栗子冬菇燜雞肶 + 蒜蓉炒脆肉瓜 ( AUG-2008 )

同里奧大人食完 Lunch 就番屋企喇   因為想快啲屋企睇奧運精英滙香江呀 ~

是日晚餐 - 栗子冬菇燜雞肶 + 蒜蓉炒脆肉瓜

栗子冬菇燜雞肶 - 栗子係之前買多咗   所以諗住整雞翼   點知雪櫃居然無雞翼   但又唔想再落街買   所以就整栗子冬菇燜雞肶喇 ~

蒜蓉炒脆肉瓜 - 又係之前買多咗嘅   所以就整蒜蓉炒脆肉瓜就算 lu ~

整完哂所有嘢   里奧大人就煮芝麻糊湯丸   食到好飽呢 ~

~~~~

今朝無番教會   所以同里奧大人慢慢食早餐   我最享受星期日份早餐   因為唔駛趕頭趕命咁食   好 Relax  ~

車仔麵 + 休息 ( AUG-2008 )

雖然我唔係咁舒服   但我都去街市買 8 個鴨梨 ($10) + 1 個西瓜仔 + 3 個木瓜 ($10)   因為要食多啲生果   同埋煲雪梨水比里奧大人潤下 ~

我次次病親   車仔麵都係我首選   雖然無益但好味   最適合無胃口嘅人食呢 ~

食完睇陣電視就沖涼   好多人話沖完熱水涼即刻瞓覺好舒服   但我次次都唔覺嘅   反而覺得更難入睡   因為好熱呀   慶合合點瞓啫   一路瞓一路瞓發惡夢都似呀 ~

~~~~

今朝無番工   本來可以瞓晏啲   但個心成日掛住打比公司請病假   又掛住 10 點睇奧運精美滙香江   所以 9 點幾打比公司請病假之後就出街食早餐 lu ~

本來想食麥皮   但好有病 Feel   所以去大家樂食糯米雞 + 奶茶 ($19.5)   食飽啲   因為里奧大人開 OT 要 3 點先番到屋企呀 ~

大家樂 ( AUG-2008 )

尋晚放工去 Shiseido 修眉同做皮膚測試   結果係皮膚比較乾   所以真係要比心機敷 Mask 喇   唔係再多幾年真係難以想像㗎喇   其實我買埋唔少 Mask   但係懶   唔願做之嘛 ~

前晚唔夠瞓   所以耳仔同喉嚨都好痛   個人又好凍   都知出事喇   因為我耳仔痛多數係發燒嘅先兆 ~

番到屋企第一時間探熱   真係 99.6 呀   拿拿聲食 Panadol   因為聽日約咗媽咪飲茶   唔想病呀 ~ 

同里奧大人去大家樂   就腳嘛   食牛肉串 xx 鐵板燒 + 鹹魚雞粒炒飯   牛肉串得果幾粒牛肉   超唔抵呀 ~

食完里奧大人話去 Jusco 買冰皮月餅   明知我發燒   仲唔早啲同我番屋企而要買月餅   我都奇怪   點知去到 Jusco 就話要買木瓜   想買木瓜比我食   因為可以增強免疫力喎   嗰果刻幾開心㗎   終於知道有我存在   但可惜 Jusco 無呢   之後佢自己再去惠康   但一樣係無   見到里奧大人咁好   真係好感動   所以其實我都好鍾意自己得閒病下   但唔要大病入醫院喎   因為佢成日掛住做嘢   無時間陪我呀 ~

~~~~

今朝耳仔同喉嚨超痛   唔想食熱嘢   所以食芝腿菠蘿包 + 凍奶茶 ($17)   飲凍嘢真係舒服好多呢 ~

晏晝要覆診   所以同媽咪 里奧大人去美心皇宮飲茶   之後就去覆診 lu 感謝神   我甲狀腺同貧血指數非常好   到明年初先要覆診呢   但就要繼續食鐵丸   因為唔食啲指數好差喎 ~

番到屋企又探熱   又係 99.6 度   所以拿拿聲睇醫生呢   原來淋巴勁發炎   話摸到淋巴有好大粒嘢喎   當醫生按我條頸兩側時   痛到我用手打醫生隻手   勁尷尬呀   拿拿聲 Say Sorry 呀   今次要食一個星期抗生素   好煩啦 ~

不過都有樣開心嘢   就係有醫生紙   聽朝唔駛番工呀 ~

呢排無啦啦好鍾意食呢款牛油卷   唔知又會肥幾多磅呢 ~

住家飯 @ 媽咪屋企 + 瑜珈 ( AUG-2008 )

尋晚又要學瑜珈   所以約家姐去麥記 Share 魚柳包打底~

其實瑜珈都幾多招式   次次番到屋企都唔多記得學咗啲咩嘢   想玩下都唔得添   有啲好簡單都記得嘅   但又唔記得幾時吸氣同呼氣囉 ~

學完瑜珈就同家姐打的番媽咪屋企食飯 lu   今次媽咪又係去睇大戲   所以又係得番家姐 工人同我食咋 ~

家姐睇埋 "家好月圓" 就番屋企喇   好在朱朱未瞓   可以陪下我   比我影下相   比我攬攬咁啫 ~

又係等到媽咪番咗屋企先安心瞓覺   所以 12 點幾先瞓呢   但過了瞓覺時間   好難入睡呀 ~

~~~~

今朝 7 點起身同媽咪 朱朱食早餐   連家姐都嚟埋   好開心呢 ~

食完番屋沖下涼   睇睇報紙就番工喇 ~

依家喉嚨有啲痛   唔知係咪唔夠瞓呢   不過都應該係㗎喇   因為我依家超級眼瞓呀 ~

晏晝又番媽咪屋企食飯   因為里奧大人今朝上咗大陸開會呢 ~ 

青 BB 晚餐 - 薑蔥雞絲 + 蒜片炒脆肉瓜 + 芫茜皮蛋魚片湯 + 印尼香蒜撈麵 ( AUG-2008 )

呢幾晚都係好攰咁   所以都無咩心機學煮新餸   費事無心機整得唔好食呀 ~

去到街市買要芫茜 ($3) + 鯇魚片 ($10) + 4 條脆肉瓜 ($4) + 4 隻皮蛋 ($6) + 雪藏雞肶 ($6)   經過饅頭店   突然好肚餓   所以買咗個熱辣辣嘅饅頭 ($3) 番屋企食呢   橫掂里奧大人探奶奶未咁早番   食少少嘢係好啲嘅 ~

