唯真上海麵 @ 佐敦 + 散步 ( SEP-2008 )

不得不感動   尋晚同里奧大人探完奶奶之後   里奧大人見到一個心儀已久嘅皮袋   但佢唔捨得買   係都要話 50 % Off 先肯買喎   但根本無可能   有 5% Discount 已經偷笑 ~

呢一刻我覺得里奧大人對我真係好好   因為佢送個 LV 比我時   話買就買   仲叫我多啲用   用爛再買好過唔用擺喺度   但佢自己呢   幾千就覺得好貴   唔捨得   又唔肯比我送喎 ~

不過唔緊要啦   就嚟到聖誕節   大把平嘢執   到時可能仲有其他選擇呢 ~

行行下里奧大人話好掛住椰汁大王   所以買完椰汁順便食晚飯 ~

里奧大人話有間 "Up Up Dup Dup" 嘅舖頭嘅煎餃巧巧食   所以就去試下   間舖頭喺佐敦某個小巴站隔離   舖頭名好似叫唯真   老喇   點記都記唔到係咩名   但印象中好似叫唯真囉 ~

食咗煎餃子 + 蔥油餅 + 豬扒粗炒 + 肉汁白菜   樣樣都熱計辣辣   脆卜卜   好正呢   又好味又飽肚價錢又平   埋單只係 $56 咋   笑爆咀 ~

不過唔知係咪熱氣   我食啲蔥油餅覺得好鹹   但里奧大人話一啲都唔覺鹹   之後仲慘   食咗少少炸豬扒之後就覺得個吸塵機好慶   好熱氣呀 ~

尋晚見落車附近就係平時跑步嘅地方附近   所以索性同里奧大人一齊散步當跑步   因為我唔想上屋企換衫   又上又落嘥時間呀 ~

~~~~

今朝天氣好清涼   好舒服呢   秋天來臨了 ~

又係好早番到公司附近   不過今朝無咩胃口   所以食花生醬多士 + 熱央 ($13) 就算 lu ~

邪邪邪   成日話無嘢   點知今日功好忙   得閒呢家嘢真係唔好亂講咯 ~

晏晝同里奧大人去下村興記食豬扒麵餐   唔食就無機會食㗎喇   因為好似就嚟要拆   佢哋又好似唔再做   所以我哋就作最後衝刺喇   個餐只係 $25   但就好豐富   食完真係頂到上喉嚨呀 ~

黑椒牛仔骨 + 節瓜粉絲貢丸煲 + 隔夜湯 + 跑步 ( SEP-2008 )

里奧大人快啲做完功課就好啦   唔駛成日都要喺屋企附近搵食   真係食到有啲驚 ~

基本上下午茶係好少食飯呢啲飽肚嘢   所以就去學利魚蛋粉   之前好想試呢間嘅魚蛋粉   但食落都係一般   有啲失望   不過唔試又唔心息喎 ~

呢排里奧大人成日不停咁講話要食多啲生果    所以買下買下又買咗成盤 ~

是日晚餐 - 黑椒牛仔骨 + 節瓜粉絲貢丸煲 + 隔夜湯

黑椒牛仔骨 - 唔知煮咩好   所以煮牛仔骨   因為超方便   只要用醃肉醬醃幾個鐘就搞掂   再加少少黑椒汁就可以煮成一碟好惹味嘅餸   勁呀 ~

節瓜粉絲貢丸煲 - 仲有剩 1 條節瓜   所以就煮呢個煲   因為我唔識煮有節瓜嘅餸 ~

隔夜湯 - 隔咗一晚   啲湯仲超甜呀 ~

尋晚 7 點食飯   所以有時間去跑步   跑咗半個鐘   流汗嘅感覺真係好舒服   好似排哂啲毒出嚟咁   超正呀 ~

~~~~

今朝早 5 分鐘起身   早 5 分鐘出門口   估唔到會早 20 分鐘就番到公司附近   不過我覺得最緊要係要早一晚拎定番工嘅衫   咁就唔駛嘥時間搵呢 ~

早餐食炸菜肉絲米粉配餐肉蛋 + 鴛鴦 ($18)   食完再行番公司   食完行下真係唔錯唔錯 ~

番到菇場呢   都係嗰句啦 ~

晏晝無比勁開心   因為同媽咪 里奧大人去美心皇宮飲茶呀   食咗潮州粉果  + 蒸蘿蔔糕 + 干蒸牛肉 + 奶皇包 + 叉燒包 + 杞子桂花糕 / 綠茶糯米磁 / 夏枯草凍糕   好飽呀 ~

茄汁蝦碌 + 粟米薑粒炒飯 + 南瓜粟米栗子豬展湯 ( 28-SEP-2008 )

難得老細 Off   里奧大人又 Off   所以尋日放工即走 lu ~

又係諗唔到食咩好   所以同里奧大人又去食酸辣米線喇 ~

食完就去街市買南瓜半個 ($7) + 超瘦粟米 4 條 ($5) + 栗子半磅 ($4)   之後再去超市買米同豬展就番屋企 ~

呢排成日番到屋企都唔願郁   應該同肥有關呢 ~

是日晚餐 - 茄汁蝦碌 + 粟米薑粒炒飯 + 南瓜粟米栗子豬展湯

茄汁蝦碌 - 第一次整咋   係用雪藏蝦整嘅   整埋呢次應該要隔好耐好耐先再整   因為要剪蝦鬚啲感覺好核突   之後再剪埋少少蝦頭部份   見到對眼好恐怖   最慘係整完洗幾次手都有陣腥味呀   今次係用茄汁喼汁蒜粒煮汁   好正呢   不過里奧大人話食唔到茄汁味   只食到蒜頭味喎 ~

 
粟米薑粒炒飯 - 呢個飯係參考小公主嘅   再加埋薑粒一齊炒   又係好正呢 ~

 
南瓜粟米栗子豬展湯 - 本來想拻粟米粒   因為好細粒   所以好難拻   就咁一條條算喇   呢個湯好多南瓜蓉   所以又係好正呢 ~

今餐好滿意   因為我覺得樣樣我都好有心機整   所以樣樣都好好食呀 ~

今朝終於可以番教會喇   去到教會附近食早餐   距離崇拜仲有好多時間   所以可以好好享受假期嘅早餐呢 ~

崇拜之後又走去街市逛逛   因為街市有冷氣又乾淨   所以一路行會一路買嘢   今次買咗 Pack 急凍帶子 + 橙 + 獨子蒜 + 冰糖 + 蜜棗   其實屋企附近都有呢啲嘢買   但就無咁靚囉   所以次次都會買定啲番屋企   以備不時之需 ~

