食棧 @ 大埔 ( 31-JUL-2009 )

香茅豬扒湯金邊粉 / 馬拉盞炒通菜 / 石榴子冰

( 31-JUL-2009  FRI )

話咁快又 Happy Friday   期待放假嘅心情真係好開心呢 ~

番到菇場又係好開心   因為有錢賺又他條   呢份工真係養到我肥肥白白呀 ~

晏晝同里奧大人去食粉麵   呢個天時真係唔知食乜好   不過食乜都唔緊要   最緊要有杯凍飲呢 ~

牛丸河 / 炸魚片頭麵

放工同里奧大人去醫院探奶奶   本來話買燒賣比里奧大人食   佢又話唔駛   點知去到醫院話肚餓    去 OK 買咗個杯麵   見佢食我又想食喎   買咗盒 XO 醬蘿蔔糕   毫無味道   食麵粉咁 ~

7 點半就要走喇   又未肚餓   所以番屋企附近先食晚餐   突然又好想食越南湯粉   所以就去食棧開餐喇 ~

粟米龍脷柳拌豉油王蔥粒炒飯 + 牛油香草粟米 ( 30-JUL-2009 )

( 30-JUL-2009  THU )

今朝里奧大人 7 點 40分打比我   話吐露港勁塞車   半個鐘頭都無郁過   所以叫我搭火車好啲   因為唔知塞到幾時喎 ~

咁搭火車番工啦   不過就好鬼煩囉   因為要坐 Shuttle Bus 到火車站   坐完火車又要轉地鐵   轉到頭都暈   要 1 個鐘多啲啲先番到菇場   仲要企足全程   又多人   最鬼憎呀 ~

無啦啦又瞓矮頸喎   成程車拎住個袋又重喎   真係好想叫人起身比個位我坐呀 ~

食埋早餐先番菇場   不過就要飲凍奶茶囉   再飲熱就會好遲㗎喇   費事啦   不過覺得飲凍奶茶係無咁提神咁   唔知點解 ~

番到菇場無哂心機啦   條頸痛到顛   慶合合咁好辛苦呀 ~

晏晝無啦啦落大雨   所以同里奧大人臨時改去大家樂   但超多人   第時都係去附近茶餐廳好啲   唔駛嘥時間等位 ~

次次晏晝食飯就會好眼瞓   飯氣攻心好難頂   做乜都無原動力   只係好想番屋企瞓覺 ~

是日懶餐 - 粟米龍脷柳拌豉油王蔥粒炒飯 + 牛油香草粟米

粟米龍脷柳拌豉油王蔥粒炒飯 - 本來想整意粉   但又唔想開焗爐喎   又突然記得有冷飯   所以整咗呢碟飯   個粟米汁真係唔知想點   唔識打茨   就咁用乾蔥蓉 + 雞蛋 + 粟米再加啲水  再加生粉水  煮嘅時候有汁咁㗎   但上碟無哂汁咁喎 ~

牛油香草粟米 - 唔想淥菜   因為唔想洗菜摘葉浸菜   好攰唔想攪咁多嘢   所以整粟米算喇   但唔知係咪個人作唔舒服   對住啲粟米唔係話勁想食   定係開始厭咗呢 ~

飯後果食榴槤   街市買 $15/Pack 咋   我見好靚咁   摸落又腍腍哋又平   一於買嚟食   估唔到真係又甜又多肉   食咗幾舊已經飽喇   超滿足呀 ~

蜜糖豬扒 + 涼拌皮蛋 + 菜心 + 蕃茄湯米線 ( JUL-2009 )

( 27-JUL-2009  MON )

落雨天陰陰 + 唔夠瞓 + 星期一   真係好痛苦呀 ~

我幾趕都好   都會去食早餐   雖然係趕   但總好過番菇場食   一個人坐喺自己位食早餐   感覺好悶呀   同埋番到菇場已經有啲同事開緊工   我食早餐都唔好意思啦   咁不如出去食   遲少少番好過呀 ~

今日媽咪煲咗北芪淮山圓肉杞子山斑魚湯   所以同埋里奧大人又去美心皇宮飲茶喇   飲湯飲到飽唔想食   叫咗一個餐 (2款點心 + 雪菜火鴨燜米)   呢個燜米好好味   濕濕哋咁   如果自己可以整到咁就發達喇 ~

