學利魚蛋粉 @ 大埔 ( 31-OCT-2009 ) + ( 1-NOV-2009 ) + ( 2-NOV-2009 )

( 31-OCT-2009  SAT )

估唔到星期六都會塞車   仲諗住慢慢食添   點知一樣係要咁趕 ~ 

星期六多數 Hea 住等放工   有嘢做都唔想做   好在無嘢做啫 ~

 
逢星期六晏晝就最開心   因為可以同里奧大人一齊食 Lunch   雖然成日見   但我唔會厭 ~  

食完行陣又 4 點 lu   順便買糖水番屋企食   希望好食啦   中式糖水真係好難整得好食呢  

夜晚無胃口   所以求其去學利魚蛋粉食嘢算喇   每月一到真係乜 Mood 都無哂添 ~  

( 1-NOV-2009  SUN )

又係每月一到最辛苦嘅時候啦   好在係假期   可以瞓足一日   咁就無咁辛苦呢 ~  

( 2-NOV-2009  MON )

呢日請病假呀   個頭超痛   頂唔順呢   斷斷續續瞓到 4 點幾起身睇醫生   再陪里奧大人食 Tea 又番屋企再瞓過 lu ~  

瞓到 8 點又起身   因為 Feel 到里奧大人要食嘢呢   好在有胃口   勁想食車仔麵   又要麻煩里奧大人落街買   無住家飯仲要周圍走   我真係好心痛呢 ~

打邊爐 @ 大家樂 ( 30-OCT-2009 )

( 30-OCT-2009  FRI )

又 Happy Friday 喇   今朝無乜攰嘅感覺   所以幾 Happy 呢 ~

番到菇場   Hea 到 Lunch Time   過都仲未諗到食啲乜 ~

又未餓   行下百佳先   行咗 20 分鐘就去買嘢番菇場食 lu ~

晏晝無啦啦好鬼攰好鬼攰   勁唔想煮呀   毫無頭緒煮乜好   所以同里奧大人出去食算喇 ~

好想打邊爐   但里奧大人熱氣   所以話去大家樂   Good Idea 啦   依家有一人火鍋嘛 ~

我叫里奧大人揀食乜   佢話食叉燒燒鴨飯   我話唔好啦   食走地雞或者生炒骨啦   佢大笑話: 又係妳叫人哋揀   揀完又話唔好   是但啦  妳話事啦   不過講講下我又真係次次都係咁   假民主呀   最後我都叫番燒味飯啦   費事一陣叫咗啲嘢唔好食就煩咯 ~

隔離枱有兩個女仔打邊爐   只係一個火鍋 Share 食   但就將啲嘢食霸哂成張枱   仲衰到一左一右咁坐   叫人哋點坐呢   自唔自私啲呀   我打邊爐都係用自己面前嘅位放嘢食㗎咋   雖則係唔方便   但人哋設計到都就哂位㗎啦   唔需要霸埋人哋啲位咁囉   同埋明知食飯時間多人就咪咁做嘛   得人憎 ~

食完同里奧大人行陣 Jusco 先番屋企   依家有八達通自助收費   自己搞掂   好好玩㗎   好似 Cashier 咁 Scan   又有單據喎   買一兩件嘢真係唔想排隊囉 ~

住家飯 @ 媽咪屋企 ( 29-OCT-2009 )

魚片豆卜紹菜 - 椰菜好甜   索哂啲汁好正呀   平時我唔食椰菜都覺得好好味呀

白切雞 - 冰鮮雞嚟㗎   我都幾鍾意食雞   最緊要唔駛自己煮呢

薑蔥蓉 - 又係超好味   點解我整唔到咁好味嘅   係咪要用好多熟油先好味

豉椒蒸黃立鯧 - 好新鮮好厚肉   正呀

江瑤柱蝦乾炒合掌瓜 - 清清哋唔錯呢

蒜蓉辣椒 - 超好味

粟米蛋花湯 -  今次因為突然即興上媽咪屋企   所以煲唔切湯   用粟米湯代替   但點解啲蛋花咁滑嘅   我又整得唔滑㗎噃

芋頭糕 - 媽咪話想食   所以買個靚芋頭番嚟比工人整   估唔到又好味噃   材料只係芋頭 + 豬肉   煎到啲邊燶燶哋   好好味呢

( 29-OCT-2009  THU )

呢朝難得早咗少少出門口   所以又勁想食煙肉蛋漢堡喇   食完行番菇場真舒服呀 ~

之前天氣乾燥皮膚痕   只怪自己又飲得太少水   無嘢做連郁都唔願郁   但依家飲番多啲水真係皮膚無咁痕 ~

晏晝去大榮華買紅豆沙 + 叉燒包   我好少一個人食一碗紅豆沙   不過估唔到又好味噃   好香陳皮味   真係無驚喜反而有驚喜   因為我諗住酒樓啲糖水多數一味係甜同無豆囉   食完覺得個人好滋潤咁呀 ~

今晚去媽咪屋企食飯   呢次係即興所以無湯   不過無所謂   我自己可以煲嘛   最緊要係齊人聚一聚啫 ~

甜麵豉炒茄子 + 鹹蛋蒸肉餅 + 芫茜皮蛋魚片湯 ( 28-OCT-2009 )

( 28-OCT-2009  WED )

是日倒序法

是日懶餐 - 甜麵豉炒茄子 + 鹹蛋蒸肉餅 + 芫茜皮蛋魚片湯

甜麵豉炒茄子 - 想食青豆角   但無得買   又唔想食脆肉瓜同菜心   所以買茄子   第一次用甜麵豉炒又 OK 喎   其實應該加埋指天椒仲惹味   不過里奧大人熱氣到咀都腫埋   咁就費事啦 ~

鹹蛋蒸肉餅 - 我最唔鍾意食肉餅   但我家夫君熱氣嘛   蒸個肉餅就最好架啦   係咪先 ~

芫茜皮蛋魚片湯 - 呢個湯又係比我家夫君下下火㗎   呢餐飯真係為佢而煮呢   佢應該好感動啦希望 ~

是日午餐 : 7-11 咖哩烏冬 / 芝士腸 / 燒賣 / 熱華田

第一次食 7-11 咖哩烏冬   估唔到有驚喜   辣辣哋又唔係太辣   烏冬又幾煙韌   不過最難食係燒賣   好粉咁呀   N 年無飲熱華田   又幾好味喎    唔需要落糖都好夠甜呢 ~

