峇里炒飯 + 羅漢果菜乾瘦肉湯 + 芒果豆腐凍 ( 31-MAY-2009 )

( 31-MAY-2009  SUN )

今朝 9 點 45 分起身啦   仲估唔到可以去太興食早餐添   真係好開心呢 ~

食完又係去買餸啦   早啲去無咁多人呢 ~

番到屋企就拖地   之後就等食 Tea 喇 ~

是日晚餐 - 峇里炒飯 + 羅漢果菜乾瘦肉湯 + 芒果豆腐凍

峇里炒飯 - 求其啦   改咗少少食譜咁啦   加啲減啲改啲唔錯吖   腦要曉轉彎嘛   今次整得唔錯㗎   不過加咗指天椒就辣到里奧大人飛起囉   不過無得番轉頭   唯有照食咁啦 ~

羅漢果菜乾瘦肉湯 - 湯包得菜乾 + 細半粒羅漢果 + 南北杏 + 2 粒蜜棗   包裝上寫明建議加 2 條紅蘿蔔  & 2 條粟米 & 豬肉   咁就甜好多啦 ~

芒果豆腐凍 - 第一次跟食譜整   屋企有無糖豆漿嘛   不過自己懶   無打芒果汁   如果唔係仲正呀 ~

臘腸釀苦瓜 + 雪菜肉絲炒年糕 + 雪梨羅漢果茶 ( 30-MAY-2009 )

( 30-MAY-2009  SAT )

終於等到 Off   但如果里奧大人都一齊係 Off 就更好喇 ~

9 點半起咗身啦   所以去 KFC 食早餐   $10 一份早餐   1 蜜糖鬆餅 + 1 牛角包 + 奶茶   真係抵   估唔到依家睇免費報紙都有着數呢 ~

食完再去街市買餸   盡哂家庭主婦嘅責任啦   里奧大人話喉嚨唔舒服   我即刻煲雪梨羅漢果茶   夠埋體貼入微啦 ~

里奧大人放 12 點 15 分   番到屋企仲可以休息半個鐘   抖足精神就去食 Tea 喇 ~

魚皮餃墨魚丸湯金邊粉 / 鹹魚雞粒炒飯 

是日晚餐 - 臘腸釀苦瓜 + 雪菜肉絲炒年糕

臘腸釀苦瓜 - 跟食譜整嘅   味道好 Good Good Good 呀 ~

雪菜肉絲炒年糕 - 第 1 次整   又係好好 Good Good Good 呀 ~

今餐嘅餸菜真係好滿意呢 

咖哩魚蛋撈芋絲 + 隔夜湯 ( 29-MAY-2009 )

( 29-MAY-2009  FRI )

是日 Happy Friday   所以早餐要食飽啲   食芝士蘑菇雞肉腸片三文治烘底 + 奶茶   有芝士真係好味好多 ~

番埋今日   聽日又 Off   如果法例規定番一日放一日就好咯 ~

晏晝同里奧大人又去美心皇宮   因為媽咪又煲咗當歸南棗雞蛋水比我飲呢 ~

叉燒菠蘿包 / 沙茶牛肚 / 黑椒鴨掌 / 金華火腿帶子炒飯 / 媽咪煲嘅當歸南棗雞蛋茶

放工同里奧大人一齊去奶奶屋企   比啲裇衫比里奧大人惠州嘅表哥   之後食下惠州茶果   其實一早講好 7 點開飯   但係佢哋 7 點都未番   因為里奧大人趕住番屋企同朋友傾功課   所以都係走先喇 ~

茶果唔夠飽家嘛   所以番到屋企都煮咗咖哩魚蛋撈芋絲   再淥個福字麵比里奧大人   再加埋豌隔夜湯   咁就夠飽喇 ~

豉椒炒蜆肉 + 咖哩魚蛋 + 灼通菜 + 石斛清補涼瘦肉湯 ( 28-MAY-2009 )

( 28-MAY-2009  THU )

雖然放假   但都唔會瞓得太晏   10 點鐘就起咗身喇   同里奧大人去大家樂食早餐   多人到爆   排咗 15 分鐘先有得食呀 ~

食完行百佳   講出嚟好悶咁   但我真係好鍾意同里奧大人一齊去超市買嘢㗎 ~

假期真係想比自己抖抖   所以早一晚熨哂所有衫   咁就可以一路睇電視一路食古古力餅   呢盒餅係里奧大人同事送嘅   好好味   不過好貴   我唔會買呢 ~

眨下眼就到食 Tea   唔想食太飽   所以食酸辣米線喇 ~ 

食完就落雨   最慘係買完餸   兩個人用一把縮骨遮   又要揹袋   又一袋二袋喎   遮得人又遮唔到個袋咁   喺咁嘅情況下   我發脾氣同里奧大人講我半邊身濕哂啦   其實只係濕咗個袋   點知開門入屋嘅時候   原來佢半件衫濕哂呀   陰公   佢仲串串共話   呢啲就真係半邊身濕哂喇 ~

是日晚餐 - 豉椒炒蜆肉 + 咖哩魚蛋 + 灼通菜 + 石斛清補涼瘦肉湯

豉椒炒蜆肉 - 第 1 次整   求其啦   不過我係灼熟再炒   所以里奧大人話好韌喎 ~

咖哩魚蛋 - 驚里奧大人唔夠食   所以整多樣餸   點知佢話唔整都得 ~

灼通菜 - 超難食   唔知點解   食落口好似有滑潺潺嘅感覺咁   超怪 ~

石斛清補涼瘦肉湯 - 係時候要清熱解毒喇 ~

今晚實在太開心喇   因為有里奧大人陪我一齊食榴槤呢 ~

赤丸製麵所 @ 德福 ( 27-MAY-2009 )

