金菇牛肉卷 + 牛油炒粟米 + 四寶珍菌湯 ( FEB-2009 )

星期六同媽咪 朱朱一齊食早餐   見到佢哋真係好開心㗎   所以幾早起身都無問題呢 ~

菇場好多人 A/L   有一半又 Day Off   最正係老細又 Day Off 嘛   真係 Free 到爆呢 ~

晏晝同里奧大人食 Tea   雖然食嚟食去都係嗰啲   但又覺得唔悶喎   可能因為係星期六開心啦 ~

食完番屋企煲湯   之後就番教會   見仲有時間   所以去食碗熱辣辣嘅亞婆豆腐花   真係超滑㗎   $5 又平喎   所以次次都好多人排隊㗎 ~

是日懶餐 - 金菇牛肉卷 + 牛油炒粟米 + 四寶珍菌湯

金菇牛肉卷 - 赤手包牛肉卷   包到隻手好油   好多肥膏黐住隻手   立黐黐咁   極到討厭呀 ~

牛油炒粟米 - 好耐無食   所以覺得好好食   哈哈 ~

四寶珍菌湯 - 包裝註明 "此湯清心養胃   有助於増強身體免疫力"   材料有蜜棗 + 茶樹菇 + 黃金菇 + 雲芝 + 冬菇絲 + 舞茸 + 白背木耳絲   我加埋 1 條大嘅紅蘿蔔 + 2 條粟米   唔落肉   就咁齋湯   唔錯唔錯 ~

~~~~

星期日同里奧大人 9 點幾起咗身   所以去大家樂食早餐   一見到啲他他醬就開心   再加埋塗滿牛油嘅厚多士   真係食得好滿足呀 ~

番到屋企勁喇   因為想洗抽油煙機嘅葉呀   洗咗一個鐘   勁攰勁攰 ~

晏晝食酸辣米線   酸酸辣辣好啱女人食呢 ~

生日第四擊 (紅螞蟻 @ APM) ( FEB-2009 )

今朝正想一路食早餐   一路他他條條睇雜誌嘅時候   點知同事坐埋嚟   所以就變咗一路傾一路食喇 ~

菇場勁忙   但都仲勁有 Holiday Mood   又加埋 Happy Friday   所以無咩心機做嘢 ~

晏晝里奧大人同同事食飯   所以我就清清腸胃   食白粥+ 炒米粉   食嘅時候好飽   但 4 點幾就好肚餓呀 ~

放工同 CC 食飯   佢請我去紅螞蟻食生日飯呢 ~

扒大蝦蕃茄天使麵 - 毫無味道可言

拼盆 - 豬仔骨 + 雞翼 + 魷魚鬚 + 麻醬茄子 - 最好味係魷魚鬚同麻醬茄子

韓燒醬牛仔骨 - 好入味

千島芝士汁焗西蘭花 -又係無味

紅豆椰汁冰 - 一般

由 6 點半傾到 9 點半   真係好開心呀 ~

生日第二擊 (和民居食屋 @ 大埔) ( FEB-2009 )

因為有和民 Cash Coupon   所以約埋家姐同里奧大人一齊去和民開餐呢 ~ 

順便比埋鹹金桔比家姐   浸咗一年㗎喇   不過仲要等幾年先飲得喎 ~

上次買相機送米奇杯   都順便比埋家姐 lu   我屋企真係無咁地方擺呀   其實我好鍾意睇杯    但奈何一隻杯可以用好耐   所以只可睇不可買呀 ~

今次去和民開餐   叫咗蕃茄煙肉 Pizza + 天婦羅 + 野菌炒雜菜 + 鐵板煎餃子 + 豚平燒 + 5 色刺身   個 Pizza 最唔掂   唔熱嘅   我要再叮熱呢   其他食物又好油   雖然飽   但都要叫刺身中和番 ~ 

我覺得開心就要食甜品   但唔會喺和民食   因為對佢哋無哂信心   所以去屋企樓下食糖水   食完真係好好好好飽喇 ~

生日第二擊 (海洋公園 + Dan Ryan's Chicago Grill @ 金鐘) ( FEB-2009 )

生日當天   同里奧大人一齊 8 點起身去太興食早餐   番屋企梳洗後就出發去海洋公園喇 ~

由於正日生日   所以去海洋公園係 Free 㗎   咁啱里奧大人簽卡   原來有 $208 Cash Dollar   正正就係入場費用   咁即係都叫 Free   所以好開心呢   雖然天氣麻麻 ~

要搭 4 條勁長嘅扶手電梯先去到玩遊戲   搭都搭到悶呀   定係自己無耐性呢 ~

點都好   最緊要里奧大人喺我身邊啫   一見佢沉重嘅背影   就覺得心甜又心痛   因為佢次次同我去玩都係揹背囊   因為要帶大機同 1 支水   我嘅外套   所買嘅嘢   其實個袋真係好重   但佢話一啲都唔重   揹背囊唔辛苦喎   又驚我手痛   係都要幫我拎埋袋   其實佢又真係好好好嘅   所以當日我就算幾攰都無發脾氣㗎 ~

我勁怕機動遊戲   所以仍都唔會比里奧大人玩   因為我都會好擔心   我驚玩過山車時會無啦啦停   又驚會飛咗個人出嚟   跳樓機都係好高危   係咁講講講   講到里奧大人都煩到費事玩 ~

擺明今次係觀光團   所以慢慢行   玩啲絕對無刺激性嘅活動   好似 Ocean Park Tower   不過排隊就出事   因為後面全部係自由行   好嘈   入到去仲嘈   嘈到以為自己置身喺酒樓   我真係覺得好煩好頭痛   咩 Mood 都無哂 ~

悠悠間坐下摩天輪   其實我都好驚㗎   不過唔駛排隊先坐咋   最搞笑係得兩個摩天輪有人坐呢 ~

之後去我最鍾意睇嘅海洋館   因為我唔識游水   但又咁近距離見到啲魚   會覺得好開心 ~

里奧大人話觀光團要行下食下   如果唔係唔夠腳骨力   所以坐得食炸雞 + 薯條 ($45)   件雞好脆   但薯條唔脆噃   不過算啦   唔可以要求咁多 ~

食完就去睇水母館   其實之前去過   不過就純粹睇   但今次唔同 Feel 喇   因為依家鍾意影相   依家係又影唔係又影   原來影相真係好好玩 ~

睇完就坐 Cable Car 去另一邊睇熊貓   本來里奧大人諗住睇埋百鳥居先走   但我實在太驚啲雀鳥喺我頭頂飛嚟飛去   又喺咁叫   所以入咗去 10 秒就出番嚟呀   啲工作人員以為有咩事呀   哈哈 ~

呢一日嘅海洋公園行程完畢   總括黎講都開心嘅   因為我由此至終都無前期望嘛   里奧大人就慘啲   咩都唔比玩 ~

差唔多 3 點半就出到金鐘   里奧大人話好肚餓   所以去最近嘅大家樂食 Tea   食完再出銅鑼灣 ~

行咗個幾鐘   突然好想去南記食酸辣米線   所以又 Share 食卷春卷腩肉小鍋米線    勁正呀 ~

食完又去番金鐘喇   因為約咗家姐 7 點去 Dan Ryan's 食嘢呢 ~

一坐低我就問 Waiter 生日有無 Special Offer   佢話會送個 Cake   我問幾大 ?!   佢話足夠 3 個人食喎   但答人啲態度勁衰囉   我其實諗住驚唔夠食會再叫多個甜品咁囉 ~

麵包 & Muffin (麵包鬆軟   Muffin 勁多 Nuts   正呀)

Casear Salad (好大碟   食完都半飽 )

Appetizer Combo ( 薯皮 + 水牛雞翼 + 炸洋蔥圈   味道唔錯)

Grilled Lamb Chops (其實唔係好羶   但我都係唔鍾意食囉   所以食咗兩啖咋)

Tiramisu  (餐廳送嘅生日蛋糕   仲有幾個 Waiter 一齊拍手唱生日歌)

食到飽飽   之後就各自歸家喇 ~

今日我生日呀 ( FEB-2009 )

今日就係我生日

放假就係好禮物

里奧陪我好充實

食飯慶祝玩一日

特別覺得甜蜜蜜 

祝自己

生日快樂

身體健康

生日第一擊 (住家飯) @ 奶奶屋企 ( FEB-2009 )

呢排天氣勁潮濕   所以番工前會開抽濕機   啲衫又快乾   最緊要係牆紙唔會蹹蹹濕濕咁嘛 ~  

晏咗出門口   所以早餐食芝腿治烘底 + 奶茶 ~

番到菇場凍到震   出街又覺得好熱   真係煩呀 ~

晏晝同里奧大人去公司附近食 Lunch   真係食到無咩好食喇 ~

放工諗住買樽醃鹹金桔   點知好多雜貨舖都無得買   好在最後都比我買到 3 個樽啫 ~

之後同里奧大人一齊打的去奶奶屋企食飯   因為話想同我慶祝生日   同埋比利是我喎 ~

今餐餸好齋   啱哂我   因為夜晚唔想食咁多肉   飯後仲有自家整嘅甜品   好耐無食芒果布甸    所以覺得好好味呀 ~

