年初一 至 年初六 ( JAN-2009 ) + ( FEB-2009 )

年初一

朝早去媽咪屋企   再一齊出發去婆婆屋企拜年食飯   本來開開心心   但比婆婆催催共   所以成朝都係火 ~

里奧大人唔舒服   所以喺屋企休息   番到屋企里奧大人仲瞓緊   瞓到 5 點幾先起身   所以我就早啲煮飯 ~

是日晚餐 - 鹵水雞翼 + 腐乳生菜

食完飯去租碟   租詹瑞文嘅 "玩得喜"   當中知道詹瑞文為讀演藝   一年時間內學好多嘢嚟充實自己   真係好值得欣賞呢 ~

~~~~

年初二

同里奧大人喺屋企附近食完早餐   梳洗後就去媽咪屋企食開年飯喇   不過 Feel 到自己開始唔舒服   無哂心機 ~

去到媽咪屋企   啲餸已經整到 7788 喇   唔駛幫手就諗住同朱朱玩   點知朱朱都凍到唔願郁呀 ~

食完我就要瞓喇   因為感覺到開始發燒   又越瞓越凍   喉嚨又痛   不過又唔可以瞓得太耐   因為要趕下場去奶奶屋企食開年飯呀 ~

去到都無心機   而且太多人   費事傳染比佢哋   喺房休息到開飯為止 ~

上年年初二就傷風   今年就感冒   年初二好黑呀 ~

~~~~

年初三

食完早餐就即刻睇醫生   睇開嘅醫生又休息   不過唔理喇   未睇過都照睇   因為實在太辛苦喇   咳到甩肺 ~

想去食嘅餐廳要初八先開   所以晏晝去大家樂算喇   最緊要係唔駛行咁遠呀 ~

屋企有好多糕   里奧大人話見我唔舒服   想親自煎糕過我食喎   是但啦   難得有人開口話煎    唔通話唔好咩   一話唔好   以後就唔駛旨意再有機會呀 ~

~~~~

年初四

放埋今日咋   所以要好好珍惜呢   同里奧大人去太興食早餐   食完兜個大運就番屋企喇 ~

晏晝唔想諗   所以又去大家樂   其實我好鍾意去大家樂   因為我好鍾意柔和嘅黃光㗎 ~

食咗藥   個人好似好番少少   所以就煮飯喇   今次只係煲飯同淥菜心   因為個餸係水姑喺初二嘅時候比我嘅   所以唔想嘥嘢就煮埋囉 ~ 

是日晚餐 - 梅菜排骨 + 菜心

~~~~

年初五

今朝 8 點半前要番到菇場   知道菇場附近好多餐廳都未開   所以去麥記食早餐 ~

番到菇場都無心機   一對住電腦   啲眼水即刻標哂出黎   雖然勁辛苦   但又好開心喎   因為去美心皇宮食完開年飯就放工喇 ~

里奧大人仲係 Off   所以約去尖沙咀   陪佢食完酸辣米線   再行一陣就睇戲喇 ~

今次嘅戲飛係 Free 㗎   揀咗 "馬利與我"   里奧大人強調話上網 Check 過 "馬利與我" 係 Happy Ending   呃人嘅   喊到豬頭咁呀   都唔知里奧大人 Happy Ending 嘅定義係咩 ~ 

病緊   所以呢樣唔得嗰樣唔準   無可選擇之下就去太興   想食嗰啲又無喎   勁唔開心呀   求其叫燒肉燻蹄飯 + 上湯雜菜煲   可能感冒嘅關係   覺得樣樣都無味 ~

~~~~

年初六

要番工   但真係唔願起身囉 ~

無咩胃口   所以去 KFC 食牛角包 + 奶茶    越食越眼瞓 ~

番到菇場靜英英   真係唔明點解可以咁靜   靜到想瞓覺 ~

六六無窮 ( JAN-2009 )

年三十晏晝去街市   一心諗住滾魚湯同煲雪梨水   點知去到咩都無   無哂心機 ~

番到屋企又要執嘢   之後就全心全意整晚餐喇 ~

是日晚餐 - 六六無窮

茄汁蝦仔 - 嘻嘻哈哈

墨魚卷 - 年年有餘

螺片生菜 - 和氣生財

撈麵 - 長撈長有  撈到風生水起

蕃茄薯仔排骨湯 - 鴻運當頭

腐竹湯丸 - 富足團圓

行年宵 + Outback Steakhouse @ 銅鑼灣 ( JAN-2009 )

今年嘅年廿九非常之開心   因為又可以同里奧大人 家姐一齊睇戲行年宵 ~

里奧大人唔舒服無番工   家姐就逢星期六 Off   所以得我一個趕頭趕命咁走 ~

今次去康怡嘅 MCL 睇戲   所以去太古城 Food Court 食嘢   去度邊度都咁多人呢 ~

睇 3 點鐘嘅 "3D 超級零零狗"   我覺得好好睇呀   仲覺得有啲感人添 ~

睇完買杯珍珠奶茶   再搭廿年無搭過而好想搭嘅 "叮叮" 去銅鑼灣   原來 "叮叮" 都好多人搭    同埋車廂好迫   無位坐又大風   真係幾辛苦下 ~

一心諗住 6 點去到維園係無咩人   點知原來都好多人   好在都睇到同買到嘢咋   唔係真係無咩心機咯 ~

因為家姐想買花   所以行埋濕檔   地下又無想像中咁濕   同埋原來有好多花睇㗎   再幻想自己屋企有個大花園種哂所有花   真係諗下都開心呀 ~

行咗兩個幾鐘   對腳同條腰開始痛喇   所以買完花就走喇 ~

其實臨走前好想買呢隻電動小吉   但我又唔多鍾意佢係電動   所以最後都係唔買喇 ~

今晚又去 Outback   等咗 40 分鐘先有位   不過都預咗去到邊都要等 ~

9 點幾食到 11 點   對於一個早瞓嘅我真係好辛苦呢 ~

