雲南桂林過橋米線 @ 荃灣

尋晚約咗家姐去表妹度剪髮   所以放工即走 ~  

家姐好鍾意噴香水   所以我就托朋友去中環買支 DEMETER 嘅 "爽身粉味" 香水   同埋買多支 Kiehl's 限量版梨味嘅潤唇膏比佢   兩樣都咁香   真係好開心架 ~  

 

好奇怪   我送 d 貴小小嘅嘢比家姐 媽咪同里奧大人都會捨得   但用番同一個價錢買嘢比自己又會諗下先買架喎   唔知係咪女人係咁嘅呢 ~

不過我睇見佢地開心   又唔捨用   好珍而重之咁放好嘅情境   我就會覺得貴 d 都值得   因為我最想見到係佢地好開心個樣呀   其實我自覺真係好幸福   因為我媽咪 家姐 里奧大人都係咁樣對我呢 ~  

噢   因為家姐要染髮   表妹又有客   所以 9 點半先搞掂   之後就一齊去食嘢 ~

去到荃灣多數食米線   最緊要係就腳呀 ~  

之前覺得呢間水準差咗   可能假期人多啦   但今次又好味喎   唔知係咪因為肚餓呢 ~ 

3 碗都係紅噹噹   不過我只能食小辣   食我太辣我個胃唔舒服架   家姐就勁 d   可以食好辣好辣   食指天椒都面不改容架   仲一路食一路笑咁添架 ~
~~~~

今朝超凍呀   加上自己又唔夠瞓   真係好慘呢 ~ 

唉   諗煮咩又煩   但原來諗食咩都好煩架   所以求其食番芝蛋治烘底 + 奶茶就算喇 ~   



今日喺菇場仲忙   因為想做哂 d 嘢   因為聽日 OFF 呀 ~   

晏晝同里奧大人去牛頭角下村嘅文記食車仔麵   我好鍾意呢間嘅辣汁   因為有好多薑粒   但里奧大人就唔多鍾意   可能我鍾意食薑   所以辣 d 都無所謂   不過最鍾意都係佢嘅螺肉   因為真係好大粒呢   勁好味呀 ~

聽日得 9 度咋   新界仲會低 2 - 3 度架   所以大家記得着多件衫   食多 d 嘢喇　記住呀    衫可以唔着   但嘢一定要食架   嘩哈哈 ~