冷烏冬 - 呢碗係細碗嘅   但份量比之前細好多呀   有啲呃人囉   但又好好味喎   煙煙韌韌   勁有口感   不過我唔可以食太多   會覺得好脹胃呀

煎餃子 - 我覺得太脹卜卜好恐怖   同埋太多肉咁囉   我麻麻哋鍾意

煎肉腸 - 無特別

天婦羅多春魚 - 太耐無食   所以好想食

天婦羅南瓜 - 一心叫比里奧大人食   點知佢話喉嚨唔多舒服唔食   要我食哂添

橙汁 - $5 咋   好過飲汽水

( 27-MAY-2009  WED )

唔知係咪尋晚無飯落肚嘅關係   今朝特級肚餓呀   所以就去遠少少嘅茶餐廳食早餐   食沙爹牛肉米 + 太陽蛋 + 方包 + 奶茶   飽到吖   食完慢慢行番去菇場   勁他條 ~ 

呢排唔知做乜   對眼濛查查咁   都唔知係咪有老花 ~

早餐太飽喇   所以晏晝同里奧大人食麥記算喇   我食脆昋雞翼餐   里奧大人食豬柳蛋漢堡 + 古古力新地 (多醬多花生)   勁正 ~

食就好食喇   不過真係覺得好熱氣呢 ~

番到菇場又上網   但唔上網又唔知做乜好   不過咁   上網總好過傾電話嘅   因為唔會影響人嘛 ~ 

今晚唔駛煮飯   因為要同里奧大人睇電器   所以就近近地去赤丸開餐喇 ~

食完呢餐   再加上晏晝又食麥當勞   真係感覺到好熱氣呀   所以番到屋企附近就食糖水潤一潤呢 ~

彩虹 - 我覺得用透明玻璃碗裝就靚好多

芝麻糊 - 里奧大人突然好想食   呢碗芝麻糊好滑   不過食完真係好漏呀

端午做節 @ 奶奶屋企 ( 26-MAY-2009 )

乳豬 / 蒸魚 / 瑤柱雞 (百佳買) / 釀豆腐 / 釀茄子 / 釀尖椒 / 灼菜 / 炸春卷 / 瑤柱白粥

( 26-MAY-2009  TUE )

同一個地方食早餐   真係食到好悶   加埋天陰陰仲更加無 Mood   所以今朝去美心快餐食早餐   吉列魚柳腸仔拚厚多士 + 奶茶   同茶餐廳一樣係 $21   咁我覺得去美心抵啲   因為有我鍾意食嘅他他醬同厚多士呢 ~

唔好講笑   食完呢份早餐   飽到上心口   番到菇場作眼瞓添呀 ~

媽咪煲咗當歸南棗水比我   所以晏晝就同媽咪 里奧大人去美心皇宮飲茶 ~

一星期飲一次茶真係唔錯   但今朝實在太飽   唔太食得落   但我唔食啫   佢哋要食家嘛   我又唔想話樣樣唔食好掃興咁   最多食唔哂就打包咁囉   一齊食開心啲嘛 ~

潮州粉果 / 干蒸牛肉賣 / 煎腸粉 / 菠蘿叉燒包 / 煎三色糕 / 芋頭糕 / 馬蹄糕 / 蘿蔔糕 / 蛋散 / 雪菜火鴨絲湯米

放工去媽咪屋企   再等里奧大人 Join 我哋去奶奶屋企食飯做節呢 ~

去到仲驚   成枱都係餸   6 個人食   有 8 餸 1 湯   我唔想食飯   所以食瑤柱白粥   好棉呀   如果自己可以煲成咁就好 lu ~

日本魚蛋炒烏冬 + 皮蛋鹹蛋杰粥 + 腐竹糖水 ( 25-MAY-2009 )

( 25-MAY-2009  MON )

早餐食奶醬多 + 奶茶   滿心歡喜食厚多   點知無喎   激氣呀 ~

番到菇場又唔忙   個胃又戚戚痛   無哂心機   好煩呀 ~

呢排成日睇報紙見 KFC 做 Promo   所以同里奧大人去食 KFC 喇   不過呢   太漏喇   巴辣雞翼又唔辣   又唔脆   食到令人後胃   食完呢次之後   半年內都唔想再食   唔想再見 KFC 呀 ~

今晚同里奧大人一齊放工   再一齊去街市買餸   有人幫手拎生果真係好好多呢 ~

是日懶餐 - 日本魚蛋炒烏冬 + 皮蛋鹹蛋杰粥 + 腐竹糖水

日本魚蛋炒烏冬 - 用前日食剩嘅五香肉丁開穫炒   所以呢個烏冬辣辣哋   好開胃呢   今次試 Made in Japan 嘅烏冬   $27.9/5 包   我覺得貴呀   但又好好味喎   最緊要係唔痴底呀 ~

皮蛋鹹蛋杰粥 - 煲粥真係好難呀   我用 1/8 嘅米 + 4 豌水   大火煲 15分鐘   再中慢火煲 15 分鐘   一開蓋   無哂水喎   要喺臨食前加滾水   里奧大人仲話呢豌係湯飯   唔係粥   仲笑笑口 Remind 我記得咬碎先好食呀   哎呀   人家諗住食粥對個胃好啲   點知煲到咁樣   真係人都顛呀 ~

腐竹糖水 - 半包腐竹 + 6 豌水 + 1 大粒冰糖   真係好甜好滑呢   飲完當堂覺得自己啲皮膚好似 BB 咁滑呀 ~

元綠壽司 @ 大埔 ( 24-MAY-2009 )

