元綠壽司 @ 大埔 ( 30-SEP-2009 )

( 30-SEP-2009  WED )

今朝有胃口啦   食腿蛋治烘底 + 奶茶   但麵包烘得太乾   超難啃呀 ~

晏晝想食啲熱嘢   買沙爹牛肉米粉   點知油到爆   又係超難食   食到一半食唔落喇 ~

夜晚終於有胃口啦   想食濃味嘢   所以去元綠壽司   因為落大雨唔想行咁遠呢 ~

( 25-SEP-2009 ) + ( 26-SEP-2009 ) + ( 27-SEP-2009 ) + ( 28-SEP-2009 ) + ( 29-SEP-2009 )

( 25-SEP-2009  FRI )

今日請假   因為呢日係奶奶安息禮拜 ~

同里奧大人食完早餐   番屋企再 Prepare 嘢   梳洗後就陪我覆診   感謝神   醫生話我報告好好   同埋差唔多一年都無翻發   所以我依家只需要一年覆診一次   實在好開心呢   但仍然要食鐵丸   仲諗住睇住可以即走添 ~

取藥處要等一百個號碼先到   所以同里奧大人去 Canteen 醫肚   啲嘢食難食到不得了   叉燒湯濛無味嘅   湯都無味   超難頂 ~

食完就再去取藥處拎藥   時間啱啱好   之後拿拿聲打的去世界大酒店 lu ~

感謝神保守帶領   安息禮拜一切都好順利 ~

完畢之後就一齊去 Food Court 食嘢   食完就各自歸番屋企休息 ~

( 26-SEP-2009  SAT )

朝早同里奧大人去紅磡火車站麥記食早餐   估唔到都好多人喎 ~

食完就去大酒店   再去火葬場   之後去食解穢酒   所有嘢終於搞掂哂 lu ~

番到屋企好攰   所以都無煮飯   出街食飯算喇 ~

( 27-SEP-2009  SUN )

今朝番祟拜   所以喺教會附近食早餐 ~

因為 11 點幾先食完早餐   所以多數 3 點幾先食 Tea   食完再去買餸   番到屋企已經 5 點   時間真係好唔見駛呢 ~

是日懶餐 - 勝瓜魚滑湯

勝瓜魚滑湯 - 2 條勝瓜 + $10 鯪魚肉   呢個湯超方便又飽肚   飯都唔駛食呀 ~

( 28-SEP-2009  MON )

每月一痛   雖然唔係話好痛   但個肚成日扯住扯住好辛苦   但又唔想成日請病假   所以呢日喺菇場係咁瞓   放工即打的番屋企   好在有 8 折   埋單 $110 算抵啦   6 點番到屋企喎   如果坐巴士要 6 點 40 分先番到呀   我真係頂唔順呀 ~

呢日又全日無食嘢   一食就想嘔   所以番到屋企即刻沖涼瞓覺   舒服好多呢 ~

( 29-SEP-2009  TUE )

呢日都仲係有啲唔舒服   同埋瞓得唔好   個人超攰超攰又無胃口喎   所以勁想快啲放工番屋企   本來想坐巴士   但諗諗下都係唔好   所以又打的   嚟緊呢個星期要節衣縮食喇 ~

今日又全日無食過嘢   但番到屋企沖過涼就舒服好多   開始精神同有啲胃口   勁想食燒賣腸粉   所以里奧大人即刻買番屋企喇   因為過咗一陣又可能唔想食呢 ~

釀尖椒 + 蕃茄薯仔排骨湯 + 冰皮月餅 (綠豆蓉) ( 24-SEP-2009 )

( 24-SEP-2009 THU )

今日 Off   因為想陪下里奧大人   不過其實自己都想偷懶嘅   都係唔好講到自己咁偉大咁呢 ~

唔知好彩定唔好彩   今朝煤氣公司有人驗查煤氣    哎呀   我哋又要換煤氣喉呀   因為上層啲單位應該爆過鹹水   所以腐蝕咗條喉   一定要換   因為驚唔知幾時會流煤氣呀   又要比 $3,300 呀 ~

朝早同里奧大人 & 2 姑奶一齊食早餐   食下傾下已經 12 點幾   點解時間過得咁快㗎   之後同里奧大人去買餸   咁就過咗半日喇 ~

3 點幾先食 Tea   今次又試食冬蔭功魚片頭湯粉   但都係接受唔到椰奶味   我記得喺泰國飲嘅冬蔭功好好味㗎噃   無咁重椰奶   點解咁㗎 ~

是日晚餐 - 釀青椒 + 蕃茄薯仔排骨湯

釀青椒 - 一份尖椒只係 $5   再買 $10 鯪魚肉咁就可以整一樣餸   真係好抵呢   不過我覺得釀青椒都幾麻煩   今次用鐵鑊煎   因想要有金黃效果   雖然落咗好多油   但都同樣痴鑊   麻麻煩煩    又再用番易潔鑊煎   估唔到都會有金黃效果   之得一早用易潔鑊啦 ~

尖椒皮蛋 - 突然好想食皮蛋   加啲尖椒 麻油 蒜蓉一齊食又唔錯噃 ~

蕃茄薯仔排骨湯 - 4 個蕃茄 + 1 個中薯仔 + $10 排骨   呢個湯超甜   又有營養   不過就唔鍾意又批又切囉 ~

冰皮月餅 (綠豆蓉) - 家姐之前買咗 3 Pack 唔同味嘅冰皮月餅比我   今次試綠豆蓉   勁失望   無味   口感又唔好喎   同幾年前食嘅差好遠呢 ~

鹹魚雞粒炒飯 + 西生菜 ( 23-SEP-2009 )

( 23-SEP-2009  WED )