番到屋企食呀食   估唔到區區 1 個鏝頭係咁飽肚喎 ~

食完之後就開始做嘢喇   煲菊花茶   熨衫再滾湯   諗住睇一陣電視先 Ready 晚餐   點知里奧大人話 On the way   搞到我要即刻煮喇 ~

是日青 BB 晚餐 - 薑蔥雞絲 + 蒜片炒脆肉瓜 + 芫茜皮蛋魚片湯 + 印尼香蒜撈麵

薑蔥雞絲 - 雞肶隔水蒸熟   放涼後拻成絲   之後再放大量薑蔥蓉   加少少麻油   我覺得超正呀 ~

蒜片炒脆肉瓜 - 啲菜太貴又驚食唔哂   所以整脆肉瓜   因為好易整 ~

芫茜皮蛋魚片湯 - 里奧大人生痱滋   要滾呢個湯比佢下下火呢 ~

印尼香蒜撈麵 - 係 超為食卡姑 介紹嘅   原來係同 7 仔嗰啲一樣㗎   以後可以唔駛再去 7 仔食 lu ~

尋晚又幫里奧大人 "鍊錬" 骨   等佢可以舒舒服服瞓覺 ~

~~~~

  
今朝食芝蛋治烘底 + 咖啡 ($16)   就嚟食到唔知食咩好喇   真係有得食又煩   無得食又煩 ~

番到菇場靜英英   打 Keyboard 都要細細力打呀 ~

晏晝同里奧大人去美心食焗豬扒飯 + 凍奶茶 ($39)   個飯超唔掂呀   唔多熱   啲飯又腍   唔係講笑   我整得仲好味過佢呀 ~

隔夜晚餐 ( AUG-2008 )

尋晚放工陪媽咪配眼鏡   所以成 8 點先番到屋企呢 ~

食唔哂就要留番做隔夜餸囉   唔通嘥咩   咁唔駛買餸   番到屋企只需要收衫   洗衫就當做咗家務喇 ~

是日懶餐 - 入味喼汁骨飯 + 入味隔夜湯 + 菠菜豬肉餃米粉

入味喼汁骨飯 - 放埋一碟   好似靚仔啲 ~

入味隔夜湯 - 唔係讚自己㗎   里奧大人真係一路飲一路話好甜㗎 ~

菠菜豬肉餃米粉 -  因為唔想里奧大人食隔夜餸   所以特登煮樣新嘢佢嘆   等佢覺得屋企好溫暖 ~

食完洗完沖埋涼   諗住瞓   點知做 "亮相"   所以同里奧大人一齊睇埋先瞓覺   見里奧大人呢排咁攰   所以我好主動咁輕聲同里奧大人講   同你 "練" 骨吖   里奧大人話唔好   因為驚我啲手指會痛   我就話唔驚   幫你 "練" 骨當做運動囉   當下里奧大人超級感動   不過同時彈句 "如果妳唔發脾氣又真係幾好嘅"   我都好少發脾氣之嘛   佢實在太唔了解我喇   比少少甜頭佢居然咁話我 ~

~~~~

今朝天氣好好   心情都唔錯   所以去 KFC 食鬆餅 + 奶茶 ($11) ~

番到菇場忙咗陣就做下自己嘢   咁先似番工家嘛 ~

晏晝同里奧大人去餐廳食魚皮餃河粉 + 鹹魚肉餅飯 + 凍檸茶 ($41)   食到好飽都唔驚   因為行到番公司已經成身汗   差唔多所有嘢都消耗哂喇 ~

喼汁骨 + 青紅蘿蔔粟米栗子豬骨湯 ( AUG-2008 )

尋日同里奧大人食 Tea   食完就去買放大鏡比平仔   因為佢依家對眼好難 Focus   佢又想睇聖經   但啲字太細   所以買副放大鏡比佢   等佢可以睇   時間又可以過得快啲呢 ~

番到屋企已經 4 點   所以要開始煲湯 lu ~

是日晚餐 - 喼汁骨 + 青紅蘿蔔粟米栗子豬骨湯

喼汁骨 - 買 6 件金沙骨 ($12)   呢個餸係跟李派林喼汁提供嘅食譜整嘅   但人家嘅喼汁骨好深色同啲汁好杰   但點解我整嘅唔係咁嘅   但我跟足哂步驟架噃   點解會咁㗎   我仲加埋老抽   但都無人家咁深色 ~

青紅蘿蔔粟米栗子豬骨湯 - 好耐無煲湯   所以真係好好好好好好飲 ~ 

要快快手洗碗同沖涼再做 Mask   因為要睇奧運閉幕呀   張大導真係好勁呀   睇到我嘩嘩聲   真係令人嘆為觀止呀 ~

~~~~

今朝要抽血   去到醫院超多人   因為星期五打風無開   所以個個都拿拿聲去補番抽血   今次人多反而早咗抽完血   估唔到可以嘆埋麥記早餐先番菇場開工呢 ~

番到菇場忙到嘔茄   未停過手呀   寫 Blog 睇 Blog 睇報紙都唔得閒呀 ~

晏晝里奧大人同同事 Farewell   所以我拿拿聲去媽咪屋企食飯呢 ~

譚仔雲南米線 @ 佐敦 ( AUG-2008 )

尋日里奧大人 Off   所以留喺屋企拼命做功課 ~

我又要番工   晏啲又會探奶奶   所以唔知點好   咁啱家姐約我去板長食壽司   所以索性唔番屋企 lu ~

今次又係家姐請   埋單 $180   家姐仲精到係咁 "夾" 住我個手袋   我搶咗 3 次都失敗   咁唯有下次我請啦   之後就陪家姐 Shopping   今次又有禮物收   因為家姐送咗條褲比我   知我肥人難買褲嘛 ~

買完就上媽咪屋企陪朱朱   我陪到 5 點半就去探奶奶 lu ~

唔知點解呢排成日想食米線   所以迫里奧大人陪我食譚仔雲南米線   結果同上次一樣係唔好食   不過自己話去嘅   點都要食哂同埋話好食囉 ~