~~~~

今朝早咗起身   慢條斯理反而遲咗出門口 ~

好想食他他醬   所以早餐食吉列魚柳 腸仔 蛋 多士 + 奶茶   食完勁飽 ~

Lunch Time 同里奧大人食車仔麵   因為我勁想食辣汁呢 ~

感動禮物包 From 冰姑 ( FEB-2009 )

心情好呀   所以寫下嘢先 ~

上星期四番到屋企   管理員又笑口噬噬叫停我: 里太   有包裹呀 (我估佢哋知我叫 Babymama   所以喺度笑   暗哋裡可能話幾十歲人改啲咁嘅名呢)   一睇就知係 冰姑 啦 ~

拆禮物真係好開心   但最令我感動同激動係仍呢份心意   佢真係記得我所講嘅說話   所以佢成日會寄有關物件比我   連古古力都寄比我   唔溶已經偷笑咯 ~

次次見到冰姑嘅禮物   就會斜視里奧大人   因為里奧大人都無咁細心呀 ~

冰姑妳唔好再寄禮物嚟啦   求下妳   唔好浪費金錢   雖則知妳有唔少私己   但妳留番比自己用啦   唔駛買嘢比我㗎   要聽老人家話呀   知道嗎 ?! 

脆肉瓜黑椒牛丸煲 + 蕃薯糖水 ( FEB-2009 )

今朝早去送嬸嬸 堂妹機   早啲去到   食埋早餐仲有時間周圍行添 ~

其實我好怕送機   因為我係一個超級眼淺嘅人嚟呀 ~

差唔多 12 點就坐車走   出到市區可以趕到同里奧大人一齊食 Lunch   感恩感恩 ~

邪呀   番到菇場忙到爆   係多嘢做到唔知做邊樣好   連飲水都無時間呀 ~

放工無 Mood 諗餸   所以求其算喇 ~

是日懶餐 - 脆肉瓜黑椒牛丸煲

脆肉瓜黑椒牛丸煲 - 4 條脆肉瓜 + 6 粒牛丸   咁牛丸切半   觀感上多啲   哈哈 ~

食完飯出街買嘢   之後再煮蕃薯糖水喇 ~ 

和民居食屋 @ 大埔 ( FEB-2009 )