今朝又係有秋涼嘅感覺   秋天真係令人好舒服同好開心呀 ~

番到菇場上網睇報紙   越睇越攰   都係鍾意睇一份份揭揭下嘅報紙多啲 ~

尋日食過燒賣腸粉   覺得好好味   所以今日晏晝再食過呢 ~

一早諗好煮乜   只係去街市買菜就搞掂喇 ~

是日懶餐 - 鹹魚雞粒炒飯 + 西生菜

鹹魚雞粒炒飯 - 里奧大人好鍾意出街食呢個炒飯   所以我想試下整   味道唔錯呢   同埋最緊要無出面咁油呀 ~

西生菜 - 食生菜真係好方便   灼兩灼就搞掂   不過我就麻麻哋鍾意食生菜呢 ~

飯後甜品就係媽咪尋晚比嘅雜豆糖水   媽咪煮餸就一般   但煮糖水同煲涼茶就好足料好好味呀 ~

板長壽司 @ APM ( 22-SEP-2009 )

三文魚籽軍艦 x 3 - 粒粒脆卜卜好好味   又新鮮

帆立貝壽司 x 2 - 家姐食嘅

醋鯖魚壽司  x 1 - 最鍾意食醋鯖魚嘅口感

火炙墨魚鬚壽司 x 3  - 好爽口  我鍾意

紫菜蝦卷 (1 客) - 媽咪食嘅

海膽軍艦 x 4 - 啲紫菜唔多新鮮

芥辣墨魚軍艦 x 2 - 越食越 "攻" 鼻   正呀

鮟康魚肝卷 (1 客) - 媽咪食嘅

火炙鰻魚壽司 x 3 - 麻麻哋   無入口即溶嘅感覺呀

煙三文魚壽司 x 2 - 媽咪食嘅

三文魚壽司 x 8 - 依家做特價  只需 $3/件   不過依家細件咗好多啦

醬漬三文魚壽司 x 4 - 又係特價  $ 9/2 件   半生半熟嘅三文魚   口感好得意

帆立貝刺身 (6 件) - 家姐同里奧大人食嘅

炸軟殼蟹 x 1 - 一般啦

炸生蠔 (1 客) - 麻麻哋   啲蠔太細隻喇

醬燒三文魚頭 (1 客) - 唔講唔知係醬燒囉   一啲汁都無嘅   同埋 3 件都有眼珠   好恐怖呀   本來呢碟係我哋三母女食嘅   後尾我同家姐嚇到比哂媽咪食呀

日本未來粟米 x 1 - 呢碟粟米其實係半條嘅份量   二十蚊   不過媽咪話想試食   所以試下   估唔到有好多汁   好得意呀   因為我第一次食生粟米呢

( 22-SEP-2009  TUE )

尋晚 10 點 20 分就瞓   所以今朝好精神   加上今朝又有秋涼嘅感覺   真係好舒服   番工都覺得特別開心呀 ~

老闆 Off 半 Day   所以我可以任意上網   唔駛鬼鬼祟祟   正呀   如果我唔係背住老闆房就好啦   咁就可以點玩都得呀 ~

Lunch Time 唔係太餓   但唔食又唔得   所以買啲可以擺耐唔會太難食嘅燒賣腸粉喇 ~

今晚同媽咪 家姐 里奧大人去 APM 嘅板長壽司   呢餐媽咪請   因為家姐鍾意食壽司喎   但媽咪就只食熟嘅壽司或者炸物囉 ~

食完各自歸家   番屋企途中落雨   落咗場雨真係涼咗好多   但都要開冷氣   因為覺得開冷氣會爽啲呀 ~

冬菇魚唇燜雞翼 ( 21-SEP-2009 )

( 21-SEP-2009  MON )

星期一   最難過嘅星期一又嚟咯 ~

今次又飲鴛鴦   睇下係咪會精神啲先   但原來無用㗎   一樣咁眼瞓嘅 ~

喺菇場又靜又悶   所以焗下紅棗圓肉杞子   咁樣斟下飲下   時間會過得快啲㗎 ~

呢朝一早買咗肉鬆酥做 Lunch   唔駛行有得食真係唔錯呢 ~

仲係咁眼瞓   星期日瞓得太多都唔係一件好事呀 ~

是日懶餐 - 冬菇魚唇燜雞翼

冬菇魚唇燜雞翼 -  星期一係極度唔想煮飯嘅一晚   所以呢個餸係尋日整定嘅   同埋隔咗晚係會入味啲呢   再加生菜墊底   其實依家懶起上嚟   求其調味   唔會跟足食譜   估唔到里奧大人話好味   真係令我信心大增呀 ~

車仔麵 @ 大埔 ( 20-SEP-2009 )

尋日晏晝家姐話我知   醫院打電話嚟話媽咪喺度喊又話好驚   情緒好唔穩定咁   聽完之後搞到我無哂心機   媽咪   真係妳驚我都驚㗎   本來諗住睇中醫都唔睇喇 ~

由於里奧大人又去大陸嘅關係   所以只有我探媽咪咋   好在公司附近有車到醫院   所以好快可以陪到媽咪   見到佢無厘精神   肯定驚咗成日啦 ~

無幾耐有醫生嚟咗   話建議媽咪裝心臟起伏器   因為媽咪係心跳快先要入院   食藥可以控制   等佢慢啲唔好跳得咁快   但因為媽咪本身係心跳慢   食埋藥變相慢上加慢會比較危險   所以醫生有咁嘅建議   同埋醫生話呢個係手術仔   只需要局部麻醉   一至兩個鐘就搞   傷口約兩吋長   咁個起伏器壽命大約 8 年右   所以 8 年後又要再叉電嘅   而價錢約 3-4 萬   唔洗咁擔心 ~

之後家姐嚟到   同番佢講醫生頭先話建議媽咪裝心臟起伏器   家姐都話好   之後媽咪話好驚   家姐就問妳驚啲咩 ?!   佢又答唔出   連工人都話做囉   醫生叫妳做咩咪做咩囉   唔洗驚噃   咪係囉   有咩好驚 ?!   做咗係對自己好仲駛咩諗咁多啫   仲有喎   妳話做都要等專科病房 Check 咗   再 Book 手術室   唔係話做就做   做咩再要拖啫 ~

