臘肉炒芥蘭苗 + 臘潤腸蒸排骨 ( 16-MAY-2024 )

( 16-MAY-2024  THU )

尋晚半夜去完廁所   好難先瞓得番呀   但好感恩起身都精神呢 ~

早餐食菠蘿包   里奧大人就食香濃車打芝士條   如果佢覺得好食就會再買 ~

菇場忙呀   話咁快就 11 點 45 分 ~

Lunch Time 出去行陣再食牛筋上海麵   好耐無食牛筋   突然覺得好濃味   唔係咁想食   哈哈 ~

食完就去買菜同 2 磅百香果   咁再行多個圈就買大富士蘋果   比完錢諗住走   見到皇帝蕉又買埋啦   前晚先同里奧大人講話好少見到皇帝蕉   咁我比埋錢就諗住走   拎住嘅時候又唔係覺得好重咁   後尾檔主再比番袋富士蘋果比我   佢都笑住話我唔記得拎呀   之後拎哂兩樣嘢就覺得重喇   哈哈 ~

仍然忙呀   所以好快又放工了 ~

放工即走   番到屋企都即預備晚餐喇 ~

里奧大人話頭先諗住買糖水比我食   但行到一半都番轉頭   因為我每月一到   唔想我食咁多凍嘢 ~

我話其實今晚又食   真係食得太多啦   星期日同星期二先食完嘛   即係一星期隔日咁食喎   又唔係有益嘢   一個月食一次都已經係極限啦   所以我話好想食嘅時候先買比我就得㗎喇   其他時間唔駛買比我食   哈哈 ~

是日晚餐 - 臘肉炒芥蘭苗 + 臘潤腸蒸排骨

臘肉炒芥蘭苗 - 想清埋啲臘肉   咁炒芥蘭苗最好   因為里奧大人唔係咁鍾意食甜豆 ~

臘潤腸蒸排骨 - 里奧大人話唔駛整呢個餸都得啦   我話你帶飯嘛   無理由得臘肉做餸囉 ~

洗完碗即去樓上買冬菇   但原來樓上係收 7 點   我記錯咗 8 點呀   嗚嗚 ~

里奧大人話咁快番嚟嘅 ?!   我話去到已經收舖喇   所以咪即番屋企囉 ~

開埋機洗衫就沖涼   里奧大人熨完衫就去做運動 ~

睇完 "家族榮耀之繼承者" 再睇陣 Youtube   今晚 10 點 50 分先瞓覺 ~