~~~~

預咗 One Day 大掃除   所以今朝真係唔番得教會喇 ~

食完早餐   買埋餸就番屋企大掃除   屋企細細   但要執要抹真係幾辛苦   好在平時我都鍾意整整齊齊   如果唔係就大鑊喇 ~

奶奶比咗啲水仙   但都未開花   天氣咁凍   唔知會唔會開呢 ~

喺年宵買咗個五代同堂   顏色非常之 Colorful   我勁鍾意㗎 ~

晏晝同里奧大人食完酸辣米線   再行大埔嘅年宵市場   簡直大開眼界呀   因為從未見過咁細嘅年宵市場   又無嘢睇喎   行唔夠 5 分鐘就可以走人 lu ~

奶奶團年飯 @ 景福酒樓 ( JAN-2009 )

尋晚輪到同里奧大人屋企人一齊食團年飯喇   不過無影到相   費事又問長問短   同埋個個都肚餓   咁就更加唔好影啦   快啲食完要快啲去辦年貨 ~

番到屋企已經 9 點幾   洗一機衫就瞓覺喇   呢排夜咗瞓   爆瘡唔靚女呀 ~

~~~~

今朝勁嘆   因為老細唔喺菇場   加上今朝又咁凍   所以校咗 8 點鐘先起身   再去美心食早餐先番菇場 ~

一心諗住食印象之中好好味嘅糯米雞   點知今次難食到爆   口感腍劈劈   食到一半已經唔想食 ~

番到菇場真係好 Free   同埋無 Mood 做嘢   因為一諗起晏晝同里奧大人 家姐睇戲再行年宵   個心已經飛咗去佢哋度 lu ~ 

2009 牛年快樂

祝大家

                 二零零九嘅牛年

                 人人順景樂連連

                 身體健康無病纏

                 加薪幅度勝舊年

                         總之

                    人人有運行

                 日日開心笑哈哈

團年飯 @ 星悅鮮廚 ( JAN-2009 )

尋晚 Really Really Happy 呢   因為又可以同最愛嘅屋企人食團年飯呀 ~

因為要同埋朱朱一齊團年   所以一定要帶埋佢啦   哈哈   佢好乖呢   因為食飽奶   所以會瞓喺張櫈度   唔理我哋㗎 ~

番到屋企附近同里奧大人去許留山食龜苓膏   我就試咗日本抹茶糕   我覺得好好味   因為唔太大個同唔甜呢   啱哂我啲想食但唔敢食咁多嘅女人 ~

~~~~

今朝又 Really Really Happy 呢   因為同里奧大人一齊去 Oliver's 食早餐呀 ~

今餐抵到震呀   因為用 $30 Cash Coupon 再加 $10 Coupon   咁原價 $54 就只需要比 $14   可以嘆兩份早餐   真係好 Happy 呢 ~

番到菇場忙下靜下咁   但唔敢講得閒   因為好邪㗎 ~

好想食薯條   所以同里奧大人去麥當勞   今餐又係好抵呀   因為之前入咗會   送咗 1 張 Coupon (芝士漢堡 + 細粟米 + 細可樂)   我就食脆辣雞腿包 + 細薯條   埋單 $19.8 咋   兩個人十幾蚊食 Lunch 真係食得好開心呀 ~

里奧大人呢排瞓得唔好   再加上連續一個星期出街食飯   依家喉嚨痛呀   比我痛好啲咯   我可以順便戒下口   停下口嘛 ~

住家飯 @ 媽咪屋企 + 遠方寄來的新年賀卡 ( JAN-2009 )