之後婆婆同大舅父都嚟咗   婆婆行動不便都嚟探媽咪   搞到我都好心痛添   我又要再詳細講多次醫生話咁咁咁比佢哋知   婆婆同大舅父諗都唔駛諗就話做啦   做咗身體好仲駛咩諗咁多啫   媽咪又喺度喊又話好驚   驚聽朝無知覺喎   點知大舅父話妳知道無知覺 ?!   咁又點會有知覺話自己無知覺呀   比妳激死   佢咁講我都係度笑   大舅父仲話妳唔做比佢做呀   又話妳咁驚   我哋陪妳一齊每人裝一個喇   講到黐哂線呀   哈哈   之後叫我去 Book   唔好比媽咪諗咁多喎   但家姐話等媽咪自己親口話做先 Book   唔係一陣話好驚都係唔做仲煩   媽咪比我哋車輪戰一輪終於話做喇   我就拿拿聲出去同護士 Confirm 做手術   隔無耐有個高級啲護士同我哋講係咪我哋同意媽咪做手術   我哋話係   但佢話最終都係睇病人同唔同意   媽咪同護士講好驚   護士話個個人做手術都驚係人之常情   明白嘅   咁妳做唔做手術   好在媽咪話做咋   幾驚呀 ~

番屋企途中   家姐打嚟話媽咪已經轉咗專科病房   太好喇   快啲做埋個手術   咁就大家都安心喇 ~

個人無咩心機   同里奧大人又唔知食咩好   但又想食啲濕濕哋嘅嘢   所以就食車仔麵喇   最緊要係平嘛   我食辣魚蛋+豬腸+魷魚+生菜米粉 ($21)   里奧大人就食魚蛋+牛腩+生菜米粉$ (16)   再加罐西柚味汽水   正到痺呀 ~ 

