狗都係一條生命嚟㗎 ~

釀青椒 + 芫莤皮蛋魚片湯 + 徑步 ( MAR-2009 )

今朝好想食餐蛋治   所以覺得個早餐好好好好味呢 ~

番到菇場無嘢做   所以諗下 Lunch 食咩   真係 Shake 開有條路   所以今日又 Shake   今次要四川辣椒味粉   倒出嚟就好攻鼻   不過我覺得啲味又唔係太濃   如果再辣啲就更加正喇 ~

放工又係先買餸後徑步   比咗錢 Join 會真係好有原動力去徑步呀 ~

是日懶餐 - 釀青椒 + 芫莤皮蛋魚片湯

釀青椒 - 突然好想食   所以整呢個餸喇   2 隻青椒 + $6 鯪魚肉   份量啱啱好   里奧大人食第一口已經話 "嘩   好香呀"   我聽到好開心㗎   其實我唔需要佢讚好食   只要佢食得哂啲餸就得㗎喇 ~

芫莤皮蛋魚片湯 - 呢排食太多太多熱氣嘢   所以係時候下下火呢   剥皮蛋嘅時候   覺得啲皮蛋好靚呀   呢啲好似叫松花皮蛋   有隻應該係糖心添呀   不過我無時間影相囉 ~

豬柳茄汁意粉 + XO 醬炒西蘭花 + 徑步 ( MAR-2009 )

好耐無同媽咪 朱朱食早餐喇   所以尋晚特登 10 點半瞓覺   今朝 6 點 15 分起身同佢哋食早餐呢 ~

雖然早起身   但又唔覺好眼瞓喎   唔知係咪太開心呢 ~

早排成日焗紅棗水   依家就焗菊花龍眼肉杞子   所以依家好抗拒飲清水呀 ~

晏晝同里奧大人食粉麵   呢期勁鍾意食炸魚皮呀   所以食炸魚皮河粉    里奧大人就食炸魚片頭牛腩河粉   啲牛腩勁肥呀   等食期間   里奧大人無啦啦好認真問我   牛腩河同牛腩粉有咩分別   嚇到我 O 哂咀   玩嘢咩 ~

今晚里奧大人會遲放工   所以我買完餸就去徑步   之後就拿拿聲開飯喇 ~

是日懶餐 - 豬柳茄汁意粉 + XO 醬炒西蘭花

豬柳茄汁意粉 - 雖然好簡單咁   但我好有心機整㗎   因為我會炒香洋蔥粒   再加埋意粉一切炒㗎   我覺得好好味呢   因為好有口感呀 ~

XO 醬炒西蘭花 - 其實好想食菜心   但覺得同意粉唔夾   所以就炒西蘭花喇 ~  

譚仔雲南米線 @ 佐敦 ( MAR-2009 )

早餐食芝士   多啲鈣質好啲 ~

午餐去麥記   因為勁想食 Shake Shake 薯條   奈何揀咗星洲椒鹽味粉   都唔好食嘅   不過今次用麥樂會卡   所以有細薯條送   都唔錯   不過好熱氣囉 ~

晚餐去譚仔米線   因為奶奶入院   所以就去佐敦食喇 ~

朝早食多士   晏晝食薯條   夜晚食麻辣   呢一日嘅食物真係好熱氣呀 ~  

翻兜咖哩薯仔魚蛋 + 生炒牛肉飯 (外賣) + 腐乳通菜 (外賣) ( MAR-2009 )

今朝遲出門口再加上勁塞車   所以要趕頭趕命食早餐 ~

唔知係咪飲咗中藥嘅關係   個人真係精神咗 ~

晏晝同里奧大人 & 佢舊公司同事食 Lunch   由於時間關係   所以只能夠去公司附近餐廳食嘢 ~

放工要去荃灣拎中藥粉   所以晚餐就食番大前晚嘅咖哩   好在無壞咋 ~

無時間煮飯   所以叫里奧大人買生炒牛肉飯 + 腐乳通菜 ~

食完又去徑步   之後拿拿聲番屋企沖涼睇 "Laughing 哥" 呢 ~    

雲南桂林過橋米線 @ 荃灣 ( MAR-2009 )