尋晚勁開心啦   因為里奧大人約媚媚傾功課   我就番媽咪屋企食飯   不過我係即興   唔係一早約定嘅   好在咁啱有湯飲啫 ~

食完飯   傾下偈又食下生果   真係好嘆呢   但覺得里奧大人無得食住家飯又好似好慘咁喎 ~

番到屋企開信箱   又收到 Blog 友 冰姑 寄嚟嘅新年卡   我發覺自己好有長輩 Feel 呀 ~

呢兩日都好多公司都開始放假 lu   所以無咩人搭車   好快番到菇附近呢 ~

~~~~

今朝食芝蛋治烘底 + 鴛鴦   都話明要熟蛋   但成日都係生生地咁嘅   我好怕啲蛋汁家嘛 ~

番到菇場好開心   因為番多兩日就放新年假 lu ~

晏晝同里奧大人去茶餐廳食 Lunch   但今日比較熱   行到去都有少少汗   但比啲風一吹又覺得好鬼凍   新年流流唔想病呀 ~

味千拉麵 @ 大埔 ( JAN-2009 )

尋晚真係搞嘢   Admin 同事 5 點 35 分先通知   話如果換咗新銀紙嘅同事要留低即時點算   如果唔拎嘅話   數目唔對公司就唔負責㗎喇   咁講即係唔留唔得啦 ~

終於搞到 6 點 10 分先走得   咁都好   可以約埋里奧大人一齊放工番屋企 ~

同里奧大人去味千拉麵   今次試下便當   估唔到都唔錯喎   因為有我鍾意食嘅金菇牛肉卷同螺肉   仲有個麵豉湯   $45 又抵喎   里奧大人就獨孤一味   蒜片豬軟骨拉麵    但蒜片一定要分開上   否則會林哂   勁難食㗎   再加多碟日式炒雜菜   飽哂 ~

番到屋企好攰   所以沖涼算喇   臨近年廿八   咩都未做   咩都未執   咩都未買   諗起都頭痕呀 ~

~~~~

尋晚瞓得勁差   加上天氣又好似回南天咁   所以無咩胃口   食花生醬多士 + 鴛鴦   食一啖已經想反胃   但唔食齋飲鴛鴦仲閉   所以最後都格硬食哂 ~

番到菇場忙到唔知時間   忙到抖唔到氣呀 ~

里奧大人唔舒服   所以晏晝先番工   難得咁樣   即刻叫佢去 Pizza Hut 食 Lunch   因為 $35 有個 Set Lunch 好抵呢   再加 $8 可以有個俄羅斯沙律   其實係普通沙律   仲係無味又細碟   細碟度好似喺人哋度 "北" 過嚟咁   搵笨嘅 ~

菇場超級靜嘅   講電話都要好細聲好細聲   仲要用手掩住個口果隻喎   所以啲人成日以為我唔舒服   點解把聲咁   真係講都無人信呀   但都唔明點解   個女同事可以喺咁靜嘅環境下剪手甲   仲要係剪哂 10 隻指甲   因為聽到好多下啪啪聲   好心啦   番屋企先剪嘛   我覺得呢啲行為好討厭   同埋覺得彈到周圍好污糟咁呀 ~   

休息 ( JAN-2009 )

星期日同星期一都比每月一到纏繞   勁唔舒服   但都無想像中咁痛   咁都好啲 ~

所以我好好㗎   知道自己呢幾日煮唔到飯   所以星期六特登煲雪梨水比里奧大人滋潤一下呢 ~

我真係好怕里奧大人病   因為我會超勁心痛   自從佢上次感冒   病到面青青之後   我就覺得佢一食街嘢多就會病   所以我有時連續幾日唔煮飯   我就會好驚好唔安樂咁㗎 ~ 

好在星期日唔駛番工   可以比我全日瞓全日休息 ~

~~~~

要番工喇   所以點都要食嘢   早餐去 Panash 買杏仁酥   甜甜哋唔錯 ~

晏晝里奧大人同 Dept. 食團年飯   所以我就買火腿通粉番菇場食   之後瞓覺 ~

夜晚都係無胃口   勁唔想食嘢   所以就咁飲盒利賓納算喇 ~

~~~~

今朝好好多喇   可以食到嘢   但都係好想反胃   食到一半唔想食   好浪費呢   但真係食唔落呀 ~

番到菇場諗住他他條條   點知單單都係急急急 ~

好在晏晝可以同里奧大人一齊食 Lunch 啫   我早午晚同里奧大人一齊食都唔會悶㗎 ~

元氣壽司 @ 大埔 ( JAN-2009 )

里奧大人星期六多數 12 點放工   如果準時 8 點番到公司同唔忙嘅話   所以佢多數會番屋企瞓陣先   等埋我番屋企就一齊去食 Tea ~

今晚會同家姐食飯   所以我煲雪梨水算喇 ~

今次去食元氣壽司   因為家姐勁想食帆立貝   今期元氣做特大北海道帶子 ($9/隻)   我初初以為係 $9 碟   原來係 $9 隻   不過家姐就鍾意食   所以無咩所謂   佢自己食咗 4 隻   我同里奧大人就唔喇   唔想食咁多生嘢 ~

食完凍想食熱   所以再食燒賣 + 腸粉 + 粉果   今勻真係好飽喇 ~

食完同家姐買全盒   佢再上我屋企睇 DVD "林海峰求其大合唱 Part 2"   睇到 11 點 45 分就走 lu   因為最後一班車係 12 點呢 ~

朋友婚宴 @ 翰騰閣 (又一城) ( JAN-2009 )

尋晚朋友茄子結婚   其實茄子係里奧大人舊公司同事   好多時搞 Gathering 我都會一齊去   再加上我又同茄子 MSN   所以好快就熟喇 ~

里奧大人聽完 Seminar 就可以直接去又一城   所以先約咗其他舊同事喺麥記傾下偈 ~

我去飲之前多數會食啲嘢打底   因為多數要 9 點幾先開席   我唔餓得㗎   唔係好易掹 ~

我覺得今次場地比較窄   同埋樓底較低   所以覺得有啲焗   塊面焗到紅卜卜   啲人以為我飲咗好多酒   我唔鍾意飲酒   因為我覺得成陣啤酒 "除" 好臭 ~