冷辣辣麵 / 芒果蟹籽沙律 / 素魚翅海蜇壽司 / 螺肉壽司 / 鮮帶子壽司 / 秋刀魚壽司 / 炭火燒鰻魚壽司 

( 24-MAY-2009  SUN )

一早就落雨   同里奧大人去唔駛擔遮都到嘅茶餐廳食早餐   正呀 ~ 

我嘅回鍋肉芝士腸炒蛋公仔麵 / 里奧大人嘅五香肉丁腸仔火腿公仔麵

落雨唔鍾意出街   唯有喺屋企執下嘢咁啦   之前又無做家務   成屋都係嘢   再唔執就唔願執㗎喇   執下抖下都唔錯嘅   當做運動咁囉 ~

屋企附近開咗間譚仔雲南米線   又去試下   第時食 Tea 可以多個選擇呢 ~

我嘅腐竹牛丸麻辣米線 - 小辣 /  里奧大人嘅腩肉豬潤酸辣米線 - 小辣

大多數嘅星期日或者假期都好少飲水   所以依家試下飲玫瑰花茶   人哋話飲花茶好㗎   不過我唔記得乜嘢好 lu   總之係買咗唔好嘥咁啦 ~

諗住求求其其煮餐飯   但里奧大人話唔想我煮   想我抖下喎   所以就去元綠壽司喇   因為仲係落雨   唔想行咁遠呀 ~

金泰泰式美食 @ 大埔墟街市熟食中心 ( 23-MAY-2009 )

( 23-MAY-2009  SAT )

見個胃無咁痛   又見有 d 胃口   所以早餐食回鍋肉孖腸米粉 + 凍奶茶   不過食兩啖已經好唔舒服   但無理由唔食家嘛   最後只食剩啲筍同半碗米粉   算勁㗎喇   總好過嘥嘢嘛 ~

番到菇場   個胃隱隱作痛   好在老闆 Off   索性唔做嘢   上網 Relax   務求令自己唔好咁緊張咁呢 ~

終於等到 1 點放工   即走啦   同里奧大人去食 Tea 咯 ~

我食吉列魚柳沙律 + 可樂    里奧大人就食鹽燒秋刀魚餐 + 青檸梳打    自從同老闆娘話秋刀魚好好食之後   依家老闆娘一見有秋刀魚   就好滿心歡喜話我知   搞到我都唔好意思唔食呀 ~ 

食完番屋企抖陣就番教會   啲時間用得真係好好呀 ~

聽完崇拜   之後還書   再去熟食街市食泰國菜 ~

今次去金泰泰式美食   試下好唔好食   好食下次再嚟 ~

6 點左右   其實唔係太肚餓   所以叫辣椒膏炒蜆 + 馬拉盞炒通菜 + 泰式海南雞飯 + 珍多冰   第一次試呢間   覺得味道淡咗啲   唔夠惹味呀   同埋唔知點解   硬係覺得九龍城啲泰國菜係好味啲咁㗎噃 ~

埋單 $121 咋   真係好抵   不過下次唔知仲會唔會咁平呢   因為成個熟食中心貼滿 "更改租約   變相加租"   咁即係又會將條數打番落我哋度啦 ~

食到飽飽就同里奧大人慢慢散步番屋企喇   呢排無湯水   加上又成日出街食   喺時候要冰涼一下咁呢   所以我整咗香蕉船比里奧大人嘆   我就食果肉雪條   一路食一路睇電視   真係好開心呢   我實在太耐無試過咁喇 ~

( 19-MAY-2009 ) + ( 20-MAY-2009 ) + ( 21-MAY-2009 ) + ( 22-MAY-2009 )

( 19-MAY-2009 TUE )

早餐 : KFC 焗鬆餅 ( 多蜜糖 ) + 奶茶 

午餐 : 豉椒排骨炒河 + 奶醬多 + 凍檸茶 

晚餐 : 台灣辣肉燥 + 蔬菜子母湯

( 20-MAY-2009  WED )

每月一到呀   不過今次唔係肚痛   係超級胃痛   又成日瞓唔着   所以要請假喺屋企休息呀 ~

全日瞓   無食嘢無飲水   唔係特登唔食唔飲㗎   係一飲完水之後   一上床休息就想嘔   好辛苦   索性唔飲喇   搽多啲 Cream 保濕算喇   咁搞法   應該可以瘦幾磅呢 ~

( 21-MAY-2009  THU )

要番工啦   但個胃仲超級痛呀 ~

無哂心機   唔願郁   最想快啲 Lunch Time   因為想瞓覺呀 ~

幾辛苦先捱到放工   即番屋企沖涼休息   見有啲胃口   就同里奧大人去豆漿大王食炒麵 +  酸辣雲吞米線   呢餐晚餐係呢生人最難食嘅一餐   炒麵唔熱   又腍又油   雲吞又唔熱   我哋都懶得叫佢哋換   因為唔會再有翻單呢 ~

( 22-MAY-2009  FRI )

早餐唔食唔得   所以去 7 仔買燒賣 + 朱古力奶    一食嘢個胃好脹   超辛苦   行步路都慢過人呀 ~

晏晝同里奧大人去美心食海鮮炒烏冬   都唔明依家啲快餐店搞乜鬼   個碟就洗手盤咁大   但份量又少喎   咁樣比人感覺好少仲細碟咗咁   但事實上份量真係唔多喎 ~