一起身見到有太陽   真係人都醒神啲呀 ~

雖然早餐來來去去都係食嗰啲   但唔食又唔得喎   因為我唔食早餐會頭暈無力㗎   所以我成日覺得番工唔食早餐啲人好勁呀 ~

菇場又係無嘢做   真係上網上到悶呀 ~

午餐同里奧大人去食車仔麵 我勁鍾意食佢哋嘅辣汁   因為有好多薑   惹味得嚟又可以驅驅風   唔錯吖 ~

夜晚同里奧大人一齊去荃灣位元堂睇中醫調理身體   今次就 "溶" 喇   兩個人睇咗 6 千幾呀   因為其中有些少冬蟲夏草 + 鹿茸   所以就咁鬼貴呀   希望食一排身體真係好啲啦 ~

之後去雲南桂林酸辣米線開餐   食豬軟骨腐竹酸辣米線 & 豬腩肉魚腐酸辣米線 & 腐乳通菜   正呀 ~

食完番屋企煲中藥喇   里奧大人呢排黐咗孖根呀   一見我坐低呢   佢就會跳 "日日跳日日 Fit" 嘅舞   越跳越開心   黐黐哋   想笑我肥呀   我唔介意㗎   肥人先有福呀   傻瓜 ~  

咖哩薯仔雞翼魚蛋 + 印度薄餅 + 徑步 ( MAR-2009 )

依家多數星期六番教會   本來星期日可以盡情瞓   但可惜體育會係 1 點 Close   所以一定教鬧鐘 10 點 15 分起身食早餐   之後抖個幾鐘就去徑步 lu ~

尋日整一大鍋咖哩   之前整咖哩試過黐底同煮燶咗   所以今次煮嘅時候就不斷咁搞   加上又用錯力拎起鍋咖哩   所以對手腕超痛   真係痛到痛不欲生咁㗎   絕無誇張 ~

晏晝同里奧大人去食 Tea   今次我食秋刀魚餐 $25 (2 條秋刀魚 + 1 碗飯 + 1 飲品)   個辣汁真係超正   下次會再為個汁而叫秋刀魚餐呢 ~ 

是日懶餐 - 咖哩薯仔雞翼魚蛋 + 印度薄餅

咖哩薯仔雞翼魚蛋 - 用大罐嘅楊協成咖哩醬   但唔知點解唔覺辣   之得加指天椒啦   我估會惹味好多呢 ~

印度薄餅 - 喺 Jusco 買嘅印度薄餅   自己無睇到包裝寫乜   就懶醒走去解凍   點知原來唔駛解凍   解凍咗嘅薄餅超難拻出嚟黐住哂   整出嚟個樣超肉酸   其實真係好方便整   唔駛解凍   唔駛落油   但一路食一路覺得好漏囉 ~

韭菜豬肉水餃 + 粉葛赤小豆眉豆瘦肉湯 + 徑步 ( MAR-2009 )

難得每月一次嘅星期六 Off   諗住可以瞓到 10 點半   點知瞓到 9 點半就醒咗   唯有去食早餐啦   去大家樂食炒麵 + 鴛鴦   我覺得大家樂啲咖啡好香呢 ~

嘆完個早餐   就去超市買豬肉   街市買餸   早啲預備好材料   咁樣個人無咁亂㗎 ~

番到屋企首先整好韭菜餃啲材料   之後煲湯   再拖地同洗衫   簡直無比自己停過呀 ~

終於等到 2 點同里奧大人食 Tea   食完又番屋企開工   因為要整咖哩薯仔雞翼魚蛋   早一日整入味啲呢 ~

整完抖陣就番教會   之後再去圖書館借書   今次借咗 7 本食譜   咁嚟緊幾年應該會有啲新菜式呢 ~

是日懶餐 - 韭菜豬肉水餃 + 粉葛赤小豆眉豆瘦肉湯

韭菜豬肉水餃  - 韭菜 ($4) + 水展 ($15) + 水餃皮 ($5.5)   份量啱啱好   感恩感恩   今次用大紅浙醋加蒜泥   唔知點解   加咗麻油啲蒜泥變咗好辣   仲乸住喉嚨添   無幾耐照鏡   個咀唇好似勁爆拆咁   上唇好鞋好痛呀 ~