~~~

今朝又晏起身無番教會喇   我發覺好似好耐無番教會咁添 ~

同里奧大人他他條條食早餐之後去超市買豬骨 ($20) 就番屋企喇   因為條街好熱 ~

車仔麵 + 麥當勞新地 ( AUG-2008 )

尋日食完 Tea 就番屋企 Hea 下   睇下報紙   睇下奧運   不過睇睇下電視瞓咗喎 ~

起身已經 6 點   間間食肆都唔開   諗住煮午餐肉就算   但個頭作痛   所以都係放棄唔煮 lu ~

屋企附近所有食肆都唔開   唯獨食車麵同麥當勞   所以食車仔麵算喇   其實都唔想㗎   生日食車仔麵慶祝好似好慘咁   但無辦法啦 ~

食完車仔麵再去麥當勞食新地   當堂飽哂 ~

11 點 15 分諗住瞓覺   點知發覺睡房窗台漏水   搞到 12 點半先瞓得   好慘呀 ~

~~~~

今朝第一件事開電視   3 號風球就起身番工啦 ~

食飽啲   去赤丸食腸蛋出前一丁 + 奶茶 ($22)   真係好飽呀 ~

番到菇場突然有嘢做   咩 Mood 都無哂 ~

酸辣米線 ( AUG-2008 )

呢排瞓得唔好   搞到心口痛同背脊痛   最慘係好難抖氣   所以放工拿拿聲睇醫生   唔係第日 8 號風球無得睇就慘咯 ~

好在係肌肉發炎   食止痛藥就無事㗎喇   咁都好啲 ~

痛到無咩心機   所以就算用心煮飯都係唔好食   因為不在狀態嘛 ~

同里奧大人又食酸辣米線   食完成身汗   不過真係好正呢 ~

暴風雨前夕真係好風平浪靜   搞到個人好緊張添 ~

其實掛 8 號風球唔駛番工真係好正   但最緊要係唔好有人命傷亡囉 ~

~~~~

今朝真係 8 號風球唔駛番工   里奧大人生日就無啦啦多日假喇   同里奧大人 10 點幾起身去椰林閣食早餐   出面好大風   微微雨   同埋唔多覺街好多人   可能知道晏少少會發出更高強風信號 ~

唔知到幾點開始就 9 號波喇   呢個風真係好犀利呢   直吹香港 ~

 

同里奧大人去大家樂食完 Tea   行咗一陣之後見 Pizza Hut   椰林閣都 Closed   而大家樂就開始 Cut 人   佢哋真係要快啲走啦   如果唔係無車番屋企都唔知點算 ~

里奧大人最好的生日禮物 - 鸚鵡 ( AUG-2008 )

今朝 8 號風球   晏啲可能再有更高強風信號   係 10 號呀   啲風真係好勁 

今日係里奧大人生日   無啦啦多日假休息   咁又幾好喎 ~

雖然唔可以出街慶祝   但可以平平靜靜咁過生日都好嘅   本來想去山頂呢 ~

今年嘅生日都幾特別   唔知下年唔會唔又咁樣   哈哈 ~

住家飯 @ 媽咪屋企 + 瑜珈 ( AUG-2008 )

尋晚要學瑜珈   所以順便去媽咪屋企食飯同過夜   不過媽咪去睇大戲   所以只得我同家姐食呢 ~

番到屋企即刻可以開飯喇   是日晚餐有蒸石斑仔 + 煎牛柳 + 蒜蓉炒油麥菜 + 花膠當圓肉參豬展湯   食到飽一飽   飽到要隔一陣先可以食生果 ~

家姐 9 點幾就走喇   所以我就沖涼   攬下朱朱睇電視   之後等埋媽咪番屋企   所以 11 點 45 分先瞓呀 ~

~~~~

今朝 7 點起身   因為同媽咪 朱朱食早餐   攰到呢 ~

番到菇場做一陣嘢就要抖抖   里奧大人要 Send  文件比僱傭公司   所以晏晝約咗姑奶們去美心皇宮飲茶   今次 2 姑奶請飲茶   因為里奧大人今日農曆生日   聽日西曆生日呢 ~

一早請咗假聽日會同里奧大人慶祝   但隻鸚鵡好似啄到埋嚟咁   啲朋友仲話聽朝飛到埋嚟   會掛 8 號 9 號風球添呀   係唔係㗎 ~

在此祝里奧大人生日快樂   身體健康   事業順利 !!

苦瓜菜脯炒蛋 + 水餃福字麵 + 愛心紅蘿蔔湯 ( AUG-2008 )

因為我嘅堅持   所以就煮咗呢餐我覺得簡單而好味嘅懶人晚餐喇 ~

是日懶餐 - 苦瓜菜脯炒蛋 + 水餃福字麵 + 愛心紅蘿蔔湯

苦瓜菜脯炒蛋  - 苦瓜係淨餘物資   啲蛋就過期嘅 (7/8 到期不過無臭)   都唔知啲雞蛋其實可以留幾耐嘅   但聞到無臭就照煮喇   大拿拿 4 隻蛋喎   今時唔同往日   真係咩都唔可以浪費呀   呢個餸都幾煩   因為苦瓜要出水又要切條   菜脯又要切粒   不過點都好過出去食味道嘢嘅 ~

水餃福字麵 - 簡單而里奧大人又鍾意食   所以我都好樂意煮嘅 ~

愛心紅蘿蔔湯 - 係水姑叫工人煲嘅   但因為太夜無飲   所以留番   好好味呀   唔知係咪太耐無飲湯呢 ~

尋晚好有 Mood 睇家好月圓   點知睇兩 Part 都係陳法拉   仲要不斷播 "分分鐘需要你"   真係聽到有啲驚   同埋覺得好悶呀 ~

~~~~

今朝食餐蛋治烘底走牛油要熟蛋 + 熱奶茶 ($16)   我覺得飲奶茶精神過飲咖啡   因為之前飲咖啡好似仲攰咁   所以都係飲奶茶好啲 ~

番到菇場又忙忙哋   幸好我可以一心二用呢 ~

晏晝同里奧大人去麥記   明知無益都要食呀   因為有 Coupon 呀   買 1 個餐送漢堡包   用 $5 可以買粟米 (大)   總數 $31.3 咋   咁平係邊到搵呢   雖然明知無益   但一次半次無所謂啦 ~