食完就里奧大人送我去巴士站   因為我要去覆診呢 ~

2 點半覆診   3 點半搞掂   番到屋企即刻沖涼睇電視   之後瞓覺   舒服好多呀 ~

唔知食乜好   不過一定要食濕嘢   本來想食米線   但驚脹胃   所以轉食車仔麵 ~

呢幾日里奧大人都好慘   無啖好食   所以我一好番   必定會煮餐住家飯   好好報答里奧大人呢幾日無微不至嘅照顧呢 ~

台灣辣肉燥炒油麥菜 + 七味蒜香菇 + 牛油香草粟米 + 隔夜湯

早餐食芝士蘑菇雞肉腸片三文治烘底 + 奶茶    好似好耐係食芝士咁   半溶嘅芝士真係好好味呢 ~



出面熱到溶咁滯   但菇場就凍到震   又無帶外套喎   狂飲熱水等身體暖 d   但咁樣凍成日都幾慘 ~   

晏晝同里奧大人去另一間茶餐廳食嘢   試咖哩牛腩意粉 + 西多士 + 凍檸茶    味道都唔錯   又唔係好嘈   又有電視睇   又有 "挨 pan"  椅坐   真係舒服好多架 ~ 

條街真係又熱又曬   一到夏天就好多嘢搞   朝早一定要記得搽防曬   夜晚又要隔兩三日做美白同保濕 Mask   諗起都煩呀   但唔做又唔得喎 ~ 

菇場凍到唔知煮乜好   所以求求其其算喇 ~ 

是日懶餐 - 台灣辣肉燥炒油麥菜 + 七味蒜香菇 + 牛油香草粟米 + 隔夜湯

台灣辣肉燥炒油麥菜 - 台灣買嘅辣肉燥罐頭   差唔多到期   所以要清埋佢喇   用黎炒油麥菜真係好好食呢 ~ 

七味蒜香菇 - 唔知乜菇   但我覺得 d 菇有腥味   所以又蒜蓉又魚露  又七味粉又 XO 醬一齊炒   出黎又真係無咁腥喎 ~   

牛油香草粟米 - 之前煲湯用剩嘅   用黎炒就最好不過啦 ~  

隔夜湯 - 隔一晚仲入味   簡直係超勁甜呀 ~ 

食食下飯   廚房燈閃閃下   無啦啦燒咗燈胆   又趕唔切買燈胆   所以開電筒仔 + 抽油煙機嘅燈黎洗碗   噢 ~ 

西檸軟雞 + 南瓜粟米栗子紅蘿蔔豬展湯 ( 17-MAY-2009 )

( 17-MAY-2009  SUN )

今朝番教會   所以 10 點起身喇   咁可以慢慢食早餐   難得假期   最唔鍾意趕頭趕命嘅感覺呀 ~

唔想來來去去都同一間食   所以周圍搵下   呢間叫海旋門餐廳   門面唔錯   入去試下   坐低之後   里奧大人問我聞唔聞到噏味 ?!   但我聞唔到噃   咁不如走啦   但佢話無問題   我聞唔到就得喎 ~

聞唔到啫   但個心已經 "形" 住間嘢好 Dirty 咁   不過呢間真係唔會有翻單   因為個麵好腍好難食呀 ~

番完崇拜就陪里奧大人去圖書館借書   佢借唔到   但我就借咗幾本食譜   有圖書館真係好好呢 ~

借完行埋街市買嘢就番屋企咯   因為條街好熱呀 ~

估唔到依家又 Hit 番珍珠奶茶   屋企附近已經有 6 間   有啲係連鎖店   有啲係小本經營   試過哂都係小本經營好飲啲  連鎖店啲水準唔掂呀   茶又淡   珍珠又腍   但去另一區又唔係咁架噃   唉 ~

太熱無胃口   所以我食雞翼薯條 + 芬達   里奧大人就食鹹魚雞粒炒飯 + 可樂   但我杯芬達係走冰   最終都係太甜   飲咗兩啖無飲 lu ~

星期日時間過得好快  番到屋企拿拿臨換衫煲湯喇 ~

是日晚餐 - 西檸軟雞 + 南瓜粟米栗子紅蘿蔔豬展湯 

西檸軟雞 - 第 1 次整   我覺得個汁 OK   但里奧大人話唔夠味喎   可能今次太心急   求其寫咗 Receipe 就算   下次要再整好啲先得 ~

南瓜粟米栗子紅蘿蔔豬展湯 - 太耐無飲湯   覺得好好飲   因為個湯實在太甜喇   甜到想打人呀   哈哈 ~

泰地道 @ 九龍城 ( 16-MAY-2009 )

辣椒膏炒蜆 - 個汁好味   但係啲蜆就勁細隻勁少囉

泰式海南雞半隻 - 雞肉好滑   個汁又正呀

油飯 - $15 豌都幾貴   但又幾好味喎   煙煙韌韌

泰式香葉肉碎炒河 - 味道 OK   辣辣哋好開胃

鐵板蝦醬黑汁通菜 - 求其放上去鐵板就算

香酥魚芒果絲 - 好似咁叫   超好食呀   因為好香口   芒果絲酸酸辣辣好開胃呢

珍多冰 - 我無飲   但媽咪話 OK

石榴子冰 - 我無飲   但里奧大人話 OK   因為都好多石榴子

榴槤飄香 - 正到不得了呀   食完真係好滿足呀

( 16-MAY-2009  SAT )