粉葛赤小豆眉豆瘦肉湯 - 粉葛 ($16) + 赤小豆 + 眉豆 + 2 條粟米 + 2 條紅蘿蔔 + 3 粒蜜棗 + 1 塊陳皮 + 瘦肉 ($23)   煲 3 個鐘   超超超超超超甜呀 ~

勞動完一日就同里奧大人去跑步鬆鬆筋骨 lu ~

菠蘿蜜糖牛仔骨 + 牛油炒粟米 + 火腿粒炒飯 + 徑步 ( MAR-2009 )

早餐食炸菜肉絲芝士腸出前一丁  + 奶茶

午餐食 KFC 家鄉雞烤卷套餐 (烤雞卷 + 墨西哥脆脆配芝士醬汁 + 蘑菇飯 + 辣雞膇)   一個人食一個餐又超飽   但一餐 Share 食又唔夠飽   我覺得個雞卷無咩味道   最好味係個芝士醬汁   其他就無咩特別 ~

是日晚餐 - 菠蘿蜜糖牛仔骨 + 牛油炒粟米 + 火腿粒炒飯

菠蘿蜜糖牛仔骨 - 第一次整   味道甜甜酸酸十分之好食   我勁鍾意食牛仔骨啲骨   但里奧大人就唔鍾意   所以今次我就好細心咁分開骨同肉喇   咁樣食就會方便好多喇 ~

牛油炒粟米 - 時間關係   唔想浸菜同用多個煲煮菜   所以就炒粟米喇   加上 $7 有 4 條粟米喎   抵過食 $16 斤菜心啦 ~

火腿粒炒飯 - 好在突然間諗起冰格仲有火腿 (Expiry Date: 19/3)   如果唔係又唔記得有火腿呢回事㗎喇   本人及里奧大人對今餐餸菜非常滿意 ~

食完洗碗就匆匆忙忙咁去體育會跑步   好在都跑到 25 分鐘   唔係又蝕咗一日呀 ~

超好味鎮江骨 + 薑蔥蓉拌菜心 + 徑步 ( MAR-2009 )

早餐食我嘅至愛吉列魚柳 腸仔 蛋 多士 + 鴛鴦   點解依家啲魚柳會腥㗎   以前都唔會嘅   定係我 "形" 住呢 ~

菇場係淡季   所以基本上我係全日上網   唔係日子唔知點過好 ~

同里奧大人食 Lunch 算係最開心㗎喇   因為菇場無咩同事啱傾   個個都係一句起兩句止咁   啲氣氛好怪   出咗菇場門口就好似唔識咁   唔多願意同妳打招呼   可能佢哋個個都一堆堆   又做咗十幾年   所以係咁掛 ~

里奧大人好遲先放工   所以我自己一個人去徑步   比咗錢真係好有原動力呀 ~ 

是日懶餐 - 鎮江骨 + 薑蔥蓉拌菜心

鎮江骨 - 整咗幾次   今次又係左抄抄右抄抄   但呢次真係二十萬個超好味呀   我好少讚自己煮肉類好味   今次真係例外呀   但次次都影得唔好嘅   無心機 ~ 

薑蔥蓉拌菜心 - 依家 $16 斤菜心   但我買嘅時候係 $12   因為接近收檔呢 ~

蕃茄無頭紅衫魚 + 粟米青椒炒什菌 + 媽咪湯 + 徑步 ( MAR-2009 )