依家結婚興開席前會有 Slide   我好鍾意睇㗎   因為細個啲樣好得意呢 ~

尋晚食到魚就要走喇   因為已經 10 點 45 分   里奧大人要番 8 點   所以要早啲番屋企瞓覺 ~

~~~~

好在今日係星期六   所以可以遲小小番公司 ~

今朝比較趕   所以食芝腿治烘底 + 奶茶 ~

稻香 @ 九龍灣 ( JAN-2009 )

尋晚放工同里奧大人 奶奶 姑奶一齊去九龍灣稻香食晚飯   6 點半就食晚飯   唔知係咪未肚餓   所以覺得啲餸麻麻哋好味 ~

本來想影相   但費事又問黎問去點解影相   影嚟做咩   所以唔影 lu ~

食到 7 點半就走喇   番到屋企附近就有啲肚餓   所以去許留山食嘢   里奧大人就食龜苓膏    我就試下啲蘿蔔糕   不過唔係咁好味   食完個口有啲苦   同埋最唔鍾意就係叮熱   但唔知做咩鬼又會有好多油㗎喎 ~

~~~~

今朝早喇   同里奧大人一齊去 Oliver's 食早餐   因為一份早餐滿 $26 就可以用 $5 Coupon    感覺上好似好抵   仲之係有 Cash Coupon 就覺得好咁抵啦 ~

菇場無咁忙喇   所以可以慢慢做   不過我覺得講完會好邪   會突然好多嘢做咁囉 ~

晏晝同媽咪 里奧大人去翠園飲茶   一個星期飲一次茶真係唔錯呢 ~

雲吞麵 + 薑蓉拌菜心 + 芫茜皮蛋魚片湯 ( JAN-2009 )

尋晚打完邊爐   驚里奧大人太燥熱   所以都係簡簡單單滾啖湯   煮個麵   淥條菜算喇 ~

是日懶餐 - 雲吞麵 + 薑蓉拌菜心 + 芫茜皮蛋魚片湯

雲吞麵 - 雲吞係雲吞麵舖買嘅   但 Size 就比以前細好多 lu ~

薑蓉拌菜心 - 好大條嘅菜心   1 斤有 7 大條   又甜喎   我仲好呀   里奧大人好怕食到啲 "衣"   所以我就批哂啲 "衣" 出嚟喇   好有心機整㗎 ~

芫茜皮蛋魚片湯 - 要下火   所以就煲呢個湯喇   今次用大魚肉   覺得好似無咁腥咁   同埋最緊要係無咁多油   如果用鯇魚片會有好多油㗎 ~

天氣太凍   所以都無去徑步   徑開唔徑好似唔多慣   但太凍出街又真係好難頂呢 ~

無啦啦右手痛   可能呢排個袋太重   但我覺得個袋太輕又唔似袋   輕飄飄好無安全感 ~

~~~~

今朝繼續花生醬多士 + 奶茶   希望可以越食越小嘢啦   因為我唔想再咁肥呀 ~

番到菇場繼續忙   唔知係咪咁   所以呢排晏晝無咩胃口呢 ~

里奧大人話好想食 KFC 蜜蜜燒雞翼    去到見好多人排隊   里奧大人話轉去麥記   但又係好多人排隊   之後話去淘大嗰邊   我即刻開始有脾氣   話排隊時間同去淘大時間差唔多   加上我腳痛   唔想行咁遠呀   里奧大人即刻急急腳走番去 KFC 等位   又爭住排隊買嘢   之後話驚唔夠飽   又急急腳去 Panash 買個包   見到佢個樣又好似好慘咁   做咩自己唔忍下啲脾氣呀 ~

打邊爐 @ 稻香 (大埔) ( JAN-2009 )

難得天氣仲咁凍   所以一定要打邊爐   今次去稻香    由 7 點 打到 9 點半   第一次同里奧大人食晚飯食咁耐   其實係因為太飽   所以要停下食下咁囉 ~

今次個豬骨鍋湯底只需 $1   肥牛都就 $12/碟   除咗珊瑚蚌係正價   其他食物都係有特價   所以埋單都係 $260   我覺得都抵呀 ~

我好怕去酒樓嘅洗手間   我驚見到核突嘢   但今次太急   所以都要去   一入去見到清潔阿姐    之後我 V 到半路   聽見有人吹口哨   其實果下都幾驚   因為第一個反應係諗多數阿叔先吹口哨   好小女人會吹   真係一路 V 一路驚   但出黎又無人喎   又會咁嘅 ~

食完咁熱氣嘅嘢   當然要食番生果啦   呢排奇異金果好平   所以買好多   我多數會買一半生一半熟嘅   咁就可以擺耐啲喇 ~

~~~~

今朝要清清腸胃   所以食花生醬多士 + 奶茶   平時唔覺飽   但今朝覺得好飽   應該係尋晚食得太飽定喇 ~

番到菇場忙到震   10點開完會之後就未停過手    第一次覺得啲時間係過得咁快咁呀 ~

晏晝同里奧大人去茶餐廳食羅宋湯螺絲粉餐 + 炸兩 + 炒麵    眼闊肚窄   勁勁勁勁飽呀 ~

食完晏就自已去工業大廈買嘢   因為 Marjorie Bertagne 以開倉價發售呀   所以掃咗好多 Hand Cream ($39 原價 $220)   再買埋 Hand Mask ($39 原價 $320)   Marscara ($39 原價 $128)   唇彩 ( $19 原價$108)   眼影 ($29 原價$148)   妳話係咪好難忍手   同埋最難得係喺正我公司隔離座大廈嘛 ~