是日早餐 : 芝士雞肉蘑菇腸片三文治烘底 + 奶茶   

芝士三文治烘底真係好正   我超鍾意食㗎 ~

鮮蝦雲吞米線 + 腐乳唐生菜 + 許留山 ( 27-OCT-2009 )

( 27-OCT-2009  TUE )

放咗兩日半假  心情真係好好多呢   一番到又星期二仲覺得特別開心啲咁呢 ~

今朝有運行   因為塞車   所以遲咗   我去另一間食早餐   食完已經 9 點 20 分   一出去見到老闆兩公婆過緊馬路   好在無去食開果間   唔係真係一齊食一齊走咯   估唔到老闆會咁遲   咁即係代表第時一過 9 點就唔好入去食   情願行遠少少食好過 lu ~

Free 呀 Free 呀   雖然可以上網真係好 Free   日日咁睇真係睇到眼濛濛   有啲攰呀 ~

番工等 Lunch Time 再等放工   唔知係咪個個都係咁諗嘅呢 ~

晏晝買嘢番菇場食啦   行下吸下新鮮空氣   不過又唔想行太遠   費事又亂買嘢   女人真係好難節制呀 ~

呢日叫做放假後第一日番工   所以晚餐盡量以超簡單方便為主呢 ~

是日懶餐 - 鮮蝦雲吞米線 + 腐乳唐生菜

鮮蝦雲吞米線 - 雲吞外賣嘅  ($12/6 粒)   好爽口   不過就最唔鍾意佢隻手又拎雲吞又收錢囉   好唔衛生家嘛   次次番屋企都要沖下雲吞皮先煮   但雲吞皮又薄喎   整到爆開哂啲餡   唔靚仔家嘛   米線就係壽桃牌雪菜火鴨絲米線   個味一啲都唔似雪菜火鴨絲嘅   都係蕃茄味好味啲 ~

腐乳唐生菜 - 其實真係唔鍾意食生菜   但就最鍾意生菜唔駛浸咁耐   所以如果想食菜又唔想又洗又浸   食生菜就係首選   再蘸埋腐乳   超好味呢 ~

搞掂哂所有嘢就同里奧大人去還碟   再去許留山食龜苓膏   我就食糖不甩   一心諗住用埋啲 Cash Coupon   點知原來 2 月尾已經到期   即係廢啦 ~

番到屋企再食巨型番鬼荔枝   家姐特登買比我㗎   重 1.9 磅   最鍾意切到一大嚿   一大啖一大啖咁食   超滿足呀   今次要分兩餐食   因為實在太飽同埋太大個呢 ~

大家樂 @ 大埔 ( 27-OCT-2009 )

一早諗好尋日會坐昂平 360   點知自己感冒   咩街都唔去得啦   唔制呀 ~

之前 Upload 咗超多相喺電腦度   里奧大人成日要我 Delete 唔要嘅相   咁啱里奧大人又 Set 新 Hifi 同 DVD   所以我整相佢就 Set 機喇 ~

Set 好 DVD   咁里奧大人當然要試碟啦   但我覺得試咗好耐咁 (因為我 Delete 相都用咗半個鐘 )   原來佢借試碟為名   坐咗喺度睇 DVD   仲要好入神嗰隻   比佢激暈呀   仲有大把嘢未執家嘛 ~

執到咁上下我就去睇醫生   之後同里奧大人食 Tea 喇 ~

口淡淡又眼瞓   所以食酸辣米線   因為果度嘅酸辣米線係酸而不辣呢 ~

 
唔舒服當然唔會煮飯啦   唔通戴住口罩煮飯咩 ~

同里奧大人 6 點 45 分去大家樂食飯   超多人呀   仲係好多人食一人火鍋呢 ~

不過唔舒服   所以只可以食涼瓜排骨飯 + 鐵板牛扒 (茄汁)   第一次食扒係要茄汁   無味嘅   勁唔好食呀 ~

尋晚獎門人又幾好笑噃   原來真係無期望先會唔失望呢 ~

睇完里奧大人又話睇 Batman III   仲要只係睇最精彩嘅尾段   雖然我睇到一頭霧水   但又幾好睇喎   下次真係要認真由頭睇到尾先得喇 ~

今朝起身勁唔想番工呀   食咗感冒藥特別超攰   但又唔想成日請病假喎 ~

唔想乾爭爭食包   所以走去食炸菜肉絲腸仔麵 + 凍奶茶 ($20)   勁難食   但唔食又好嘥喎   見砌對面個男人狂落辣椒油   引到我呢 ~

番到菇場幾多嘢做   真係估唔到   仲諗住可以抖抖添 ~

 
晏晝又同里奧大人去興記   口淡淡所以食火腿會意粉   仲飲埋華田   好有病 Feel 呀   因為我唔舒服先飲華田呢 ~

蕃茄海鮮意粉 + 蕃茄薯仔排骨湯 ( 26-OCT-2009 )

( 26-OCT-2009  MON )

真係好鍾意星期一放假   硬係覺得星期一番工特別攰咁   做乜都無心機   就算約人都唔鍾意約星期一咁㗎 ~

瞓到 10 點半   爽呀   同里奧大人慢慢嘆食完早餐就番屋企 lu ~

無啦啦接到家姐電話   話換好咗對鞋   可以比番我   所以想同我哋食嘢   差唔多 1 點左右應該會嚟到大埔喎   又會咁即興嘅   我啱啱先食完早餐又話要食晏咋噃   不過都會陪佢食嘅 ~

佢想去大埔墟街市食魚蛋粉   點知放假   真係好好彩呢   無得食   不過好在街市入面都有唔少嘢食   所以即轉食豬扒上海麵   飲食雜誌話好食㗎   同埋真身見個樣都好吸引   所以就等啦   等咗 20 分鐘先有得坐   再多 30 分鐘先食   好在我同里奧大人唔餓   係家姐慘啲啫   不過街市有樣好   就係可以一張枱可以叫唔同檔嘅食物   樣樣食啲好開心呢 ~