食完拿拿聲番屋企   因為我實在太攰喇   可能頻頻樸樸同埋又擔心媽咪   真係好攰好攰呀 ~

沖埋涼   睇睇下書已經進入睡眠狀態   非瞓不可呀 ~

~~~~

今朝喺巴士度又唔想瞓   所以拎本書出嚟睇又 OK 噃   無謂嘥咗啲時間嘛   同埋我覺得朝早睇書會入腦啲   因為咁早唔會有任何野諗嘛 ~

又係要快快食早餐   食火腿芝士菠蘿包 (走皮) + 涷鴦 (小甜) ($15)   超飽但唔緊要   因為中午要幫媽咪買冬薑   橫掂又無帶飯   順便出去食埋同行下放下啲悶氣 ~

Lunch Time 出去食豬手米加菜 ($18)   其實頭先一路行一路諗食唔食好   想食豬手係因為有骨膠原   但又驚係一隻豬手咁隊第埋嚟   之後又喺度諗啲豬好可憐呀   第時仲買唔買豬肉好呢 ?!   好驚呀   但我又唔想食其他嗰啲野喎   終於都鼓起勇氣叫咗碗豬手米加菜喇   好在唔係成隻豬手咁隊埋嚟咋   唔係唔知點算好喇 ~

食完就起程買冬薑   好黑仔呀   諗住去優之良品買   點知執咗   咁退而求其次去百佳買檸汁薑   又係無得買   唔係嘛   搞到我好熱呀   之後諗起附近有間舖係買啲鹹酸濕嘢就即刻去買   好在有開咋   即刻買咗包冬薑同金桔   但我驚唔好食   所以再去 Market Place 買多包糖   不過估唔到自己會有收穫喎   就係買咗支菜油呀   我搵菜油好耐㗎喇   又唔想特登為咗支油去烘焙店   所以頭先買到好開心呀   都唔敢同里奧大人講買左支油呀   唔係又話我顛㗎喇   山長水遠咁重買支油番屋企   都唔明白人哋嘅 ~

番到公司又喺度種菇   即係悶到發霉   頭先又行到香汗淋漓   依家好眼瞓呀 ~

好煩呀   買唔買 MTR 嘅 Giroro 狙擊風扇好呀 ?!   八十蚊呀   見到真身又幾得意喎   但八十蚊太貴喇   都係日日去   睇到厭就唔想買佢就算喇 ~

雪菜肉絲炒米 + 南瓜栗子粟米紅蘿蔔豬展湯 ( 20-sep-2009 )

( 20-SEP-2009  SUN )

最鍾意嘅星期日終於來臨喇   瞓到十點半起身食早餐   夠瞓真係特別開心呢 ~  

食早餐期間   家姐打嚟話一齊食 Tea   順便睇埋 "大話妹" 喎   又會咁即興嘅   所以我同里奧大人食完拿拿聲去買餸   番到屋企又要拿拿林熨衫同抹櫃   忙到呢   好在家姐嚟黎之前就做完嘢所有嘢   如果等佢走咗先再做   就會覺得時間好唔夠用咁㗎 ~

今次去大家樂食 Tea   多人到爆   好在等咗一陣就有位啫   如果唔係轉場又浪費哂啲時間㗎喇 ~

熱狗 (多醬) / 燒鴨湯瀨 / 特色雞翼+脆皮腸+薯仔沙律 / 珍珠奶茶

家姐走咗之後   我就即刻煲湯   因為好怕太夜飲湯   會成晚去廁所無覺好瞓㗎 ~

是日懶餐 - 雪菜肉絲炒米 + 南瓜栗子粟米紅蘿蔔豬展湯

雪菜肉絲炒米 - 尋日里奧大人喺餐廳食嘅唔好味    所以我再整比里奧大人食    今次嘅肉絲又係用煲湯嘅豬展    真係好慳家呀 ~

南瓜栗子粟米紅蘿蔔豬展湯 - 半個中式南瓜 + 半磅栗子 + 2 條粟米 + 1 條紅蘿蔔 + $25 豬展   煲出嚟嘅湯真係超甜呀 ~

煙三文魚 + 蒿麥冷麵 ( 19-SEP-2009 )

( 19-SEP-2009  SAT )

星期六喇   又約媽咪去大家樂食早餐   我今次食糯米雞   啲糯米煙煙韌韌超好味   不過我唔鍾意食啲汁同啲餡㗎 ~

逢星期六番到菇場都覺得特別無聊   除咗老細同啲阿 Head 有嘢忙之外   其他個個都無嘢做嘅   等收工真係好痛苦呢 ~

好怕星期六放工等車   好彩等 10 分鐘就有車有位坐   唔好彩要等半個鐘先有位坐㗎   所以好鬼怕呢   我又唔鍾意企  企 40 分鐘好辛苦嘛   又 Chok 又焗   咪搞我 ~

番到屋企嘅時間係啱啱食 Tea 嘅時間   仍即係最多人嘅時間   好在唔駛等位   如果唔係都幾煩   因為我最憎等位 ~

天氣好焗   作大風咁   所以都係番屋企休息好過   唔係一陣焗暈就大鑊 ~

今晚番教會   之後再去 Jusco 買嘢   又有 95 折   爽呀 ~

是日懶餐 - 煙三文魚 + 蒿麥冷麵

煙三文魚 - Jusco 買嘅   今次買1 Pack 大嘅   估唔到又食得哂   唔錯唔錯 ~

蒿麥冷麵 - 晏晝整定   打埋啲冷麵汁一齊雪凍   好味好多呢 ~

芝士焗肉醬意粉 + 牛油香草粟米 ( 18-SEP-2009 )

( 18-SEP-2009  FRI )

終於星期五喇   今個星期過得好快   可能因為星期二放咗半日   好似無乜點番工咁 ~

星期五喇   要食飽啲   咁先得嚟開心嘛 ~

番到菇場忙咗陣又喺度 Hea   Lunch Time 一到就出發去食飯 lu ~

同同事去遠少少嘅餐廳食 Lunch   但呢間餐廳嘢食超唔掂   食完個肚有啲搞搞下   我同事就話個胃脹 ~

次次食完晏番到菇場   都會覺得啲時間過得好慢   睇咗好多嘢   個鐘都好似唔郁咁嘅   我唔想成日望鐘㗎   但個大鐘喺我面前   無可能望唔到囉 ~

是日懶餐 - 芝士肉醬焗意粉 + 牛油香草粟米

芝士肉醬焗意粉 -  我覺得今次個色整得唔錯   不過里奧大人就話酸咗啲囉   如果唔係更好呢 ~

牛油香草粟米 - 粟米好甜   不過就唔夠大粒囉 ~

我好鍾意食大蕉   因為好少話揀得唔靚   食又方便    菇場對面嘅大蕉真係超大條   我好少見到    所以間唔中都會買嚟食㗎 ~

豉油王肉碎蔥花炒飯 + 菜心 ( 17-SEP-2009 )

( 17-SEP-2009  THU )

今朝好熱   但又唔會行到出汗   唔錯呢 ~

