燒汁焗雞翼 + 八珍豬腳薑 (外賣) + 蒜蓉炒生菜苗 ( 3-MAR-2026 )

( 3-MAR-2026  TUE )

感恩一覺瞓天光呀   呢排天氣勁潮濕   加上我又未好番哂   所以瞓得好真係好緊要呢 ~

早餐食甜餐包   里奧大人就食芝麻餐包 ~

菇場忙咗一陣   雖然瞓夠   但係都有啲攰咁 ~

Lunch Time 蒸完飯就出去惠康買薯片同香蕉   再買埋雞骨草已經 12 點 15 分   要快啲番菇場開餐喇 ~

唔忙就做自己嘢   但突然好眼瞓   好在今日 3D   我應該坐喺度瞓着咗呀   因為起身好精神   哈哈 ~

放工即走   番到屋企已經見到里奧大人   不過今晚可以慢慢整晚餐   因為里奧大人腳眼仲痛   我膝頭哥又有啲痛   唔駛去做機就唔駛咁趕呢 ~

是日晚餐 - 燒汁焗雞翼 + 八珍豬腳薑 (外賣) + 蒜蓉炒生菜苗

燒汁焗雞翼 - 加埋韓國辣醬係惹味好多   不過我就加得唔多嘅 ~

八珍豬腳薑 (外賣) - 其實 2 月到期㗎喇   咁今晚都要食喇   食咗一半都好飽下   所以要留番聽晚再食 ~

蒜蓉炒生菜苗 - 我今次落鑊炒   可能個火唔夠大   要炒好耐先得   哈哈 ~

洗埋碗就開機洗衫   好在里奧大人熨咗衫   我沖完涼就可以休息喇 ~

今次啲橙就無咁乾水

易姐請嘅鳳梨酥   我覺得好好食呀   最鍾意啲餡係有點煙煙韌韌   同埋唔係咁甜

同里奧大人一齊睇咗 3 集 "非常檢控觀"   其實劇情真係唔錯   演員又做得好   最鍾意係獨立故事   咁就唔駛記咁多嘢   哈哈 ~

睇到 10 點 50 分都要瞓覺   我覺得集中精神睇都幾快攰㗎 ~