炸豬扒麵 / 炸醬麵 / 炸兩 / 炸墨魚丸

之後再去食 "亞婆豆腐花"   我其實食完個早餐真係食唔落麵同豆腐花囉   但大埔墟最出名係呢幾樣   無理由一場嚟到唔介紹人食嘅 ~

番到屋企散咗咁呀   今日又熱喎   腳又未停過   口又未停過咁 ~

目送家姐上車後就買餸   咁就過咗大半日 lu ~

呢日的起心肝煲紅豆沙   浸咗一晚紅豆   又特登買白蓮子百合   好比心機煲   點知睇睇下 DVD 時   聞到陣燶味   無喇   乜都無喇   無哂心機呀   仲要擦餐死添   原來紅豆會索水   之得耐唔耐加啲水啦 ~  

唔知點解今次啲燶味好似唔散咁   去到邊都聞到咁嘅 ~

是日懶餐 - 蕃茄海鮮意粉 + 蕃茄薯仔排骨湯

蕃茄海鮮意粉 - 唔想食肉   唔想食飯   因為今日太飽   所以整呢個意粉   酸酸咪咪開胃啲呢 ~

蕃茄薯仔排骨湯 - 好耐無滾湯   係時候要做番啲嘢   但次次煲完都會問自己點解唔蕃茄魚湯嘅   有益啲嘛 ~

元綠壽司 & 滿記甜品 @ 大埔 ( 25-OCT-2009 )

帆立貝壽司 / 甜蝦壽司 / 三文魚壽司 / 太卷 / 石恆貝壽司 / 劍魚腩壽司 / 炭火燒鰻魚壽司 / 螺肉壽司 / 蟹籽壽司 / 素魚翅海蜇壽司 / 醬燒三文魚鮫 / 帆立貝刺身

( 25-OCT-2009  SUN )

今日約咗家姐 里奧大人姐夫 & 家姐 10 點到我屋企打麻將   同里奧大人要 9 點起身   食早餐梳洗再執嘢   但尋晚太攰無執   今朝又唔想太早起身喎   所以時間都好緊迫下 ~

唔知點解   打麻將啲時間過得特別快   唔覺唔覺就到 Tea   呢日又係叫外賣   最緊要快嘛 ~

司華力腸拚沙律 / XO 醬炒公仔麵 / 星洲炒米 / 沙爹牛肉炒飯 / 海鮮炒烏冬

差唔多 6 點里奧大人就接佢家姐更    打到 8 點就散 lu   因為里奧大人姐夫要番屋企食飯   所以我哋就同埋家姐一齊食飯喇 ~

家姐最鍾意食壽司   我有元綠 $50 Coupon   所以當然去元綠啦   估唔到兩晚都會去元綠添  
之後再去滿記食甜品   食完鹹再食甜真係好舒服呢 ~

雪山榴槤 (綠茶雪糕) / 海底椰涼粉

元綠壽司 @ 大埔 ( 24-OCT-2009 )

洋風劍魚壽司 / 蟹足捧壽司 / 熟帶子壽司 / 石垣貝壽司 / 素魚翅海蜇壽司 / 螺肉壽司 / 炭火燒鰻魚壽司

( 24-OCT-2009  SAT )

呢朝又同媽咪去大家樂食早餐   我今次食糯米雞 + 粥套餐   飽到反肚 ~

番到菇場好 Free   今朝得番一半人番工   特別靜咁   完全感受唔到星期六番半日   之後放孖 Day 好開心嘅氣氛呀 ~

今次準時 1 點即走   點知都係送車尾   好在等咗 7 分鐘有車兼有位坐咋   今朝太早起身   上車無耐可以瞓着   Chok 下 Chok 下好舒服呀 ~

今朝食滯咗   所以要食啲刺激嘢   令到自己開胃啲   去食酸辣米線就最啱啦   我今次要中辣   估唔到係比多匙更辣椒籽就當中辣   極度失望呀   不過又估唔到越食越辣喎 ~

食完番屋企睇 DVD   本來想煮飯   但唔肚餓同埋好攰無 Mood 煮   但星期六邊度食店都好多人   所以就算 6 點幾唔肚餓都要落街搵食   如果唔係實無位㗎 ~

本來里奧大人想去大家樂   但我又唔想食扒   又唔想食炒嘢   覺得好大碟好飽   最後去咗元綠食壽司   細細件感覺無咁飽咁囉   呢排天氣好清涼好舒服   所以食完行陣先番屋企呢 ~

住家飯 @ 媽咪屋企 ( 23-OCT-2009 )

煎鯧魚 / 荷蘭豆芹菜炒鹹肉絲 / 鹵水鵝掌翼拚盤 (外賣) / 苦瓜燜排骨 / 當參花膠無花果淮山龍眼杞子烏雞湯 )

( 23-OCT-2009  FRI )

今朝無啦啦塞車呀   9 點 10 分先落車咋  拿拿聲去麥記食早餐   好耐無食煙肉蛋漢堡   覺得好好味呀   不過超滯囉 ~

番到菇場超勁爆開心   因為老闆放假   無拘無束咁任意上網   爽呀 ~

晏晝同同事食   今朝太飽啦   所以食豬扒米線   叫同事幫手食半份豬扒   咁就啱啱好喇   不過今日有啲熱   食完行番菇場都幾辛苦呢 ~

今晚番媽咪屋企食飯   但就會買個天使蛋糕當做家姐嘅生日蛋糕   事緣上次聽到家姐同里奧大人講電話   話農曆生日想食天使蛋糕   但嗰日要嚟我屋企打牌   我又想媽咪都有得食   所以我就買喇    今次仲好好彩   因為 Enjoy Card 有 9 折   我又無   咁啱隔離等訂蛋糕嘅阿姐話幫我碌   我比番 Cash 佢就得啦   太感恩喇   咁我又慳番十幾蚊喎   真係好開心呢 ~

食飯前家姐無啦啦係咁笑住叫我比廿蚊   我唔知乜事   但都會照比   因為肯定我有着數   我以為係佢仲咗六合彩   叫我比廿蚊當我夾份買咋   點知原來佢買咗對涼鞋比我   佢話有年生日送鞋比媽咪   佢自己又買鞋  衰咗成年喎  所以只此之後佢就會收人廿蚊當幫人買咁喎 ~

其實佢買鞋比我   因為佢內疚   佢話上次見到我對鞋底蝕咗   問我點解唔換   根本我都唔知   佢話之前 $144 可以整番好   但無話我知   所以覺得有着數唔話我知咁   佢咪買對鞋比我囉 ~