粉絲芋絲蝦煲 + 蒜蓉豆苗 + 辣炒粒粒 + 叉燒蔥粒炒飯 + 粟米瑤柱羹 + 薑蓉 ( JAN-2009 )

尋晚約咗食環處嚟屋企睇廁所天花   所以要好快咁去街市買豆苗   好在有得買   唔係就好掹㗎喇 ~

呢餐飯好多都係用剩餘物資嚟整   所以覺得自己好叻呀   整咁多樣嘢   哈哈 ~

是日晚餐 - 粉絲芋絲蝦煲 + 蒜蓉豆苗 + 辣炒粒粒 + 叉燒蔥花炒飯 + 粟米瑤柱羹 + 薑蓉

粉絲芋絲蝦煲  - 覺得一碟炒飯同一碟菜好單調   所以加多個蝦煲   用豆豉蒜頭爆香   勁正呀 ~

蒜蓉豆苗  - 諗住整瑤柱扒豆苗   但瑤柱浸極都唔林   所以用蒜蓉炒   炒菜絕對係我弱項   我真係好怕呢 ~

辣炒粒粒 - 隔夜嘅粒粒   加咗冰姑比我嘅辣椒醬   當堂好惹味呀 ~

叉燒粒蔥花炒飯 - 隔夜嘅叉燒   唔好嘥   用嚟炒飯最正   加埋蔥花無得頂呀 ~

粟米瑤柱羹 - 本來無呢個羹   但啲瑤柱浸極唔腍   所以用嚟煮粟米湯 ~

薑蓉 - 幾世嘅蔥   再唔食就掉㗎喇   所以又整埋碟薑蓉   送飯好正㗎 ~

呢次係我有生以嚟整得最多嘢嘅晚餐   但又唔係覺得好辛苦喎   勁呀   為自己鼓掌 ~

~~~~

今朝早餐 - 蘑菇腸片蛋治 + 奶茶

呢排對得電腦多呀   對眼好澀好痛   但帶眼鏡又無事喎 ~

今日午餐  - 魚扎魚皮河 + 蝴蝶腩河

炒粒粒 + 節瓜紅衫魚湯 + 芝麻湯丸 ( JAN-2009 )

朝早扮細食   學人食多士   所以晏晝好快肚餓   係咁博命食零食   之得正正經經食個飽啲嘅早餐好過啦 ~

又要等埋里奧大人做功課   所以 3 點先食 Tea   食完同里奧大人去買餸   其實一齊買餸幾好架   等佢知道下啲價錢   唔係食米唔知米貴呀 ~

差唔多農曆新年喇   係時候要小掃除   慢慢執啲執啲咁   最緊要唔好咁辛苦   同埋最主要係我屋企都幾乾淨下嘛   係真㗎 ~

不過我首先會喺執食物櫃   因為成日會買埋買埋好多嘢   一見有空位就買   於是呢   依家先發覺買咗好多出前一丁同粟米湯 ~

依家星期日多數會黃昏徑步   之後番屋企煮飯   因為我鍾意睇 Cable 嘅旅遊節目   但如果要徑步就無得睇喇   雖然可以錄   但我都鍾意快啲睇   因為睇旅遊節目真係令人好開心呢 ~

是日晚餐 -  炒粒粒 + 節瓜紅三魚湯 + 芝麻湯丸

炒粒粒 - 材料有叉燒 + 豆腐乾 + 青紅黃椒 + 菜脯 + 冬菇   將所有材料切粒粒   原來可以叫叉燒佬切粒粒㗎   所以慳咗唔小功夫   天氣太凍喇   洗完啲材料   啲手指凍冰冰   超辛苦   自問細心嘅我都唔想細心切粒粒喇   切得唔靚當睇唔到算喇 ~

節瓜紅衫魚湯 - 一次過有魚有瓜有湯   超方便   不過 2 個節瓜都要 $10   我覺得都貴咗呀 ~

芝麻湯丸 - 大量薑片   所以食完個人暖粒粒好舒服呢 ~

一個人喺屋企坐梳化睇電視   越坐越凍   所以索性拎個暖爐出黎用喇 ~

~~~~

今朝起身超凍   沖完涼仲覺得超超凍呀 ~

早餐又食芝腿菠蘿包 + 奶茶   一個人食早餐真係好悶   來來去去都係食嗰啲 ~

番到菇場忙到爆   晏晝同里奧大人去興記   唔知係咪凍得滯   今次啲水準好唔掂呀   豬扒鹹   火腿燴意粉無味 ~

富田和食亭 @ 佐敦 ( JAN-2009 )

晏晝同里奧大人去食酸辣米線   我發覺呢排好鍾意食米線   可能天氣凍   覺得食啲辣嘢會暖啲咁㗎 ~

食完番屋企坐陣就去醫院探奶奶喇   天氣突然寒冷   老人家啲氣管好易收窄   所以妳哋要提醒老人家   得閒聞啲蒸氣 (熱水啲蒸氣呢)   咁條氣會舒服好多㗎 ~