今晚放工又可以同里奧大人齊搭車番屋企   雖然成日見   但我都覺得好開心呀 ~

是日懶餐 - 蜜糖豬扒 + 涼拌皮蛋 + 菜心 + 蕃茄湯米線

蜜糖豬扒 - 醃咗一晚嘅豬扒   煎香再掃蜜糖   超正呀   呢次係我第一次煮到啲豬扒唔 "鞋" 㗎咋   唔知係咪因為醃嘅時候落多咗生粉呢 ~

涼拌皮蛋 - 好想食皮蛋但無尖椒   所以用蒜蓉+蔥花再加麻油   味道都唔錯噃   不過隻皮蛋有啲怪呀 ~

菜心 - 尋晚食剩半斤嘅菜心   用薑蔥落拌嚟食   真係好好味㗎   好過食蠔油   又貴又無益 ~   

蕃茄湯米線 - 雖然都係即食制品   但感覺好健康咁呀 ~

我真係辛苦命   如果屋企有嘢未做呢   我會成日籮籮攣咁   好想快啲搞掂   同埋唔鍾意做啲唔做啲咁   所以尋晚洗完碗就抹地   沖完涼再熨衫   真係有啲虛脫呀   但唔做又唔安樂喎 ~

做完舒服哂   個人都開心啲呀   所以食我最鍾意嘅薄荷朱古力雪糕嚟獎勵自己呀 ~

栢檔無骨海南雞飯 @ 佐敦 ( 29-JUL-2009 )

( 29-JUL-2009  WED )

今朝早咗出門口   所以可以他他條條去遠啲食早餐   早餐又米粉又飲熱嘢   但坐喺冷氣地方真係唔覺熱   點知一出門口呢   熱到暈   行到番菇場成身濕哂   勁想番屋企沖涼呀 ~

番到菇場又要 Pack 嘢   熱到出油呀   立黐黐超辛苦呀 ~

晏晝無力行咁遠   所以同里奧大人去麥記食 Lunch   無啦啦又覺得啲薯條好好味   唔知係咪頭先太體力勞動得滯呢 ~

番到菇場再 Pack 過   差唔多 3 點幾就攪掂   真係有啲虛脫呀   但又有嘢做喎   想抖下都唔得添 ~

放工同里奧大人去醫院探奶奶   之後就去佐敦附近食嘢 ~

今次去栢檔去骨海南雞飯   又話去骨   但點解雞肶同雞翼係有骨嘅   油飯又唔油   不過都無乜所謂   最緊要係有啲酸辣汁   如果自己識整就好喇 ~

蒜頭豆豉蒸排骨 + 臘腸 + 西蘭花 ( 28-JUL-2009 )

( 28-JUL-2009  TUE )

早餐食豐富 d   牛扒 腸仔 炒蛋 多士 + 奶茶   因為要補血   所以要食多啲牛肉呀 ~

番到菇場諗住要 Pack 嘢   所以食飽啲   點知唔駛 Pack   之得唔食咁飽啦 ~

個天想落雨咁    所以都係同里奧大人去附近食 lunch 算喇 ~

粟米雞絲飯 / 龍蝦丸麵

番到菇場見 Partner 中眼瞓   我企身裝佢   佢應該係瞓着咗   點知樓上無啦啦鑽咗一嘢   嚇到佢彈一彈   話唔係瞓着都無人信啦 ~

是日懶餐 - 蒜頭豆豉蒸排骨 + 臘腸 + 西蘭花

蒜頭豆豉蒸排骨 + 臘腸 - 晏晝喺菇場聞到有人叮臘腸   勁想食   所以就煮喇   又超方便喎   今次加咗指天椒   辣辣哋真係好好味呀 ~

西蘭花 - 本來想買菠菜但賣哂   見到兩棵西蘭心只賣 5 蚊   真係好抵   所以買囉   就咁灼熟都好甜呢 ~

蜜糖豬扒 + 涼拌皮蛋 + 菜心 + 蕃茄湯米線 ( 27-JUL-2009 )

( 27-JUL-2009  MON )

落雨天陰陰 + 唔夠瞓 + 星期一   真係好痛苦呀 ~

我幾趕都好   都會去食早餐   雖然係趕   但總好過番菇場食   一個人坐喺自己位食早餐   感覺好悶咁   同埋番到菇場已經有啲同事開緊工   我食早餐都唔好意思啦   咁倒不如出去食   遲少少番好過呀 ~