早餐又食芝士蘑菇雞肉腸片治烘底 + 奶茶    唔知幾時會食到厭呢 ~

無嘢做   成朝望住電腦   望到眼澀澀 ~

終於 Lunch Time 可以比對眼抖抖喇   同里奧大人又去菇場附近茶餐廳食墨魚丸河 + 咖哩豬扒飯    里奧大人好鍾意食呢間嘅咖哩   話想我整   無問題吖   不過係楊協成咖哩   唔係呢間餐廳嘅咖哩味囉 ~

放工即去街市買餸   買 2 個蕃茄 + 3 條粟米 + 1 條紅衫魚 (走頭)   買完番屋企 Ready 晚餐喇 ~  

是日晚餐 - 蕃茄無頭紅衫魚 + 粟米青椒炒什菌 + 媽咪湯

蕃茄無頭紅衫魚 - 第 1 次煎魚   仍都可能係最後一次煎   次次整完魚都唔想食   好反胃   唔知點解   所以連張 Recipe 都掉埋   真係唔想再整   整嘅過程又恐怖喎   當我擺條魚落鑊嘅時候跣手   成條魚跌咗落爐邊   好鬼大聲   嚇到我吖   好似好唔想比我食咁   煎嘅時候又唔知點解啲皮黐住隻鑊剷   所以條魚甩皮甩骨咁   好恐怖   真係好驚呢 ~

粟米青椒炒什菌 - 用少少牛油求其炒埋一碟   原來係無味嘅   所以最後要狂加香草同七味粉調味 ~

媽咪湯 - 係前一晚特登煲比我飲嘅   材料有當參龍眼肉淮山黑棗豬展   里奧大人話好好飲    仲以為係我煲添 ~

里奧大人對於我煮碟魚就讚不絕口   因為佢無諗過我夠膽煮魚喎   可惜呢次可能係最後一次呢 ~

仿膳飯莊 @ 德福廣場 ( MAR-2009 )

雞絲粉皮 / 鎮江餚肉 /蔥油拌海蜇 / 填鴨半隻 / 蝦子京蔥燒原枝日本遼參 / 上海五香椒鹽排骨 / 
糖醋鮮魚塊 / 仿膳小籠包 (另加) / 松子腩肉炒飯 (另加) / 高力豆沙香蕉

今朝早餐食芝腿治烘底 (少油少蛋走牛油 ) + 奶茶    我相信應該無咁肥 ~

番到菇場好悶呀   望住個鐘   好似唔郁咁   簡直渡日如年呀 ~

晏晝同里奧大人最後一擊去興記   今次好好彩有卡位   可以舒舒服服咁食呢 ~

放工即去 Shisedo 修眉   再買按摩膏   我覺得 $380 都幾貴   不過女為悅己者容   所以都值得嘅 ~

之後就勁開心喇   因為約咗媽咪 家姐 里奧大人一齊去德福仿膳食晚飯 ~

今次食遼參填鴨套餐   恆生簽賬有 6 折優惠  $483/套餐   不過驚唔夠食   所以加咗小籠包同埋炒飯   初初諗住唔夠食   點知食剩   所以比媽咪帶番屋企 ~

我覺得填鴨麻麻哋   但啲餸菜同炒飯就唔錯喇 ~

其實填鴨係咪即係片皮鴨呢   因為好似片皮鴨係得皮無肉   同埋多數兩食   如果係咁   我都係鍾意食片皮鴨多啲   因為我唔多鍾意食肉呢 ~

住家飯 @ 媽咪屋企 + 徑步 ( MAR-2009 )

由今日開始   每朝都要笑住番工   因為要感恩自己有賺錢嘅能力 ~

早餐先黎個芝士蘑菇雞肉腸片 + 鴛鴦   食得飽   做嘢先有原動力   就算無嘢做都唔會 "中" 眼瞓呢 ~

如我所料   番到場都係無嘢做   菇場內寂靜無聲   氣氛令人好想瞓覺   但我唔會   因為無公事做   都有私事做嘛 ~

晏晝同里奧大人去下村食車仔麵   雖然辣到飛起   不過食完個食就好暖喇 ~

今晚里奧大人會同朋友去中央圖書館搵資料   所以我就番媽咪屋企食晚飯喇 ~

早啲食飯早啲走   番到屋企都係 9 點   仲可以做埋運動添 ~

冬菇枝竹燜排骨 + 蕃茄薯仔魚湯 ( MAR-2009 )