經過一間買椰汁嘅舖頭 講到好新鮮好好味咁   買樽試下   點知一啲都唔好飲   成口碎冰   同佐敦間椰汁大王差好幾百倍呀 ~

節瓜鹹蛋碎豬肉湯 ( SEP-2009 )

尋日比里奧大人激到死死下   因為原來佢夜晚會番奶奶屋企食飯   早響嘛   等我仲前晚買定餸添 ~

我又唔多舒服   所以都費事去呀   同埋又有啲免治豬肉喺雪櫃   真係唔想再白白浪費   所以尋晚自己番屋企食囉 ~

是日懶餐 - 節瓜鹹蛋碎豬肉湯

節瓜鹹蛋碎豬肉湯 - 本來想整湯飯   但 2 條節瓜都幾飽肚   所以都係滾湯算喇   今次啲湯好油   因為用咗免治豬肉   飲剩幾啖都真係飲唔落   實在太油喇 ~

就咁飲湯好似好悶咁   所以食下芝士圈   不過唔好食   等我仲買咗 2 包添 ~

~~~~

今朝又係 6 點半起身   因為約咗媽咪 朱朱食早餐   估唔到家姐都黎埋   好開心呢 ~

番到菇場勁 Free   因為老細 Off   真係可以為所欲為呀 ~

魚香茄子煲 ( SEP-2008 )

尋日 2 點幾食咗粒感冒 Panadol   點知放工坐巴士時先覺得晏瞓   好在瞓到屋企附近扎醒   雖然仲想瞓   但就迫自己要爭大眼等落車   唔夠瞓要起身真係勁想嘔呀 ~

一落車仲衰   踩到唔知咩嘢   差啲向後跣落地   好在下盤穩健   唔係就撻落地就肉酸到爆㗎喇   不過我覺得跣親都勁樣衰囉 ~

尋晚只係去超市買豬肉 + 生果 + 零食就番屋企 lu ~

是日懶餐 - 魚香茄子煲

魚香茄子煲 - 超簡易   材料只係 2 條茄子 + 免治豬肉 + 1 小件鹹魚 + 魚香茄子醬料包   味道同出面食嘅一樣㗎   我再加埋鹹魚   超正呢   出面嘅魚香茄子好油   但我呢個就唔會好油  不過賣相就樣衰啲囉 ~

呢個餸我用咗 2 條茄子 + 3 湯匙嘅免治豬肉黎整   基本上呢個餸嘅份量兩個食係唔算多    但食剩 5 - 6 條茄子嘅時候   我叫里奧大人食埋   因為食多啲瓜菜有益   點知話好飽   我真係火都嚟   因為碗飯唔係多   其實 1 碗都唔夠   碟餸又唔係特別大   飽咩啫 ~

又話要我煮炒少啲   大佬   得一個餸咋   唔係好多啫   今次份量又唔係好大   我最憎佢就係一叫佢食蔬菜就成日叫我煮少啲   所以我好慶話   咁我唔煮喇   出街食唔好煩呀   麻麻煩煩咁   又唔知諗煮咩幾咁辛苦喎 ~

~~~~

今朝超眼瞓呀   星期五應該好開心先係家嘛   但點解會攰到無哂心機㗎 ~

早餐食鹹牛肉蛋治 + 奶茶 ($16)   鹹牛肉超少   簡直唔覺佢嘅存在   只係好似食緊蛋治咁   再加上自己又唔記得要烘底   所以仲覺得唔好食 ~

番到菇場又係坐到收工   陰公咯 ~

里奧大人要同同事食 Farewell 呢   所以我買粉果燒賣炒麵番公司食 lu   去買嘢食嘅時候見到里奧大人   企埋一邊問佢去邊度食 Lunch 呀   啲感覺好搞笑   好似見到啲舊同事咁   哈哈 ~

東亞擠提謠傳 + 板長壽司 ( SEP-2008 )

帆立貝壽司 / 芥辣八爪魚軍艦 / 三文魚子軍艦 / 醋鯖魚壽司 / 蝦天婦羅壽司 / 海膽壽司 / 火灸鰻魚壽司 / 火灸醋鯖魚壽司 /  油甘魚壽司 / 加洲卷 / 三文魚刺身 / 燒三文魚頭 /  炸軟殼蟹 / 綠茶冷麵

尋日有消息話東亞銀行擠提喎   所以突然好多人去銀行拎錢   我媽咪都唔例外 ~

本來尋晚係學瑜珈   但媽咪要我放工去接力   所以同家姐都無學   幫手接力呀 ~

我去到有好多人排隊   排到去廟嗰度   好在媽咪排十幾就比較易搵   因為計計埋埋 At least 有 300 人排隊呀   超勁多人呀 ~

媽咪下晝 1 點半去排隊   點知等到 5 點半條龍都未郁過   好在我媽咪排十幾咋   一路等嘅時候   警察話押款車已經嚟緊   而職員又話排籌   可以留番聽日拎錢   但就好多人都唔拎籌   要繼續排   直至拎到錢為止喎 ~

原來晏晝無咁多人排   媽咪係排最後一個㗎   點知啲人見到有人排隊就即刻打電話通知人   有啲就見人排即刻排再打電話   所以之後就越嚟越多人喇 ~

雖然 "金管局 及財政司 司長曾俊華 已經了解情況，並掌握充分資料。本港銀行體制健全，呼籲市民毋須擔心。財政司司長曾俊華仍重申，本港的銀行體系健全，市民無需為謠言感到恐慌。東亞銀行財政穩健，資金流充足，足夠應付客戶的需要，暫時未需要金管局的協助，一旦有需要，金管局也會提供資金，不會袖手旁觀。"   但啲人都係唔太相信呢 ~

但又唔怪得佢哋要拎哂錢先走   因為排隊好多都係老人家   血汗錢嚟嘛   雖然大銀行唔駛驚   但佢哋個心好亂   唔驚就假   我朋友話見到有個阿婆一路等一路喊添呀 ~

終於 6 點 45 分左右可以入銀行登記   銀行限人數   所以每次只可以 10 個持有戶口嘅人入去   等到 8 點幾   終於見到有錢送嚟   所以 9 點幾就可以拎完錢走人 lu ~

尋日有警察維持秩序   所以秩序非常良好   不過其實要喺咁嘅情況下維持秩序得好好就真係有啲難度   因為吋人好恐慌   發哂茅咁   最慘係有啲人排得耐又鼓譟   就會鬧警察點做嘢   咁耐都唔比人入咁嗰啲呢   但其實又唔關警察事   鬧佢哋做咩啫   警察只係喺度維持秩序   入幾多人都係銀行話事   鬧人都唔講理由嘅   討厭到震   最憎呢啲人   因為呢啲人一出聲   之後會有 9 百幾人和應   好討厭呢 ~

