和民居食屋 @ 大埔

今朝明明聽到鬧鐘響   但唔知點解好快又瞓番   11 點先起身   所以無番到教會 ~

出去食早餐嘅時間過哂   唯有自己煮啦   反正之前買咗好多丁丁  ~



食完就整粉圓   諗住整完買杯奶茶番屋企   扮珍珠奶茶   點知整咗成個鐘頭   仲要燶咗   個煲都燶埋   擦到發火   真係又嘥煤氣   又嘥水嘥力   下次出去買好過呀 ~   

天氣實在太潮濕喇   對完個火爐已經成身汗   再無動力做其他家務喇 ~ 

晏晝同里奧大人食 tea   天氣潮濕   要食 d 辣嘢   食泰式香草辣椒肉碎炒河    諗住好惹味    點知一 d 都唔好食   只係靠食 d 指天椒 先 feel 到辣味 ~

因為我要整鹹金桔   又想去官燕棧買湯包   所以要去大埔墟   里奧大人就番屋企做功課喇 ~ 

自己一個人行街   唔好處係第一無人拎理   第二係好易失控   不過我都有分寸嘅   家下經濟唔好   所以買嘢真係要諗過度過架 ~  

今次好開心就係去官燕棧   買 d 湯包   猴頭菇同花旗參   3 百幾蚊搞掂   仲可以做會員   咁計落都有 so 嘅 ~ 

之後又買咗件衫比媽咪   再買件外套比奶奶   尋晚 Annual Dinner 抽到嘅行利是錢已經用突 lu   所以無嘢買比自己   不過大家開心   好過我一個開心嘅 ~ 

番到屋企真係有 d 虛脫   好在唔駛煮飯   因為約咗家姐去和民開餐 ~ 

以前和民好多嘢食   依家小咗好多款式之餘   食物又唔好食喎 ~ 

今次食 和風 pizza + 和民沙律  + 串燒盛合 + 麻醬海鮮冷麵   最難食係個串燒   因為唔多熱   但隻碟就好熱   都唔知係咪用微波爐叮熱嘅 ~