老地方 @ 大埔 ( AUG-2008 )

尋晚又唔駛煮飯   因為去探奶奶同平仔 ~

次次去醫院前   我都會買啲小食同里奧大人一齊醫肚   今次買燒賣 ($10/16 粒) 超抵呀 ~

去到探奶奶   點知有親戚嚟探   我同里奧大人要讓路   因為心臟科病房只可以每次兩個人探訪   所以我同里奧大人就探平仔   見佢無心機   原來因為發燒   可能聽日做唔到化療住   要等到退燒先可以做   之後就開解佢   見佢有番笑容   我個心都安樂啲   探咗半個鐘就要探奶奶喇   因為奶奶聽日要做通波仔   所以又要開解奶奶   只不過是小手術   不用擔心呢 ~

我隻手仲好痛   所以拎奶奶啲脫苦海嚟貼   姑奶話我有網球手喎   仲話會跟我一世添   唔係呀化 ~

同里奧大人又去老地方食飯   食蕃茄豬扒飯 + 菜肉雲吞米線 + 生菜   食完接到姑奶電話   話有個現成菲傭喺佢屋企   所以想里奧大人見一見   問一問資料   如果 OK 就請喇   因為奶奶就快出院呢 ~

就係咁   又搞到 12 點先番到屋企   我對眼紅哂呀 ~

~~~~

尋日媽咪特登早啲餵朱朱食嘢   因為要支持劉翔呀   點知媽咪打嚟話劉翔腳傷   退出比賽   好無心機呢   因為一心為咗睇佢嘛 ~

今朝睇報紙標題   劉翔因傷悲關係   尚未正式跨過一個欄   便已緣盡京奧 ~

聽到呢個消息   真係好失望   希望劉翔真的放下包袱   好好療傷呢 ~

今朝我都好攰   所以去食平靚正 KFC 鬆餅 + 咖啡 ($11)   飲完咖啡都好眼瞓呀 ~

番到菇場真係吽吽呌呌頭暈暈咁   真係老喇   唔可以捱夜 ~

里奧大人唔舒服   所以無番工   造就咗我去媽咪屋企食飯   又見到朱朱好開心呢   不過朱朱就慘啲   因為我次次番親屋企佢都唔願瞓   中下中下到我走咗先瞓到豬一隻   呢個小寶貝真係令到我好冧呢 ~

食完飯   姑奶打嚟話奶奶手術成功   好開心呀 ~

釀苦瓜 + 節瓜鹹蛋瘦肉湯 + 突然外出晚飯 ( AUG-2008 )

里奧大人呢排好鍾意食米線   所以晏晝就一定要去食   因為佢一個星期前已經講明話星期日要食呢間新開張嘅餐廳呢 ~

估唔到都幾好味   第時可以多間選擇喇 ~

大熱天時好慘   唔想食飯   但食粉又食到身水身汗   麻鬼煩 ~

食完行一陣就當運動   不過又唔可以行得太耐   因為太熱   所以個人好易攰呢 ~

番到屋企就開心喇   因為睇到 Klinsmann 呀   所以又睇咗兩個鐘頭足球無做嘢喇 ~

一早諗好煮住家飯   點知里奧大人同水姑兩公婆話同我哋食飯   所以我帶埋我煮嘅住家餸喺酒樓度食囉   無謂浪費嘛 ~

是日晚餐 - 釀苦瓜 + 節瓜鹹蛋瘦肉湯

釀苦瓜 - 參考自 通少 食譜

節瓜鹹蛋瘦肉湯 - 參考自 小公主 食譜

去到酒樓掛住傾偈都無咩點食嘢   不過姑奶同佢老公話我煮得又唔錯喎   所以我啲住家餸好快就清哂喇   梗係啦   無味精又好味嘛 ~

~~~~

尋晚隻右手好痛   唔知係咪太耐無煮飯   所以用錯力   痛到瞓唔到覺呀 ~

所以今朝好攰   好想食甜嘢   所以食芝腿菠蘿包 + 凍鴛鴦 ($17) ~

番到菇場又忙   隻手又痛   真係好想番屋企瞓覺呢 ~

晏晝同里奧大人去池記食麵   我覺得又貴又細碗又唔飽囉 ~

富田和食亭 @ 佐敦 ( AUG-2008 )

最鍾意星期六   因為只係番半日 ~

但里奧大人要開 OT   所以我求其同里奧大人去佢公司對面茶餐廳食 Lunch 就算   呢間咁茶餐廳   每人最低消費 $9   真係估唔到 "Up Up Dup Dup" 嘅茶餐廳都有最低消費咁串呀 ~

食完里奧大人就番公司   我就同媽咪去飲茶   傾下偈咁囉   之後媽咪去婆婆屋企   我就再陪家姐去大家樂食 Tea   不過我無食   因為食唔落   等埋家姐食完就一齊上媽咪屋企陪朱朱喇 ~