今朝明明聽到鬧鐘響   但唔知點解好快又瞓番   11 點先起身   所以無番到教會 ~

出去食早餐嘅時間過哂   唯有自己煮啦   反正之前買咗好多丁丁  ~

食完就整粉圓   諗住整完買杯奶茶番屋企   扮珍珠奶茶   點知整咗成個鐘頭   仲要燶咗   個煲都燶埋   擦到發火   真係又嘥煤氣   又嘥水嘥力   下次出去買好過呀 ~

天氣實在太潮濕喇   對完個火爐已經成身汗   再無動力做其他家務喇 ~

晏晝同里奧大人食 Tea   天氣潮濕   要食啲辣嘢   食泰式香草辣椒肉碎炒河    諗住好惹味    點知一啲都唔好食   只係靠食啲指天椒 先 Feel 到辣味 ~

因為我要整鹹金桔   又想去官燕棧買湯包   所以要去大埔墟   里奧大人就番屋企做功課喇 ~

自己一個人行街   唔好處係第一無人拎理   第二係好易失控   不過我都有分寸嘅   家下經濟唔好   所以買嘢真係要諗過度過㗎 ~

今次好開心就係去官燕棧   買啲湯包   猴頭菇同花旗參   3 百幾蚊搞掂   仲可以做會員   咁計落都有着數嘅 ~

之後又買咗件衫比媽咪   再買件外套比奶奶   尋晚 Annual Dinner 抽到嘅行利是錢已經用凸 lu   所以無嘢買比自己   不過大家開心   好過我一個開心嘅 ~

番到屋企真係有啲虛脫   好在唔駛煮飯   因為約咗家姐去和民開餐 ~

以前和民好多嘢食   依家少咗好多款式之餘   食物又唔好食喎 ~

今次食 和風 Pizza + 和民沙律  + 串燒盛合 + 麻醬海鮮冷麵   最難食係個串燒   因為唔多熱   但隻碟就好熱   都唔知係咪用微波爐叮熱嘅 ~

杯麵 + 雙丸餐 + 公司春茗 ( FEB-2009 )

( 19-FEB-2009  THU )

里奧大人公司 Annual Dinner   我又唔舒服   所以求其食杯麵算喇   不過淥過籠   發脹哂超難食呀 ~

一路喺廳瞓   一路等埋里奧大人番屋企   我一定要等到里奧大人番屋企   先可以安心入房瞓覺㗎   唔知係咪個個賢妻都係咁嘅呢 ~

~~~~

( 20-FEB-2009  FRI )

今朝終於好番好多喇   所以食芝腿治 +奶茶    不過勁滯 ~

番到菇場要拚博   因為之前兩日無做過嘢呀 ~

晏晝同里奧大人去公司附近茶餐廳   我無咩胃口   所以食沙爹牛肉包咋   食完即番菇場休息 ~

夜晚里奧大人番奶奶屋企食飯   我唔去喇   因為仲係唔多舒服   番屋企休息好過   瞓下瞓下又突然好肚餓   所以煮幾粒丸食算喇   唔想煩呀 ~

~~~~

( 21-FEB-2009  SAT )

今朝精神好好多   所以晨早同媽咪 朱朱食早餐   勁開心 ~

番到菇場真係無 Mood 做嘢   星期六多數係咁 ~

晏晝同里奧大人食 Tea   之後行下買下嘢   呢幾晚好少同里奧大人食飯   所以覺得好耐無見咁   感覺好似小別勝新婚咁呀   哈哈 ~

行完就即番屋企梳洗   之後就出發去食 Annual Dinner 喇 ~

7 點開始   10 點半先食完   超攰呀 ~

鴻星海鮮酒家 @ 九龍灣 ( FEB-2009 )

 

 

其實真係好唔開心   難得同嬸嬸 堂妹食晚飯   點知又唔舒服   我又攰又無胃口   所以都無咩傾偈   因為我坐喺度已經可以瞓着呢 ~

今次喺淘大鴻星食晚飯   11 人食   所以叫魚翅鮑魚套餐   最可惜自己唔舒服無影相   食物分量真係好多   好多都食剩一半要打包   但媽咪話紅磡鴻星啲分量無咁多㗎   所以今次真係好抵食 ~

我同嬸嬸 堂妹好難得先見到   因為佢哋住加拿大太遠喇   不過依家科技發達   要溝通要見面真係絕對無問題   所以我同家姐送部數碼相機比佢哋   等佢哋影多啲相 Send 比我睇嘛 ~

食完同里奧大人打的番屋企   依家的士短加長減都幾好   不過其實真係無咩幾何會搭呢 ~

~~~~

今朝晏咗起身呀   所以買粉果 + 奶茶番菇場食 ~

番到菇場都仲係肚痛   不過真係唔好意思請假 ~

晏晝點都要陪里奧大人食飯   因為佢夜晚公司 Annual Dinner 實會好夜先番屋企   所以點都要見下呢 ~

蜜糖雞翼 + 粟米湯 ( FEB-2009 )

是日懶餐 - 蜜糖雞翼 + 粟米湯

蜜糖雞翼 - 好怕煎雞翼   成日都有血水   今次又係咁   所以用咗半個鐘頭   又冚蓋焗又煎   好計煩 ~

粟米湯 - 里奧大人話飲到厭   我話飲到厭都要飲   因為仲有十幾盒倉存   哈哈 ~

~~~~

今朝番到公司   但每月一到超辛苦   所以 11 點半就走喇   去媽咪屋企休息   因為夜晚約咗嬸嬸 堂妹等親戚喺九龍灣食晚飯   所以唔番得自己屋企休息   一出一入已經無哂時間 lu ~  

譚仔雲南米線 ( FEB-2009 )

