黃豆醬焗雞翼拚蒜味香腸 + 蒜蓉蒸節瓜粒 ( 17-MAR-2026 )

食埋尋晚嘅薄餅

( 17-MAR-2026  TUE )

感恩一覺瞓天光呀   但臨醒之前個夢係半夜起身瞓唔着   所以鬧鐘響嘅時候   我覺得好似正想瞓着就要起身咁啦   不過尋晚都夜瞓啦   下次平日真係唔好咁夜瞓喇 ~

早餐食藍莓&紅莓糯米小食 + 紅豆粒糯米小食 + 迷你牛角 + 法國丹麥酥方包   樣樣食啲真係好正呀 ~

家姐話好似 Buffet 咁   我其實都鍾意樣樣有啲   不過咁樣就要食足 3 日囉   哈哈 ~

菇場忙呀   因為要 Pack File   好在阿齋幫手搬運   雖然短程但都好攰㗎 ~

Lunch Time 出去買 3 條翠玉瓜同 3 條節瓜   再買 2 包獨子蒜   阿姐話買瓜係最重   不過我都一定買 2 日   咁唔駛成日做同一樣嘢   哈哈 ~

買完再去買兩餸飯   一陣體力勞動   真係要食飯呀   同埋我唔想食濕嘢   食到個人出汗會覺得仲熱 ~

豉椒豬扒拚蘿蔔牛腩

差唔多 2 點又再 Pack File   船頭都有幫手   但我 Pack 到 4 點半都抖下喇 ~

放工即走   番到屋企都即預備晚餐   里奧大人 6 點 15 分番到嚟   不過我話未咁快食得呢 ~

是日晚餐 - 黃豆醬焗雞翼拚蒜味香腸 + 蒜蓉蒸節瓜粒

黃豆醬焗雞翼拚蒜味香腸 - 依家帶飯就會煮多啲份量   但今次雞翼太少要加 2 條台灣腸呀 ~

蒜蓉蒸節瓜粒 - 唔係咁熟要再蒸過   下次都係買 2 個就夠喇   哈哈 ~

洗埋碗抖半個鐘就同里奧大人去做機   依家又開始做 15 分鐘先 ~

番到屋企即開機洗衫同沖涼休息   之後又喺 Youtube 聽歌喇 ~

里奧大人拎住袋垃圾   之後拎住對皮鞋   問我有無膠袋 ?!   咁啱我晾緊衫   我發哂脾氣話可唔可以唔好成日喺我做緊嘢嘅時候   問我拎呢樣嗰樣呢 ?!   佢個樣好慘咁答我話問下有無膠袋啫   我真係好想再講   想掉對皮鞋就一早袋好拎去掉   如果突然間想掉都可以拎個膠袋出嚟再放對鞋囉   唔係要我拎家嘛 ~

可能晏晝體力勞動   今晚好攰呀   所以 10 點 20 分都瞓覺 lu   里奧大人以為我咁早瞓唔舒服添呀 ~