秘制烤鴨半隻 (外賣) + 蠔油燜茄子 ( 5-JAN-2025 )

( 5-JAN-2025  SUN )

今朝又同里奧大人一齊食早餐   之後去佢公司幫佢做嘢喇 ~

同阿妹傾咗一陣偈就要做嘢   其實未搞掂   但我要番自己教會事奉   所以都要走 lu ~

搞掂哂再買埋午餐就番屋企   咁又已經 2 點半   好在里奧大人啱啱放工 ~

好想食咕嚕骨   所以買盒兩餸飯 Share 食

買咗秘制烤鴨半隻 ($65)

里奧大人食完就瞓陣晏覺   我又瞓唔到喎   咁呢兩日開始乾燥   可以洗張羽絨被 ~

之後做下小清潔   再熨埋衫就燜餸 ~

里奧大人 4 點半起身   佢諗住熨衫   但我話我熨哂啦   佢話估唔到我咁快熨   我話唔攰咪做埋囉 ~

咁我要執嘢   今晚 6 點半先食得   所以叫里奧大人去做運動   番嚟沖埋涼先食飯就仲好啦 ~

里奧大人約咗姑奶聽日飲茶   我話又唔早啲講   咁我預埋你聽日嘅 Lunch Box 家嘛   依家又要我食隔夜飯   之後里奧大人好細聲話午餐都係隔夜飯啦   真係笑死我呀   仲諗住整鬼佢添 ~

佢話飲茶飲到 12 點之嘛   可以留比佢做午餐都得㗎   咁其實半碗飯係可以留番聽晚食都得   只不過唔食就真係早啲講   咁我唔駛煮多啲飯嘛 ~

是日晚餐 - 秘制烤鴨半隻 (外賣) + 蠔油燜茄子

秘制烤鴨半隻 (外賣) - 其實今晚係食焗雞翼   不過突然想食鴨   所以買嚟食喇 ~

蠔油燜茄子 - 里奧大人唔鍾意食就咁蒸嘅茄子   咁我蒸完再加豉油蠔油豆板醬炒下啦   佢就可以食好多呢 ~

洗完碗就即沖涼   之後同里奧大人一齊網上散拜   完咗就睇 "中年好聲音 3" 同埋食綠豆沙 ~

睇到 10 點半   里奧大人又睇下明珠台   原來做 "侏羅記世界"   估唔到又幾好睇喎   其實我係睇過   因為尾段開始好睇   所以想再睇   仲睇到 11 點 15 分   不過做到 12 點就太夜喇   所以里奧大人幫我錄起去   留番聽晚先再睇   我就可以瞓覺喇 ~