尋晚同里奧大人一齊探奶奶   探完就去佐敦譚仔雲南米線食嘢喇 ~

無啦啦落雨   凍咗好多咁呢   食啲麻辣暖暖身好啲㗎 ~

里奧大人好鍾意飲椰汁   所以又去椰汁大王買番杯椰汁涼粉紅豆冰 ~

其實我麻麻哋鍾意譚仔嘅麻辣   我唔鍾意個湯底白雪雪   好唔吸引 ~

~~~~

今朝起身沖完涼   唔覺得凍   所以無着外套   點知出到街原來凍咗咁多   但又唔想滕番屋企拎衫喎 ~

去到餐廳見到同事   所以一齊坐   早餐食芝蛋治烘底 + 奶茶    今次要少蛋   同佢一路傾一路食   簡直傾到唔想番工呀 ~

番到菇場靜英英   啲時間過得勁慢 ~

晏晝同里奧大人食粉麵   食完暖啲   無咁辛苦 ~

薑蓉拌菜心+ 蕃茄薯仔排骨湯 ( FEB-2009 )

朝早諗住食完早餐就番教會   但突然間接到家姐電話   原來加拿大嘅嬸嬸同堂妹番咗嚟香港   所以約埋姑姐 姑丈 12 點去媽咪屋企附近飲茶   咁難得   所以同里奧大人食完早餐   我就趕出去會合佢哋喇   最可惜里奧大人要去圖書館借書啦   如果一齊出去嘅話仲好呀 ~

8 年前仲係小朋友   好黐我嘅   8 年後已經亭亭玉立喇   時間過得好快咁呀 ~

其實我食完早餐無耐   所以根本食唔落   又掛住傾偈   基本上係唔駛食嘢都得 ~

飲完茶就上媽咪屋企坐陣   之後就各自歸家喇 ~

差唔多 4 點先同里奧大人食 Tea   嗰刻我開始肚餓 lu   所以食星洲炒米    里奧大人就食鹹魚雞粒炒飯   食飽就去街市買餸   咁就一日喇 ~

是日懶餐 - 薑蓉拌菜心 + 蕃茄薯仔排骨湯

薑蓉拌菜心 - 呢排菜心無咁靚 lu   細條咗好多呢 ~

蕃茄薯仔排骨湯 - 今次用 4 個蕃茄 1 個大薯仔 $16 排骨   排骨佬話啲排骨用鹽醃 15 分鐘   個湯會好味啲   又學識一樣嘢喇   個湯真係好似好多㗎   今次會用湯渣送飯   唔想嘥料嘛   最緊要係唔駛特登煮多樣餸呀 ~

食完同里奧大人出去行下   去到大眾書局買嘢   比錢嘅時候原來有 8 折   比完錢   里奧大人又話要再睇睇先   最後又買咗百幾蚊   成日話我買買買   自己見到 8 折咪一樣再買買買   但買嚟買去都係原子筆   屋企有成幾十枝原子筆喇   都唔知做咩計咁鍾意原子筆 ~

無煲湯又無煲涼茶   所以去食龜苓膏   我唔食得   食個甜品算 lu ~

~~~~

今朝又凍咗   咁嘅天氣真係好容易病 ~

潮濕嘅天氣真係令人好攰   再加上星期一   簡直係攰上加攰   食芝腿治 + 咖啡   居然唔記得叫烘底   好在啲麵包都鬆軟   如果唔係都幾難頂 ~

番到菇場就慘喇   無嘢做   勁想番屋企瞓覺呀 ~

好想食薯條   晏晝同里奧大人去麥記   用埋 Coupon 仲抵   不過個個都用 Coupon   所以排隊都要 15 分鐘呀 ~

平淡情人節 @ 水立方 + 大家樂 ( FEB-2009 )

情人節當日難得 Off   本來校好鬧鐘 9 點起身出去同朱朱食早餐   點知里奧大人起身番工之後   我都瞓唔着   索性早啲出去媽咪屋企陪佢哋好過 ~

一開門   朱朱已經係咁樸埋嚟   去廁所又跟住   坐梳化又望住妳   無非係想出街   因為次次我朝早番媽咪屋企   必會帶佢出街食早餐呢   但出完街就會瞓到豬一隻咁   勁嘆呀 ~

食完上媽咪屋企   11 點幾就走 lu   因為要 Join 里奧大人一齊去落馬洲按摩呀 ~

今次第一次去水立方  都幾方便   環境都唔錯 ~

去到第一時間換衫   之後去食嘢   味道 OK   唔好要求咁多 ~

同里奧大人一齊按腳 1 個鐘   之後再按身   我想通淋巴   所以佢哋話揀巴里島風情   里奧大人就中式   我係第一次做巴里島風情   都幾舒服   我揀嘅油係薰衣草味道   但覺得自己揀錯油   因為越聞越似紫花油味   都幾難頂 ~

按摩 2 個鐘   實則 90 分鐘   不過我就覺得都 OK   太耐我會覺得好悶㗎 ~

埋單 RMB698   我覺得都幾貴   不過未去過水立方   點都要試下嘅 

諗住按摩完就去 Blog 友卡姑極力推介嘅大漁   點知晏晝打去 Book 已經 Full 哂   我又唔忿氣    所以搭地鐵 Walk-in 攞位   最後當然都係無啦   可能情人節關係呀 ~

勁失望勁失望   諗住去小肥羊   點知又要等 4 張枱   因為已經 6 點鐘   即係啲人啱啱先開始食   加上要坐係街等   天氣又焗又想落雨   所以放棄 ~

挑起咗條邊爐癮   所以即打去稻香 Book 位   但要半個鐘頭內到喎   大佬   福田到大埔喎   一個鐘就差唔多   哈哈 ~

番到大埔   去 Shakey's Pizza 啦   Pizza hut 和民 元氣 味千   通通都一大堆人等位   最後去大家樂打邊爐算喇 ~

難得里奧大人話唔做功課住   想陪下我喎   所以租 "Batman" 番屋企睇   情人節就係咁平平淡淡過咗喇 ~

節瓜粒湯飯 ( FEB-2009 )