媽咪仲慘   因為佢好難守秘密   呢對鞋係家姐星期一買嘅   但家姐話唔準話比我知   咁頭先我買蛋糕   又係叫媽咪唔準話比家姐知   無哂驚喜嘛   所以之後媽咪話舒服哂   唔係乜都唔準講喎   哈哈 ~

食完飯我拎蛋糕出嚟   家姐超開心呀   因為佢真係好想食呢   原來佢正日生日想買   但居然無喎   所以有得食佢就好開心呢 ~

尋晚坐巴士上層   個司機開 Roadshow 開到超大聲   真係好嘈   里奧大人走落去叫司機細聲啲   真係兩個世界呀   都唔知點解之前要開咁大聲呢 ~

焗咖哩雞翼 + 豉油皇炒飯 + 芥蘭 ( 22-OCT-2009 )

( 22-OCT-2009  THU )

今朝食飽啲   因為 Lunch Time 要去修眉   唔想一路修一路個肚打鼓呀 ~

話咁快就星期四   呢幾年啲時間過得真係好快咁   唔知點解 ~

Lunch Time 走去修眉   因為唔想放工先去   趕住煮飯嘛   我好怕修眉㗎   次次都痛到標眼水   佢仲叫我晝眉   我條眉都唔係淺色   我話唔駛喇   心諗我夾起前面頭髮家嘛   面色又唔係紅潤   又唔查唇膏   無啦啦一對眉毛咁黑色   好肉酸啫   咪搞我 ~

修完眉都未餓   所以喺超市行陣再買嘢番菇場食   今次呢個蕃茄吞拿魚 Pizza   好味喎   啲餡又多   個包又脆卜卜   不過原來食完好漏囉 ~

呢排天氣好清涼   所以番屋企煮飯都煮得好舒服呢   最怕煮完立黐黐   但又唔可以沖涼住   好難頂呀 ~

是日懶餐 - 焗咖哩雞翼 + 豉油皇炒飯 + 芥蘭

焗咖哩雞翼 - 有焗爐真係方便   焗出嚟又無咁油   正呀 ~

豉油皇炒飯 - 今次多油咗啲   里奧大人問係咪炒糯米飯   睇睇下又幾似   不過我個心好驚   因為佢記得我買咗包糯米   咁即係一定要煮啦   唔係又鬧買完又唔煮   淨係識得買咁 ~

芥蘭 - 阿姐話 6 點半前買 8 蚊斤   依家就 8 蚊兩斤   所以好抵喎   想要我買兩斤   但我食唔哂嘛   之後又未必會煮飯   所以一斤算喇 ~

酸梅麵豉蒸排骨 + 粟米豆角粒 + 滿記甜品 ( 21-OCT-2009 )

( 21-OCT-2009  WED )

尋晚打完邊爐   所以今朝想食清清哋   食奶油多 + 奶茶   呢間茶餐廳係新開張嘅   坐得好舒服   因為無乜人嘛   睇嚟佢哋應該做得唔耐   因為其他茶餐廳係好多人㗎 ~

明明充滿力量   但番到菇場坐咗無耐就會謝哂 ~

同同事出去食 Lunch   好在同佢都好傾   唔係一日流流長都幾悶 ~

終於放工   好在一早諗定煮乜   所以行步路都輕鬆啲呀 ~

真係好怕去街市買嘢   因為好怕有巨強行嚟行去   我次次都眼甘甘望住地下行㗎   因為一有強哥就可以第一時間走嘛   諗起都驚呀 ~

是日懶餐 - 酸梅麵豉蒸排骨 + 粟米豆角粒

酸梅麵豉蒸排骨 - 加啲指天椒當堂好味十倍   但里奧大人話好辣好辣喎   依家多數會整埋里奧大人嘅 Lunch Box   所以多數以肉為主   尋晚問佢要唔要 Lunch Box  佢話乜餸先   哎呀呀   整埋仲要問乜餸   真大膽呀   好在佢知機話好   唔係佢就知味道 ~

粟米豆角粒 - 今次用盒裝粟米喇   因為真係無乜心機逐粒拻呀 ~

洗哂所有嘢就一齊去還碟   順便去滿記食糖水   因為我突然間好想食紅豆沙   不過唔好食   啲蓮子唔熟咁   同埋我唔多鍾意食起沙嘅感覺   都係媽咪煮嘅好味啲   再唔係自己學煮   我相信應該都唔錯嘅 ~

食完個糖水有啲反胃   所以食番個石榴   拻哂出嚟一啖一啖咁食   又甜又多汁   當堂舒服哂呀 ~

紅螞蟻 @ APM ( 20-OCT-2009 )

精選小食拼盤 (雞翼 / 茄子 / 魷魚鬚 / 豬仔骨)

鮮茄汁焗鮮露筍帶子意大利粉

香草蒜茸法包

墨西哥肉醬焗薯皮

( 20-OCT-2009  FRI )

又到 Happy Friday   真係原本唔 Happy   諗起 Happy Friday 個 Happy 就 Happy 呀   食早餐都食得 Happy 過人添啦 ~

星期五真係勁有 Holiday Mood 呀    加上今晚同 CC 食飯   真係更加更加唔想做嘢呀 ~ 

媽咪晏晝又約我飲茶   其實真係唔想去㗎   唔想滕嚟滕去   不過媽咪話想飲就飲啦   橫掂我都要食嘢 ~

夜晚同 CC 去 APM 嘅紅螞蟻食晚飯   呢餐飯係佢嘅生日飯   食下傾下又過咗兩個半鐘   之後再行下就各自歸家 lu   里奧大人又咁啱喺 APM 食飯   但係佢哋要 10 點幾先走    所以我走先喇   番屋企捲 "被竇" 好過呀 ~  

打邊爐 @ 京都宴會廳 ( 20-OCT-2009 )