瞓得唔好無胃口   所以食奶醬厚多士 + 奶茶   多士好食   但杯奶茶就超難飲   飲兩啖已經飲唔落喇 ~

星期六喎   有邊個會有心情做嘢吖 ~ 

放工約埋里奧大人同家姐一齊去 Pizza Hut 食 Lunch   今次好彩里奧大人早少少到   所以有位呢 ~

忌廉雞湯 - Pizza Hut 整得好好飲   最怕 "稀亨亨" 咁呢

意大利蔬菜湯 - 偷飲一啖都唔錯   之前好淡

超級至尊 (芝心批底) - 好耐無食   所以覺得好好味   但唔知點解會碟上囉

千層肉醬闊麵 - 個肉醬幾濃味   食完都好漏下

西班牙海鮮炒飯 - 啲料好少呀

芒果沙冰 - 太甜呀   啲味又假   呢杯仲要加 $10 轉特飲   唔值呀

雙重特濃朱古力 - 比個名呃咗   原來一啲都唔濃㗎   仲衰過茶餐廳嗰啲朱古力奶   呢杯仲要加 $15 添   呃錢呀

忌廉梳打 - 本來我都想轉特飲   但佢哋話兩杯都唔掂   所以我叫汽水算喇   穩陣啲嘛

食完去拜爸爸 lu   之後一齊去媽咪屋企休息 ~

5 點幾出發去九龍城   去曲奇四重奏買蝴蝶酥   好在唔多人咋   因為我好憎排隊呢   去到試食   我覺得啲曲奇真係麻麻哋   唔夠 Jenny 鬆化   但蝴蝶酥又好鬆化噃   所以最後只買咗一盒比媽咪算喇 ~

之後行番去泰地道   一頭一尾咁行都幾辛苦 ~

埋單 5 百幾都幾貴   因為九龍城好多平過佢   但媽咪鍾意呢間環境   無法啦 ~

番到屋企睇埋 "証人"   又幾好睇噃   所以睇到 12 點先瞓覺呢   好眼瞓呀 ~      

蒜芹魚鬆炒米粉 + 芫茜皮蛋魚片湯 ( 15-MAY-2009 )

( 15-MAY-2009 FRI )

終於 Happy Friday 喇   食下其他嘢先   所以去遠少少嘅茶餐廳   食牛肉腸 + 奶茶 ~

我覺得豉油真係緊要   但係呢間餐廳啲水準真係次次唔同   有時鹹有時甜咁嘅   今次我話要多豉油   點知鹹到吖   要落多啲甜醬中和番呀   我覺得呢餐早餐食咗好多醬油咁呀 ~

星期五呢   番到菇場都特別開心㗎 ~

晏晝同里奧大人去菇場附近茶餐廳   食咖哩豬扒意粉 + 西多士 + 凍檸茶   意粉要加 $3   唔知係咪因為用咗咖哩汁嚟炒呢 ~

好少晏晝食西多士   覺得勁有食 Tea 嘅 Feel 呀 ~

呢排食嘢好似唔多健康   所以幾攰都要煮餐住家飯呢 ~

是日懶餐 - 蒜芹魚鬆炒米粉 + 芫茜皮蛋魚片湯

蒜芹魚鬆炒米粉 - 我好鍾意食蒜芹㗎   爽爽咁好好味   鯪魚又煎到香香咁   正呀 ~

芫茜皮蛋魚片湯 - 食完咖哩燥熱   要下下火呢 ~

小草屋 @ 將軍澳中心 ( 14-MAY-2009 )

( 14-MAY-2009  THU )

今朝着中袖   出到街覺得凍   好後悔唔着長袖呀 ~

無啦啦勁餓   所以食榨菜肉絲米粉 + 腸仔太陽蛋多士 + 奶茶   太陽蛋真係好靚   不過我唔食生勾勾嘅蛋黃   只食蛋白   仲要放落湯度浸熟先敢食呢 ~

無嘢做   個腦一片空白   好在可以上網打發時間   唔係肯定提早老人痴呆呀 ~

Lunch Time 同里奧大人試另一間粉麵店   我食水餃米線   里奧大人食菜肉雲吞 + 炸魚腐   水餃好爽   唔錯   不過湯底無味   雲吞都 OK   因為有好多菜   好健康咁   炸魚腐完全唔掂   油淋淋又無味呢 ~

撞鬼吖   個口好 "寡" 呀   所以忍唔住食奇華嘅低糖馬仔   低糖到一啲甜都無呀   我覺得正常馬仔甜甜哋好味好多 ~

夜晚唔駛煮飯   個腦無嘢諗添 ~

放工同里奧大人去將軍澳   因為同奶奶補祝母親節呀 ~

相就唔方便影喇   只能夠影啲自己眼前嘅嘢咁囉 ~

食完同里奧大人去買西褲   差唔多 10 點先搞掂   去到地鐵站入面靜英英   有啲恐怖呢 ~

番到屋企 11 點幾   拿拿聲沖涼   我沖完熱水涼又吹埋頭   成身滾哂好難瞓得着  再加超時瞓覺   我仲更加難更加難瞓着   但唔瞓又唔得喎   因為我唔夠瞓   啲手指好易有濕疹好痕㗎 ~

臘腸油飯 + 蕃茄薯仔排骨湯 ( 13-MAY-2009 )

( 13-MAY-2009  WED )

今朝着簡便 One Piece + Legging + 涼鞋 + 唔 Jel 頭就出門口   所以好快出到去呀   索性行遠啲   去大家樂食早餐食家鄉炒米粉 + 奶茶   太耐無食   覺得超好味呀   因為有好多菜呀 ~