尋晚同媽咪 家姐等到勁肚餓   所以拿拿聲去板長食壽司   太肚餓喇   所以求其咩都叫啲   最緊要快呀 ~

10 點幾先食完   所以同媽味一齊番屋企   橫掂我帶咗衫   所有喺媽咪屋企過夜 lu ~

~~~~

今朝 6 點 50 分起身   同媽咪 朱朱一齊食早餐   無咩胃口呢   不過都要食   食五香肉丁公仔麵 + 凍鴛鴦咁囉 ~

番到菇場有少少嘢做   所以啲 時間過得好慢好慢好慢好慢 ~

里奧大人上咗大陸   咁晏晝同大食表妹去 Delifrance 食 Lunch   樣樣都唔好食嘅   下次唔會再去食 lu ~

元綠壽司 + 8 號風球 (黑格比) ( SEP-2008 )

尋日講咗話 6 點前發掛 8 號風球   但公司高層無反應   眼見朋友走清光   里奧大人又一早番到屋企   真係好無癮呢   真係無哂 Mood   想我做嘢都幾難呀   好在我都有卡姑陪我 M 到放工咋   如果唔係覺得自己好似棄嬰咁呀 ~

放工唔大雨   但就超大風   不過喺街度又唔係話特別多人   我估人哋一早放哂番屋企啦 ~

因為驚塞車   同埋唔知要等幾多架巴士先上到車   所以穩陣啲搭地鐵   火車再轉接駁巴士番屋企   轉到頭暈兼腳軟 ~

打比里奧大人   佢話唔好煮喎   驚我辛苦咁話   但我仲有醃咗嘅豬肉   佢話算啦   幾蚊唔好要啦   去元綠食啦 ~

雖然覺得好浪費   但見佢盛意全全   所以就去元祿食壽司喇 ~

去度得兩個人   又得幾碟壽司喺度轉轉共   好似作收工咁   但問啲 Staff 又話唔係   所以就安心坐低食嘢喇 ~

今次唔係食好多   因為我無咩胃口   但今次就好抵   因為有 2 張 78 折 Coupon   咁下次食又可以平啲喇 ~

今次 8 號風球對我心情無咩影響   唔會話好興奮   因為明知第日要番工   點解咁早吹到嚟呀 ~

以前大埔墟火車站嘅隧道有檔砵仔糕好好味   又多紅豆又平   不過自從火車站裝修之後就唔見咯   但打風就實會見到佢   可能唔會比人捉啩   所以里奧大人尋日見到就即刻買 3 個 ($10) 番屋企   煙煙韌韌勁好味呀 ~

~~~~

今朝出門口天氣又唔係好差   只係落毛毛雨   仲要係可以唔駛拎遮嗰隻喎 ~

 
但經過屋企附近   見到棵樹斷咗   咁即係都幾大風力下   但尋晚真係聽唔到風聲喎   同上次鸚鵡差好遠喎   可能打唔正我嗰邊啦 ~

早餐又食芝腿菠蘿包 + 凍鴛鴦 ($17)   因為要快   我唔想成日咁遲番公司呀 ~

番到菇場超眼瞓   後尾先醒起自己頭先食咗傷風感冒 Panadol   所以好眼瞓   依家改咗包裝    都幾方便   2 粒一包   但就唔係好環保咁囉 ~

中下中下又中到 Lunch Time   唔想行太遠   所以同里奧大人去最近公司嘅茶餐廳食嘢   落大雨都唔驚啦 ~

菜脯肉粒 + 扮蝦仁炒飯 + 蒜蓉蒸茄子 ( SEP-2008 )

尋晚去到街市   個個買菜阿姐都話打風呀   平啲賣咁   都唔知係唔係真係打得成呢   不過就真係好焗   勁辛苦囉 ~

我都驚打風無菜買   所以就買咗 1 份節瓜 ($5) + 1 份茄子 ($5)   之後再去超市買豬肉 ($17) 就番屋企 lu ~

番到屋企洗個臉   坐一陣就 Ready 晚餐喇 ~

是日晚餐 - 菜脯肉粒 + 扮蝦仁炒飯 + 蒜蓉蒸茄子

菜脯肉粒 - 今次懶   所以無浸菜脯   鹹到震   本來想整椒醬肉   但唔記得買豆腐乾   所以求其用磨豉醬炒就算喇

扮蝦仁炒飯 - 因為菜脯粒已經好鹹   所以炒飯唔會再落老抽同生抽   但望住啲飯   白雪雪勁單調   所以加咗幾隻急凍蝦仁同雞蛋同蔥花   剎那間變成一碟賣相幾好睇嘅炒飯   好有滿足感呢 ~

蒜蓉蒸茄子 - 茄子大大條   唔食對唔住自己   所以求其用蒜蓉 + 豉油蒸就算喇   清清哋唔錯 ~

天氣太焗   一心諗住食完飯跑步   但里奧大人話太焗唔好跑步喎   所以都唔跑喇 ~

~~~~

今朝好在無落雨   仲有啲陽光添   又唔似作打風喎 ~

早餐食吉列魚柳餐 + 熱奶茶 ($21)   依家飲奶茶有啲反胃   我只係飲半杯   但唔飲又眼瞓   飲咖啡仲反得犀利   所以好耐無飲   唔通第時要飲檸茶提神   我怕削胃呀 ~

番到菇場個個都話會 8 號風球   但上網睇話應該黃昏前掛   係就快啲啦   放早兩個鐘都好嘛 ~

晏晝同里奧大人去最近公司嘅茶餐廳食 Lunch   因為里奧大人食完要上深圳攞嘢呀   所以近近哋算喇 ~

韭菜豬肉雲吞 + 隔夜湯 ( SEP-2008 )

尋日成 12 點先食完早餐   12 點幾番到屋企   拖下地執下嘢又已經 2 點幾喇 ~

又即係時候食 Tea   又係因為要睇家好月圓大結局   所以一定要好好安排啲時間   咁就可以睇得安安樂樂喇 ~

大熱天時   真係唔想食飯   所以又去食粉麵呢 ~

食完買雲吞皮 ($3) 就番屋企喇   因為要煲雪梨水   成日覺得煲完出嚟啲雪梨好鬼嘥   但又唔想食喎   因為超級腍   口感好核突呢 ~

是日懶餐 - 韭菜豬肉雲吞 + 隔夜湯

韭菜豬肉餃 - 用雲吞皮無咁飽   但都係覺得啲肉好 "鞋"   都唔知點樣先整得好   湯底唔想用雞粉   所以用 1 湯匙冬菜做湯底   仲諗住好鹹   點知一 啲味都無嘅   激死人喇 ~

隔夜湯 - 無用隔油壺   所以好計油   不過都好好飲喎 ~

又係拿拿聲洗碗就沖涼再做 Mask   之後就坐定定睇家好月圓大結果喇   個結局有啲同雜誌講嘅有出入   咁都好   有啲驚喜   最緊要係 Happy Ending 嘛 ~

