蒜蓉汁豬扒 + 蠔油油麥菜苗 ( 8-MAY-2024 )

( 8-MAY-2024  WED )

感恩瞓得都唔錯   好在朝早先聽到里奧大人鼻鼾聲咋   不過鬧鐘未響   我都可以繼續瞓 ~

今朝焗完麵包先沖涼   之後見有時間就煲薑茶喇 ~

早餐食牛油排包   加咗片芝士真係好正 ~

排包喺超羣買㗎   估唔到口感都唔錯喎   我覺得好食過美心   可惜超羣分店極少啦

食完就去里奧大人公司坐陣   咁樣我就唔駛咁趕 ~

菇場唔忙又 Skype   點都好過成日上網啦   哈哈 ~

Lunch Time 去行陣先   行到 12 點 15 分就去買燒賣腸粉   咁啱見到船頭   咁佢話唔想食飯   我話我去買腸粉   佢就一齊行啦   佢本身就咁買 1 份燒賣同 2 隻粉果   之後再買多 2 隻韭菜餃   佢話佢一個人食   咁諗住一齊行番公司啦   但佢話仲要買碗牛什魚蛋麵呀   我問燒賣呢啲係咪同阿花 Share 食 ?!   佢話唔係呀   自己一個食哂㗎   我話妳都好食得喎   佢自己都話佢好鍾意食嘢   同埋食得都算多嘢   哈哈 ~

4 條腸粉 + 7 粒燒賣   船頭話呢份係佢早餐   問我夠唔夠食 ?!   我話夠啦   佢以為我朝早食好多嘢呀   我話只係食麵包咁囉   始終太早食午餐嘛   其實我唔想食燒賣添㗎   不過就咁食腸粉好悶咁囉   所以最後呢份午餐都食咗 45 分鐘

仍然唔忙又 Skype   話咁快又 5 點半喇 ~

放工即走   番到屋企即預備   里奧大人 6 點幾就番到屋企   所以要等多陣先食得 ~

是日晚餐 - 蒜蓉汁豬扒 + 蠔油油麥菜苗

蒜蓉汁豬扒 - 因為里奧大人帶飯   所以整呢個豬扒   我就食尋晚嘅雪菜火鴨絲燜米就搞掂 ~

蠔油油麥菜苗 - 我覺得油麥菜苗無油麥菜咁大陣味   所以依家多數買油麥菜苗呢 ~

洗埋碗就開機洗衫   之後沖涼休息了 ~

里奧大人熨完衫再去做運動   我仲以為佢唔做添 ~

睇陣福寶   今晚同里奧大人 10 點半都瞓覺喇   平時多數我瞓先   始終我慣咗 11 點前瞓呢 ~