探完就同里奧大人去佐敦富田食壽司   我次次食壽司   食食下就會好想飲啲熱嘢或者要食啲熱嘢   如果唔係會好唔舒服咁 ~

今次勁抵呀   埋單 $150   最抵就係鰻魚壽司呀   優惠價 $9/碟 ( 原價 $18/碟 )   所以我食咗 4 碟   勁漏   食完之後個人有啲呆呆滯滯咁呀 ~

實在太太太太飽喇   本來想行去尖沙咀搭車   但里奧大人趕住 Email 功課比佢姐夫睇   咁啱又有車咁吸引   所以都係搭車走喇 ~

里奧大人之前有粒特大暗瘡   所以隔日食龜苓膏   食咗幾次真係好咗 8 成   所以依家佢會耐唔耐食一次   當清熱氣喎 ~

~~~~

今朝喺教會附近食早餐   唔駛咁趕 ~

去到凍肉舖   見到一包馬蹄只係 $3   買咗 3 包   因為突然間想整馬蹄糕   其實最想係用咗包馬蹄粉   買咗大半年都未掂過   好眼冤呀 ~

住家飯 @ 媽咪屋企 ( JAN-2009 )

尋晚去媽咪屋企食晚飯   所以又係放工即走喇 ~  

因為我想買 Cake   所以今次叫媽咪煮少啲餸   同埋我要求好簡單咋   只要有湯有新鮮魚有菜就得㗎喇 ~

Italian Tomato 嘅 Cake 真係好正   不過我鍾意同屋企人一齊食   因為佢哋咩款都啱 ~  

食到飽飽就走人喇   朱朱就由開飯到我哋走都凍到唔願郁呀 ~

~~~~

今朝好開心   因為 Off 可以瞓到 10 點半   我真係好想每逢星期六都係 Off 呢 ~  

太凍喇   所以唔願煮   同里奧大人出街食早餐算喇 ~

食完同里奧大人行下商場   好有新年氣氛呀   我鍾意新年㗎   因為樣樣都紅噹噹好開心呢 ~

雲南桂林過橋米線 @ 荃灣 ( JAN-2009 )

尋晚約咗家姐去表妹度剪髮   所以放工即走 ~

家姐好鍾意噴香水   所以我就托朋友去中環買支 DEMETER 嘅爽身粉味香水   同埋買多支 Kiehl's 限量版梨味嘅潤唇膏比佢   兩樣都咁香   真係好開心㗎 ~

好奇怪   我送啲貴少少嘅嘢比家姐 媽咪同里奧大人都會捨得   但用番同一個價錢買嘢比自己又會諗下先買㗎喎   唔知係咪女人係咁嘅呢 ~

不過我睇見佢哋開心   又唔捨用   好珍而重之咁放好嘅情境   我就會覺得貴啲都值得   因為我最想見到係佢哋好開心個樣呀   其實我自覺真係好幸福   因為我媽咪 家姐 里奧大人都係咁樣對我呢 ~

因為家姐要染髮   表妹又有客   所以 9 點半先搞掂   之後就一齊去食嘢 ~

去到荃灣多數食米線   最緊要係就腳呀 ~

之前覺得呢間水準差咗   可能假期人多啦   但今次又好味喎   唔知係咪因為肚餓呢 ~

3 碗都係紅噹噹   不過我只能食小辣   食我太辣我個胃唔舒服㗎   家姐就勁啲   可以食好辣好辣   食指天椒都面不改容㗎   仲一路食一路笑咁添架 ~

~~~~

今朝超凍呀   加上自己又唔夠瞓   真係好慘呢 ~

諗煮咩又煩   但原來諗食咩都好煩㗎   所以求其食番芝蛋治烘底 + 奶茶就算喇 ~

今日喺菇場仲忙   因為想做哂啲嘢   因為聽日 Off 呀 ~

晏晝同里奧大人去牛頭角下村嘅文記食車仔麵   我好鍾意呢間嘅辣汁   因為有好多薑粒   但里奧大人就唔多鍾意   可能我鍾意食薑   所以辣啲都無所謂   不過最鍾意都係佢嘅螺肉   因為真係好大粒呢   勁好味呀 ~

聽日得 9 度咋   新界仲會低 2 - 3 度   所以大家記得着多件衫   食多啲嘢喇   記住呀   衫可以唔着   但嘢一定要食㗎   哈哈 ~

枝竹火腩 + 金銀蛋菠菜 ( JAN-2009 )

尋日真係全日都好忙   對眼又澀   身心疲累   心力交瘁   但我都會煮飯 ~

晨早睇 AM730 嘅食譜係枝竹火腩   見都幾簡單   所以就試下煮喇 ~

去到燒味舖買 $25 燒腩   佢哋話 $25 好少   所以切咗 $35 比我   之得去太興食燒肉飯唔駛煩啦   之後再買炸枝竹   原來都要成 $8   我仲以為 5 蚊添   越行越覺得出街食仲着數呀   哈哈 ~

是日晚餐 - 枝竹火腩 + 金銀蛋菠菜

枝竹火腩 - 食譜有埋豆卜   不過我無買   煮之前忍唔住偷食兩舊燒腩   啲皮脆卜卜真係好唔捨得用嚟燜呀 ~

金銀蛋菠菜 - 今次煮得唔係咁好   因為蒸唔熟隻鹹蛋   但啲菜又已經煮好   趕時間呀   所以求其再淥熟   所以賣相唔多好呢 ~

煮完哂   里奧大人就啱啱番到屋企   其實我係唔需要整得咁急   但我想喺里奧大人一番到屋企就有得食飯   因為我覺得一番到屋企即刻有飯食嘅感覺係好溫暖呢 ~