海鮮船 - 免費   
瀨尿蝦 - 個樣好衰   勁似小強   同佢剥殼好驚呀   一節節咁   啲感覺好核突呀

蝦 - 好甜噃   有驚喜

蟹 - 我同里奧大人都唔食㗎   影完相比番佢哋呢

蝦滑 - 一般啦

美國肥牛 - 真係幾肥   不過打邊爐無肥牛絕對唔似打邊爐呀

油墨菜 / 粟米 / 金菇菜 / 南瓜 - 南瓜好甜好好味   第時自己打邊爐都要食南瓜

桶蠔 - 都唔細隻   之前嗰次勁細隻

豬潤 - 生勾勾好核突   但又想食   所以第一時間倒哂落去淥呢

水魷 - 淥出黎好啞色咁  唔同平時自己買嗰啲   唔通記錯名

龍蝦丸 - 雪到凍一凍

山筋 - 我無食   我覺得好油

蒜蓉辣椒豉油 - 今次啲辣椒唔夠辛辣   加咗好多都係咁   無癮

蝦片 - 唔脆嘅  仲鬼咁開心有得食添

涼粉 - 食完真係無咁熱氣咁㗎

( 20-OCT-2009  TUE )

今朝終於好好多喇   去美心快餐食早餐   但超難食   塊魚柳凍冰冰   食完想反胃呀 ~

里奧大人今朝見工   所以晏晝可以一齊食喇   超開心呀 ~

去 Ikea 食啦   難得可以早啲搵位   如果唔係好多人 ~

有機蕃茄醬長通粉 - 無餸㗎   就咁食好酸呢

肉丸配蕃茄醬 - 啲肉丸越食越覺得麻麻哋   今次啲薯片唔脆添

泰式紅咖哩牛肉飯 - 賣相超樣衰   但原來牛肉係牛展   好腍呢   都唔錯

今晚都係決定唔煮飯   比自己抖多一晚好啲   所以就去打邊爐喇   一百蚊一個人任食 + 任飲 (百事 / 橙汁 / 啤酒)   限時兩個半鐘抵啦   如果大食嘅話 ~

食完番屋企睇碟   如果晚晚係咁都幾爽喎 ~

苑記 @ 大埔 ( 19-OCT-2009 )

( 19-OCT-2009  MON )

勁想食出前一丁   所以早餐就食丁喇   不過唔好食嘅   同自己整到差九百幾倍   自己整得好好味㗎   唔通出面嗰啲係假丁 ~

番到菇場有嘢唔願做   皮膚敏感仲未褪   所以好擔心   好在塊臉無受牽連咋   唔係無臉見人呀 ~

食咗粒敏感藥   個人超攰   晏晝無胃口   所以食提子麥包   再晏少少食麥皮   夠哂健康啦 ~

真係好攰好攰   放工坐車就瞓   飯都唔想煮呀   只想食完拿拿聲番屋企瞓 ~

貪就腳去苑記食粥   因為碗粥有好多料   食極都仲有咁   同埋就算食得好慢   食到尾都仲碗粥都有煙出呢   尋晚一入門口聽到個女仔食客講粗口已經好反感   之後就到伙記講粗口   粗口滿天飛   恐怖兼討厭呀   其實呢間苑記啲伙記成日講粗口已經聽慣   但唔明點解可以有客喺度都講囉   離鬼哂譜   不知所謂呀 ~

番到屋企即刻沖涼睇碟   但睇睇下瞓着咗   索性入房瞓   8 點半入房瞓   我都覺得好早   但唔鬼理啦   因為超攰呀 ~

黑椒牛仔骨 ( 18-OCT-2009 )

( 18-OCT-2009  SUN )

今次無教鬧鐘   瞓到 11 點半自己醒   無早餐食 lu   所以唯有去食車仔麵當早餐 ~

食完行陣百佳買餸   因為勁想食牛仔骨   我覺得百佳嗰啲牛仔骨唔錯呢 ~

呢日真係好唔願郁   抹完櫃已經好攰咁   仲攰到發脾氣   唔知點解一攰就會發脾氣嘅   但唔做又過唔到自己嗰關喎   所以里奧大人都幾慘 ~

食 Tea 喇   又係去茶餐廳搞掂   好鍾意假期去茶餐廳   覺得特別有 Feel 呀   但平日就麻麻喇   因為比我感覺好似好趕咁 ~

是日懶餐 - 黑椒牛仔骨

黑椒牛仔骨 - 炒熟紅黃椒墊底   懶得再洗多隻碟   黑椒汁好味  但牛仔骨啲肉超 "鞋"   因為煮咗好耐   已經慢火慢慢煮   但煮極都有血水   驚唔熟   所以又大火又焗又兜   唔 "鞋"有鬼咯 ~

南乳薯仔燜排骨 + 南瓜薏米豬展湯 + 粟米蛋花湯 ( 17-OCT-2009 )

( 17-OCT-2009  SAT )

呢朝無出去同媽咪食早餐呢   實在太攰   同埋費事惹到媽咪啦 ~

番到菇場超想瞓覺呀   Partner 呢日 Off   所以我要番   如果唔係實唔番呀   橫掂醫生比咗病假紙嘛   因為我想瞓多啲快啲好番呀 ~

幾辛苦先等到收工呀   同里奧大人食完 Tea 就瞓喇   我真係好少會瞓晏覺囉   里奧大人就同姑奶佢哋出去傾嘢 ~

是日懶餐 - 南乳薯仔燜排骨 + 南瓜薏米豬展湯 + 粟米蛋花湯

南乳薯仔燜排骨 + 南瓜薏米豬展湯 - 呢兩樣餸係姑奶特登整比我哋   整熱就有得食 lu   間唔中咁都幾舒服呢 ~

粟米蛋花湯 - 我唔敢飲薏米呀   驚涼會頭暈   所以就整粟米湯 ~

飯後果 - 石榴   媽咪買㗎   好甜好多汁   又幾好味   不過食嘅時候都幾煩   要吐啲核出嚟   啲核太細粒喇 ~

和暢粥麵專家 @ 大埔 ( 16-OCT-2009 )

( 16-OCT-2009  FRI )

今朝約咗 8 掛食早餐   但我遲咗 15 分鐘先到   真係唔好意思呢   我已經早 10 分鐘出門口   但架車開得好慢   搞到我又好趕   下次都係唔好咁早食早餐   有緣相見仲好呢 ~