天氣悶熱   真係無咩胃口   簡簡單單整湯飯算喇 ~

是日懶餐 - 節瓜粒湯飯

節瓜粒湯飯 - 3 個細節瓜 + 幾粒瑤柱 + 幾隻冬菇 + 10 隻蝦乾 + $10 瘦肉 + 2 碗冷飯   滾 45 分鐘搞掂   雖然方便   但越食越熱呀   哈哈 ~

食完拿拿聲沖涼   之後就睇 "珠光寶氣" 大結局   極度令人失望   第一次睇結局係咁失望   唔知佢想點 ~  

酸辣米線 ( FEB-2009 )

( 13-FEB-2009  FRI)

尋晚里奧大人要番學校見 Tutor   問關於 Project 嘅問題   又唔知幾時先可以番到屋企   所以勒令我唔好煮飯喇 ~

唔駛煮飯   當然想行下街啦   行下睇下真係幾開心㗎 ~

 
依家經濟唔好   唔好亂買嘢   除非恨咗好耐   或者啲重要日子啦   同里奧大人又老夫老妻   都好少話有咩驚喜   送小禮物比對方   多數開門見山講㗎喇   哈哈 ~

天氣焗到暈   無咩胃口   所以去食酸辣米線   里奧大人走辣   我就小辣   點知連我碗都走埋辣   唔通個天都唔想我食辣 ~

番到屋企沖完涼就坐定定睇 "珠光寶氣"   話咁快就大結局   可惜呢套重頭劇越做越唔好睇呢 ~

~~~~

今朝起身仲以為落雨添   暗到吖   再加上勁回南   超唔舒服呀 ~

Happy Friday 要食啲令自己好 Happy 嘅早餐   所以食吉列魚柳腸蛋多士 + 咖啡   不過去皮嘅魚柳真係好難食囉 ~

番到菇場忙咗陣又周圍遊   終下終下咁望到月曆先知今日係黑色星期五 ~

同里奧大人食 Lunch   一路行一路冒汗   最慘係一滴風都無喎   行到餐廳已經好鬼熱   食完再行去買珍珠奶茶   再行到番菇場真係出哂汗好辛苦呀 ~

菜脯粒炒蛋 + 灼菠菜 + 丸 + 粟米湯 ( FEB-2009 )

尋晚放工坐巴士   因為趕住番屋企煮飯   所以坐樓下倒頭車位置   架車 Chok 到不得了   加上樓下比較焗   搞到我想嘔   第一次坐車咁辛苦呀 ~

去到街市諗住買節瓜滾湯   估唔到行咗 4 檔菜檔都無得買   咁算啦   飲粟米湯算喇   唔駛煩 ~

是日懶餐 - 菜脯粒炒蛋 + 菠菜 + 丸 + 粟米湯

菜脯粒炒蛋 - 用咗大半碗菜脯 + 4 隻蛋   我無送飯   就咁食   所以覺得好鹹又好滯 ~

菠菜 - 掛住睇電視   灼到腍哂   口感唔掂 ~

丸 - 突然好食辣椒豉油 + 蒜蓉   所以為咗佢而淥咗蟹籽丸 + 龍蝦丸 + 蟹柳   唔知啲蟹柳係咪擺得耐得滯 (Expiry Date 係 2010 年)   但啲紅色好怪   一路食一路有啲驚   好似同平時食嗰啲唔同咁嘅 ~

粟米湯 - 加蛋花同黑椒   Perfect 呀 ~

沖完涼又做下家務   熨下衫   雖然開哂啲窗   但一啲風都無   勁辛苦呀 ~

可能又豉油又菜脯   所以超勁口渴   飲咗包利賓納同蘆薈汁好啲咋   不過都仲係好口渴囉 ~

呢排頭條日報好多都有麥記 Coupon   所以都儲咗唔少   一路剪一路覺得好開心   因為我勁鍾意剪 Coupon   感覺好似好有着數咁   但其實好多時都用唔到   但唔剪又驚到時無得用喎   所以銀包最多嘅唔係錢   係 Coupon 喇 ~

~~~~

今朝起身都仲係覺得好鬼鹹咁   所以食奶醬多 + 奶茶   我鍾意食多士   但又成日覺得唔多夠飽喎 ~

番到菇場周圍巡 Blog   唔係時間唔知點過 ~

晏晝同媽咪 里奧大人去 美心皇宮 飲茶   成日幻想飲完之後同媽咪行街   唔駛番工就好喇    因為我覺得飲茶係假期嘅節目之一呢 ~

星悅鮮廚 @ 官塘 ( FEB-2009 )

尋晚同媽咪預祝生日   本來諗住去旺角金龍船食 6 人餐   但里奧大人要做 Proposal 唔得閒嚟   所以得 4 個人食   媽咪又唔多舒服   朱朱又嘔   好攰咁   所以媽咪話唔出去食   等人齊先再去食過呢 ~