我坐到 5 點幾走 Join 里奧大人探奶奶同平仔   奶奶拆喉可以食嘢同說話   平仔可以自己企身行去洗手間   真係好開心   感謝神嘅保守同恩典 ~

咁開心喇喎   所以同里奧大人食壽司   去佐敦富田   第一次去   味道唔錯   最驚喜係滙豐卡有 9 折嘛 ~

食親壽司都好口渴   所以番到屋企附近嘅麥記食美祿麥旋風 (好似係咁叫)   但好甜   同埋 "北" 起好似 "Poo Poo" 咁好核突   所以食咗 1 / 3 唔想食   比里奧大人食算喇 ~

~~~~

今朝 10 點半起身   所以又係無番教會 ~

同里奧大人去食早餐   之後去超市買新鮮林肉 ($15) + 香蕉 ($4)   再去街市買 6 個木瓜 ($20) + 4 個節瓜 ($5) + 2 條苦瓜就番屋企喇 ~

難得有太陽   所以就洗衫同拖地   再整呢樣嗰樣又無咗個幾鐘   所以星期日啲時間係過得好快呢 ~

老地方 @ 大埔 ( AUG-2008 )

尋晚同里奧大人探奶奶同平仔   見到佢哋兩個都精神咗   所以都放鬆咗少少   感謝神嘅保守 ~

呢排好攰   想快啲番屋企休息   所以去屋企附近食晚餐喇 ~

又係去老地方   因為想再試佢啲嘢好唔好食   唔好就唔會再去嘛 ~

我食炸豬扒米線 (冬陰公湯底)   里奧大人食沙爹牛肉粗麵再加菜心同黑珍珠豆漿   好期待冬陰公嘅酸酸辣辣   其實不嬲唔食   但唔知點解突然好想食   點知係超級唔掂   唔酸唔辣又無味   連蝦仔都無隻   真係唔明點解佢哋夠膽叫做冬陰公   仲要加 $4 添   不知所謂呀   里奧大人仲衰   食埋啲早餐食嘅嘢   一心想試新嘢家嘛   點知食沙爹牛肉   激鬼死我咯   下次應該唔會再嚟食佢啲麵   但會再試佢哋啲小食囉   如果小食都唔掂就唔會再去食㗎喇 ~

~~~~

今朝好早起身   因為約咗媽咪同朱朱食早餐呢 ~

但太早起身   所以求其食腿蛋治烘底 + 凍奶茶 ($18) 就算 lu ~

食完番上屋企坐一陣先番工   所以有時間同朱朱影下相喇   不過佢好攰   所以都唔敢影咁多喇   唔係會發脾氣咬我㗎 ~

廣東燒味 @ 佐敦 + 新相機 ( AUG-2008 )

尋晚探奶奶同平仔   所以又喺佐敦食飯喇   今次一行七人   見到廣東燒味有位   所以就入去食嘢喇 ~

食咗燒味飯 + 茄子牛仔骨 + 蒜香骨 + 土魷肉餅 + 蝦仁炒蛋 + 菜心 + 芥蘭    又話燒味好好食   呃人嘅   燒肉皮韌㗎   同埋啲紅腸染到啲飯係紅色   食完塊腸好似查咗唇膏咁囉   好得人驚呀 ~

食完即走喇   因為趕住番屋企附近攞新相機 CANON IXUS 80is ~

~~~~

今朝仲係好攰   老喇   一晚唔夠瞓   要好幾日先可以復原呢 ~

星期五要食豐富啲   所以食炸菜肉絲午餐肉出前一丁 + 奶茶 ($20)   自己掛住睇雜誌   所以啲麵腍哂   好難食呀 ~

番到菇場公私兩忙   真係有啲虛脫 ~

晏晝同里奧大人食黑椒脆豬軟骨飯套餐 + 水餃麵   勁勁勁勁飽呀   晏晝都係唔好食飯   次次食完個胃都脹脹咁 ~

唔知係咪自己幻覺   覺得里奧大人好似瘦過我咁嘅 ~

住家飯 @ 媽咪屋企 + 瑜珈 + 遠方禮物 ( AUG-2008 )

尋晚放工去學瑜珈   所以就約家姐去麥記 Share 半個麥香雞   費事 一陣無力拗腰嘛 ~

上瑜珈好開心   因為可以同 CC 同家姐一齊玩   之後又可以番屋企食飯   陪下媽咪陪下朱朱咁好開心呢 ~

放咗學同家姐打的番媽咪屋企   一入屋已經有飯食喇 ~

是日飯餐 - 酸甜排骨 + 蒸斑 + 節瓜粉絲豆卜 + 韮菜花芽菜魷魚 + 清補涼湯

食到飽飽又要食生果   咁樣想唔肥都難   因為做完運動超易吸收家嘛 ~

不過媽咪係咁   食少少就以為妳唔舒服   但食得多呢   又覺得妳好鍾意食   成日問駛唔駛幫我買 ?!   真係好搞笑 ~

正想 "灘" 喺梳化睇電視嘅時候   里奧大人打電話嚟   話奶奶突然呼吸困難急救緊   所以我就 9 秒 9 出門口去醫院   去到醫生話仲急救緊   所以唔可以入去   感謝神   奶奶叫做過咗危險期   叫做穩定囉   留到 12 點就打的番屋企瞓覺 lu ~

~~~~

今朝一出大堂   看更就話 : 里太   有份嘢比妳呀   但因為我要趕番工   所以帶埋份 Parcel 番工   因為唔想滕上滕落 ~

終於等到喇   就係來自新加坡嘅 Blog 友 冰姑 嘅窩心禮物呀   仲有啲補身湯包比我補身   好感動呢   冰姑  I Love U ~

尋晚瞓得唔好   所以要飲凍咖啡 + 腿蛋菠蘿包 ($17)   不過飲完都好眼瞓呢 ~

好在有兩位 Blog 友 冰姑 同 卡姑 呢兩碌精神之柱啫   唔係真係日日 "中" 眼瞓呀 ~

晏晝同里奧大人去麥記   因為好熱唔想行咁遠囉 ~

煙鴨胸 + 牛油香草粟米 + 煙三文魚 + 蒿麥冷麵 + 菊花茶 + 木瓜功效 ( AUG-2008 )

