豉椒炒蜆肉 + 咖哩魚蛋 + 灼通菜 + 石斛清補涼瘦肉湯

( 28-may-2009 thu )

雖然放假   但都唔會瞓得太晏   10 點鐘就起咗身喇   同里奧大人去大家樂食早餐 ~ 

多人到爆   排咗 15 分鐘先有得食呀 ~  

食完行百佳   講出黎好悶咁   但我真係好鍾意同里奧大人一齊去超市買嘢架 ~ 

假期真係想比自己抖抖   所以早一晚熨哂所有衫   咁就可以一路睇電視一路食古古力餅   呢盒餅係里奧大人同事送嘅   好好味   不過好貴   我唔會買呢 ~   

眨下眼就到食 tea   唔想食太飽   所以食酸辣米線喇 ~ 

落街無落雨   食完就落雨喎   最慘係買完餸   兩個人用一把縮骨遮   又要揹袋   又一袋二袋喎   遮得人又遮唔到個袋咁   喺咁嘅情況下   我發脾氣同里奧大人講我半邊身濕哂啦 ( 其實只係濕咗個袋 )   點知開門入屋嘅時候   原來佢半件衫濕哂呀   陰公   佢仲串串共話   呢 d 就真係半邊身濕哂喇   噢 ~ 

是日晚餐 - 豉椒炒蜆肉 + 咖哩魚蛋 + 灼通菜 + 石合清補涼瘦肉湯

豉椒炒蜆肉 - 第 1 次整   求其啦   不過我係灼熟再炒   所以里奧大人話好韌喎 ~

咖哩魚蛋 - 驚里奧大人唔夠食   所以整多樣餸   點知佢話唔整都得   噢 ~

灼通菜 - 超難食   唔知點解   食落口好似有滑潺潺嘅感覺咁   超怪 ~

石斛清補涼瘦肉湯 -  係時候要清熱解毒喇 ~

今晚實在太開心喇   因為有里奧大人陪我一齊食榴槤呢 ~