呢排啲天氣令人無咩胃口   所以清清淡淡就算喇   但清得嚟又要惹味喎 ~

~~~~

尋晚成晚發夢   搞到無覺好瞓   最記得係幫人用大機影相   要擒高擒低影影影   所以當我扎醒幾次嘅時候   係夢中所擺嘅姿勢   最慘係起身嘅時候   條頸真係痛唯呀 ~

今朝無咩胃口   食芝腿菠蘿包 + 凍奶茶    旨在食芝士同火腿   因為個包係唔好食嘅 ~

番到菇場遊魂咁   無心機   成個人謝哂 ~

里奧大人上咗大陸開會   加上朱朱尋晚嘔   所以同媽咪 朱朱一齊食 Lunch   等我放心啲嘛 ~

住家飯 @ 媽咪屋企 + 芝麻糊年糕 ( FEB-2009 )

尋晚去媽咪屋企食飯呀   因為奶奶入咗醫院   所以里奧大人去探佢   我就唔探得喇   仲咳緊   同埋醫院太多菌喇 ~

無情情好想食卷蛋   所以去大班買咗條原味卷蛋去媽咪屋企一齊食   因為自己食一條會食到驚呢 ~

去到未食飯   當然同朱朱多角度影相啦   其實朱朱唔駛點郁   係我郁咁啫   一路影佢一路瞓   搞到我都好想瞓呀 ~

今次餸菜有酸梅麵豉蒸排骨 + 蒸蝦 + 蒸紅油 + 炒白菜仔 + 節瓜淮山鱷魚肉湯   不過我飲咗碗湯之後都無咩胃口食嘢 lu ~

差唔多番到屋企嘅時候   里奧大人打電話嚟   話佢仲未食飯   陰公啦   9 點幾仲未食飯   所以我番到屋企即刻煮水餃米粉比佢   總好過食車仔麵啦 ~

之後我話今日係元宵佳節想食湯丸   但屋企無湯丸   所以用日本年糕   夠煙韌嘛 ~

差唔多想瞓嘅時候   豬豬妹 ( 噹媽 ) 打嚟   傾咗差唔多 1 個鐘頭   原來佢驚我仲唔開心   所以打嚟慰問   真係好多謝佢呀   我果刻真係好感動   因為真係好難相信寫 Blog 會遇到一個交心嘅朋友   仲有一個就係 冰姑 ( 冰姑 )   因為佢知我唔開心   同噹媽講咗   所以噹媽就打嚟慰問喇   所以我又係好多謝冰姑呢位好朋友 ~

仲有仲有 卡姑 同 小公主 (唔提唔得㗎)   同卡姑每日都會 MSN (番工嘅話)   已經成為習慣   佢唔番工真係好唔慣   同埋同佢 M 真係好開心   因為真係感受到佢真係一個好開心嘅人   佢又成日打錯字   咁我已經可以一日笑幾十勻   所以佢真係帶比我無限歡樂㗎   而小公主呢   我鍾意佢好真   又覺得同我性格差唔多   所以好有共鳴咁   不過我好少同佢 M   因為佢真係好忙   所以真係唔好意思打擾人呢 ~

~~~~

今朝坐車好凍   可能肚餓呀   所以早餐食牛扒腸仔蛋配多士 + 奶茶   食完渾身是勁呀 ~

番到菇場同同事傾偈   話有個同事 Resign 咗   但菇場接到客人投訴呢位同事   所以話計埋哂所有假叫佢早啲走   但佢同佢老公唔滿意   所以佢老公就打電話嚟騷擾   仲講咗十分鐘粗口喎   呢啲人真係無修養   公司賠埋錢比妳走   好心妳就算啦   自己唔啱再先都要咁做   真係不知所謂 ~

朝早食得太多肉   所以晏晝要食清啲喇   同里奧大人去公司附近茶餐廳   今次我又食薑蔥撈麵    啲薑勁辣   仲辣過辣椒油   里奧大人食咖哩牛腩飯   碟飯上枱嘅時候都 O 哂咀   點會將隻匙羹直插落啲飯度㗎   真係第一次見呢 ~

茄汁豬扒 + 酸齋 & 齋鴨腎 (外賣) + 菠菜 + 隔夜湯 + 徑步 ( FEB-2009 )

終於有時間煲羅漢果雪梨茶   今次材料係雪梨 + 羅漢果 + 南北杏 + 川貝   希望飲完唔好再咳啲唔咳啲咁啦 ~

次次夜晚飲湯都瞓得唔好   因為要去廁所   所以尋日飲完茶就飲碗隔夜湯   咁就無問題喇 ~

5 點半同里奧大人一齊去徑步   一路行一路有風吹住   爽呀 ~

是日晚餐 - 茄汁豬扒 + 酸齋 & 齋鴨腎 (外賣) + 菠菜

茄汁豬扒 - 用韓式醃肉醬醃一晚   但其實都唔夠味   所以整茄汁豬扒   因為我勁鍾意食自己整嘅茄汁㗎 ~

酸齋 & 齋鴨腎 (外賣) - 突然勁想食   所以買嚟做餸喇 ~

菠菜 - 唔想再食菜心   但又唔想食瓜   咁食菠菜就最好喇   有鐵質嘛 ~

星期日其實唔會咁早瞓   原因係朝早 10 點幾起身   瞓咗十幾個鐘   唔會咁易眼瞓   但一諗起第朝要番工   同埋只瞓得 8 個鐘   就唔瞓唔得喇 ~

~~~~

今朝食芝蛋治烘底 + 鴛鴦   真係食到悶   但星期一又唔多想諗食咩喎 ~

唔知點解今日番到菇場好 Happy   做嘢都特別比心機呀 ~

晏晝同里奧大人去食粉麵   呢個天時食嘢都幾矛盾   無胃口又想食濕嘅嘢   但又驚食到成身汗   因為流完汗個人好攰   同埋勁想番屋企沖涼呢 ~

殘餘物資 + 蛋炒飯 + 清補涼鱷魚肉豬展湯 + 年糕 ( FEB-2009 )

最鍾意星期六晏晝同里奧大人去茶餐廳食 Tea   唔知點解感覺特別 Relax 咁㗎 ~

諗住煎蘿蔔糕同年糕當晚餐就算   點知聞到蘿蔔糕好刺鼻   應該係壞咗   打亂哂我嘅計劃    但又唔想出街食   又唔想醃肉   突然 "叮" 一聲   打開冰格   拎哂啲就嚟過期嘅冷藏食物出嚟煮   唔好煩喇 ~

是日懶餐 - 煎漢堡扒 + 墨魚卷 + 沙爹醬炒海鮮 + 清補涼鱷魚肉豬展湯 + 年糕

煎漢堡扒 + 墨魚卷 - 非常簡單又好味   不過就好無益 ~

沙爹醬海鮮 - 用沙爹醬炒海鮮都唔錯   無哂雪味同腥味呀 ~

清補涼鱷魚肉豬展湯 - 清補涼係自已執嘅   因為覺得湯包唔多新鮮   同埋好少材料 ~

蛋炒飯 - 好在仲有冷飯   唔係應該唔飽呢 ~

年糕 - 煎年糕真係好考耐性   加上我又用細煎 Pan   諗住擺得靚靚   食嘅時候會開心啲   點知黐埋一嚿嚿   里奧大人仲陰陰咀笑住話   駛咩咁有心機逐塊煎啫   依家食嘅時候都黐住哂   一大嚿煎就得啦   講完其實都好認同佢講法㗎   哈哈 ~

