準備開餐
個爐兩邊都倒咗雞蛋
家姐幫我哋倒咗烤肉汁同包肉醬
自助嘅涼拌小食 妳拎幾多都得 但一定唔可以浪費
生菜都係任拎
我好鍾意食呢啲涼拌㗎 醃蘿蔔夠酸夠凍
泡菜都幾辣 所以我鍾意食呀 同埋最緊要食完唔會乸喉
喜來烤肉 ($158) - 玫瑰花造型好靚呀
真雪花牛肉 ($228) - 最鍾意燒到有焦香嘅味道 所以鍾意同糟糟食韓燒 哈哈
辣魷魚 ($150) - 我唔知糟糟叫咩家嘛 呢碟又放咗喺佢嗰邊 我只睇到洋蔥咁 哈哈
我話要咁樣先見到魷魚
韓豚五花肉 ($180) - 家姐好搞笑 佢唔駛煮飯買餸嘛 所以唔知咩叫五花腩 佢同糟糟講話想食好肥嘅豬肉 哈哈 但其實燒完出嚟唔肥㗎 食完滿口油香好正呀
大醬湯 ($85) - 大家都覺得好鹹
糟糟細心哋每人分一碗
柚子梳打 ($45) - 糟糟就叫檸檬梳打 我就無飲啦 唔想飲咁多凍嘢
糟糟全程負責燒同配給 我同家姐只係負責食 哈哈
幾款肉都係口感軟腍
( 31-MAY-2024 FRI )
尋晚去完廁所都好快瞓得番 今朝又係鬧鐘未響起身 但就繼續瞓 其實都唔知有無瞓到 不過最後 7 點 18 分都起身 咁早啲起身整早餐 ~
早餐食甜餐包夾芝士 里奧大人話咁樣好味啲 尋朝食 Salami 太濃味 哈哈 ~
食完又靈修 10 分鐘先番工 個天又係想落雨 所以要早啲出門口 ~
菇場忙呀 真係無諗過 哈哈哈哈 ~
Lunch Time 個天都黑黑哋 所以我唔行喇 直接去買雞翼酸辣米線番菇場食 ~
肥仔豪見我買酸辣米線 佢話唔明點解我同阿蟲都咁鍾意食 我話開胃嘛 但佢都唔覺得係 哈哈哈哈
阿花無啦啦叫我望下阿齋 原來佢睇緊 "女神降臨" 因為呢排無咩韓劇好睇 我同阿花話多啲支持車銀優啦 阿齋話佢唔係支持車銀優 我話係就唔怕認喎 一齊支持啦 之後阿齋 "唉" 咗一聲 笑死我哋呀 ~
忙到 3 點就搞掂 又繼續 Skype 到放工 ~
今晚里奧大人同菜仔媚媚去上環食飯 咁我都約家姐同糟糟食飯呢 ~
糟糟接完家姐再接我 所以 6 點已經可以去到尖沙咀喇 ~
今次約食飯都算即慶啦 同埋糟糟之前送咗部榨汁機比我 我話要請佢食飯 咁當然一定請埋家姐 咁啱佢哋今晚又無約人 如果早一個星期食就約唔成 lu ~
咁糟糟話要食韓燒 所以佢揀呢間 之後家姐即 Book 位 但限時 100 分鐘 本來 Book 7 點 但糟糟話想早啲 咁即改 6 點 我話點早都要 6 點囉 因為太早我未放工嘛 ~
糟糟去泊車 我同家姐行去食店先 好在糟糟教咗點樣行咋 我話希望佢唔好早過我哋到啦 哈哈 ~
一坐低 糟糟問食牛定豬 ?! 家姐好快答話牛 其實我哋 3 個都鍾意食牛嘅 呵呵 ~
咁我同家姐去拎小食 我叫糟糟自己話事 最緊要食得哂就得 ~
上次同糟糟又係食韓燒 佢又係話睇完韓劇要食韓燒 不過佢其實都唔鍾意韓國 我都話去過一次唔會話好期待想去第 2 次 因為食物唔係太啱胃口 同埋樣樣都差唔多味道 反而家姐鍾意食韓國嘢 不過睇佢喺韓國食嘅嘢 又係吸引嘅 餐餐唔同款呀 ~
今晚又係好開心 話哂大家有共同話題 又識咗咁耐 講嘢唔駛就住就住就最開心 因為以前一齊相處過 真係見到佢就好自然諗番起舊時呢 ~
佢先搞笑 話家姐成日比人蝦 我話妳咪一樣蝦佢 不過家姐都當佢係阿妹咁錫嘅 成日又同佢一家人食飯 同埋糟糟其實都好錫家姐嘅 家姐未請到工人嘅時候 幫佢煮咗 2 個星期飯呀 仲要每日都唔同款 勁過茶餐廳呀 哈哈 ~
食下傾下 唔係職員過嚟話 Last Order 我哋都唔知已經接近 7 點 ~
7 點半都走喇 估唔到大家都好飽 本來我話請食糖水 不過糟糟話好飽唔去食 同埋佢啱啱喺日本番嚟 所以食到滯咗 咁唔怪得之叫咁少嘢食啦 ~
咁我哋大家之後都有嘢整 所以跟糟糟車去旺角喇 ~
番到屋企都接近 9 點 沖埋涼都休息 lu ~
今日係家姐番工週年紀念日 所以請哂群組嘅人食蛋撻 本身 Full Team 係 3x 人 不過今日只係番咗 20 人但都照請喇 因為今日係正日呢
拿破崙焦糖千層蛋撻 ($18/個)
糟糟送比我嘅日本手信 咁佢比咗 4 對襪比我同家姐揀 其實一對係紫色 咁我一定比家姐 之後我揀呢對淺藍色 糟糟個樣好驚訝咁望住家姐 話點解家姐知我會揀呢對 哈哈
睇陣電視再睇陣 Youtube 里奧大人 10 點 50 都未番 所以我都瞓覺先喇 ~
沒有留言:
發佈留言