食咗藥都仲係有燒   真係好煩   又頭痛又反胃   加埋多嘢做   超辛苦呀 ~

晏晝買酸辣菜餃米線番菇場慢慢食   點知個米線唔酸又唔辣   菜肉餃無菜嘅   只係冬菇加豬肉    都唔明點解要叫菜餃嘅 ~

終於等到收工   拿拿聲去睇醫生   好在 37.3 度有少少燒   不過就有齊豬流感跡象   頭痛 反胃 流鼻水 骨痛   醫生話聽朝起身如果 38 度就要去流感中心測試喎   最怕之前同媽咪家姐食飯傳染比屋企人咋 ~

同里奧大人去食粥   我好少話食粥   真係病到超級唔舒服先食咋 ~

食完行番屋企都幾舒服   不過見到里奧大人擔心個樣   我又好開心喎   因為我覺得自己唔舒服有時都唔錯㗎   因為佢會特別細心照顧我呢   平時唔係唔照顧   不過硬係覺得唔夠細心咁囉   成日掛住公司嘢都唔理我嘅   得我一個人睇電視   但我唔舒服呢   佢就間唔中斟水比我摸下我   睇我有無事咁囉   都幾好嘅 ~

咪走雞 @ 大埔 ( 15-OCT-2009 )

( 15-OCT-2009  THU )

今朝口淡淡   所以早餐食五香肉丁香腸仔米粉 + 凍奶茶   不過都係覺無厘味道 ~

諗住喺菇場休息   點知多嘢做到爆   樣樣都趕   真係忙到有啲暈呀 ~

  

晏晝約里奧大人去吉野家   不過唔好食囉   都唔係珍珠米   一心諗住食珍珠米家嘛   激鬼氣 ~

好耐無行咁遠   加上又唔舒服   真係有啲虛脫咁款呀 ~

 

本來諗住今晚煮飯   但都係想抖下   咁啱姑奶上嚟屋企   所以一齊出去食晚飯 lu ~

家姐生日飯 @ The Spaghetti House (APM) ( 14-OCT-2009 )

Lobster Bisque (特色龍蝦湯)
Crispy Pizza with Yellow Crab Roe, Crab Meat, Scallop, Crab Roe & Squid Ink Risotto
(金蟹粉黑珍珠脆薄批 - 鮮蟹粉 / 蟹肉 / 帶子 / 蟹子 & 墨魚汁飯)
Barbecued Baby Back Ribs served with American Crispy Fries (醬燒豬仔骨配美國瘋薯條) 

Enriched Mushroom Fondue Combination with Assorted Beef Platter - New Zealand Beef, Grilled Chicken, Smoked Pork Fillet, Spicy Barbecued Sausage, Vegetable, Squid Ink Angel Hair Pasta & Baguette Cubes (特濃野菌芝士火鍋配極上燒牛肉拼盤 - 紐西蘭燒牛肉 / 炭燒烤雞 / 煙豬柳 / 香辣腸 / 雜菜 / 墨魚汁天使麵及法包粒)

( 14-OCT-2009  WED )

今日 Sick Leave 呀   里奧大人係都唔比我番工   不過我都番唔到   因為想起身番工嘅時候仲係占寒占涷呀 ~

10 點起身   睇醫生之後就食早餐   再租碟番屋企睇 ~

諗住食完藥會眼瞓   點知一啲都唔眼瞓   所以睇碟   睇到 3 點先食 Tea ~

今晚同家姐慶祝生日   所以早少少出去買生日禮物比家姐喇 ~

 

好在買到禮物   如果唔係就要遲啲㗎喇   其實之前睇中咗㗎喇   不過唔係紫色所以唔買   我又唔想求求其其呢 ~

今晚會去 APM 嘅 The Spaghetti House 同慶祝家姐生日   因為家姐想試芝士火鍋   咁多人食無咁漏   今餐家姐比錢   話晏晝佢請咗同事食飯   所以都要講埋屋企人喎 ~

煎鯪魚餅 + 西蘭花 ( 13-OCT-2009 )

( 13-OCT-2009  TUE )

早餐係食榨菜肉絲米粉 +奶茶   覺得除咗條腸比較有味之外   樣樣都無味咁 ~

午餐勁想去麥記   不過原來一個人獨吞一包薯條唔係一件易事呢   食完超飽肚 + 超熱氣呀 ~

呢幾日作病咁款   因為我好少放工坐巴士瞓覺   但呢幾次都瞓到   唔方好嘢 ~

夜晚勁唔想煮   但又唔想出街食   所以求其算喇 ~

是日懶餐 - 煎鯪魚餅 + 西蘭花

煎鯪魚餅 - 覺得今次煎得幾金黃   同埋最開心係塊魚餅個樣好似完整無缺咁呢 ~

西蘭花 - 十蚊兩個食唔哂   所以分兩餐食 ~

呢晚睇電視期間好凍好凍   同里奧大人講   要熄冷氣同埋要蓋被   我覺得自己好唔妥   要即刻探熱呀   一探就 100.5 度呀   嚇到我呢    佢仲以為我講笑添呀   因為我成日會喺屋企大叫   引佢注意   佢話狼來了唔信喎   不過佢知道係真之後就好緊張喇   個樣仲好似想叫我入醫院添呀   我唔制㗎   又無鼻水又無咳嘛   情願食退燒藥   早啲瞓覺   聽朝拿拿聲睇醫生好過呀 ~

柱候焗雞翼 + 滷水魚唇燜鴨掌 + 蒜粒黃薑炒飯 + 西蘭花 ( 12-OCT-2009 )

( 12-OCT-2009  MON )

尋晚瞓得勁差   加上星期一又落毛毛雨   顯得超級無厘精神呀 ~

早餐食芝蛋治烘底   我話要少蛋   但覺得好似仲多咗蛋咁   好恐怖呀   根本食唔哂啦 ~

放咗孖 Day  番到菇場特別覺得悶咁   真係好想番屋企瞓覺呀 ~

  
無啦啦好想食腸粉燒賣   但買完之後就唔想食   喺唔想食嘅情況下咁食   嚟緊呢一頭半個月都唔再掂腸粉燒賣 lu ~

實在太攰   上車無耐就瞓   塞車都唔知   不過好在唔知   因為困住喺架車度真係好慘   搞到個人好焦急咁呢 ~

我平時放工好少去超市   估唔到一去就有收穫   就係卡樂 B 波浪薯片 200g 只買 $10   我以為啲人放錯位置   所以走去問 Cashier   佢哋話係 $10   但都仲係半信半疑   再問另一個 Manager   佢話係 $10   我問點解咁平   佢話要清貨喎   但係呢幾箱薯片嘅製造日期係 2009年 9 月17 日    Expiry Date 係 2010 年噃   又會咁怪嘅   不過唔理啦   反正我都鍾意食   自己買 4 包又買 4 包比家姐   第一次成車都放哂薯片啊   好開心呢   不過自己無帶環保袋   叫里奧大人拿拿聲拎兩個落嚟   咁就可以慳番 $2   又有人幫手拎   唔錯唔錯 ~

