茄汁洋蔥雞扒 + 超甜粟米 ( 24-DEC-2025 )

( 24-DEC-2025  WED )

尋晚瞓得唔係咁好   雖然開冷氣但又好似有啲熱咁 ~

早餐食菠蘿包   里奧大人食甜餐包搽花生醬 ~

食完就去里奧大人公司坐陣先番工   我同里奧大人講開啲人 42 吋長腿   我話我有 40 吋都夠喇   佢話妳條腿都有 40 喎   不過係 cm 之嘛   我話啋過你呀   哈哈 ~

咁我同里奧大人去 Pantry 沖嘢飲   之後有個人企喺我隔離裝我   原來係榴槤   佢話想嚇我呀   不過嚇唔到囉   呵呵 ~

之後見到阿妹番嚟   我同里奧大人話熄房燈嚇阿妹   佢見到里奧大人即刻話嚇死人咩   哈哈   因為本身里奧大人番 1 點嘛   依家幫榴槤就早啲番囉 ~

阿妹都仲係以為我嚟幫手   仲覺得嗰個名牌係我   我話我真係嗰個名   但我今日真係要番工   哈哈   之後佢話佢真係好想我幫手呀   不過 12 月請得太多假   所以唔敢請囉 ~

菇場唔忙   又做自己嘢 ~

Lunch Time 出去食口水雞米線   食完就行 Mikiki   行到 12 點 45 分都番菇場喇 ~

麻辣口水雞米線 ($39)

1 點 20 分收到公司群組放 4 點半   真係好開心呀   因為諗住無得放早嘛 ~

阿怪係都要開 2026 D/N   但 System 一定係開 2025 年   之後問佢點啦   佢叫我問番小說點   我叫佢自己問完再同番我講 ~

咁我本身已經開咗張 D/N   佢話可以 Del 咗個號碼   我再開張新就無問題   但佢根據都無 Del 仲話佢無話可以 Del   呢下我好慶   同埋佢講嘅語氣係開始發顛   所以我好大聲話得得得   唔駛再同我講   呢啲人欺善怕惡   如果我唔出聲   佢肯定更加大聲 ~

佢最唔鍾意係因為我問咗阿輸同小說   但我一定係要問咗佢哋先   佢哋都話阿怪咁做都有問題   不過間公司 Filing 係由名怪負責   到時有咩問題佢要自己搞掂就可以 ~

搞掂又做自己嘢   因為放 4 點半   所以就覺得好快放工咁喇 ~

買埋迷你冬甩就搭車去里奧大人公司   之後即刻派比佢啲同事食喇   最搞笑有人問係咪我整 ?!   我話係就好喇   哈哈 ~

本身想買 18 個葡撻   但得 8 個   咁職員話焗緊   不過我都唔等喇

咁即睇凍櫃有咩   見到有迷你冬甩就仲好   仲要係 $13/2 件   所以轉買 18 件迷你冬甩喇   最後食剩 3 件   咁我番走喇   里奧大人鍾意食嘛

我 5 點 25 分走   阿妹好慘咁話妳走喇 ?!   我話要煮飯呀   之後要我陪佢   到 5 點 55 分同里奧大人一齊走   佢又好慘咁話妳走喇 ?!   我話我真係走喇   我要煮飯呀 ~

番到屋企即預備晚餐同埋煮蕃薯糖水   所以叫里奧大人沖涼先喇 ~

差唔多 7 點 20 分先開餐   不過都好呀   因為中午食到好飽   同埋今晚只係煮個辣味拉麵比里奧大人食就得   我真係食唔落飯同麵呀 ~

是日晚餐 - 茄汁洋蔥雞扒 + 超甜粟米

茄汁洋蔥雞扒 - 之前醃咗塊雞扒   所以今晚點都要煮呢 ~

超甜粟米 - 上星期日買   又係今晚點都要食   估唔到係好甜好多汁呀 ~

洗埋碗就開機洗衫   之後沖涼休息 ~

里奧大人話要網上上堂呀   佢自己都差點兒唔記得   真係搞笑 ~

抖到 9 點就食蕃薯糖水   食完就熨衫喇 ~

睇下 Youtube 又打機   里奧大人 10 點上完堂就一齊睇 Youtube   我睇到 11 點都瞓覺 lu ~