茄子燜牛肉 + 炸魚皮 (外賣) ( 5-MAR-2026 )

( 5-MAR-2026  THU )

尋晚瞓得都唔錯   不過呢排啲天氣潮潮濕濕   真係好想瞓到自然醒   哈哈 ~

早餐食菠蘿油   因為牛油就嚟到期   係時候開始清埋去 ~

菇場忙下停下   最鍾意係咁 ~

Lunch Time 蒸完飯就去買茄子同炸魚皮   買完又周圍行下先番菇場開餐 ~

一坐低就同船頭 阿齋傾陣偈   阿齋話依家去一田買啲嘢咋   咁就用咗 3 百幾   之後我哋話依家咩都貴哂   連菜都貴啦 ~

船頭依家食完飯會去完街市買嘢   佢話都好重   所以想買架車仔   唔駛拎到咁辛苦   我話推車真係好正㗎   但肯定會越買越多囉   之後阿齋都話係呀   佢頭先明明只係想買蘋果   買完又買咗辛辣麵   諗住比錢就順便買多包柑同湯包   我話完全明啦   我平時就係咁 ~

傾完先食   之後望個鐘已經係 12:57   我又無戴眼鏡   以為係 12:37 呀   所以真係要加快速度食喇 ~

洗埋碗又同阿齋傾偈   佢 12 月去咗深圳   話成日會去酥僖塘買蟹黃鍋巴   又會去薜記炒貨買現烤豬肉脯   我話我都係喎   我哋好多時講到好興奮會捉住對方隻手   之後佢話我哋啲口味真係越嚟越似   哈哈 ~

傾到 1 點 40 分   其實之後都繼續背對背傾   船頭又會加入   所以坐得近真係好   哈哈 ~

忙咗一陣又做自己嘢   今日啲時間過得好快 ~

放工即走   同隔離公司阿穩一齊行去搭車   上扶手電梯嘅時候   佢話掛住傾偈唔記得去一田   所以要搭番落去   哈哈 ~

番到屋企都煮晚餐   里奧大人 6 點 40 分番到屋企   可以即刻食得 ~

是日晚餐 - 茄子燜牛肉 + 炸魚皮 (外賣)

茄子燜牛肉 - 我覺得牛梅花肉無肥牛咁肥   所以一去成興隆就會入定貨   今次都係用泰式聖羅勒辣椒醬嚟燜   唔駛自己調味真係好方便呢 ~

炸魚皮 (外賣) - 好想食就買啦   里奧大人話今晚呢個 Combination 好得意   哈哈 ~

洗埋碗抖陣就同里奧大人去做機   今晚做咗 25 分鐘就走喇 ~

番到屋企即刻染髮   之後沖涼同埋開機洗衫 ~

同里奧大人一齊睇 1 集 "非常檢控觀"   睇完就睇 "歡樂茶飯"   錄哂嚟睇就最好   唔駛睇廣告   咁樣慳番好多時間㗎 ~

今晚有啲攰   睇到 10 點半都瞓覺 lu ~