早餐食吞拿魚三文治烘底 + 鴛鴦   今次飲咗半杯鴛鴦好精神喎   我試過合埋眼一陣都唔覺眼瞓呢   但飲完個喉嚨會好痕   好辛苦囉 ~

番到菇場唔願做咁款   但內心有團火想做   但唔知點解又唔願做呢 ~

晏晝同媽咪去美心皇宮飲茶   好耐無行咁遠   郁下真係唔錯 ~

百花釀茄子 - 第一次食好好味   今次第三次食已經失哂水準

炸雲吞 - 新鮮炸起   好鬆脆呀   奈何太飽   如果唔係食多碟呢   不過我唔鍾意食個啲蝦肉餡㗎

瑤柱扒柚皮 - 媽咪鍾意食   估唔到都幾入味   唔錯

干蒸牛肉賣 - 我鍾意食干蒸牛肉多過山竹牛肉   覺得無咁啖啖肉   蘸點埋喼汁真係好好味呢

鴨腳扎 - 好耐無食   最鍾意食塊腐竹   索哂啲汁好正呀

合桃露 - 好彩有合桃味   但 "稀亨亨" 呢

今次媽咪又煲咗蛤蚧鱷魚肉當參海底椰無花果川貝湯   但就係留番夜晚飲   咁我就唔駛再特登煲湯啦   仲整咗樽鹹魚比我帶番屋企   正呀 ~

放工坐巴士上層   無啦啦見個人向住我邊位影相   嚇到我即刻遮臉   因為放工個樣特別殘特別衰咁呢 ~

無嘢做又周圍望   見到有 Pair 細路拖手   應該 12-13 歲   個身型仲未發育咁   咁快就怕拖   我真係覺得唔係幾好囉   專心讀好啲書先啦   書到用時方恨少呀 ~

是日懶餐 - 豉油王肉碎蔥花炒飯 + 菜心

豉油王肉碎蔥花炒飯 - 特登買一蚊蔥嚟炒飯   超好味   但唔知點解成日都唔會炒到粒粒分明嘅   我已經唔係落好多水煲飯㗎啦   又會咁嘅   呢次我仲特登整多啲留比里奧大人聽日 Lunch 㗎   真係細心服服侍周到呀 ~

菜心 -  8 蚊斤   估唔到都好甜喎   拌薑蔥蓉一齊食好好味呀   加埋指天椒仲正   不過驚里奧大人話辣咋 ~

咖哩豬扒意粉 + 唐生菜 ( 16-SEP-2009 )

( 16-SEP-2009  WED )

唔知點解呢幾日坐車已經好肚餓   好在無人喺車食嘢   如果唔係會更肚餓呢 ~

尋晚瞓得好差   所以一番到菇場已經中眼瞓   點都提唔起勁呀 ~

一早去咗 Pie & Tart 買咗個肉鬆酥做午餐   凍咗一樣好味   反而覺得無咁漏   如果新鮮熱辣食會好漏喎   唔知點解 ~

好耐無煮飯咁   雖然極度不願意煮   但為咗里奧大人   所以幾攰都煮   總好過出街食啦 ~

是日懶餐 - 咖哩豬扒意粉 + 唐生菜

咖哩豬扒意粉 - 本來諗住整黑椒汁   但原來樽黑椒汁過哂期   所以即刻急轉彎整咖哩汁喇   因為一心想食辣呢   里奧大人話唔想食都無得傾 ~

唐生菜 - 蘸腐乳好好味   無咁寡 ~

呢晚比里奧大人整到我發老脾   事緣係里奧大人次次喺熱水煲斟水   次次斟完都唔加水   個煲無哂水都唔知   但個水煲會繼續煲家嘛   一陣爆就煩啦   雖然唔知會唔會   但都好危險啦   係咪呀   加上尋日我又攰又要煮飯   真係好鬼激氣   本來想唔同佢煲水   但見佢唔出聲知衰就算數啦   即刻諗番佢啲好嘢囉   最後我都有煲水   因為佢唔飲我都要飲呢   唔明點解啲人可以咁無手尾囉 ~

雞翼拚盤 + 七味粉日式年糕 + 粟米蘑菇蛋花湯 ( 15-SEP-2009 )

( 15-SEP-2009  TUE )

今朝勁開心啦   估唔到今朝 10 點 3 先除下 8 號風球   呢個 "巨爵" 都好勁   超大風   不過可能吹唔正我屋企   所以唔覺得好嘈   定還是開咗冷氣唔覺呢 ~

瞓到 10 點起身   同里奧大人落樓下食早餐   遮都唔駛帶   爽呀 ~

11 點 15 分先出門口   巴士站打哂蛇餅  好在無落雨   唔係仲混亂呢 ~

番到菇場 12 點 20 分   咁坐多 10 分鐘又到 Lunch Time   不過我只買咗燒賣晏啲食   因為啱啱食完早餐無咁快餓呀 ~

呢日真係好開心    好似番工無耐又放工咁   正呀 ~

放工大風又大雨    所以預咗塞車    好在醃咗雞翼    唔係又要出街食㗎喇 ~

 

是日懶餐 - 雞翼拚盤 + 七味粉日式年糕 + 粟米蘑菇蛋花湯

雞翼拚盤 - 有雞翼 + 腸仔 + 蟹柳 + 帶子   好在有呢啲 急凍食物   打風落雨都唔駛驚   煎完掃蜜糖   勁有 BBQ Feel   我鍾意呀 ~

七味粉日式年糕 - 過咗期 5 日   但無異樣同異味   所以煎嚟食   里奧大人唔多鍾意食煙韌嘢   我一個人食哂   咬到牙骹都軟呀   要抖陣先可以食其他嘢呀 ~

粟米蘑菇蛋花湯 - 加埋蘑菇同蛋花   真係好好味呢 ~

大家樂 @ 大埔 ( 14-SEP-2009 )

( 14-SEP-2009  MON )

星期一啦   仲要天黑黑添   想唔眼瞓都幾難呀 ~

勁想食芝菇治   想食而有得食   真係覺得好好味呢   今次仲好似好大件咁呀   飽到呢 ~

番到菇場就 1 號風球   中午 3 號風球   之後就當然期待 8 號風球啦   但之前兩個 8 號都係夜晚嚟   所以都唔敢期望太大 lu ~

晏晝唔想食包同麥皮   所以去對面茶餐廳食火腿通粉   十二蚊咋   超抵呀 ~

3 點幾收到風話會發 8 號風球   之後家姐打嚟話佢同事家姐已經走咗   咁即係堅料啦   無幾耐就話 6 點前發 8 號   勁開心   但係菇場 5 點先放人走   個個聽到都雞咁腳走   我都唔例外   因為出面實超多人   我都係搭地鐵火車穩陣啲   好在一去到就有車   所以都唔係用咗好耐時間番屋企咋 ~

 

無啦啦作頭痛唔想煮   同埋街市都無餸買啦   同里奧大人去大家樂食飯算喇   估唔到無乜人   感覺好寧靜好舒服呢 ~ 