今朝食完早餐就番教會喇   星期日做咩都會慢吞吞   所以到 3 點先食 Tea   今次食燒賣 + 腸粉 + 粉果 + 勁辣魚蛋  + 韮菜豬腸 + 珍珠奶茶    呢餐好飽呀 ~

食到飽就去買餸   呢樣係星期日唯一嘅拍拖節目 ~

屋企幾百張食譜   所以係時候要整 d 簡單嘅新菜式 ~

是日晚餐 - 冬菇枝竹燜排骨 + 蕃茄薯仔魚湯

冬菇枝竹燜排骨 - 材料有 10 隻冬菇 + 1 包炸枝竹 + $10 排骨   又係第一次整   不過味道唔夠濃   有待改善   不過都好好食㗎   因為我好有心機整呢 ~

蕃茄薯仔魚湯 - 材料有 3 條細紅衫魚 + 3 個蕃茄 + 1 個薯仔   材料合共 $30   原來滾湯都幾貴 ~    

脆肉瓜雲耳燜雞柳 + 芝麻糊年糕 + 徑步 ( MAR-2009 )

今朝遲咗出門口   所以雖然天氣凍咗   但我都覺得好熱呢 ~

早餐要食飽啲   因為要 2 點先可以食 Tea   所以就食五香肉丁腸仔公仔麵 + 凍奶茶喇 ~

番到菇場等放工   真係悶到爆呀 ~

等呀等   等呀等   終於等到同里奧大人食 Tea   但早餐仲未落格   所以食雞翼薯條   估唔到有 2 隻雞翼   樣樣都熱辣辣   好熱氣呀 ~

食飽飽就買餸喇   之後去徑步 ~

是日懶餐 - 脆肉瓜雲耳燜雞柳

脆肉瓜雲耳燜雞柳 - 第一次整   我都覺得唔錯   比我想像中有味道 ~

食完抖陣再煮芝麻糊年糕   芝麻糊係罐裝即沖嘅   但就咁煲係無味   所以一定要加冰糖    咁就又甜又滑   正呀 ~   

打邊爐 @ 大家樂 + 徑步 ( MAR-2009 )

做完運動   朝早急步上樓梯都唔會膝蓋痛   Good Good Good   我要努力跑走哂身上所有肥膏 ~

早餐又食蘑菇雞肉腸片蛋治烘底 + 鴛鴦   星期五喇   食咩都開心呢 ~

番到菇場雖然忙   但覺得時間過得好快   Good Good Good ~

話咁快又同里奧大人見面   但落雨濕濕   所以去公司附近食粉麵   食完又去買樓上燕窩莊買大片花旗參   $39/4 兩   所以買咗 4 樽   再買盒玫瑰花茶同埋同仁堂白鳳丸   個盒好靚呀 ~

又係 4 點幾個人唔多舒服   真係無哂 Mood   所以最後決定唔煮飯   比自己他息下 ~  

突然凍凍地   所以去大家樂打邊爐喇 ~

食完行陣就去跑步喇   出一身汗真係好舒服呢 ~

臘腸飯 + 瑤柱浸勝瓜 + 徑步 ( MAR-2009 )

晨早流流搭車番工   諗住閉目養神   點知後面兩個男仔係咁傾偈   仲係咁講粗口   最難頂係佢話 : "如果我溝邊個   我實溝到"   咁鬼爛口   鬼鍾意你咩   我真係好想擰住後面望下佢係點嘅樣   咁有自信嘅 ~ 