~~~~

今朝心情唔錯   不過鼻重重似作感冒呢   麻鬼煩 ~

早餐食芝蛋治烘底 + 熱奶茶 ($16)   都係覺得飲熱奶茶好味啲   因為呢幾排成日飲凍嘢   覺得對身體唔係咁好咁嘅 ~

番到菇場有嘢做   做完又拿拿聲 M 喇   如果唔係成日會好難過呢 ~

晏晝同里奧大人食車仔麵  ($43)   我覺得自己感冒   所以食多辣   因為啲辣汁係有薑蓉嘅   食完個人真係舒服好多喎   唔知係咪同啲薑係驅風寒有關呢   但里奧大人就慘啲   少少辣都話辣   真係吖 ~

如果兩個人食嘢口味唔夾真係幾慘   因為自己鍾意食嘅嘢就肯定想同自己鍾意嘅人一齊食   但奈何對方又唔鍾意   都咪話唔慘呢 ~

香煎鯪魚餅 + 青紅蘿蔔粟米豬骨湯 ( SEP-2008 )

尋日唔夠瞓   又作感冒   所以個人唔多舒服   放工即走   番屋企同里奧大人食 Lunch   無咩胃口   所以要食酸辣米線 ~

我個人好古怪   一諗到想做就做   唔做會覺得周身唔舒服   點解咁講   因為一早已經諗住煮飯煲湯   但個人無厘精神同胃口   所以想煮又唔想煮之間   但食完行陣又無咩事喎   所以都係照原定計劃進行喇 ~

自己去百佳   因為要退番罐金寶忌廉湯   退番 $7.9   咁又幾好喎   好似無啦啦多幾蚊駛咁   之後買豬骨 ($28) + 免治豬肉 ($15) + 1 包急凍即食蝦 ($88)   因為買滿 $50 有 9 折   呢間超級廣場都幾好   耐唔耐會有呢個 Promotion   呢個時勢   慳得幾多得幾多啦 ~

買完再去街市買鯪魚肉 ($6) + 紅/青蘿白 + 粟米 ($17) 就番屋企喇 ~

行一轉街市搞到成身汗   沖完涼先有心機整嘢 ~

因為 8 點半做家好月圓   所以拿拿聲煲湯   之後又忍唔住熨衫   攰到黐線   但又唔想留番第日做   因為發覺自己惰性越嚟越犀利呢 ~

是日懶餐 - 香煎鯪魚餅 +  青紅蘿蔔粟米豬骨湯

香煎鯪魚餅 - 太攰喇   所以無加臘腸同東菇撈埋一齊醃   但煎嘅時候加少少黑椒   咁就無咁腥   同埋辣辣哋幾開胃呢 ~

青紅蘿蔔粟米豬骨湯 - 太攰喇   所以唔拻粟米   原來唔拻粟米真係慳咗好多時間㗎   所以第時都係一碌碌粟米咁算 lu   無買菜   要連 "渣" 都食埋呀 ~

食完拿拿聲洗碗就沖涼   咁就可以他他條條睇家好月圓喇 ~

~~~~

今朝無番教會   點知瞓到 11 點半   所以只可以食燒賣腸粉 + 炒麵做早餐   其實我唔係咁鍾意瞓到咁晏   除非唔舒服   如果唔係好似好嘥時間咁   因為我覺得星期日啲時間過得勁快呀 ~

食完同里奧大人買生果   買香蕉 + 木瓜 + 西瓜 + 鴨梨   難得里奧大人喺度   所以買定多啲生果   因為生果好重呢 ~

住家飯 @ 奶奶屋企 ( SEP-2008 )

尋日真係苦過 Di Di   朝早攬住鬧鐘唔願起身都知衰   我平時唔會懶床   唔舒服先會咁做炸 ~

早餐飲奶茶都唔覺精神   已經 Feel 到應該作病   頭又少少痛喎   但都接受到   點知放工仲痛得犀利   但到忍住唔食 Panadol   因為食得太多 Panadol 好傷肝腎 ~

奶奶前日出院   所以放工同里奧大人去奶奶屋企食飯   但里奧大人未咁快收工   所以我去媽咪屋企坐陣   之後再 Join 里奧大人去奶奶屋企 ~

去到奶奶屋企就差唔多開飯 lu   但我個頭已經痛到爆   所以都無咩心機食   之後頂唔順   坐到 9 點就番屋企喇   最後喺等巴士番屋企期間頂唔順都係要食 Panadol   因為食完可以坐車瞓下舒服啲 ~

番到屋企即沖涼   諗住瞓覺   但瞓唔到   所以 11 點幾先瞓 ~

~~~~

今朝 6 點半起身   因為同媽咪 朱朱食早餐   咁早搭車啲感覺真係好似去緊旅行咁   因為去親旅行   都係未瞓醒就已經坐緊旅遊巴出發去玩   好攰呢 ~

但一見到朱朱   我就會好開心   所以攰啲都係值得嘅 ~

食完又上媽咪屋企坐陣   就要番菇場喇 ~ 

茄汁海鮮焗天使麵 + 蒜蓉包 + 粟米湯

我覺得自己都算係一個性格樂天嘅人   但我又會為一啲事會唔開心幾日喎   咁都唔知算唔算係樂天呢 ~

我個人好怪   憎人會憎好耐   就算做一啲令我感動嘅嘢   以為我會感動   我都覺得會係好假   我係 Feel 到的   妳呃到所有人   但呃唔到我   講真   我觀察人都幾準   我係觀察人好耐先會講出黎   唔會單單為一件事而講   所以唔好以為做小小嘢可以氹到人   妄想啦   知妳為人係點   所以唔想同妳斤斤計較先費事話妳咋   做人最緊要問心   拎個心出嚟做人   唔好下下靠表面   又唔知道係人都知妳假喎   講起都嘔心呀 ~

