咖哩豬扒意粉 + 唐生菜 ( 16-sep-2009 )

( 16-sep-2009 wed )
唔知點解呢幾日坐車已經好肚餓   好在無人喺車食嘢   如果唔係會更肚餓呢

尋晚瞓得好差    所以一番到菇場已經中眼瞓   點都提唔起勁啊 

一早去咗 pie & tart 買咗個肉鬆酥做午餐   凍咗一樣好味   反而覺得無咁漏   如果新鮮熱辣食會好漏喎   唔知點解 

好耐無煮飯咁    雖然極度不願意煮    但為咗里奧大人    所以幾攰都煮   總好過出街食丫

是日懶餐 - 咖哩豬扒意粉 + 唐生菜
咖哩豬扒意粉 - 本來諗住整黑椒汁   但原來樽黑椒汁過哂期   所以即刻急轉彎整咖哩汁喇   因為一心想食辣呢   里奧大人話唔想食都無得傾啊  

唐生菜 - 點腐乳好好味  無咁寡 

呢晚比里奧大人整到我發老脾    事緣係里奧大人次次喺熱水煲斟水   次次斟完都唔加水    個煲無哂水都唔知    但個水煲會繼續煲家嘛    一陣爆就煩啦 ( 雖然唔知會唔會 )  但都好危險啦   係咪呀   加上尋日我又攰    又要煮飯   真係好鬼激氣   本來想唔同佢煲水   但見佢唔出聲知衰就算數啦    即刻諗番佢 d 好嘢囉    最後我都有煲水   因為佢唔飲我都要飲呢   但唔明點解 d 男人可以咁無手尾呢