咖哩煙肉意粉 ( 12-MAR-2026 )

( 12-MAR-2026  THU )

感恩瞓得都唔錯   但始終都係半夜起咗身囉   如果一覺瞓天光就好喇 ~

早餐食芝士卷   里奧大人話好食   因為唔係食空氣包   哈哈 ~

菇場忙呀   咁先似番工 ~

Lunch Time 蒸完飯出嚟   阿齋話唔記得將飯盒放落雪櫃   我同阿爽一齊話唔駛叮   真係唔 Give me five 都唔得喇   哈哈 ~

唔記得拎飯蓋   西瓜就幫我放好去   平時我都只係兩個蓋疊埋去㗎咋

今日唔駛買菜就去 Mikiki 行半個鐘   他他條條真係最舒服 ~

阿齋上網買咗好多抹手巾仲要好平   話真係唔駛慳住用   用完掉咗都唔心痛   溫總話不如買抹手紙仲好啦   阿齋問點解 ?!   佢話用完就掉嘛   我同阿齋喺度大笑   阿齋意思係抹多幾次覺得霉霉哋就掉   咁掉都唔心痛啫   唔係抹完即掉呀 ~

仍然忙呀   菇場要裝修   好在對我就無咩影響   不過下星期真係要 Pack File 喇   呢幾年完全無 Pack   係時候要還 lu ~

放工去大家樂買沙薑雞   但估唔到賣哂呀   諗住買 3 餸但又剩咗金沙骨要食   所以最後都係番屋企煮晚餐 ~

里奧大人 6 點 20 分番到屋企   我即同佢講話比你把好口講中咗   真係無得買雞呀   之後佢都喺度大笑   佢話咩唔係之前試過買哂咩 ?!   我話無囉   係今次比你講完就無得買囉 ~

是日晚餐 - 咖哩煙肉意粉

咖哩煙肉意粉 - 好在屋企長期有意粉同咖哩醬   咁唔知煮咩就煮呢啲㗎喇   今晚最開心係用埋個洋蔥呀   因為唔知之後啲餸用唔用到佢嘛 ~

洗埋碗就煮蕃薯糖水   里奧大人要番公司處理緊急嘢   咁我都去做機 lu ~

做半個鐘就夠喇   番到屋企已經見到里奧大人   頭先叫佢煮熱啲糖水   咁就可以自己食先喇 ~

開埋機洗衫就沖涼   之後都食蕃薯糖水呢 ~

里奧大人 9 點開 Zoom Meeting   我就睇 Youtube 又打下機咁啦 ~

今晚 10 點 45 分都瞓覺   里奧大人啱啱開完會   佢本身話 10 點開完   但無啦啦又話要再開囉 ~