是日懶餐 - 柱候焗雞翼 + 滷水魚唇燜鴨掌 + 蒜粒黃薑炒飯 + 西蘭花

柱候焗雞翼 - 用南乳醬醃一晚   入味啲   今次用焗爐整嘅   真係超方便   又唔油   以後都會用焗爐整呢 ~

滷水魚唇燜鴨掌 - 之前一晚煮定   所以好入味   超好食呀   第一次整鴨掌啲感覺都唔係好恐怖   我覺得雞腳恐怖啲   不過我未試過整雞腳 ~

蒜粒黃薑炒飯 - 加啲黃薑同魚露一齊炒   再加啲脆蒜粒   當堂好味哂呀 ~

西蘭花 - 就咁灼熟就算   都唔錯 ~

茄汁洋蔥豬扒 + 四寶珍菌湯 + 冰皮月餅 (石榴飄香) ( 11-OCT-2009 )

( 11-OCT-2009  SUN )

今朝瞓到自然醒   好在 11 點起咗身   如果唔係就無早餐食呀 ~

食完同里奧大人行百佳   好在我依家多數會 Check 單咋   因為我買嘅餅乾明明係 $23.5   但張單係 $25.9   我買咗兩盒㗎   如果無睇單就走   我就蝕咗 4.8 啦   咁唔抵嘛   里奧大人仲話個價錢無錯添   男人就係對啲數字特別唔留心㗎喇   真係呢 ~

番到屋企拖地又執下嘢   咁都用咗一個鐘呢   個人太攰  真係做嘢都做得慢過人呀 ~

  
食完 Tea 無啦啦落雨   最憎落雨下濕濕去街市買餸㗎 ~

睇完 DVD 就煮飯   話咁快就過咗一日 lu ~

是日懶餐 - 茄汁洋蔥豬扒 + 四寶珍菌湯 + 冰皮月餅 (石榴飄香)

茄汁洋蔥豬扒 - 唔知整乜好   所以整呢個餸   因為實在太方便啦 ~

四寶珍菌湯 - 湯包嚟㗎   自己再買豬骨 + 2 條粟米 + 1 條紅蘿蔔    咁就好味好多呢 ~

冰皮月餅 (石榴飄香) - 無味道可言   今年食咗 3 Pack 冰皮月餅   覺得 3 Pack 都無以前咁好味   下年應該唔會再食 lu ~

燒扒屋 @ 大埔 ( 10-OCT-2009 )

煙鴨胸沙律 - 我覺得佢唔應該整啲汁   又汁又沙律好怪   同埋最大問題係啲汁唔好食呀

美式什扒配意粉 - 有腸仔 煙肉 牛扒 豬扒  雞扒    個汁又係好唔掂   同埋太多肉喇   最後都食唔哂要打包呀

羅宋湯 - OK啦   幾多料囉

蒜蓉包 - 個包都脆卜卜   但太少蒜蓉醬

( 10-OCT-2009  SAT )

今日 Off   但奶奶 "入伙"   所以要早起身去太興食早餐   之後再約埋里奧大人啲家姐一齊出發喇 ~

差唔多 12 點幾就搞掂 lu   今次分批走人   因為我同里奧大人想落銅鑼灣逛逛呢 ~

  
去到銅鑼灣多數會去南記食嘢   春卷腩肉小窩米線必食   仲要加埋佢哋啲辣椒醬   超辣超好味呀 ~

食完行陣 Sogo   諗住去 Supermarket 買嘢   點知無收鑊   只係買咗罐花茶咋 ~

之後番教會   但仲有半個鐘   所以去街市食炸兩   平時晏晝好好味㗎   油炸鬼脆卜卜   但今次超腍   可能因為收工啦   都費事再開鑊炸啩 ~

今日好攰    今次真係好唔想煮飯   所以同里奧大人去屋企附近開餐算喇 ~

小食會 @ 姑奶屋企 (大埔) ( 9-OCT-2009 )

壽司 / 白汁吞拿魚長通粉 / 炒飯 / 蒜蓉包 / 焗瑞士汁雞翼 / 炒椰菜

( 9-OCT-2009  FRI )

Happy Friday 加埋聽日又 Off   真係唔開心都好難咯   所以朝早同媽咪又去大家樂食早餐呢 ~

  
吉列豬扒腸仔配多士 / 雞肉漢堡餐肉配蘿蔔糕 / 無糖麥皮

食完早餐番菇場   又係無嘢做   其實真係幾舒服   雖然有時會悶啲咁囉 ~

Lunch Time 仲未餓   所以出去行下   一路行一路諗食乜東東   終於買咗酸齋 齋鴨腎 齋春卷番菇場慢慢食 ~

今日心情好   又驚自己唔夠飽   所以買定件 Cake 做 Tea   不過菇場太靜啦   啲膠袋又大聲   係人都知妳食嘢   食都食得唔安樂呀 ~

夜晚同里奧大人去賓姑屋企食飯   原來其中一個兒甥仔生日   所以整咗個小食會   我唔駛煮喎   我梗係去啦 ~

食完傾偈   又係傾到 10 點幾   本來想繼續傾   不過聽朝要早起身   所以要番屋企休息 lu ~

金銀蒜蔥花蒸茄子 + 午餐肉 + 紅豆沙 ( 8-OCT-2009 )

( 8-OCT-2009  THU )

今朝想食菠蘿油    點知無喎   所以食沙爹牛肉包   個包就好味   但奶茶好澀   如果唔係就 Perfect 喇 ~

菇場又好靜   靜到想瞓覺   係咁嘅環境之下   真係做乜都無心機呀 ~

終於 Lunch Time 啦   真係要出去走走   尋晚已經諗好食牛腩河㗎喇   不過呢間嘅河粉唔滑嘅 ~

實在悶到無 Mood 諗煮咩   打比里奧大人話想打邊爐   又 Say no   真係無癮   不過最後佢又話打   話見我好想打喎   但我諗好煮乜啦   所以唔打喇 ~