食完番屋企食大蕉   真係好大條呀   食完一條都好飽好飽呀 ~

御八築地創作料理 @ 大埔 ( 13-SEP-2009 )

日式魚生飯  - 魚生唔多新鮮   我哋食完第一啖就講終於知道點解無人排隊囉

帶子刺身 (6 件) - 我無食  依家唔係咁想食生嘢

三文魚壽司 - 食咗少少三文魚    但又幾新鮮喎   賣相就比較古怪   明明係一條條   無啦啦整一舊   一係就分兩碟上嘛   不過可能係特登咁整啩

蟹子沙律 - 無乜特別

脆炸雞軟骨 - 炸到好脆  好味   我好鍾意食雞軟骨   但里奧大人唔鍾意   所以好小機會食呢   不過如果無埋啲肥膏就更好啦

七色冷麵 - 餐牌無寫材料   我仲以為係素添  呢七樣嘢應該係香瓜 / 日式魚蛋 / 雞肉 / 蟹柳 / 牛脷 / 青瓜 / 筍   牛脷同筍就唔食嘅   我最鍾意食香瓜   甜甜哋又爽口   正呀     

( 13-SEP-2009  SUN )

今朝瞓到 10 點半先出門口食早餐   唔駛趕嘅日子真係好舒服呢 ~

番到屋企接到家姐電話   佢話想早啲嚟睇大話妹   之前錄咗比佢   搞到我同里奧大人要拿拿聲睇埋 "畫皮" ~

同家姐一齊去 Shakey's Pizza 食 Tea   因為想用埋張 $100 Cash Coupon   今次食咗 $110   只係比 $ 10 Cash 就搞掂   感覺上好似用 $ 10  就食餐 Tea 咁   勁開心呀 ~

喜客至尊 (薄批) - 免治牛肉 / 意式肉腸 / 火腿 / 野菌 / 菠蘿 / 洋蔥 / 青椒 / 紅椒 / 橄欖 / 鮮茄醬及芝士 - 好似好多料   但覺得無乜味咁   都係 Pizza Hut 嘅至尊好味

三文魚厚批 - 厚批唔掂呀   都係薄批好味啲

凱撒沙律 - 無乜特別

水牛雞翼 / 喜客脆薯 - 雞翼好入味  但脆薯就好似紙好薄  駛唔駛咁小家呀

巨蜂提子特飲 - 得個甜字

食完 Tea 就叫里奧大人番屋企先   我就同家姐去 Jusco 買嘢   因為啲男人無耐性   只會問妳有乜嘢買呀   行幾行又再問有乜跠買呀   問幾 10 次咁   行 Supermarket 要行下睇下先買家嘛   真係吖 ~

買完番到屋企就睇 "大話妹"  一齊睇真係開心好多呢 ~

睇到 6 點半先走   本來去富山壽司   但見好多人排隊   所以即刻轉場   去御八築地創作料理試下   不過食物唔多新鮮   唔怪得無人排隊等位啦 ~

食完同里奧大人去姑奶屋企練詩歌   所以又搞到 11 點先番到屋企呀 ~

XO 醬肉絲炒米粉 + 老黃瓜赤小豆扁豆豬展湯 + 黑加侖子椰果凍 ( 12-SEP-2009 )

( 12-SEP-2009  SAT )

終於待到每月一次嘅 Off 啦   但 9 點半起咗身   唔想再瞓   所以同里奧大人一齊食早餐喇 ~

雪菜肉絲米 / 腸仔炒蛋配牛油方包

蕃茄鮑片通粉 / 紅腸炒蛋白配牛油方包

食完就租 DVD   之後再買餸就番屋企喇 ~

呢日都好爽呀   就咁抹櫃就搞掂   因為之前里奧大人幫手熨哂衫   唔駛我咁辛苦呢 ~

不過我見好得閒咁   所以就清潔廚房同煲湯   搞咗成個幾鐘   整完腰骨都痛呀 ~

望下個鐘已經兩點   但未餓   所以睇下雜誌   坐到 3 點先出發食 Tea 呢   食完上番屋企坐陣就去番教會 lu ~

是日懶餐 - XO 醬肉絲炒米粉 + 老黃瓜赤小豆扁豆豬展湯

XO 醬肉絲炒米粉 - 今次覺得自己好慳家呀   因為啲肉絲係用煲湯嘅豬展整㗎   切絲就搞掂   再加埋 XO 醬同指天椒一齊炒   辣辣哋好惹味   但里奧大人話辣   又話唔鍾意 XO 醬嘅味道   玩嘢咩   整過好多次 XO 醬啦   真係火都嚟呀 ~

老黃瓜赤小豆扁豆豬展湯 - 去濕湯水   點解飲完又唔覺得好去濕咁嘅   一樣咁攰喎 ~

整完哂所有嘢   就同里奧大人一路食黑加侖子椰果凍   一路睇 "戰狼 300"   好在血腥場面唔多   唔係就會發惡夢㗎 ~

咕嚕斑塊 + 豉油王蛋花炒飯 ( 11-SEP-2009 )

( 11-SEP-2009  FRI )

Happy Friday 啦   早餐一定要食豐富啲   就算唔餓都要食飽啲   因為星期五真係令人好開心呢 ~

終於等到聽日 Off   所以番到菇場就算悶都悶得好開心呀 ~

朝早太飽啦   晏晝要食清 d   所以食麥皮 + 蘋果   今次將啲麥皮整杰少少就可以飽啲   但食完呢餐又胃痛喎   應該係蘋果酸得滯   所以先會咁   我真係好想食麥皮清清腸胃㗎 ~

呢排無煮飯   突然要煮番有啲唔慣   但其實我又幾想煮飯   出街食真係太無益呢 ~

是日懶餐 - 咕嚕班塊 + 豉油王蛋花炒飯

咕嚕斑塊 - 一早解凍咗條龍脷柳   聞落好似臭咗咁   但其實我無聞過龍脷柳係乜味   但總之覺得好似臭咗咁   應該係生嘅魚啲味嚟嘅   里奧大人鼻塞又聞唔到喎   所以我決定掉咗去   驚食到肚屙呀   一心諗住整咕嚕汁   所以買咗 3 色椒   仲以為整唔到   點知突然記得尋晚食剩 3 件魚塊    本來想就咁炒熱就算   咁依家可以整咕嚕班塊啦   雖然啲班塊唔係我整   但我上碟嘅時候都好有滿足感呀 ~

豉油王蛋花炒飯 - 又係尋晚食剩嘅白飯   用豉油蛋花一齊嚟炒就最好啦   又方便又好味嘛 ~

飯後果 - 哈蜜瓜   切咗粒粒再雪凍真係好好味呢 ~

明新焗飯小廚 @ 大埔 ( 10-SEP-2009 )

口水雞 - 啲汁越食越辣  真係好好味呢

粟米班塊 - 個汁麻麻哋   睇個樣好杰   其係粟米還粟米   水還水咁

蒜炒菜心 - 叫咗少油都好油

例湯 - 太耐無飲湯   就算明知係味精湯都覺得好好飲