不過要用番 15 分鐘行番菇場真係幾攰下   算啦   當做下運動   無咁肥呀 ~

番到菇場又係坐   想唔啤梨身型都唔得啦 ~

晏晝同里奧大人去美心快餐   依家啲快餐店都好貴下   兩個餐要 $77   海南雞飯 ($39) + 越南車頭河粉 ($38)   最慘唔係太好食嘛 ~

實在太耐無飲湯咁   所以幾攰都要滾啖湯飲下 ~

是日懶餐 - 臘腸油飯 + 蕃茄薯仔排骨湯

臘腸油飯 - 唔想諗餸   求其蒸條臘腸算喇 ~

蕃茄薯仔排骨湯 - 5 個蕃茄 + 2 個薯仔 + 排骨 ($15)   今次用鹽醃排骨 15 分鐘   但食落啲排骨一啲都唔韌   但平時蒸排骨又好韌架噃   都唔明點解   呢個湯超甜超好味   我無食飯   只係飲湯同食湯渣已經好飽喇 ~

咖哩黃薑漢堡粒炒飯 + 粟米蘑菇蛋花湯 ( 12-MAY-2009 )

( 12-MAY-2009  TUE )

早餐食菠蘿油 + 奶茶   甜甜哋   個皮又脆脆哋   確實唔錯 ~

淡季嘅菇場   真係靜得好恐怖呢 ~

終於到 Lunch Time   同埋媽咪 里奧大人去美心皇宮飲茶   非常開心呀 ~

菠蘿叉燒包 / 燒賣 / 鯪魚球 / 雪菜火鴨絲燜米 / 紫米露

食到好飽   簡直諗唔到晚餐煮乜好呢 ~

是日懶餐 - 咖哩黃薑漢堡粒炒飯 + 粟米蘑菇蛋花湯

咖哩黃薑漢堡粒炒飯 - 漢堡扒切粒   油都唔駛落   因為啲漢堡粒會 "必" 哂啲油出嚟   再加埋咖哩粉 + 黃薑粉一齊炒   好香呀   顏色又靚喎 ~

粟米蘑菇蛋花湯 - 加埋蘑菇真係好好飲呢 ~

朱朱走咗之後   直到依家個心都好實   但係有樣估唔到嘅係   原來里奧大人都好好   因為佢成日氹我開心   唔博我咀   叫乜做乜唔駛我勞氣   一聽見我把聲唔對路就好緊張   夜晚瞓覺會摸下我塊臉同眼角   睇下我有無喊咁呀 ~

唔知係因為番工睇得電腦多   定係之前喊得太勁   依家對眼成日濛查查   最慘係眼袋   因為比我捽到甩皮   勁樣衰呀 ~

全日茶餐廳 ( 11-MAY-2009 )

( 11-MAY-2009  MON )

是日倒序法

晚餐 - 魚香燜茄子 + 生炒牛肉飯 + 凍唂咕   因為要做 Research   所以無時間煮飯 ~

午餐 - 豉椒排骨炒河 (多汁) + 飛天奶醬多 + 凍奶茶   因為想食濃味嘢   所以又去茶餐廳食 Lunch ~

早餐 - 芝士蘑菇雞肉腸片三文治烘底 + 奶茶   因為奶醬多要 $16   同雙併治一樣價錢   所食食雙併治抵啲 ~

口痕食呢包暴君薯圈   辣到嘖火   屙咗 3 次   下次咪搞我喇   貼錢買難受呀 ~

香煎三文魚扒 + 菜心 + 頭抽蔥花炒飯 + 羅漢果雪梨水 + 勁薑蕃薯糖水 ( 10-MAY-2009 )

( 10-MAY-2009 SUN )

今朝又要早起身   諗住又去太興   點知有 10 幾人排隊   9 點幾咋   平時無人㗎   唔通母親節關係   啲人食完早餐同母親大人出街街 ~

又唔想食丁丁   所以去扒王之王試下 ~

我食吉列魚柳 + 火腿炒蛋 + 多士 + 奶茶   里奧大人就食雞扒 + 火腿炒蛋 + 多士 + 鴛鴦   味道 OK   魚柳唔腥好好味呀 ~

食完番屋企梳洗就出發去旺角   因為朋友平仔浸禮呢 ~

難得同里奧大人出旺角   順便去花園街買平衫   不過就食咗嘢先   驚里奧大人無力行嘛 ~

天氣熱到呢   又多人又焗   所以求其去花園街附近食嘢   估唔到有雲南桂林過橋米線   諗都唔諗就標入去食 lu ~

間間雲桂米線嘅環境都比較暗   但旺角呢一間就特別暗   所以入到去個人好想瞓呢 ~

太熱喇   無乜胃口   食一樣餸好喇   我食豬軟骨小鍋米線   里奧大人食豬潤豬腩肉米線   雖然小辣   但一啲都唔辣   可惜可惜 ~

食完即去花園街買嘢   呢排里奧大人知我唔開心   所以買乜都無托手踭   真係好呢 ~

番到屋企放低所有嘢   就一齊再去街市買餸   真係好攰呀 ~

天氣燥熱又無煲湯水   所以就煲羅漢果雪梨茶   要清潤一下呀 ~

是日懶餐 -  香煎三文魚扒 ( 黑椒汁 ) + 菜心 + 頭抽蔥花炒飯 + 勁薑蕃薯糖水

香煎三文魚扒 - 煎極個皮都唔脆   求其煎熟就算喇   再埋個黑椒汁   真係好惹味呢 ~

菜心 - 太攰喇   求其灼熟算喇 ~

頭抽蔥花炒飯 - 實在太愛呢個飯喇   覺得里奧大人真係應該食極都唔會厭呢 ~

勁薑蕃薯糖水 - 個蕃薯擺咗一星期都唔爛   勁呀 ~  

大食會 @ 姑奶屋企 (大埔) ( 9-MAY-2009 )

( 9-MAY-2009  SAT )