~~~~

今朝想食腸粉   所以食牛肉腸 + 奶茶   又中又西都唔錯呢 ~

又係忙忙忙呀 ~

晏晝里奧大人去 Toy Fair   所以同我食個快速 Lunch   之後我就去修眉 lu ~

住家飯 @ 奶奶屋企 ( JAN-2009 )

尋晚同里奧大人一齊放工去奶奶屋企食飯   經過 Mrs Frieds   所以買咗塊朱古力特韌   真係好好味   唔知點樣可以整到韌韌咁好味呢 ~

今次啲餸都好啱我   因為我好鍾意食石斑仔同豆苗呀 ~

~~~~

今朝又早咗   所以去遠啲食早餐   其實食咩唔緊要   行幾耐都唔緊要   最緊要係杯奶茶   因為番工真係要靠佢維持生命呢   今朝好飽   食完要行 15 分鐘先番到菇場   罪惡感無哂呀 ~

番到菇場   要運用摩打手先可以清哂啲嘢呀 ~

晏晝同里奧大人食車仔麵   因為諗唔到食咩嘢   車仔麵喺感官上好似好多選擇咁   無咁悶   今次仲試下柚子味汽水   毫無柚子味可言呀 ~

串燒沙爹雞肉 + 菜脯粒炒飯 + 薑蔥蓉菜心 ( JAN-2009 )

一早已經醃好雞肉   所以放工就咁買菜就得喇 ~

其實想每晚諗定第晚嘅餸   但又唔想好似一個好規律   好指定嘅動作咁   但要日日諗又好煩喎   最慘係想整但無得買料   要霎時間又諗唔到煮咩   呢下最煩   做家庭煮婦真係有難度呀 ~

是日晚餐 - 串燒沙爹雞肉 + 菜脯粒炒飯 + 薑蔥蓉菜心

串燒沙爹雞肉 - 第一次整   估唔到焗雞柳係咁簡單   又快熟   又無咩油   唔駛成頭油煙   下次會再整   不過今次啲沙爹醬就落得太多花生醬   所以好漏呀 ~

菜脯粒炒飯  - 之前食唔哂嘅豉油王炒飯   加啲菜脯又當一個新菜式 ~

薑蔥蓉菜心 - 本來想整馬拉盞炒通菜   但全個街市都無通菜   所以又整番菜心呢 ~

食完飯就落麥當勞幫家姐換 "哥斯拉"   之後再陪里奧大人食龜苓膏   所以都唔徑步喇 ~

~~~~

今朝唔想食蛋同包   唔想食炸魚   唔想食出前一丁米粉通粉   所以食糯米雞 + 奶茶    其實呢間嘅糯米雞超唔掂   無得選擇所以食佢囉 ~

番到菇場又係超級忙   搞到無哂私人時間 ~

突然好想飲羅宋湯又想食腸粉   所以同里奧大人去海景食羅宋湯螺絲粉餐 + 牛肉腸 + 炒麵   呢餐好滿足呀 ~

鎮江骨 + XO 醬炒脆肉瓜 + 豉油王炒飯 + 徑步 ( JAN-2009 )

同里奧大人食完 Tea 就行一陣   見到大柑電話座好得意   所以叫里奧大人買比我喇   我開心即係佢開心嘛 ~

番到屋企睇柴犬奇蹟物語   我睇之前問咗家姐係咪 Happy Ending   係先睇呢   雖然知道係 Happy Ending   但唔知點解一路睇都一路喊   喊到眼腫腫   可能自己養狗   套入咗角色啦 ~