( 10-SEP-2009  THU )

今朝要去醫院抽血   所以 7 點要起身   7 點 40 分到咗醫院門口排隊   雖然 8 點半先開始   但醫院 8 點會開門   因為有啲係要空肚抽血   所以比佢哋快啲抽呢 ~

今次好快搞掂   最開心係抽血時唔痛嘛   之前去另一間醫院抽血   有個姑娘抽咗 5 分鐘都未抽到   但支針又桔住隻手度   痛到呢   佢驚我又驚   後尾問另一個姑娘點算   個姑娘話抽另一隻手   早就應該啦 ~

番到菇場附近只係 9 點半   太好啦   可以慢慢嘆早餐   因為我話 10 點先番菇場呢 ~

依家自己食 Lunch   基本上唔會出街食   因為一個餐真係食唔哂   同埋以前同開里奧大人一齊食   依家一個食   我會喊㗎 ~

食埋尋日食剩嘅排包 + 1 個蘋果再飲杯水   勁有喺醫院 Feel 咁呀   太清淡都唔係太好   整到個人好 Down 咁   同埋唔知係咪蘋果酸得滯   所以胃痛喎 ~

無啦啦腰骨痛   直頭痛到人都顛呀 ~

今晚唔駛煮飯   因為師傅話唔可以煮飯   唔係我唔想煮㗎   晚晚出去食真係好煩   又無益喎 ~

最後決定去食中餐   因為我想食菜同埋辣嘢呀   呢餐食唔哂要打包   又要比多 2 蚊發泡膠盒錢   下次記得嘅話   就自己帶定個盒   又環保又唔駛嘥錢買盒呢 ~

Oliva @ 大埔 ( 9-SEP-2009 )

閃光燈版 (我覺得咁樣影睇得清楚啲)

麵包 / 黑醋 - 次次啲麵包都凍冰冰   好似擺咗好耐好耐吸哂水咁

紅蘿蔔條 / 青瓜條 / 西芹條 - 無無聊聊食幾條   又幾好味喎

羅宋湯 - 我無飲   但睇落都好多料

西蘭花豆蓉湯 - 都好重豆味   唔錯喎

紐西蘭牛扒 - 今次有啲羶味   好驚   要狂蘸黑椒汁同埋快快口即咬即吞  

焗薯 - 一般啦

豬柳肉意粉 (蕃薯醬) - 估唔到有 5-6 塊豬柳   不過最後都食唔哂   呢個汁好好味   自己整到咁就好啦

忌廉蛋糕 - 呢個係甜品   蛋糕係熱嘅   所以啲 Cream 好快溶   不過我兩樣都唔鍾意食   比埋里奧大人食

無閃光燈版 (基於攝影技術有限   同埋我覺得無閃光燈好難對焦咁呀)

( 9-SEP-2009  WED )

今日好開心啦   同里奧大人結婚 9 週年嘛   時間過得真係好快咁呢 ~

雖然唔係好覺   但間唔中睇番啲相   真係不得不認老呢   中年發福之外   再近睇自己塊臉   多咗好多紋啦   同埋覺得啲皮膚真係好乾咁   真係唔可以再懶   要隔晚敷 Mask 先得呀 ~

今朝同里奧大人一齊去大快活食早餐   時間尚早   所以上媽咪屋企睇下媽咪有無唔舒服   因為媽咪無帶電話   我又帶孝在身   唔可以入屋   所以我上媽咪屋企開門   見鎖咗門即係媽咪無事出去飲茶啦   之後我去百佳搵媽咪   估唔到一入到去就見到呢   嚇咗媽咪一跳呀   之後陪佢行一陣我就安心番工 lu ~     

吉列魚柳脆皮腸配多士 / 雞扒炒滑蛋配多士

番到菇場呆呆滯滯咁   所以晏晝出去買包番菇場食   買咗排包   因為可以分兩餐食   第日唔駛又得登出街買嘢食咁煩呀 ~

終於等到放工   拿拿聲番屋企   因為想早啲食飯   早啲番屋企執屋呀 ~

唔知食乜好   里奧大人又無心情   所以去屋企附近食算 lu   食完行陣番屋企   好平淡咁渡過呢一日喇 ~

9.9.9週年結婚紀念日

今日 ( 9 月 9 日 ) 係我同里奧大人嘅 9 週年結婚紀念日 

時間過得真快   眨眼已經一齊生活 9 年

但感覺成日覺得好似結婚無耐咁    但又覺得有老夫老妻嘅感覺喎   噢
兩個人相處真係好有學問      唔係話妳為對方改變就無問題呢
我未結婚時脾氣超臭     成日要人就   唔順自己意又黑面   唔理人感受架
但呢 9 年裡面   里奧大人讓我學識包容同體諒   但唔係忍讓啊    呵呵
人年紀大喇     我只希望每日同里奧大人都開開心心    健健康康咁過

只要同里奧大人一齊    我已經覺得好幸福呢

住家飯 @ 姑奶屋企 ( 8-SEP-2009 )

蒸魚 - 唔記得乜魚  不過好好味呢

燒肉 (外賣) -啲皮唔脆   同埋無芥辣醬同酸梅醬   我好怕食燒肉   因為啲肉好 "鞋" 同好鹹呀

菜心 - 姑奶話呢個菜檔買嘅菜係比其他菜檔貴 3-4蚊   因為佢嘅菜係好甜同無渣呢

冬蟲草石斛燉雞湯 - 油咗啲   唔係更好

( 8-SEP-2009  TUE )

今朝食吞拿魚治烘底 + 凍央   雖然凍央唔會點提神   但實在太熱又太眼瞓喇   心理上覺得精神啲都好 ~

番到菇場忙到呢   忙到有啲胃痛   一下子咁忙真係好唔慣    又唔可以慢慢做喎 ~

晏晝同媽咪去美心皇宮飲茶   不過就叫媽咪唔好煲湯   其一係辛苦   其二係因為次次飲完湯   再食埋嘢   個胃好漲好唔舒服   同埋我又會滾湯嘛   都唔係無湯水吖 ~

韮菜餃 - 皮薄餡靚   超好味

蒜蓉蒸鮮魷 - 唔夠蒜蓉味   如果唔係更好食呢

雲吞 / 水餃 - 估唔到好味   啲蝦好爽   有驚喜

奶皇包 - 我鍾意食呀   因為啲奶皇唔太甜呢

豆腐花 - 超唔掂呀   一啲都唔滑   仲衰過百福豆腐花

點解屋企咁旺水㗎   最記得去澳洲旅行時接到管理處電話   話屋企爆咗咸水喉   啲鹹水已經流到出門口   好在隔離屋阿婆見到即通知管理處關水制   唔係真係賣身都唔夠賠呀 ~

之後就樓上漏水   搞到我屋企廁所滴水   天花又爛哂   又要搵人整喎 ~

今次呢   出面水喉爆咗少少   已經開始噴水出嚟   再唔整可能會爆   所以即刻搵人整   好在里奧大人唔駛番工   咁可以睇住人整   唔係又要請假都幾煩 ~