我要多謝 Blog 友   冰姑同卡姑   聽我日日係咁呻   知我好易發火   又會安慰我   我都好開心喺虛擬嘅網絡世界可以識到佢哋   仲會日日 MSN   小公主都會 M   但佢好忙   唔敢煩佢   驚比佢鬧     講真   唔同佢哋 M 真係有啲唔慣   因為同佢哋 M 已經成為生命中好重要嘅一部份   豬豬妹 妳都 M 啦   一齊 M 方便好多㗎   咁我哋可以日日見面嘛 ~

我講嘅係真心話   同佢哋 M 真係好開心   所以我番工都有原動力㗎 ~

尋晚放工好想整蒜蓉包   所以去 Panash 買咗個細法包 ($6.5) 就番屋企   其他就唔駛買   因為煮嘅嘢唔係急凍就係罐頭   唔駛特登去街市買呢 ~

是日晚餐 - 茄汁海鮮焗天使麵 + 蒜蓉包 + 粟米湯

茄汁海鮮焗天使麵 - 我覺得自己整嘅天使麵啲口感好難食   所以我食咗好少   但里奧大人就話好食囉   梗係啦   難得我煮   唔好食都要話好啦   所以對佢嘅說話有所保留 ~

 
蒜蓉包 - 焗到脆卜卜   勁好味   但我覺得太多牛油   好漏呢   最慘係里奧大人話喉嚨唔舒服   一件都無食   一個人食咁多件   我開始有啲怕 ~

粟米湯 - 清清哋   加蛋花算喇 ~

食完洗碗   又要熨衫   真係好攰 ~

~~~~

今朝無啦啦落大雨   但落完雨都係好熱囉 ~

Happy Friday   所以早餐食好啲   食吉列魚柳拼火腿蛋多士 + 熱奶茶 ($20)   超飽   但食得超開心 ~

番到菇場作頭痛   無哂心機 ~

早餐食得太飽   所以晏晝同里奧大人去食粉麵   食墨魚丸河 + 牛腩麵 + 凍鴛鴦 ($47)   食嘅時候加辣椒油加醋   勁好味呢 ~

住家麵 @ 媽咪屋企 + 瑜珈 ( SEP-2008 )

又到每星期最開心嘅日子 lu   因為係同家姐 CC 做瑜珈   然後就番媽咪屋企食飯喇 ~

天氣太熱   同埋做完運動唔想食飯   所以媽咪只係煲湯 + 灣仔水餃湯烏冬   用豬肉  豬潤  蝦做湯底   個湯好甜   好好味呀   如果我自己煮就只會落味精粉咋 ~

食到個肚脹卜卜   又唔願郁   真係想唔肥都難呀 ~

同媽咪 家姐一齊睇 "家好月圓"   我覺得多人睇好睇好多   因為番到屋企得自己一個人睇好悶呢   我要好大聲話 "嘩   邊個邊個做得好好呀"   咁先引到里奧大人出嚟睇少少咋 ~

~~~~

今朝 7 點起身   同媽咪 朱朱一齊食早餐   不過個天陰陰作落雨   搞到個人都無咩心機咁 ~

番到菇場要 Pack File   熱到我呢   好在早餐食得飽   唔係肯定魂斷菇場呀 ~

晏晝同里奧大人去美心食 Lunch   Share 食芙蓉蛋飯 + 凍奶茶   我好憎食芙蓉蛋   我覺得個樣好似嘔吐物   所以食到我巧辛苦   好在無咩胃口   咁里奧大人可以食哂去嘛 ~

食完去食雪糕   因為家姐比咗張 Coupon   10 月到期   再唔食真係唔記得佢嘅存在㗎喇   妳知女人啲銀包有好多嘢家嘛 ~

尋晚好煩   睇完家好諗住瞓覺   點知媽咪無啦啦喊住問係咪已經安裝咗平安鐘   嚇到我成身汗   以為媽咪個心口唔舒服   原來係家姐遲啲由將軍澳搬入元朗   所以驚有事無人理喎   其實就算家姐搬入元朗   家姐都會隔晚番媽咪屋企食飯   又可以過夜   又唔係搬咗唔番嚟見妳   移民咩   同埋仲有我嘛   我都可以耐唔耐出嚟食飯瞓覺家嘛   怕咩喎   又唔係話唔理佢   真係吖 ~ 

老人家係咁   見仔女鍾意就唔會講自己感受   但唔講又點知喎   家姐咁錫媽咪   如果媽咪唔想   家姐必定唔會咁做家嘛 ~

不過又難怪媽咪唔開心嘅   我住大埔咁遠   點知家姐仲遠   一下子好似兩個都走哂咁   但又唔想我哋唔開心喎   所以咪唔敢講囉 ~

不過依家唔駛煩喇   因為同里奧大人決定年底搬番出市區喇 ~

車仔麵 ( SEP-2008 )

尋日心情勁唔好   所以都無咩心機做嘢   仍都好彩無咩嘢做囉 ~

放工同里奧大人探奶奶   之後就番屋企附近食車仔麵 就算喇    其實食車仔麵好幾好   話哂有菜食嘛 ~

番到屋企就開心喇   因為睇到郭躍比賽   自從奧運之後   我呢排好鍾意郭躍   塊臉圓碌碌   眼仔細  細好得意呀   同埋好欣賞佢嘅毅力   我好鍾意睇佢開波㗎   我覺得個動作好靚呀   同埋又好鍾意睇佢滴汗㗎   真係好似水咁流   好得意呀   所以錄咗之後又要 At least 睇 3 次呀   因為第 1 次係睇下佢啲汗   第 2 次係睇下佢個樣   第 3 次係睇下佢啲技術 ~

唔知係咪掹完特別攰   所以 11 點就瞓喇 ~ 

~~~~

今朝遲咗起身   所以要拿拿聲食早餐   由於時間關係   所以食腿蛋治 + 凍奶茶 ($18)   食得太趕   但唔食又唔得   因為我好唔鍾意喺公司食早餐呀 ~

番到菇場要做嘢喇   做人都有番啲意義 ~

晏晝熱到個地下係慶㗎   同里奧大人都唔敢食粉麵   唔想食到身水身汗   所以去茶餐廳食叉燒炒烏冬 + 炒麵 + 凍奶茶 ($46)   飽到震   但又唔可以一個餐兩份食   費事比人鬧   食完行番公司嗰陣時   個天又突然好暗想落雨咁   最慘係超焗   番到公司成背脊係汗呀 ~

Shakey's Pizza + 跑步 ( SEP-2008 )

心情仲係唔好   所以去 Shakey's Pizza   今次覺得唔好食   唔知係咪受心情影響咗呢 ~

食完同里奧大人去海濱公園跑步   焗到跳舞   所以跑半個鐘就番屋企沖涼喇 ~

