茄汁蝦碌 + 粟米薑粒炒飯 + 南瓜粟米栗子豬展湯

難得老細 off   里奧大人又 off    所以尋日放工即走 lu

又係諗唔到食咩好   所以同里奧大人又去食酸辣米線喇

食完就去街市買南瓜半個 ($7) + 超瘦粟米 4 條 ($5) + 栗子半磅 ($4)   之後再去超市買米同豬展就番屋企喇  

呢排成日番到屋企都唔願郁   應該同肥有關呢

是日晚餐 - 茄汁蝦碌 + 粟米薑粒炒飯 + 南瓜粟米栗子豬展湯
茄汁蝦碌 - 第一次整咋   係用雪藏蝦整嘅   整埋呢次應該要隔好耐好耐先再整   因為要剪蝦鬚 d 感覺好核突   之後再剪埋小小蝦頭部份 ( 見到對眼好恐怖 )   最慘係整完洗幾次手都有陣腥味呀   今次係用茄汁喼汁蒜粒煮汁   巧正呢   不過里奧大人話食唔到茄汁味   只食到蒜頭味喎    

粟米薑粒炒飯 - 呢個飯係參考小公主嘅   再加埋薑粒一齊炒   又係巧正呢 

南瓜粟米栗子豬展湯 - 本來想拻粟米粒   因為好細粒   所以好難拻   就咁一條條算喇   呢個湯好多南瓜蓉   所以又係巧正呢 

今餐好滿意   因為我覺得樣樣我都好有心機整   所以樣樣都巧巧食呀

 

今朝終於可以番教會喇   去到教會附近食早餐 距離崇拜仲有好多時間   所以可以好好享受假期嘅早餐呢

崇拜之後又走去街市逛逛   因為街市有冷氣又乾淨   所以一路行會一路買嘢   今次買咗 pack 急凍帶子 + 橙 + 獨子蒜 + 冰糖 + 蜜棗   其實屋企附近都有呢 d 嘢買   但就無咁靚囉   所以次次都會買定 d 番屋企以備不時之需

經過一間買椰汁嘅舖頭 講到好新鮮好好味咁   買樽試下   點知一 d 都唔好飲   成日碎冰   同佐敦間椰汁大王差 9 百幾倍呀