里奧大人要 8 點先出到嚟   咁啱媽咪 家姐又去大家樂食晚飯   所以 Join 埋佢哋   因為媽咪話飲茶時好攰好唔舒服   始終心掛掛   之後再等埋里奧大人先一齊上去食飯呢 ~

今晚食飯得 3 個人   好唔慣   不過都要面對呀 ~

食完飯傾陣偈就沖涼瞓覺   我好怕瞓人哋啲床   就算媽咪屋企都係   幾攰都唔會即刻瞓到㗎 ~

譚仔 (三哥) 雲南米線 @ 大埔 ( 7-SEP-2009 )

( 7-SEP-2009  MON )

又星期一   又係最眼瞓嘅日子來臨喇 ~

早餐食芝蛋治 + 奶茶   但太攰啦   唔記得烘底添   如果係去開果間實會問要唔要烘底   不過估唔到唔烘底嘅麵包都好鬆軟喎   有驚喜呀 ~

番到菇場好忙   雖然有嘢做無咁眼瞓   但都係覺得好眼瞓呀 ~

今日 Lunch 食蘋果 + 1 杯即沖麥皮   初初好飽㗎   後尾 4 點開始餓   所以又食 2 塊芝士夾心餅   下次都係食多啲麥皮算喇 ~

依家無水用   因為驚水喉會爆   所以關總制   想煮飯都唔得   只係要沖涼嘅時候先開番水制 ~

同里奧大人去譚仔食米線   食麻辣真係好刺激啊    如果受到嘅話 ~

番到屋企即刻沖涼   因為真係好驚條喉隨時爆裂呀 ~

諗住幫里奧大人寫嘢   點知 2 姑奶 10 點半上嚟比嘢我哋   傾下傾下又傾到 12 點   超眼瞓呀 ~

翻兜晚餐 - 白汁吞拿魚長通粉 + 叉燒蝦仁炒飯 + 蜜糖雞翼 ( 6-SEP-2009 )

( 6-SEP-2009  SUN )

今朝 10 點起身   去到教會附近先食早餐   覺得咁樣時間好用啲 ~

崇拜完畢就同里奧大人出佐敦食 Tea   熱到呢   唔想再嘥時間搵   所以又去阿妮沙茶麵喇 ~

花枝丸沙茶麵 - 個湯底係越食越辣   啲麵都幾彈牙  唔錯呀

肉片豬腸沙茶麵 - 呢碗係里奧大人嘅   一樣係沙茶湯底呢

基隆五香 - 炸腐皮嚟嘅   餡料係豬肉   甜甜哋幾好味

冰鎮芒果 (甜) - 雜誌話即係台灣情人果   好爽口   但太甜喇   之得要酸啦

柑桔蜜 - 呢杯係里奧大人嘅   但上次我飲就無乜味囉

珍珠奶茶 (外賣) - 呢杯喺附近土豆町買㗎   只係 $10 杯   咁大杯抵飲啦   食埋珍珠真係好飽囉   有個客人話要奶茶   因為見到我張枱有杯奶茶呀   幾驚比人鬧我唔比帶外來飲品呀

食完就同埋里奧大人啲家姐 姐夫一齊到醫院認奶奶   之後再番屋企附近傾嘢   傾到 6 點半就各自歸家 lu ~

呢排好攰   真係無心情煮飯   但又唔想出街食   所以尋晚拎定啲雞翼 長通粉 炒飯番屋企   炒番熱食就算喇 ~

食食下飯無啦啦接到管理處電話   話食水喉爆咗喎   嚇到即刻關總制   只係沖涼先咁開咋   又搵唔到人整   煩到爆呀 ~

( 3-SEP-2009 ) + ( 4-SEP-2009) + ( 5-SEP-2009 )

( 3-SEP-2009  THU )

呢日好唔開心   因為清晨 5 點 15 分接到醫院電話   話奶奶心跳開始得 40 幾下   所以即刻同里奧大人飛奔去醫院   5 點 55 分去到醫院時   奶奶已經走咗 ~

雖然大家都有心理準備   但都好難一下子接受   但感恩奶奶係無痛楚嘅情況之下安然離去 ~

之後同幾位姑奶一齊去酒樓商討有關事宜   再食埋 Lunch 就各自番屋企休息喇 ~

呢晚煮咗蕃茄海鮮意粉 + 蘑菇粟米湯   因為都要有精神力氣先可以做任何事呀 ~

( 4-SEP-2009  FRI )

呢日番工   其實真係好想請假陪里奧大人   但又覺得唔係咁好咁囉 ~

夜晚放工同里奧大人去姑奶屋企食飯   再傾關於工人去向   差唔多 10 點半先走   真係好攰呢 

( 5-SEP-2009  SAT )

呢朝又同媽咪食早餐   估唔到家姐又出埋嚟一齊食呢   好開心呀 ~

吉列魚柳腸仔配厚多士 / 雞肉漢堡 (蕃茄醬 ) 腸仔配蘿蔔糕 / 牛扒北海道滑蛋配蘿蔔糕 / 蕃茄肉碎通粉 / 即磨咖啡

番到菇場無啦啦又忙   但又眼瞓   幾經辛苦先等到放工呢 ~

呢日又係同里奧大人食 Tea   之後就再去姑奶屋企   等埋所有家姐到齊就要商量細節   人齊就最好啦   當面講清楚最好   唔係到時妳以為咁   佢又以為咁就最煩呢 ~

之後一齊食飯   不過我唔影相啦   個個心急食飯呢   今次又係好多嘢食   有白汁吞拿魚長通粉 x 2 + 叉燒蝦仁炒飯 x 2 + 雜菜 1 大盤 + 牛仔骨 1 碟 + 金沙骨 1 碟 + 蜜糖雞翼 1 碟 + 春卷 1 碟 + 咖喱雞 1 鍋 + 印度薄餅 1 碟   甜品係美心天使蛋糕 + 魔鬼蛋糕   但我覺得無乜味囉 ~

水姑好鍾意食糖水   所以我哋又陪佢喺我屋企附近食糖水   呢一日個口真係無停過咁呀 ~   

富田和食亭 @ 佐敦 ( 2-SEP-2009 )

( 2-SEP-2009  WED )

朝早有啲胃口   所以食沙爹牛肉米 + 凍奶茶   但到咗又唔想食   只係好想飲嘢   食剩一大半   但又唔想迫自己食喎 ~

Lunch Time 唔知食乜好   但唔食又唔得   所以去 7-11買喇沙番菇場食   但唔鍾意椰奶味   要逐啖逐啖食啲   米粉差唔多索哂水先食完   好辛苦呢 ~

放工自己坐車探奶奶   一個人就唔坐的士喇   坐巴士平啲   好在落車好近小巴站   唔駛行咁遠 ~

探完奶奶就同里奧大人去佐敦附近食嘢   今次好想食壽司   所以又去富田壽司喇   次次食完壽司都好口渴   番到屋企附近食甜品中和番先得呀 ~