尋日無啦啦成篇 Blog 無咗   所以都無哂心機   只容許自己煮啲簡簡單單嘅晚餐就算喇   因為唔想里奧大人成日出街食   里奧大人真係有福氣呀 ~

又好想食粟米   所以去街市買 3 條粟米 ($10)   再去 Jusco 買煙鴨胸 ($15) + 煙三文魚 ($25) 就番屋企喇 ~

番到屋企就慘喇   因為忙碌嘅一日正式開始 ~

首先食條蕉補充體力先   然後就開始淥蒿麥麵再雪涷   搞掂就拻粟米   之後煲菊花茶   開機洗衫 掃地 收衫 熨衫 摺衫 ~

做完哂之後   就咁啱得咁橋收到里奧大人電話   話 On the way 喇   所以要開始預備晚餐喇 ~

是日晚餐 - 煙鴨胸 + 牛油香草粟米 + 煙三文魚 + 蒿麥冷麵

煙鴨胸 - Jusco 買嘅   只需要用慢火煎   必哂啲油就搞掂 ~

牛油香草粟米 - 慣咗用手拻粟米   所以唔覺得好煩   今次用牛油起鑊   真係香好多呢   但我覺得太多粟米   所以食完之後有啲怕 ~

煙三文魚 - 只需將三文魚逐塊逐塊放喺碟度   再用另一隻碟載豉油 Wasabi 就搞掂 ~

蒿麥冷麵 - 8 月 15 日就到期   所以要食埋去喇 ~

里奧大人一番到屋企見到盤粟米就 "乸" 埋塊臉   因為太多喎   有得食仲嫌多喎   想點先 ~

~~~~

今朝天氣好好仲好熱   所以都唔敢行得太快   唔係成身汗就麻煩喇 ~

早餐食芝蛋治烘底 + 奶茶 ($16)   突然覺得啲芝士好鹹同埋啲蛋好漏   好辛苦先食得哂呢 ~

阿 Head 屋企有事要番 USA   要月尾先番公司   希望佢屋企無事啦 ~

晏晝同里奧大人翻兜豬扒飯   今次食香茅豬扒飯 + 粉包 + 炒麵 + 奶茶  ($36)   由於唔敢同里奧大人兩個人食一個餐   驚比人鬧   所以就去隔離粥店叫碟炒麵囉   諗住應該食得哂   但到最後都食唔哂啲飯呀 ~

食完又買個木瓜比平仔   因為木瓜實在好有益呢 ~

木瓜富含17種以上氨基酸及鈣、鐵等，還含有木瓜蛋白質 估又稱為萬壽果, 聽說多食可延年益壽, 因木瓜所含酵素近似人體生長激素，多吃可令人保持青春。另外, 木瓜所含的蛋白分解酵素，有助分解蛋白質和澱粉質，對消化系統大有裨益

木瓜是一種很好的營養品，也是良好的食療果品。果實有健脾胃、助消化、通兩便、清暑解渴、解酒毒、降血壓、解毒消腫、通乳、驅蟲等功效。用於食治消化不良、胃炎胃痛、十二指腸潰瘍、心脘痛、高血壓、壞血病、產婦乳汁少、小便不利、大便不通。

木瓜，生吃能紓緩咽喉不適，對感冒咳痰、便秘、慢性氣管炎等仍有幫助。食療方面，用熟木瓜和柿餅加水煎服，可治氣喘性咳嗽；以熟木瓜去皮，蒸熟後加蜜糖，可治肺燥咳嗽；用生木瓜絞汁或曬乾研粉，可驅蟲; 此外, 木瓜富含維生素C，其含量是蘋果的48倍，有清除體內毒素的作用

據現代藥理學研究，其功效如下：

1﹒ 果實具有強心作用。

2﹒木瓜蛋白能幫助蛋白質消化，可用於慢性消化不良、胃炎。

3﹒未成熟果漿汁對於炭疽病灶中能消化損壞組織，而健康組織則不受影響。

4﹒蛋白水溶液能溶解小血塊，並能溶解黏稠膿物，可用於壞死組織創傷、慢性中耳炎等治療；並有明顯抗原及抗凝血作用。

5﹒其蛋白質有抗金黃色葡萄球菌、大腸桿菌、綠膿桿菌、副痢疾桿菌等作用。

6﹒乳汁能殺滅阿米巴原蟲及蛔蟲。乳汁外用擦治濕疹、癬等皮膚病效果良好。

7﹒番木瓜鹼具有抗淋巴性白血病細胞的強烈抗癌活性，及抗淋巴性白血病的腫瘤細胞活性。

8﹒用番木瓜擦臉、洗手可去除蛋白質、油質積留污穢，是一種良好的皮膚清潔劑。

【宜 忌】

番木瓜性味甘平、微寒、無毒，大部分的人都適合食用，並且有益健康。惟有體質虛弱及脾胃虛寒的人，不要經過冰冷後食用較好。授乳期間的婦女食用可增加乳量。常年消瘦消化不良的人，不妨嘗試多食木瓜，可以豐腴一些。
P.S. 想美白的女士就請勿食太多木瓜, 紅蘿蔔等深色的食物, 因為經常食用皮膚會變得黃黃的。

薑蔥鯇魚 + 節瓜江瑤柱排骨湯飯 + 黑木耳紅棗茶 ( AUG-2008 )

尋日番到屋企熨埋衫又已經兩點幾   係時候出動食 Tea 喇 ~

由於奧運關係   對住電視機嘅卡位都 Full 哂   無緊要啦   一路食一路睇一路等囉   好彩最後我都坐到對住電視位   仲睇到郭晶晶添   真係好難得 因為我好想睇呢 ~

見到國家隊衛冕金牌   覺得佢哋付出好大努力   終於有成績   好令人感動呀 ~

食完又要行下   所以去街市買 3 條細節瓜 ($5) + 蔥 ($2)   然後再去買 Scanncer   因為有 Discount ~

我今次有意外收鑊   就係里奧大人送部好似 CANON 80IS  比我呀   因為今次其一係抵 (有 95 折同埋加大到 4g 卡)   其二係里奧大人話觀察過我   話見我咩都影   好似好認真咁玩   所以買比我喎   不過就要星期四先有貨囉   唔緊要啦   等都無所謂嘅   今次真係好多謝里奧大人呀 ~

是日晚餐 - 薑蔥鯇魚 + 節瓜江瑤柱排骨湯飯

薑蔥鯇魚 - 今次記得放大量薑   所以覺得唔腥 ~

節瓜江瑤柱排骨湯飯 - 因為煮得 1 碗飯   但又想里奧大人食哂啲節瓜   所以扮湯飯   咁佢先肯食哂   唔係又嘥咗啲瓜㗎喇   都唔明煮埋比你食都嫌 3 嫌 4 呢   煮飯好辛苦㗎   你知嘛   會諗到頭都爆㗎 ~

無得睇獎門人   所以唔駛咁急洗碗   又可以早啲敷 Mask 呢 ~

不過 10 點 15 分 做 Basketball (中國對美國)   做到 11 點幾   又要 12 點先瞓覺呀 ~

~~~~

今朝好眼瞓   又毛毛雨   個人勁 Down ~

咁早餐就食豐富啲啦   食沙爹牛肉蛋公仔麵 + 咖啡 ($19)   食完頂到上心口 ~

番到菇場又忙   星期一忙真係好辛苦   哈哈 ~

晏晝又落毛毛雨   所以同里奧大人食咖哩豬扒飯 +  春卷 + 蒜蓉包 + 涷華田 ($46)   又係飽到上心口呢 ~

譚仔雲南米線 @ 佐敦 ( AUG-2008 )