今朝同里奧大人一齊 Off   咁啱又要去銀行整嘢   唔駛特登請假   真係感恩呀 ~ 

好難得咁早起身   所以去太興舒舒服服咁食個早餐呢 ~

搞掂哂就同媽咪 家姐一齊去葵芳湘川滬食 Lunch 喇   食完就出發去送朱朱最後一程喇 ~

雞絲粉皮 / 正宗四川擔擔麵 / 素鵝 / 小籠包 / 上海春卷 / 上海粗炒

今次所有嘢都係由 "再見寵兒善後服務中心" 安排嘅   整過安排都好順暢   非常之感恩呢   費用係獨立入爐費 ($1,680) 加沖涼 ($300) ~

原本約 3 點半   但佢哋話可以早啲嚟   因為朱朱會沖咗涼   乾乾淨淨咁見我哋呢   同埋可以摸下朱朱   所以我哋就 2 點半左右去到等 lu ~

個環境令人好舒服   但當我哋見到朱朱時   個個好激動咁喊   在場人員即刻拍拍膊頭以示安慰   等我哋冷靜啲再講講之後會點點點呢 ~

我哋坐喺工場   其實係一個大廳   摸下朱朱   又影下相   到咗 3 點半就入爐   我哋安排朱朱獨立入爐   之後就入休閒室等 ~

等咗個半鐘就搞掂   之後帶埋朱朱番媽咪屋企喇 ~

幫朱朱執骨骨嘅叔叔講   朱朱身體積聚唔少藥物   15 歲已經夠皮喇   咁多病   機能會好差   咁到時朱朱會仲慘 ~

真的嗎 ?!   真的會是這樣嗎 ?!   聽了叔叔咁講   其實我哋真係好感恩   朱朱不用打針咁走   而係喺家姐懷抱舒舒服服咁走呢 ~

大家之後就各有節目喇   所以去到荃灣就分頭走 lu ~

今晚同奶奶慶祝母親節   所以去里奧大人家姐屋企搞大食會   我真係無心情   加上對眼又腫   眼圈又黑   真係好唔想去   但又費事啦   一陣以為乜事   我仲煩呀 ~

親愛的朱朱 ( 9-MAY-2009 )

親愛的肥朱,

今天是 2009年 5 月 9 日   妳離開了我們一星期有多了   今年的 5 月   家姐真的過得很難過呢 !!

雖然家姐 媽咪仍很難過   但當想起妳在天家是活得開開心心   沒有病痛   健健康康的生活着   我們就會沒有那麼傷感吧 !!

今天家姐 姐夫 媽咪送妳最後的一程 !! 

當一望見妳時   當然又是激動的哭起來   但看着妳乖乖的熟睡   這一刻真的覺得面前的妳   是不用再受痛苦折磨的朱朱呢 !!

整個過程   我們都陪着妳   妳是不會孤孤單單的 !!  

肥朱仔呀   妳在天家要好好的生活   不用擔心我們呢 !!

愛妳的家姐上
9-MAY-2009   

酸梅麵豉蒸排骨 + 灼菠菜 ( MAY-2009 )

早餐食餐蛋治 + 奶茶   攰得滯   居然唔記得叫烘底   不過呢排天氣乾燥   唔好食咁多熱氣嘢啦   唯有咁諗會舒服啲囉 ~

Lunch Time 諗住同里奧大人去 Pizza Hut   但超多人   尋日又無人又多枱喎   唔通 Happy Friday 個個都會出街食嘅 ~

最後同里奧大人去茶餐廳食粉麵   今次我又食魚蛋炸魚皮河   里奧大人食炸魚片頭河粉   樣樣都咁好食呀 ~

天氣乾燥   唔可以食得太多煎炸熱氣嘢   所以晚餐就以蒸 + 烚為主 ~

是日懶餐 - 酸梅麵豉蒸排骨 + 灼菠菜

酸梅麵豉蒸排骨 - 整咗 N 次   酸酸甜甜真係好好味呢 ~

灼菠菜 - $5 大大份   仲可以分兩晚食   真係唔買對唔住自己呀 ~

滷水小拚盆 + 菠菜 ( MAY-2009 )

今朝抽血   所以同阿 Head 講會 10 點先番菇場   咁啱里奧大人又遲少少番工   真係好嘅啫 ~

我抽完血番屋企附近巴士站時   送車尾   點知原本嗰架就係里奧大人坐緊嘅巴士   真係無緣呀 ~

不過我好快就有車   追得佢好貼   同佢到達嘅時間係一樣   太好喇   唔駛等嚟等去嘛 ~

里奧大人熱氣   無乜胃口   所以同佢 Share 榨菜肉絲米粉餐   有炒蛋 麵包 奶茶   再加多件奶醬多   咁就夠飽喇 ~

番到菇場有嘢做   不過慢慢做   呢排瞓得唔好   所以唔可以太博命呀 ~

媽咪知里奧大人熱氣   特登煲咗花旗參雪梨豬展湯   咁所以晏晝就同媽咪 里奧大人去美心皇宮飲茶 ~

 百花釀茄子 - 啲麵豉汁超好味呀

潮州粉果 - 皮薄餡靚   又係超好味呀

銀魚肉片飯 - 我無食   不過應該都唔差呢   銀魚同肉片份量唔少

炸雲吞 - 熱辣辣脆卜卜   超好味呀又

薑蔥牛柏葉 - 個汁都好味   不過油咗啲  

叉燒包 - 美心嘅包點真係整得好好食呢

蓮蓉包 - 啲蓮蓉唔鞋   都唔錯嘅

番到菇場又要諗晚餐煮咩   都真係諗咗唔少時間呀 ~ 

是日晚餐 - 滷水小拚盆 + 菠菜

滷水小拚盤 - 7 隻雞中翼 + 1 隻雞腎 ($3) + 1 磚滷水專用豆腐 ($3)   今次整得好食噃   初初諗住好快手   點知都要 40 分鐘先燜好 ~  

