蜜汁芝麻燒排骨拚越南春卷炸雲吞 + 櫻花蟹籽炒飯 + 鮮果芝麻雞沙律 ( 9-DEC-2025 )

( 9-DEC-2025  TUE )

尋晚半夜去完廁所   好感恩好快瞓得番呢 ~

早餐都係食肉桂黑芝麻包   但仲要食埋聽日先食完   哈哈 ~

菇場忙呀   不過仲係好攰   好在無做錯嘢咋 ~

今日菇場幫阿花搞歡送聚餐   所以有 Free Lunch 食喇   開心開心 ~

準備開餐

掛住傾偈   唔記得影蜜汁芝麻燒排骨同埋士多啤梨香酥骨

炸雲吞 & 越南春卷

椒鹽雞中翼

白汁雜菌天使麵

櫻花蟹籽炒飯

煎釀三寶

大蝦鮮雜果沙律

鮮果芝麻雞沙律

芒果西米布甸

阿怪每次夾嘢都係逐件揀   今次又係咁   阿爽好大聲話唔好係咁揀啦   之後全場靜哂   得佢喺度傻笑   頭先開始食嘅時候又係咁   明知後面等住佢夾   佢又係咁揀完先放上碟   食嘅時候又企喺張枱前面   真係好似一離開張枱就無得食咁   又唔知自己阻住哂人哋夾嘢 ~

忙下停下   差唔多 5 點搞掂   就即刻搵番姊妹 MH   上次喺 Ivy 安息禮拜見到佢   之後佢趕住番工   我話遲啲搵佢   因為太耐無搵佢   我喺 FB 留訊息比佢叫佢 Add 我 Whatsapp   因為我無佢電話號碼   之後佢 Whatsapp 我啦   原來我係有佢電話號碼   我嗰下覺得自己好白痴呀   無 Whatsapp 佢唔代表無佢電話家嘛   之後佢都話同我傾過電話   不過我話太耐唔記得了 ~

原來 14 年無見   真係唔經唔覺   可能成日喺 FB 見到呀 ~

佢話我成日 Post 煮嘢食嘅相   每次我搵番啲舊朋友   佢哋第一句都咁講   我覺得好搞笑 ~

咁我話都無咩自己嘢好 Post 嘛   佢話我同同事都幾好   成日好 Enjoy 咁   呢樣真係好感恩   始終我成日都講話呢間公司同事永遠都係同事   唔會做到朋友   估唔到依家會變為朋友   哈哈 ~

太耐無見更加無傾過偈   但一傾又回憶番哂嚟   真係好開心   不過我話要放工喇   要遲啲先傾呀 ~

放工即走   今日里奧大人送水姑機   之後諗住番嚟食飯   咁我蒸熱同焗熱哂啲晚餐   但里奧大人要番公司處理緊急嘢   所以我都沖涼先 lu ~

里奧大人差唔多 8 點先番到屋企   我叫佢沖涼先   因為我要再整熱啲嘢呢 ~

洗埋碗就開機洗衫   之後再熨衫   搞掂就睇 "新聞女王 2"   其實好多集無睇   不過又唔想重溫   只係想聽下廣東話呢   唔駛睇字幕真係舒服好多   哈哈 ~

今晚同里奧大人有啲嘢傾   真係差啲傾到鬧交咁滯   感恩之後無嘢咋   不過今晚都好攰   10 點 15 分都要瞓覺 lu ~