早餐食芝士蘑菇雞肉腸片治烘底 + 奶茶    同事見我影相知我寫 Blog   咁都幾好   唔駛解釋咁多 ~

番到菇場有煩嘢搞   煩到唔想做   最怕見到 一大堆數字   真係望到都暈呀 ~

同里奧大人去公司附近茶餐廳食 Lunch   食火鴨絲燜米 + 油醬多   味道唔錯   又大碟   以茶餐廳嚟講算係唔錯㗎喇 ~

呢排唔知點解一到 4 點幾就好唔舒服   可能飲得太多紅棗水   燥得滯 ~  

是日懶餐 - 臘腸飯 + 瑤柱浸勝瓜

臘腸飯 - 兩條臘腸就縛得住里奧大人個心呢   最衰唔可以日日食   哈哈 ~

瑤柱浸勝瓜 - 第一次整   效果唔錯   味道唔錯 ~

呢排覺得身體唔多妥   覺得係時候要做番運動   所以我又 Join 番體育會   咁就再無籍口話落雨唔運動啦   同埋最緊要係比咗錢   唔做會蝕㗎 ~

沙茶金菇粉絲肥牛鍋 + 唐生菜 + 芫茜皮蛋大魚片湯 ( MAR-2009 )

早餐食芝腿菠蘿包 + 奶茶   食食下覺得個菠蘿包都唔係甜嘅   唔好食 ~

午餐食麥記    一次過食哂包薯條同蘋果批   飽到想嘔 ~

晚餐要清清哋   再要加多個清熱湯水 ~

沙茶金菇粉絲肥牛鍋 + 唐生菜 + 芫茜皮蛋大魚片湯

沙茶金菇粉絲肥牛鍋 - 半磅肥牛 + 1 包金菇 + 2 包細粉絲   估唔到咁大堆頭 ~

唐生菜 - 唔點蠔油真係好難食   無味嘅 ~

芫茜皮蛋大魚片湯 - $4 芫茜 + 2 隻皮蛋 + $5 大魚肉 + 2 碗半水   好好飲呀  ~

住家飯 @ 奶奶屋企 ( MAR-2009 )

早餐食餐肉通粉配腸仔蛋多士 + 鴛鴦 

午餐食雲吞炸魚皮米粉 + 鹹魚肉餅飯 

放工買 Cake 比媽咪做甜品   之後去到奶奶屋企即刻有飯食喇   今次又有飯後甜品   但我話下次唔好再整   因為次次都食好厭呀 ~

食完同里奧大人去 APM 買銀包   呢期鍾意長銀包   所以買嚟當生日禮物   咁啱又有 8 折   真係比錢都比得開心呀 ~

火腿蝦仁炒飯 + 腐乳唐生菜 ( MAR-2009 )

星期日晚出席朋友婚宴  8 點到達   9 點開席   同里奧大人食到 10 點半就走   其實仲未散席   不過我好眼瞓   想早啲番屋企瞓呀 ~

~~~~

今朝勁眼瞓   飲完鴛鴦都勁眼瞓 ~

最慘番到菇場又有急嘢做   搞到個人暈陀陀咁 ~

牛頭角下村就拆卸   所以同里奧大人再去興記食 Lunch   但估唔到超多人   仲要有 10 幾個人等位   等完都夠鐘開工咯   時間唔等人呀   唯有即刻跑去海皇食粥啦 ~

唔知係咪飯氣供心   番到菇場真係好眼瞓呀 ~ 

一早諗定好晚餐嘅餸菜   咁就可以搭車途中瞓覺   因為實在太攰喇   其實我好少會坐車瞓覺   因為覺得好無安全感呢 ~

是日懶餐 - 火腿蝦仁炒飯 + 腐乳唐生菜

火腿蝦仁炒飯 - 火腿 + 蝦仁 + 蛋 + 蔥花 + 老抽 + 冷飯   一齊炒炒炒   極度方便呀 ~

腐乳唐生菜 - 勁想食腐乳   所以買唐生菜   $5 有 6 小棵   真係勁抵 ~