菠菜 - $5 份咋   仲可以分兩餐食   勁勁勁勁抵呀 ~ 

執枱嘅時候   無啦啦發現個蘋果有張 Label   好似印水紙嗰啲呢   我真係第一次見㗎咋 ~

御泰坊 @ APM ( APR-2009 )

早餐 - 芝士火腿三文治烘底 (走牛油) + 奶茶 

午餐 - 麥當勞   今次我食麥樂雞 6 件餐 (附送新加坡蜜糖芥辣醬)   里奧大人食豬柳蛋漢堡   因為我有麥樂會卡   所以送杯朱古力奶昔   我超勁鍾意點醬   所以我加多 $1 買多盒芥辣醬   用嚟蘸薯條真係勁好味呀 ~ 

食食下又見到里奧大人同事   唯有一齊坐啦 ~  

晚餐 - 御泰坊 @ APM 

媽咪屋企嘅電視壞咗   所以陪媽咪睇電視機款   順便去 APM 食晚飯 ~  

約埋家姐喺 Food Court 等   之後再一齊去睇   咁啱家姐同事喺馬來西亞番嚟   買咗幾支雪條比家姐   所以就食埋先去睇電視喇 ~ 

因為有 2 款心水嘅電視   里奧大人又到咗   所以去食咗晚飯先   冷靜一下   食完先扑取買邊款呢 ~ 

今次食嘅食套餐   原價好似 $635   依家用東亞信用卡只需半價咋   所以就叫呢個餐喇 ~

水餃魚蛋雜豆米粉 ( MAY-2009 )

早餐食菠蘿油 + 奶茶又甜又鹹又苦   多重享受呀 ~

菇場淡季呀   所以無乜嘢做   上網睇嘢睇到眼攰呀 ~

里奧大人一齊食 Lunch   我食龍蝦丸米粉   炸咗嘅龍蝦丸真係好好味呢   里奧大人食豉椒肉片飯   個汁真係好正   我又勁鍾意食啲洋蔥辣椒粒   但啲肉片就醃到無哂食肉嘅口感   好恐怖呢 ~

知道今晚要熨兩機衫   所以會煮啲超級方便嘅晚餐喇 ~

是日特懶餐 - 水餃魚蛋雜豆米粉

水餃魚蛋雜豆米粉 - 加埋 "南記" 辣椒醬   真係好好味呢   又香又辣   正爆呀 ~

呢排無咩住家飯食   所以要食多啲生果   但來來去去都係蘋果 橙 木瓜真係有啲厭   但呢排皮膚唔好   榴槤同芒果太濕毒又唔想食   依家見到有得買荔枝   真係好想買黎食   但又太燥唔可以食咁多   真係唔知食乜生果好喇 ~

蒜香豬扒炒飯 + 脆肉瓜 + 海龍海馬瘦肉湯 ( 4-MAY-2009 )

( 4-MAY-2009  MON )

放咗 3 日假   終於又要番工 lu ~

今朝無乜胃口   所以食奶醬多 + 奶茶   甜甜咃唔錯啦 ~

番到菇場又無嘢做   啲時間過得好慢好慢   又 Down 喎   加上里奧大人請咗一日假   喺屋企做功課   真係好想請假番屋企呀 ~

幾經辛苦先到 Lunch Time   去媽咪屋企附近間大家樂開餐   同媽咪 Share 食冰活藍貝意粉 + 蒜蓉包 + 羅宋湯   其實無乜胃口   所以 Share 食就啱啱好呢 ~

是日懶餐 - 蒜香豬扒炒飯 + 脆肉瓜 + 海龍海馬瘦肉湯

蒜香豬扒炒飯 -  用蒜蓉醃咗兩晚   味道唔錯   不過塊豬扒白雪雪就樣衰咗啲囉 ~

脆肉瓜 - 擺咗兩日   唔食就掉㗎喇   所以用雞湯 (雞粉 + 水) 灼熟就算   唔駛煩 ~

海龍海馬瘦肉湯 - 媽咪特登煲㗎   滋潤一下都好嘅 ~

富山 @ 大埔 ( MAY-2009 )

帶子 / 三文魚壽司 / 劍魚腩壽司 ) ( 芥辣八爪魚 / 螺肉 / 八爪魚壽司 / 醋鯖魚壽司 / 九洲拉麵 / 

藍梅棉棉冰 @ 彩虹 

心情仍未平服   但已經好了很多 ~

很感恩媽咪對朱朱的離世沒有太大的傷痛 (希望不是假裝吧) ~

而我呢   我一不開心的時候   便會即是想着   朱朱是去陪着爸爸   這麼我的心情便會好一些 ~

更要明白的是   始終都會有分離的一日呢 ~

實在沒有胃口吃東西   但不吃的話   里奧大人又很擔心   這幾天吃的食物   真是覺得沒有什麼味道   因為真的很不想吃呢 ~

早餐 - 五香肉丁出前一丁 (自家煮) 

午餐 - 鹽燒秋刀魚飯 / 干燒伊麵

蒜頭豆豉蒸鯇魚 + 炒粒粒 + 花膠螺片豬骨湯 ( 2-MAY-2009 )

早餐 - 雪菜肉絲米粉 /  火腿通粉 / 火腿蛋配厚多士 / 奶茶 & 鴛鴦

午餐 - 吉列魚柳拚鮮果沙律 / 午餐 - 豉油王炒麵

晚餐 (自家煮) - 蒜頭豆豉蒸鯇魚 / 炒粒粒 ( 粟米 & 脆肉瓜 ) / 花膠螺片豬骨湯