~~~~

今朝超眼瞓   瞓到巴士掟彎都唔知   但好在後尾熱醒    所以就無瞓過籠   如果唔係就慘喇 ~

又係食芝腿包 + 凍奶茶 ($17)   因為呢個餐凍飲唔駛加錢呢 ~

番到菇場忙到爆   因為一連出幾篇網誌 寫到暈陀陀   真係寫到唔知邊日打邊日呀 ~

Lunch Time 仲係無咩胃口   所以同里奧大人去美心快餐    超多人   好在 Lunch Time 係 12 點半   如果唔係仲更加多人 呀 ~

迎喜 @ 佐敦 ( SEP-2008 )

尋日食完 Tea 就要拿拿聲出去探平仔喇   因為佢轉咗去九龍醫院療養   唔多就腳   落車要行成 20 分鐘先到呀 ~

因為 6 點要到佐敦   所以探咗平仔 20 分鐘就要打的去佐敦喇 ~

尋晚奶奶可以同醫院申請出街食飯   所以都可以同奶奶做節   近近哋去佐敦迎喜   10 幾人到   所以叫兩個餐   $1,998 包一打汽水包茶芥送 2 Jar 橙汁 2 支燕京啤酒   但啲嘢食就唔多掂   唔熱嘅   做諗住稻香集團啲質數應該無問題   點知都係唔掂嘅   其實我最唔鍾意正日做節   因為啲嘢實唔好食 ~

之後同里奧大人行一陣尖沙咀就走喇   因為天氣實在太熱 ~

突然好想食榴槤   所以去滿記外買榴槤 Pancake   超好味呀   最正係屋企附近有滿記嘛 ~

又突然間好想睇劉美君演唱會   所以走去租 DVD   不過都應該有番咁上下年紀先睇佢   以前我好鍾意佢㗎   不過依家就無咁鍾意 lu ~

~~~~

難得假期   所以同里奧大人又去番學利食早餐   食完就番屋企休息喇 ~

睇下電視又睇下雜誌   話咁快又到食 Tea 時間   去大家樂食嘢   因為好想飲珍珠奶茶呀 ~

中秋做節 @ 媽咪屋企 ( SEP-2008 )

食完嘢就去到媽咪屋企   同媽咪 家姐 婆婆打麻將   里奧大人同朱朱就瞓覺   唔知點解朱朱要吊起隻腳嚟瞓嘅呢 ~

打到咁上下就食雪糕月餅   藍梅雪糕就好好味   但塊古古力皮就真係超甜咯   食完之後又再打 ~

等埋大食表妹嚟就開飯 lu   坐到 9 點就番屋企喇 ~

~~~~

今朝無番教會   所以同里奧大人去學利食早餐   早餐就麻麻哋   但睇人哋啲魚蛋粉就好似好靚好香咁囉   但我唔鍾意早餐食晏晝嘅嘢   所以就算好香我都唔會食 ~

食完去買生果   再去大眾買 "阿呢"   比錢嗰陣時   發覺後面有人好大力抖氣   之後望下佢   以為佢買隻鹹碟   因為有個女人哂身材咁扒喺度   之後到佢比錢   我望下隻碟   原來係 "七擒七縱七色狼 "   估唔到啲咁垃圾嘅戲都有人睇   不過應該得麻甩佬先睇 ~

有啲人真係奇怪   諗住用萬幾蚊買隻錶比老公   但阿媽做手術   要比番自己個份錢就話無錢   每人都係 1 萬蚊   真係唔明點解有錢買錶比老公   無錢比自己阿媽做手術   真係一分錢都無比   真係好賤格   真係唔知無錢嘅定義係咩呢   我個人好蠢   真係呢一世都唔會明   希望有人可以解答到我啦 ~

心情唔多好   所以咩都唔想做 ~

睇睇下電視瞓着咗   所以 3 點幾先食 Tea   天氣熱辣辣   所以要食刺激味雷嘅酸辣米線 ~

蝦醬玉子豆腐火腩煲 + 蕃茄薯仔魚湯 ( SEP-2008 )

尋晚放工個天氣勁焗   作打風咁   所以極之辛苦 ~

成日覺得自己對里奧大人好好   但當睇到其他 Blog 友點對老公   我真係開始有少少慚愧喇 ~

我成日話攰呀   無心情呀咁   所以就唔想煮飯   其實好多時嘅攰係因為喺公司太悶   悶到顛   所以做咩都無心機引致到個人好攰   悶起上嚟真係食咩都唔想諗㗎   更何況要煮呢 ~

但其他 Blog 友真係工作好忙   但都堅持要煮飯比老公食   真係令人好感動呀 ~

所以我決定   就算點攰都好   都要煮啲嘢比里奧大人食   除非問里奧大人話唔煮得唔得   如果佢講兩次話得   我先順佢意唔煮啦 ~

尋晚去街市買餸   要分開幾個地方先可以買齊想買嘅嘢   真係好煩   但話過要煮飯   所以點煩都要買 ~

買 4 個蕃茄 + 1 個薯仔 ($8) + 大眼雞魚 ($35) + 韭菜 ($3) + 2 條玉子豆腐 ($2) + 燒肉 ($30) + 哈蜜瓜 ($25)   買完拿拿聲番屋企   因為啲嘢好重呀 ~

