麻辣手撕雞 (外賣) ( 19-MAY-2024 )

( 19-MAY-2024  SUN )

尋晚半夜餓醒呀   仲要係咁發夢   好記得有個夢係番緊工   本來唔出去食   但最後都係出去買牛腩河   嗰陣仲係 12 點 42 分同埋落大雨   之後過咗一陣就無雨   不過去到間食店執咗   所以就周圍去睇下嘢   再去另一間食店睇有咩嘢食 ~

另一個夢係阿渠 23 號星期一 Last Day   公司請食 Farewell Lunch 同埋阿渠請食下午茶   但當日我請咗假無得食 ~

我覺得好搞笑   發夢都記住食   係咪真係餓得咁緊要呀   哈哈 ~

今朝同里奧大人一齊起身   不過我就同家姐食早餐呢 ~

翠玉瓜蝦腸 - 呢期好鍾意食蝦   我覺得蝦腸好似無咁滯 

鳳爪排骨飯 - 姐夫一定食呢個飯   因為份量唔多

山竹牛肉球 - 呢個又係姐夫鍾意食   但其實佢只係食一個就夠了

沙律炸雲吞 - 新鮮炸嘅一定好味   同埋個餡都幾多蝦

鮮蝦三寶餃 - 樣樣唔同就最好啦

薑粒雞包仔 - 家姐話好夠薑味喎   所以叫比我食

鴛鴦燒賣皇 - 最鍾意食干蒸牛肉

食完就番屋企   Berry 女今次好乖喇   撲完家姐就係咁撲我 ~

打喊露

家姐成日都會同我講   會同邊個同事邊個朋友食飯   又會比啲相我睇下   佢話有次同糟糟朋友食飯   個朋友個女話佢同事係佢表哥   最搞笑係本身係睇佢哋細個張相   之後家姐話個男仔好熟面口   咁再比大少少嘅相比家姐睇   家姐話呢個男仔係咪姓乜名乜   英文名叫乜乜   點知全部符合哂呀 ~

就等如我同事同我教會姊妹係鄰居   里奧大人朋友嘅同事係佢舊同事   所以我成日話世界真係細   哈哈 ~   

中眼瞓

睇呢個樣   好似好文靜咁   哈哈哈哈

傾下傾下又 12 點幾   係時候走人喇   家姐同 Berry 就送我搭車 ~

番到屋企抖陣再拎啲英女皇硬幣出嚟   難得今日有收銀車回收   所以即拎去喇 ~

我間唔中會將啲硬幣分類

里奧大人差唔多 2 點鬆啲番到屋企   咁叫佢買埋午餐   估唔到佢話想食點心   哈哈 ~

食完抖陣就拎硬幣出去回收   我估兩袋加埋應該有 50 磅   我哋要停兩轉先可以去到收銀車位置呀 ~

咁睇好似好細袋   但我哋係要捧住嚟行先行到呀

有 6-7 個人等

呢個係第 2 個籃嚟嘅   我實在太多硬幣嘛   同埋每人只可以用 1 個籃   所以我拎錢出嚟嘅時候   職員係咁叫後面啲人上前

第 1 個籃有 $1,185

第 2 個籃有 $2,603

搞掂就搭車   我買埋手撕雞都番屋企 lu ~

雖然今日唔係好熱   但頭先拎住袋硬幣   真係拎到出哂汗   所以點都要沖涼洗頭   之後再開埋機洗衫就休息喇 ~

同里奧大人睇 1 集 "慶餘年"   睇到第 2 集嘅一半   之後大家都瞓着咗   無計啦   早起身又出咗成身汗係好想瞓    哈哈 ~

差唔多 6 點 15 分先預備晚餐   因為只係煲個飯   好快可以食得 ~

是日晚餐 - 麻辣手撕雞 (外賣)

麻辣手撕雞 (外賣) - 我都係要少少辣   但今次都係好辣   不過都好好味   哈哈 ~

洗埋碗再沖涼洗頭   雖然無汗   但都係習慣煮完飯要沖涼洗頭咁呢 ~

終於清哂啲沙律

睇陣 Youtube 就同里奧大人睇埋下半集 "慶餘年"   睇到啱啱好 10 點半   我都瞓覺先喇 ~