尋日見完工人同睇傢俬已經搞到 5 點幾   所以又要撲去探奶奶喇   好在近火車站   唔係又要行到身水身汗㗎喇 ~

之前奶奶喺 ICU 期間   姑奶見到一個 24歲嘅男仔 (平仔) 全身插喉   之後再了解到平仔身世都幾可憐   媽媽之前過身   爸爸 70 幾歲喺老人院   無親戚喺香港   最親嘅就係媽媽嘅一位女性朋友 (亞姨)   唔記得醫院點聯絡到阿姨   呢個阿姨係由細睇到平仔大嘅   當契仔咁看待呢   但因為佢唔知道平仔親戚啲電話號碼   所以就開平仔嘅手提電話逐個打   搵人睇佢   因為平仔情況唔理想   有生命危險 ~

其實平仔入院係因為喉嚨腫哂 (腫起一嚿)   抖唔到條入院   詳細情況我唔記得係點   但只知道佢其係患有淋巴癌   之後全身插喉   講唔到說話   醫生話如果藥物對平仔無靠的話便無得救   但如果藥物有效就可以拆喉   真的感謝神   因為我哋一齊有聲無聲咁為平仔祈禱   求神保守看顧呢位年青人呀   神蹟呀   因為平仔可以拆喉呀  真的感謝神垂聽我哋嘅禱告呀 ~

之後里奧大人同姑奶都會探平仔   因為讓平仔知道   唔係得佢一個人   而係有好多人關心佢呢 ~

咁我尋晚就係第一次探平仔   第一感覺係好瘦好瘦   我一隻腳重粗過佢兩隻腳   睇見真係好心痛   我同佢傾偈   知佢十幾日無大便   所以個肚谷住唔舒服   所以我同佢搓肚   其實我好開心   因為佢對我唔抗拒   可能係我熱情嘅笑容感動佢啦   我唔識講嘢   但我就同佢講   咩都好   總之個人要開開心心   積極面對    因為我哋個個都支持你㗎   唔好成日講回報   只要可以健健康康   積極面對人生就係對我哋好好嘅回報㗎喇 ~

見完平仔之後   我覺得自己好幸福好幸福   生命無常   好好珍惜眼前人呢 ~

探完佢哋都 8 點幾   所以順便同姑奶兩公婆喺佐敦食嘢 lu ~

去譚仔雲南米線   但好難食呀   個湯底好酸   超唔掂呀   不過個土匪雞翼就好好食   如果唔係就慘喇 ~

好黑仔呀   今日除咗早餐之外   食親咩都唔好食呢 ~

~~~~

今日又無番教會喇   因為太需要休息呢 ~

同里奧大人食點心   要咩無咩   所以求其食牛肉腸 + 燒賣 + 古法蒸蘿蔔糕 就算喇 ~

食完早餐去大眾買書   終於的起心肝買套 "我們的低能婚禮" 呀   之後再行百佳買鯇魚 ($17) 同排骨 ($13) 就番屋企喇 ~

Pizza Hut ( AUG-2008 )

尋晚放工唔駛煮飯   因為同里奧大人同兩個兒甥女食 Pizza   所以我可以他他條條咁番屋企   仲可以行街買嘢   好耐未試過呀 ~

番到屋企睇咗陣電視就走喇   咁啱睇到打鼓果場   真係好勁呀   又齊喎   真係好想留低繼續睇   但因為驚好多人等位   所以都要走喇 ~

去到 Pizza Hut   真係奇景呀   因為無人排隊等位呀   比着平時有成廿人排㗎   仲有喎   得幾枱人堂食咋   因為好多人留喺屋企睇奧運開幕呢 ~

一坐低 Waiter 話食環球 Pizza 批套餐   如果有 Compass Visa 就有 Promo   1 個環球 Pizza 批 + 2 客湯 + 2 客汽水 + 1 客小食   只需 $198   咁所以叫個環球批 A 試下   之後在加個烤雞籃 + 海鮮寬條麵    Pizza Hut 水準下跌咗成千倍呀   個環球批唔熱   同埋碟田螺同個寬麵都好燶   但佢哋話係咁喎   點搞呀   無咩人食都咁樣   多人食咪唔掂   不過埋單 $333 又幾抵嘅   因為實在太飽喇 ~

~~~~

今朝勁開心啦   因為同里奧大人都係 Off 呀   所以瞓到 10 點就起身食早餐喇 ~

之後番屋企執下屋就出發去沙田   因為約咗工人見面同睇傢俬呀   好在里奧大人賓姑奶揸車接我哋   唔係就要趕頭趕命仆出去㗎喇 ~

求其扮星州炒米 + 炒脆肉瓜 ( AUG-2008 )

唔想食飯   又唔想出街食   最好就係煮米粉~

所以放工去街市買叉燒 ($18) + 脆肉瓜 ($5) + 韮王 ($2) + 4 個芒果 ($15) 就番屋企喇 ~

又要等里奧大人   所以做啲事前功夫先   就係將叉燒同韮王剪成條狀   蒜頭切粒   紅蔥頭切片   之後就熨衫洗衫   仲辛苦過番工呢 ~

是日晚餐 -  星州炒米 + 炒脆肉瓜

星州炒米 -  第一次整   不過味道唔錯 ~

炒脆肉瓜 -  唔想又用蒜頭豆豉   所以用黑椒黎整   不過唔多覺有黑椒味喎 ~

 