~~~~

仲係咳   又唔想睇醫生   咁唔係辦法   所以嚟一招以毒攻毒   效果唔錯㗎 ~

食完行番去教會    食完行下食係舒服好多呢 ~

崇拜嘅時候   牧師講了 Nick Vujicic 嘅遭遇   沒有四肢只得一隻少少腳掌   但積極面對人生   當下我真係覺得自己真係無資格自怨自艾   加上人大喇   再成日為瑣碎事執着真係覺得好無意思囉   放開啲   人都開心好多㗎 ~

番到屋企先知奶奶嚟咗大埔   所以同埋佢哋一齊去酒樓飲下午茶   其實間酒樓真係好難食   但唔知點解佢哋仲要去呢間呢 ~

雲吞米粉 + 蠔油菜心 ( FEB-2009 )

尋日去 Pie & Tart 買咗個肉鬆酥番菇場食   我已經係慢慢食   即係幾個字咬一啖   唔敢一次過食   因為驚一次過食會好漏 ~

點知到放工嘅時候   都覺得好漏   所以唔想諗煮咩   同埋一諗起要煮肉類就想反胃 ~

我唔想食啫   但里奧大人都要食   所以買雲吞同菜心   清清哋就算喇 ~

是日懶餐 - 雲吞米粉 + 蠔油菜心

雲吞米粉 - 雲吞係麵舖買   米粉係福字米   懶人必備㗎 ~

蠔油菜心 - 大大條又爽甜   最緊要方便   一淥就搞掂 ~

無啦啦想食甜嘢   所以食咗之前買嘅紅豆粉粿   寫明係台灣製造   仲諗住啲粉粿會煙煙韌韌   點知原來好腍   加上里奧大人又睇 "史前逃龍"   見到啲怪物樣衰又核突   搞到我一路食一路想嘔   我好怕食嘢嘅時候睇啲桃突嘢㗎 ~

同埋就算食緊自己好鍾意食嘅嘢   但一見到煮食節目煮整雞呀   豬肉嘅過程   我就會即刻轉台兼當堂無哂胃口 ~

~~~~

尋晚瞓覺又咳到顛   應用係我飲咗包凍檸檬茶累事 ~

今朝又要番工   但就遲咗   所以只可以食芝蛋治烘底 + 奶茶    星期六食咩都無所謂   因為諗到番半日就咩都覺得好食㗎喇 ~

元綠壽司 ( FEB-2009 )

食咗藥   頭重重又眼瞓   真係好無原動力去煮飯呀 ~

次次唔舒服   口淡淡就好想去食壽司   所以又去元祿喇   因為唔需要等位 ~

食咁多次元綠壽司   覺得今次嘅三文魚好鮮甜   食咗 3 碟   因為都係唔想食咁多生嘢   今次鰻魚青瓜卷做特價只係 $6/件   但係只可以每人 1 件   仲要係細細件鰻魚多多青瓜絲   不過 $6 就唔要求咁多喇 ~

食完同里奧大人去超市買米粉   估唔到依家超力米粉特價都要 $3 (原價 $3.2) 都幾貴   所以轉買福字米粉   $12.9/5 包 (原價 $16.9)   本來想買 2 Pack   但里奧大人話試下先   到時好食再買過   但我話驚到時要 $16.9 呀   不過最後都係買 1 Pack 算喇   因為我都驚唔好食就嘥咗啦 ~

里奧大人之前上網搵到止咳藥方   材料係紅棗 + 紅糖 + 薑   飲完又好似好啲   不過我都照食西藥   雙重功效會好啲 ~

~~~~

無咁咳   當然瞓得好   瞓得好當然心情好   所以今朝食牛扒餐 + 奶茶   超滿足呀 ~

番到菇場少少忙   但就勁有 Holiday Mood   唔願做嘢呀 ~

晏晝同里奧大人去富記車仔麵    呢間車仔麵係有阿姐帶位   唔可以亂坐㗎   佢比我坐嘅搭枱位對住把風扇   我話唔舒服想轉位   阿姐唔比   里奧大人都未出聲   搭枱嘅 OL 已經好激動幫口話 : "有無搞錯呀   比錢食嘢㗎   人哋唔舒服呀   唔準轉位 ?!"   阿姐最後將風扇向上   又不斷同我講唔好意思   其實我都無咩所謂   最緊要唔好吹住我就得喇   相嗌唔好口呢   而我又唔舒服   無氣同佢嘈呀   不過   如果係里奧大人或者我屋企人唔舒服而唔比換位就唔同講法喇   我會用佢拚過㗎 ~

最搞笑係我影相嘅時候   搭枱嘅 OL 話駛咩影吖   下次都唔會嚟   唔通佢以為我去 Openrice 唱衰佢哋呀嘛 ~

住家飯 @ 媽咪屋企 ( FEB-2009 )

尋晚里奧大人約咗朋友食飯   所以我都去媽咪屋企痴餐 lu ~

見未有得食飯   所以食幾塊曲奇   真係好鬆化好好味   不過唔敢食咁多   驚太漏呀 ~

媽咪知我咳   所以特登煲紅蘿蔔淮山鱷魚肉湯    飲完真係好啲   今餐有梅菜豬肉 + 菜心炒魚片 + 茄汁煎魚   不過個梅菜豬肉就好鬼好鬼辣囉   落咗 10 隻指天椒去炒   家姐同工人就食到舔舔脷   工人仲會用指天椒送飯㗎   我就食咗少少梅菜   但都覺得好鬼好鬼辣呢 ~