是日晚餐 : 蝦醬玉子豆腐火腩煲 + 蕃茄薯仔魚湯

蝦醬玉子豆腐火腩煲 - 里奧大人話要食   所以就整喇   太耐無整   所以求其算喇   不過味道都唔錯 ~

蕃茄薯仔魚湯 - 無難度嘅湯水   不過呢排蕃茄唔靚   所以啲湯唔係咁甜囉 ~

沖涼之後做 Mask   之後再食哈密瓜   超爽呀 ~

~~~~

今朝雖然係 Happy Friday   但居然都好眼瞓喎 ~

太眼瞓喇  以諗住食飽啲精神啲   所以食五香肉丁出前一丁 + 奶茶 ($20) ~

番到菇場大大鑊   因為仲更加眼瞓 ~

出面又係好焗   再加上個人又好攰   所以同里奧大人近近哋去麥記算喇 ~

住家飯 @ 媽咪屋企 + 瑜珈 ( SEP-2008 )

青紅椒腰果炒蝦仁 /  梅菜蒸鯇魚 / 煎豬扒拚雞翼 / 炒生菜 / 北芪南棗當參烏雞湯

尋晚又要學瑜珈   所以又約埋家姐一齊去喇 ~

上星期無番到   再做有啲吃力 ~

做完同家姐打的去媽咪屋企食飯   食完睇下電視   唔駛洗碗都不知幾嘆呀 ~

飯後甜品係食大同嘅 4 黃蓮蓉月  可能只係食咗 1/4   所以唔覺好漏   同埋啲蓮蓉又唔係好甜   真係唔錯   不過我覺得係因為係一齊食   所以食咩都好味呢 ~

媽咪好鍾意食 4 黃蓮蓉   見到佢咁開心個樣   真係食都食得好開心呀   上年買咗個 6 黃蓮蓉比媽咪同家姐   媽咪開心到震   因為好多間美心都無得買呢 ~

其實月餅真係幾貴   不過應節   所以點都要買嚟食咁啦 ~

同樣係蓮蓉蛋黃   我都係鍾意食壽包多啲 ~

我發覺近幾年自己食嘅口味唔同咗   唔知係咪年紀開始大呢   依家真係開始有啲怕老添 ~

尋晚喺媽咪屋企瞓   所以可以早啲瞓   因為無嘢比我搞 ~

~~~~

今朝同媽咪 朱朱食早餐   勁開心呀 ~

一番到菇場周身骨痛   同埋打 Keyboard 打到手指痛呀 ~

晏晝同里奧大人去茶餐廳食點心 + 盅頭飯   不過今次麻麻哋好食   做咩咁㗎 ~

潮樓 @ 旺角店 ( SEP-2008 )

鹵水鵝片 - 味道一般

蠔砵 - 好似食燉蛋咁   得幾隻蠔仔   我覺得唔好食

蠔仔肉碎粥 - 必叫    因為鍾意食

金華四寶蔬 - 麻麻哋  至在有菜食下

酸梅湯 - 甜到爆  超難飲

尋日雖然同里奧大人結婚 8 週年   但都唔會點特別慶祝   老夫老妻咯   平平淡淡我已經好滿足㗎喇 ~

其實呢排大家都好攰   差啲都唔記得 9 月 9 係咩日子添呀   不過 9 月 9 又太好記喇   唔多唔少都會記得啲嘅   哈哈 ~

尋日里奧大人仲係唔多舒服   所以請假休息   係請 Annual Leave 唔係 Sick Leave 喎   因為佢公司 1 年得 4 日病假咋   都唔知有無搞錯 ~

我哋約咗喺佐敦等   因為要拎迷你雪櫃 (AIG 迎新禮品)   拎完再出旺角飯飯慶祝 lu ~

想食泰國嘢   韓國嘢   打邊爐   但通通唔得   里奧大人話唔舒服唔想食喎   咩 Mood 都無哂   叫佢自己諗喇   咁啱睇到有潮樓    所以就去食 lu   因為已經 7 點   再周圍搵就要等位㗎喇   你知旺角無時無刻都超級多人㗎啦 ~

其實兩個人食中餐真係幾煩   太多食唔哂   太少又唔夠飽喎   但今次真係眼闊肚窄   食到我好辛苦呀   飽到個肚想爆咁呀   但最終都食唔哂啲嘢囉   嘥哂 ~

去潮樓 / 潮館都幾好㗎   因為唔駛加一同茶芥等等   今次埋單 $280   真係慳幾十蚊㗎 ~

番到屋企   里奧大人話知我鍾意飲珍珠奶茶   所以晏晝特登買杯比我   諗住頭先帶埋比我飲   咁諗住用保溫杯裝   但保溫杯好大陣中藥味   所以唔拎   留番比我番屋企先飲喎   9 點幾飲珍珠奶茶   真係唔駛瞓咯 ~

尋晚最開心係里奧大人收到做功課嘅成績係 A 呀   佢都難以置信呀   因為佢話求其做   估唔到可以攞 A 囉   我哋相信係神嘅恩典   願榮耀歸與神 ~

~~~

好在尋晚都瞓到   但瞓得唔係咁好囉   因為成日去廁所呀 ~

啲嘢食仲未消化完   所以食啲無咁飽嘅早餐   就係 KFC 嘅牛角包 + 咖啡 ($12)   好耐無食   所以覺得幾好味 ~

番到菇場   周身唔舒服   我發覺呢排飲完咖啡就係咁   成個人好奄悶咁   睇嚟真係要戒喇 ~

晏晝同里奧大人去 ikea 食 Lunch   食咗海鮮蕃茄汁意粉 + 肉丸 + 磨菇吞拿魚批 ($54)   諗住順便買狗床   點知無番貨   尋日又話今日有貨   點搞㗎 ~

酸梅麵豉蒸排骨 + 蒜蓉菜心 + 雪梨水 ( SEP-2008 )

里奧大人開口叫我煲川貝雪梨水   話飲完個喉嚨好舒服   同埋想出街吹下新鮮風   所以食完早餐陪我去街市買鴨梨同菜心 ($10/斤)   之後去超市買埋排骨 ($16) 就番屋企 lu ~

番到屋企即煲雪梨水   我覺得自己勁有啲阿媽 Feel 呀 ~

4 點幾我先去買點心番屋企食   里奧大人又係食完要瞓   無計啦   感冒真係好攰 ~

雖然我瞓到 11 點   但都好似好攰咁   我覺得係因為無飲奶茶   一路睇電視一路中眼瞓   所以飲埋啲隔夜湯   之後又不停咁食   又食下當噹媽喺東歐旅行時嘅手信   好好味呀   諗住可以食兩塊   但原來一塊已經好飽㗎喇 ~

無無聊聊睇電視   直到里奧大人 6 點半起身   我就開始煮飯 lu ~

是日晚餐 : 酸梅麵豉蒸排骨 + 蒜蓉菜心

酸梅麵豉蒸排骨 - 唔可以雞又唔可以牛   唔可以煎又唔可以炸   所以唯有整啲酸酸咪咪嘅排骨嚟勾起食慾 ~

蒜蓉菜心 - 因為感冒要食多啲蒜頭   所以煮菜心 ~

同里奧大人一齊睇獎門人   今集都唔好笑嘅 ~ 

~~~~

今朝出門口有啲風   好清涼呀   最鍾意係秋天嘅感覺 ~

星期一嘅早餐最好食甜甜哋嘅嘢   所以食芝腿菠蘿包 + 凍奶茶 ($17)   食完真係開心啲㗎 ~

番到菇場忙忙哋   但總好過無嘢做嘅 ~

晏晝同里奧大人去美心食嘢   食燒肉燒鴨飯 + 凍檸茶   見到碟飯嘅賣相絕對唔掂呀   求其亂放咁嘅   真係嚇我一跳呀   啲燒肉皮脆卜卜都幾好味   但如果無咁硬會好味啲囉 ~