整埋哂所有嘢   無無聊聊睇下啲芒果   個樣好古怪呀   無啦啦有粒 "的" 嘅 ~

~~~~

今朝好大雨   好彩無塞車   唔係就真係慘㗎喇 ~

唔係咁餓   所以早餐食奶油多 + 奶茶 ($13) ~

番到菇場要 Pack File   所以勁忙呀 ~

晏晝帶飯   因為里奧大人要約見醫生傾傾奶奶情況呢   一路食一路同冰姑 MSN   真係好似同佢哋一齊食緊飯咁呢 ~

柱候煎雞翼 + 八爪魚卷 + 蒜頭豆豉煎玉子豆腐 + 瑤柱粟米湯 ( AUG-2008 )

尋日做完家務就嘆咯   睇完報紙再連續睇幾期嘅飲食男女   之後再睇波   睇完同里奧大人食 Tea   食米線   不過麻麻哋好食 ~

之後又番屋企 Hea 過   又係睇飲食男女同再睇波   其實頭先睇咗㗎喇   但因為場波係 "拜仁對國際米蘭"   所以我會睇完又睇   因為我勁鍾意佢哋嘅教練 Klinsmann 同摩連奴呀 ~

但里奧大人好驚我睇波   好似睇 2006 世界盃咁   我會同一場睇 4-5 次   有啲會睇 7-8 次   我無誇張㗎   因為我係為咗睇 Klinsmann 先睇咁多次   所以每逢有德國隊都會睇幾次   除咗輸咗嗰場   里奧大人睇到都驚   就連邊個入波邊個球員做嘅動作都睇到記得哂呀   所以里奧大人覺得我係一個黐黐哋嘅人呢   哈哈 ~

睇完波   又要回復心情煮飯喇 ~

是日晚餐 - 柱候煎雞翼 + 八爪魚卷 + 蒜頭豆豉煎玉子豆腐 + 瑤柱粟米湯

柱候煎雞翼 + 八爪魚卷 - 用柱候醬醃 3-4 個鐘   但都係唔點入味   下次都係醃一晚好啲 ~

蒜頭豆豉煎玉子豆腐 - 本來想蒸嘅   但唔想洗多樣嘢   所以煎香便算了   再加爆香咗嘅蒜頭豆豉一齊食都唔錯喎 ~

瑤柱粟米湯 - 見有時間   所以浸幾粒瑤柱   好飲好多呢 ~

難得 7 點可以食飯   難得 8 點半可以沖涼   難得 9 點可以食芝麻糊   難得 9 點半可以坐定定敷 Mask 睇家好月圓   真係好開心呀 ~

~~~~

今朝要番工喇   無咩落雨又幾好喎   落雨真係好醃悶呢 ~

早餐想食飽啲   所以食腿蛋治烘底 + 奶茶 ($16)   又加咗 一蚊喇 ~

晏晝里奧大人無啦啦要上大陸開會   所以我順理成章去媽咪屋企食 Lunch 喇 ~

XO 醬魚片炒米粉 + 蕃茄薯仔大眼雞魚湯 ( AUG-2008 )

突然好想食自己煮嘅住家飯   又唔想比人串串共話成日煮水餃福字麵   所以就算幾攰都堅持去街市買大眼雞魚 ($32) + 蕃茄薯仔 ($8) + 芹蒜 ($6) + 魚片 ($4) + 米粉 ($10)   買完即番屋企整喇 ~

里奧大人探奶奶   所以有時間熨埋衫先 Ready 晚餐喇 ~

是日晚餐 - XO醬魚片炒米粉 + 蕃茄薯仔魚湯

XO醬魚片炒米粉 - 魚片切條   芹蒜切粒   加 XO 醬同豉油同將所有材料同米粉炒勻上碟   因為太少 XO 醬   所以無咩味咁   要點余均益辣椒醬呀 ~

蕃茄薯仔魚湯 - 可能條大眼雞大條   所以啲湯超級清甜呀 ~

洗哂所有嘢就沖涼喇   因為想乾乾淨淨舒舒服服睇電視嘛 ~

~~~~

今朝電話響不停呀   原來打8 號風球 (北冕)   所以 5 點幾水姑打嚟話 8 號風球   6 點幾家姐打嚟   7 點幾姑奶同奶奶打嚟   8 點幾媽咪打嚟   個個驚我番工   不過唔講我真係可能會番工㗎喎   哈哈 ~

10 點就同里奧大人起身一齊食早餐呢   落到街又唔多似打風咁   但屋企樓下棵樹斷咗喎   所以個風都幾強勁下   打風基本上唔會有好多食肆開㗎喇   除咗連鎖店   所以諗都唔諗就去大家樂喇   超多人呀   里奧大人話一路排隊等   Cashier 就一路除早餐牌   無咩選擇   所以無可奈何食咗魚柳腸 + 奶茶 里奧大人就魚柳蛋 + 奶茶   因為好多食物已售罄   只係得魚柳   所以差唔多全個大家樂啲人都食魚柳呢 ~

之後同里奧大人去百佳買水餃就番屋企喇   估唔到又唔多人行喎 ~

難得有假期   所以順便拖地清潔洗手間喇   因為唔想到頂唔順先大清潔囉 ~

雖然要做家務   但唔駛番工呢個 Bonus 令到我做都做得開心過人呀 ~

8 號風球 (唔駛番工勁開心) ( AUG-2008 )

今日勁開心   因為 8 號風球唔駛番工呀 ~

元綠壽司 ( AUG-2008 )

尋日唔係咁舒服   所以番到屋企附近睇醫生   好在里奧大人特登早啲放工陪我食飯   如果唔係我又唔知等幾耐喇 ~ 唔知係咪因為放榜關係   所以好似好多人咁   平時唔駛等位   但今次都等咗 20 分鐘先有位 ~ 呢次食嘅嘢都差唔多   但今次想講就係佢啲牛油粟米勁鹹   我咁熱愛粟米都唔可以食埋餘下嘅 1/3 呢   因為實在鹹到頂唔順呀   埋單 $150   因為用元綠 Visa Card   所以有 Discount ~ 番到屋企好攰   咩都唔想做   所以睇下 "家好月圓"   唔知會唔會越嚟越好睇呢 ~ ~~~~ 今朝 1 號風球   唔知會唔會改 8 號呢   係就好喇   因為好想放假呀 ~ 早餐食奶油多 + 奶茶 ($13)   突然覺得塊多士乾爭爭好難食呢 ~ 晏晝同里奧大人去食粉麵   我食墨丸米   里奧大人食炸醬麵   但覺得啲豬肉好酸好乸喉   所以換咗牛腩撈麵   個師傅一路淥一路 "依依哦哦" 咁   不過我就聽唔到佢講咩   如果比我知佢講咩   我實會拉里奧大人走呀   好巴閉咩 ~ 出面好大風   但又唔大雨   咁唔知打唔打得成呢 ~ 想食壽司   所以揀咗元綠壽司   因為好近屋企嘛 ~