食完又傾偈   之前應承媽咪會搬出嚟市區陪佢   點知最後都搬唔到   好在媽咪都話唔緊要啦   咁講我個心都舒服啲 ~

我呢世人最緊張就係媽咪 家姐 朱朱同里奧大人   我真係好想多啲時間見佢哋   但奈何有時唔係樣樣都咁完美呢 ~

飲咗媽咪煲嘅鱷魚肉湯真係無咁咳喎   有個好媽咪   真係感到好幸福呢 ~

~~~~

今朝都係驚熱氣   唔咁再食烘三文治   所以食芝士腸蛋出前一丁 + 鴛鴦 今朝都幾熱   要慢慢食   食到一半啲湯都凍哂   變咗好難食   無可能再食落去 lu ~

番到菇場   幾個同事都咳   真係唔知自己幾時先好番呢 ~

晏晝本來同里奧大人去食車仔麵   但太多人等   所以去番茶餐廳   食羅宋湯螺絲粉餐 + 牛肉腸   超好味呀 ~

蜜味金沙骨 + 臘腸粒炒飯 + 節瓜紅衫魚湯 ( FEB-2009 )

尋晚有人睇樓   但又想滾湯   整完要即刻洗嘢   唔想比人睇到廚房立立亂 ~

是日晚餐 - 蜜味金沙骨 + 臘腸粒炒飯 + 節瓜紅衫魚湯

蜜味金沙骨 - 用焗爐焗原來好方便   又無油煙   不過覺得醃得唔夠入味   有待改善 ~

臘腸粒炒飯 - 將之前食剩嘅臘腸切粒   用黎炒飯好好味呢 ~

節瓜紅衫魚湯 -  有瓜有湯   一次過超方便 ~

層樓仲有 3 年就供完   不過都勁想搬番出九龍囉   嗰時里奧大人啲家姐話一齊住有照應   老實講   真係住咁耐都唔覺得有咩照應囉   好簡單   我同里奧大人病   又唔見佢哋話煮飯拎比我哋食   何來照應呢 ~

~~~~

咳咳咳   仲要咳到幾時呢   最慘係一瞓就咳   飲暖水食藥   飲琵琶膏通通都無用嘅   好煩呀 ~

諗住早餐食麵   點知見到同事   佢話一齊食   同佢又唔太熟   費事食麵   又要食番芝腿治烘底 + 奶茶 ~

今朝買咗幸福傷風咳素   希望可以真係唔好咳得咁犀利   但一睇到 "此藥可使人昏昏欲睡" 就暈咯   不過番到菇場即刻食㗎喇   本身又唔夠瞓   所以唔夠一個鐘已經想瞓覺 ~ 

同里奧大人去公司附近餐廳食 Lunch   想食清清哋   所以食薑蔥撈麵    里奧大人就食豉椒肉片飯   估唔到薑蔥撈麵又幾好食喎   初初覺得 $21 都幾貴   但原來有 2 個麵餅   所以都幾飽肚 ~

甜豆炒帶子 + 臘腸飯 ( FEB-2009 )

尋晚同里奧大人一齊放工   仲好幸運可以一齊坐   所以都好開心下 ~

難得一齊番屋企   其實真係好想出街食   特別係好想打邊爐   但咳成咁點去吖 ~

失望地去街市買甜豆   買完就番屋企煮飯 lu ~

是日懶餐 - 甜豆炒帶子 + 臘腸飯

甜豆炒帶子 - 第 1 次整   因為我唔識打蠔油茨汁   所以用海鮮醬做汁   甜甜哋唔錯 ~

臘腸飯 - 屋企有臘腸真係好方便   諗唔到煮咩就拎兩孖出嚟蒸   咁都可以食兩碗飯㗎 ~

食臘腸飯好油膩   所以都會飲啲酸嘅飲品   好耐之前去日本時   領隊特別推介罐裝西柚汁   有果肉㗎   味道唔錯呢   屋企附近只得 Jusco 有得買   平時 $14.x   但上次做特價再加 9 折   所以 $10.x 就買到   勁抵 ~

呢兩年新年都無整 "全盒"   因為無人會嚟我屋企拜年   同埋我哋多數出去人哋屋企拜年   所以瓜子糖果係一律欠奉嘅 ~

但我就會買盒 "花街" 比自己食囉   兒時回憶呀   細細個成日食   但之後都唔見有再出   幾年前去杜拜   臨番香港前喺免稅店見到有 "花街"   所以即買番香港   因為香港真係搵唔到   但呢幾年又出番喎   所以都會買番盒   七彩繽紛真係令人好開心㗎   但我就會同家姐 Share   驚食得太多會厭呀 ~

我覺得上年唔多開心   所以今年買嘢都講意頭   我以前絕對唔會咁㗎   過年前特登買啲最生最青嘅蕉   里奧大人都 O 哂咀呢   哈哈 ~

~~~~

呢排一諗到要瞓覺有啲驚   因為一瞓就咳   所以試下臨瞓前飲琵琶膏   希望可以改善下 ~

OMG   咳到瞓唔到   重要搞到里奧大人都無覺好瞓   佢見我咳到咁   所以好好人咁幫我搓背脊   但搓完又真係舒服好多喎 ~

起身一照鏡   對眼勁腫   塊面又腫 (肥)   真係好反胃   但都唔理   照番工 ~

早餐食芝蛋治烘底 + 鴛鴦   我覺得件芝蛋治無味呀 ~

番到菇場無耐   見有同事應該比人炒   因為睇到佢超黑面   態度仲唔多好   所以氣氛突然間好緊張   無人出聲   無人打 Keyboard   因為好想細心聆聽發生咩事呀 ~

晏晝同里奧大人去興記   食到有啲厭 lu ~