辣麵豉醬蒸鯇魚 + 蒜蓉蒸茄子 + 冬瓜冬菇江瑤柱瘦肉湯 ( SEP-2008 )

一心諗住里奧大人會食完 Tea 會陪我行超市買餸   點知到頭來都係自己行   里奧大人話想做功課喎 ~

去到超市買鯇魚 ($16) + 瘦肉 ($12) + 1 包冬菇   今期益力多平   所以買 4 Pack   之後番屋企 lu ~

番到屋企里奧大人話作感冒   所以瞓覺   又唔敢開電視睇   咁熨衫打發時間   熨完衫就 Ready 煲湯喇 ~

是日晚餐 -  辣麵豉醬蒸鯇魚 + 蒜蓉蒸茄子 + 冬瓜冬菇江瑤柱瘦肉湯

辣麵豉醬蒸鯇魚 - 因為辣麵醬 9/9 到期   所以要盡快消滅去 ~

蒜蓉蒸茄子 - 啲菜太貴   所以食茄子 ~

冬瓜冬菇江瑤柱瘦肉湯 - 去濕湯水   又方便   不過今次太多水   所以無咩味   可惜可惜 ~

星期六真係好多嘢做   因為要打理屋企之餘   仍要護理自己嘅皮膚   依家每逢星期三星期六必定要敷 Mask   如果唔係啲皮膚好乾   同埋好多臉油呢 ~

~~~~

今朝諗住番教會   點知里奧大人感冒要瞓多啲   我自己都瞓到成 11 點鐘   無得出街食早餐喇   所以要自己煮 lu ~

煮腸仔蛋出前一丁   本來想整荷包蛋   但我又唔食生蛋黃   所以求其煎就算 lu   不過又幾好食喎

里奧大人食完又瞓   好悶呀 ~ 

酸辣米線 @ 大埔 ( SEP-2008 )

尋晚要參加一個醫治釋放嘅敬拜會   因為 8 點開始   所以唔可能煮到飯呢 ~

尋晚勁開心呀   因為可以同里奧大人一齊放工搭車番屋企   好耐無試過喇 ~

其實仲好感動   里奧大人知我好多病痛   難得呢個係醫治嘅敬拜會   所以特登早啲起身番工   7 點 40 分番到公司呀   我初初以為佢講錯添呀   為咗我   佢咁辛苦   個心真係有啲痛呀   所以放工去 Panash 買芝士麻薯比佢食下   等佢都知我對佢好好㗎 ~

因為我哋唔識去敬拜會   所以約埋里奧大人 2 姑奶一齊食酸辣米線   之後一齊搭車去呀 ~

敬拜會由 8 點至 10 點   但差唔多 11 點先散會   所以番到屋企沖埋涼都要成 12 點呢 ~

~~~~

今朝 6 點半起身梳洗   因為約咗媽咪同朱朱食早餐   好好好好攰呀   但又好好好好開心呢 ~

去到 7 點半   仲未咁肚餓   所以清清哋食吞拿魚治烘底 + 凍奶茶 ~

 

之後又上媽咪屋企坐陣傾下偈先番菇場   朱朱又比我抱到就嚟瞓咁   好唔想放手呀   如果唔駛番工幾好呢 ~

放工即刻走人   里奧大人今日 Off   所以等我番去食 Tea   又係去茶餐廳   今次我食墨魚丸腐皮角金邊粉   里奧大人食鹹魚雞粒炒飯   都明點解啲男人食 Tea 都要食得飽過人嘅 ~

得了神的醫冶 終於得到釋放 ( SEP-2008 )

尋晚同里奧大人參加了一個敬拜會   (當剛強作主的工   醫治釋放特會 - 黃約翰牧師) ~

參加這個敬拜會   我深深感受主給我無限嘅恩典   主給我嘅醫治   因為我真的得到釋放   我的病真的得了醫治 ~

牧師話有病痛嘅弟兄姊妹請舉手   當然我有舉啦   因為我真係有病痛嘛   之後牧師就話如果有腰骨痛   有腳痛嘅就出來醫治   有幾位弟兄姊妹上咗台   佢哋得了醫治得到釋放就會好自然咁放軟身體暈咗 (註: 有人在後面扶住   所以唔會跌倒)   嗰刻我覺得係咪真架 ?!   同時我憂慮唔知自己可唔可以上台得醫治   奇妙事情發生喇   因為牧師問邊位個肚   特別係右邊痛嘅人請出嚟   正正就是我嘅痛症呀 (我當時仲痛緊㗎)   當我上台嘅時候   牧師連續問了我 3 次   係咪右邊個肚位置好痛 ?!    我話係   仲痛咗都幾長時間   之後牧師同我禱告   再叫我跟了牧師講了幾句說話 (唔好意思   太緊張唔記得講了咩   印象當中係求主醫治嘅說話)   之後放鬆身體   我身體得了釋放   我嘅身體突然發軟暈咗   但感覺係好舒服好平靜   身體好似牧師所講嘅 "鬆哂"   我好快就清醒   醒咗之後牧師問咗我 3 次   要我摸自己嘅肚 3 次   要我 Sure 係咪真係唔痛   感謝神   親身感受主嘅醫治   我嘅肚真係無痛呀   真係好奇妙呀 ~

好老實講   唔相信神嘅人真係好難明我所講嘅嘢   但我最希望妳哋唔好抗拒我所講嘅嘢   因為大能嘅神真係將我改變   令我得到醫治   令我得到釋放 ~

我以前都好抗拒基督教   同埋覺得就咁祈禱就得醫治同釋放   有無咁神奇呀  ?!

但我信咗主之後   我發覺自己真係身心靈都唔同咗   對人和事無以前嘅執着   遇到困難時   會知道這是神嘅美意   因為要在困難困苦當中學識倚靠神   經歷神與妳同在   得着一份真正嘅平安 !!

我每日都會不停祈禱   神真係聽我嘅禱告   所以我做每一件事都好得力   呢啲都係神給我嘅   我每日不停受神嘅恩典 ~

我上年住咗兩星期醫院   同時做咗一個小手術   但我居然無驚到   以前我少少事都會好驚   更何況係住醫院呢   但信了主之後   我知道愛我嘅主會時時刻刻咁陪住我   安撫我   我必不會有任何懼怕   是真的   我真的沒有任何懼怕   當中還得着一份平安   是真的   連里奧大人都難以相信   我一點兒都不懼怕呢 ~

我真的很感謝主   帶領我走每一步   令我每日都在平安喜樂中渡過 ~

感謝主  阿門 !!