菜脯粒炒蛋 + 灼菠菜 + 丸 + 粟米湯 ( FEB-2009 )

尋晚放工坐巴士   因為趕住番屋企煮飯   所以坐樓下倒頭車位置   架車 Chok 到不得了   加上樓下比較焗   搞到我想嘔   第一次坐車咁辛苦呀 ~

去到街市諗住買節瓜滾湯   估唔到行咗 4 檔菜檔都無得買   咁算啦   飲粟米湯算喇   唔駛煩 ~

是日懶餐 - 菜脯粒炒蛋 + 菠菜 + 丸 + 粟米湯

菜脯粒炒蛋 - 用咗大半碗菜脯 + 4 隻蛋   我無送飯   就咁食   所以覺得好鹹又好滯 ~

菠菜 - 掛住睇電視   灼到腍哂   口感唔掂 ~

丸 - 突然好食辣椒豉油 + 蒜蓉   所以為咗佢而淥咗蟹籽丸 + 龍蝦丸 + 蟹柳   唔知啲蟹柳係咪擺得耐得滯 (Expiry Date 係 2010 年)   但啲紅色好怪   一路食一路有啲驚   好似同平時食嗰啲唔同咁嘅 ~

粟米湯 - 加蛋花同黑椒   Perfect 呀 ~

沖完涼又做下家務   熨下衫   雖然開哂啲窗   但一啲風都無   勁辛苦呀 ~

可能又豉油又菜脯   所以超勁口渴   飲咗包利賓納同蘆薈汁好啲咋   不過都仲係好口渴囉 ~

呢排頭條日報好多都有麥記 Coupon   所以都儲咗唔少   一路剪一路覺得好開心   因為我勁鍾意剪 Coupon   感覺好似好有着數咁   但其實好多時都用唔到   但唔剪又驚到時無得用喎   所以銀包最多嘅唔係錢   係 Coupon 喇 ~

~~~~

今朝起身都仲係覺得好鬼鹹咁   所以食奶醬多 + 奶茶   我鍾意食多士   但又成日覺得唔多夠飽喎 ~

番到菇場周圍巡 Blog   唔係時間唔知點過 ~

晏晝同媽咪 里奧大人去 美心皇宮 飲茶   成日幻想飲完之後同媽咪行街   唔駛番工就好喇    因為我覺得飲茶係假期嘅節目之一呢 ~