睇完去徑步   徑步完再煮飯   勁充實 ~

是日晚餐 - 鎮江骨 + XO 醬炒脆肉瓜 + 豉油王炒飯

鎮江骨 - 覺得越整越進步呀 ~

XO 醬炒脆肉瓜 - 整呢個餸目的係用埋樽 XO 醬 ~

豉油王炒飯 - 之前剩得太多冷飯   唔想擺咁耐   雪櫃又無位   所以又炒飯喇 ~

食完飯家姐就上咗我屋企   之後一齊睇獎門人   一齊睇真係開心呢 ~

~~~~

今朝無啦啦喉嚨痛   所以食芝腿菠蘿包 + 奶茶    無咁熱氣嘛 ~

番到菇場忙到爆燈   咁就好喇 ~

晏晝同里奧大人去興記   3 月就無得食㗎喇    所以呢排都要去下咁呢 ~

黑椒貢丸撈麵 + 水餃福字麵 + 薑蔥蓉菜心 + 徑步 + Blog 友冰姑禮物包 ( JAN-2009 )

同里奧大人一齊放工番屋企   之後去食酸辣米線   正呀 ~

番到屋企大堂   管理員急急腳咁拎份包裹比我   原來由係 Blog 友冰姑寄嚟呢   又寄零食比我呀   (冰姑   里奧大人鬧呀   話成日要妳寄糖果比我食呀  下次唔好喇)   今次最驚喜係有張聖誕卡   因為我好耐無收過聖誕卡喇   感覺好似番咗小學時代咁呢   哈哈 ~

諗住可以休息下  點知樓上鑽嘢呀   嘈到頭痛   但我真係好攰   所以又比我都瞓得着喎 ~

是日晚餐 - 水餃福字麵 + 黑椒貢丸撈麵 + 菜心

水餃福字麵 + 黑椒貢丸撈麵 + 薑蔥蓉菜心 - 雖然簡單   但充滿愛心呢 ~

太攰喇   所以 10 點 45 分先起身   又番唔到教會喇 ~  

~~~~ 

同里奧大人落樓下食早餐   星期日食嘅早餐係特別好食   因為無時間限制   食完又唔駛番工   勁正呀 ~ 

XO 醬炒西蘭花帶子 + 臘腸片炒飯 + 翻叮肉醬意粉 ( JAN-2009 )

尋日覆診完就買餸喇   雖然抖半日   但因為要等見醫生再等攞藥   真係等到個人都吽哂   仲攰過番工呢 ~

是日晚餐 - XO 醬西蘭花帶子 + 臘腸片炒飯

XO 醬西蘭花帶子 - 第一次整算唔錯啦 ~

臘腸片炒飯  - 專為里奧大人整㗎   我自己食翻隔夜肉醬意粉咋 ~

~~~~

今朝雖然凍   但都同朱朱 媽咪食早餐呢 ~

芝士焗肉醬意粉 + 南瓜粟米栗子豬展湯 + 徑步 ( JAN-2009 )

尋日同里奧大人食完早餐就行  Jusco 超市又有 9 折呀  點算好呀   今次又有收穫   因為計過仲平過百佳   師奶錢真係好易賺呀 ~

呢一日真係未停過手呢食完早餐去超市之後再去街市買嘢   番到屋企就即刻煲雪梨水    洗衫又熨衫   好在早餐食得飽   有氣有力啫 ~

煲完又出街食 Tea   今次去大家樂   因為好想食熱狗  里奧大人話天氣凍會好胃口   所以叫咗 3 個餐呢 ~

是日晚餐 - 芝士焗肉醬意粉 + 南瓜粟米栗子豬展湯

芝士焗肉醬意粉  - 里奧大人話上次 Euro Gogo 嘅肉醬意粉整得好好味   所以今次我好有心機整呢   特登買埋意粉醬同茄膏整㗎   唔係自己讚自己   今次真係好好味㗎 ~

南瓜粟米栗子豬展湯  - 用咗 1 大個中國南瓜 + 3 條粟米 + 半磅栗子 + $20 豬展 + 南北杏 + 蜜棗   但南瓜唔當造   個湯一啲都唔甜呀   激死人呀 ~

呢一日食得太多嘢   所以要同里奧大人一齊徑步呀 ~

~~~~

今朝要番工喇   早餐又係食芝腿治 + 奶茶   今次真係避都避唔到喇   老細兩公婆坐正喺我對面   其實我咁啱食完想走   但無理由佢哋一坐低就走家嘛   所以傾偈   傾到佢哋食完一齊走   我老細兩公婆 Very Nice   但公司啲氣氛就比較靜   可能個個都用 MSN 溝通   所以公司無咩聲呢 ~

晏晝要覆診   所以同媽咪 里奧大人去美心皇宮飲茶   飲到 2 點半就去覆診 lu ~

高麗軒韓國餐廳 @ 大埔 + 散步 ( DEC-2008 ) + ( JAN-2009 )

同里奧大人一齊放 4 點   勁開心呀   因為可以一齊搭車番屋企呢 ~

其實一早諗定煮咩  但里奧大人話唔想我咁辛苦喎   係都要出街食 ~

好耐無食韓燒   所以就決定韓燒喇   去食之前就飲碗龜苓茶打底   苦到嘔呀 ~

因為呢間唔係自助形式   所以就叫個套餐喇   唔知叫十全 xx 餐   好似有 10 款肉 + 8 個前菜 + 2 個飯 + 2 個湯 + 任食甜品   $ 328 一個餐   我覺得幾貴囉   不過逐碟叫仲貴呢 ~

食到好飽   所以同里奧大人順便散散步   唔駛一陣又要番屋企換衫徑步嘛 ~

硬係覺得好熱氣   都係食番個雪糕好啲   食最鍾意嘅薄荷碎古古力   勁正呀 ~

尋晚諗住好早瞓   應該喺睡夢中倒數   但估唔到冰姑打嚟  之後再同佢 M   咁就可以同里奧大人同老友一齊隔空倒數   有驚喜呀 ~  

~~~~

今朝瞓到 10 點幾先捨得去食早餐呢   如果日日可以瞓 10 個鐘先起身就好喇 ~

2009 年新開始 ( JAN-2009 )

踏入 2009 年喇

祝大家新年快樂   最緊要身體健康

並祝 

2009 年賺到嘔

人人開工無停手

好嘢食到無停口

假期多到有排抖

四十歲前就賺夠

賺夠就可以退休