是日懶餐 - 金銀蒜蔥花蒸茄子 + 午餐肉 + 紅豆沙

金銀蒜蔥花蒸茄子 - 里奧大人唔鍾意食茄子   但我想食喎   同埋佢唔打邊爐咁衰吖嗱   所以特登整茄子佢食   等佢知道想食無得食等同唔想食但要食一樣咁痛苦呀   哈哈 ~

午餐肉 - 懶人必備   煎到香一香咁   超好味呀 ~

紅豆沙 - 媽咪煲㗎   超多豆呢   食咗兩碗超飽呀   真係搵日自己煲下先  咁想幾時有得食都得啦    諗起都開心呀 ~

住家飯 @ 媽咪屋企 ( 7-OCT-2009 )

豉椒炒蜆 / 梅菜蒸肉餅 / 煎魚仔 / 蒸鹹魚 / 灼菜心 / 木瓜魚湯

( 7-OCT-2009  WED )

朝早食榨菜肉絲米粉餐   個湯係淡如水咁   所以次次都要加七味粉調味   好味好多呢 ~

菇場好靜   只聽到打 Keyboard 嘅聲音   有啲同事就 FB   好 Free 咁喎 ~

晏晝食 Farewell Lunch   公司比錢嘅   又有得飲茶好開心呀   不過啲同事好怪   個個都唔出聲嘅  勁有搭枱 Feel 呀 ~

食到 2 點真係好喇   因為好似坐多陣就收工咁呢 ~

今晚去媽咪屋企食飯   所以要里奧大人接我放工一齊去呢   途經炒栗子車仔   買咗 1 磅   本來想買埋蕃薯   但費事媽咪鬧   所以無買 lu ~

番到媽咪屋企無嘢做   好開心咁食栗子   但啲栗子都唔多熟咁嘅   搞鬼錯呀   之後食下零食   同寶寶影相咁囉 ~

同屋企人食飯永遠覺得時間唔夠咁   講東講西乜都傾一餐   等食又傾   食緊又傾   食完又傾   係咪因為女人特別多嘢講呢 ~

今次媽咪特登煲咗蓮子百合紅豆沙比我拎番屋企   我真係好想食紅豆沙   但無同媽咪噃   又會咁啱嘅 ~

豉椒排骨臘腸 + 唐生菜 + 寧波湯丸 (芝麻餡) ( 6-OCT-2009 )

( 6-OCT-2009  TUE )

今朝好想食香口嘢   所以食吉列魚柳餐   但今次塊魚柳好細呀   搞到好似無食過嘢咁 ~

呢排個人仲係好攰   無哂朝氣咁   唔知幾時先可以回復正常呢 ~

Lunch 食芝士包   係今朝喺 Market Place 買嘅   估唔到都幾鬆軟   不過就唔係太多芝士粒   如果唔係仲正呀 ~

屋企今日換煤氣喉同拆棚   仲諗住煮唔到飯   點知佢哋好快搞掂喎   不過出街食得多真係有啲厭   屋企附近又唔多選擇   但又無 Mood 出城搵食喎   所以求其煮就算 lu ~

是日懶餐 - 豉椒排骨臘腸 + 唐生菜 + 寧波湯丸 (芝麻餡)

豉椒排骨臘腸 - 方便快捷   又惹味 ~

唐生菜 - 蘸點豉油蒜蓉指天椒一齊食   當堂刺激哂呀 ~

寧波湯丸 (芝麻餡) - 因為掉咗個盒   唔知 Expiry Date 係幾時   所以都係拿拿聲食埋去喇 ~

豉椒排骨臘腸 + 唐生菜 + 寧波湯丸 (芝麻餡) ( 6-OCT-2009 )

( 6-OCT-2009  TUE )

今朝好想食香口嘢   所以食吉列魚柳餐   但今次塊魚柳好細呀   搞到好似無食過嘢咁 ~

呢排個人仲係好攰   無哂朝氣咁   唔知幾時先可以回復正常呢 ~

Lunch 食芝士包   係今朝喺 Market Place 買嘅   估唔到都幾鬆軟   不過就唔係太多芝士粒   如果唔係仲正呀 ~

屋企今日換煤氣喉同拆棚   仲諗住煮唔到飯   點知佢哋好快搞掂喎   出街食得多真係有啲厭   屋企附近又唔多選擇   但又無 Mood 出城搵食喎   所以求其煮就算 lu ~

是日懶餐 - 豉椒排骨臘腸 + 唐生菜 + 寧波湯丸 (芝麻餡)

豉椒排骨臘腸 - 方便快捷   又好惹味 ~

唐生菜 - 點豉油蒜蓉指天椒一齊食   當堂刺激哂呀 ~

寧波湯丸 (芝麻餡) - 因為掉咗個盒   唔知 Expiry Date 係幾時   所以都係拿拿聲食埋去喇 ~

譚仔 (三哥) 雲南米線 @ 大埔 ( 5-OCT-2009 )

( 5-OCT-2009  MON )

不得不承認年紀大機器壞咯   打完一場麻將之嘛   周身骨痛 Shoulder 又痛   背脊又痛   手指又痛   手臂又痛   好在條腰骨唔痛咋 ~

放咗幾日假   日日同里奧大人一齊   依家要番工   有啲唔習慣呀 ~

今日等巴士番工   居然打蛇餅又無車   搞到我好趕咁去食早餐喎 ~

菇場又係一片沉寂   我又攰又周身痛   真係勁想瞓覺呀   平時好少會咁㗎 ~

諗住食完 Lunch 瞓陣   但都係好唔慣瞓晏覺   同埋覺得好無安全感 ~

因為屋企出面條煤氣喉要換   所以今日搭棚   聽日就換喉   里奧大人話唔好煮   費事將啲嘢搬嚟搬去喎 ~

一心諗住打邊爐   點知里奧大人話瞓得唔好   打邊爐好燥唔好喎   無哂心機啦   最後我話去譚仔米線   因為實在想食濃味 & 辣嘅嘢呀 ~

飯後果 - 大樹菠蘿   百佳買㗎   佢話啱啱開㗎   所以買嚟食   真係好甜呀 ~