今日媽咪煲咗北芪淮山圓肉杞子山斑魚湯   所以同埋里奧大人又去美心皇宮飲茶喇   飲湯飲到飽   唔想食   叫咗一個餐 (2款點心 + 雪菜火鴨燜米)  呢個燜米好好味   濕濕咃咁   如果自己可以整到咁就發達喇 ~

今晚放工又可以同里奧大人齊搭車番屋企   雖然成日見   但我都覺得好開心呀 ~

是日懶餐 - 蜜糖豬扒 + 涼拌皮蛋 + 菜心 + 蕃茄湯米線

蜜糖豬扒 - 醃咗一晚嘅豬扒   煎香再掃蜜糖   超正呀   呢次係我第一次煮到啲豬扒唔 "鞋"   唔知係咪因為醃嘅時候落多咗生粉呢 ~

涼拌皮蛋 - 好想食皮蛋   但無尖椒   所以用蒜蓉 + 蔥花再加麻油   味道都唔錯   不過隻皮蛋有啲怪 ~ 

菜心 - 尋晚食剩半斤嘅菜心   用薑蔥落拌嚟食   真係好好味   好過食蠔油   又貴又無益 ~

蕃茄湯米線 - 雖然都係即食制品   但感覺好健康咁呀 ~

我真係辛苦命   如果屋企有嘢未做呢   我會成日籮籮攣咁   好想快啲搞掂   同埋唔鍾意做啲唔做啲咁   所以尋晚洗完碗就抹地   沖完涼再熨衫   真係有啲虛脫呀   但唔做又唔安樂喎 ~

做完舒服哂   個人都開心啲呀   所以食我最鍾意嘅薄荷朱古力雪糕嚟獎勵自己呀 ~

糖醋喼汁骨 + 菜心 + 蔥花炒飯 + 老黃瓜赤小豆扁豆唐排湯 ( 26-JUL-2009 )

( 26-JUL-2009  SUN )

10 點起咗身   如果朝朝可以 10 點起身就發達喇 ~

又去茶餐廳食早餐   不過里奧大人話開始有啲厭喇   仲好啦   我都唔想佢食咁多公仔麵呀 ~

之後佢就跑步   我就熨衫   預備煲湯   燜定排骨   咁夜晚就可以他條啲煮飯喇 ~

打掃埋屋企都差唔多食 Tea 喇   時間真係過得好快呢 ~

太熱無乜胃口   但唔食 Tea 又唔覺有假期 Feel 喎   所以我食炸雞翼薯條 + 凍咖啡   好耐無飲   超好味呀   同埋我覺得凍咖啡   好多層次咁呀   里奧大人就食秋刀魚餐   啲辣汁超好味   我多數會係為咗啲汁而食呢個餐呢 ~

番到屋企又係睇 DVD 喇   今次睇毛豆極力推介嘅 "亞波卡獵逃"   都好睇不過超血腥   一有呢啲場面就飛    唔係唔掂呀 ~

是日懶餐 - 糖醋喼汁骨 + 菜心 + 蔥花炒飯 + 老黃瓜赤小豆扁豆唐排湯

糖醋喼汁骨 - 酸酸甜甜超好味   特登食完早餐就整㗎喇   入味啲嘛 ~

菜心 - 10 蚊斤菜心呀   菜檔無寫到   我又無問到   如果唔係就唔買啦   之前買 8 蚊 2 斤咋 ~

老黃瓜赤小豆扁豆唐排湯 - 呢個湯超方便   又可以去濕利尿喎   所以 4 點幾就飲喇   費事夜晚成日去廁所呀 ~

蔥花炒飯 - 就咁加老抽嚟炒   最緊要有顏色   好唔好味係其次呢 ~

飯後果食龍眼   無上次咁甜咁脆咁大粒呀   有啲失望 ~

蒜香芝士海鮮焗意粉 + 蒜蓉包 ( 25-JUL-2009 )

( 25-JUL-2009  SAT )

今朝又好早起身同媽咪食早餐   不過瞓得唔好   有啲攰 ~

番到菇場仲攰   唔願郁   個心成日好想番屋企瞓覺呀 ~

晏晝同里奧大人去譚仔三哥雲南米線   今次唔食套餐   估唔到真係無肚屙喎   咁下次又可以食喇 ~

酸菜黑木耳麻辣米線 - 小辣 / 豬潤牛肉麻辣米線 - 3 小辣 / 土匪雞翼

之後同里奧大人去租碟   今次又租兩隻  "賤狼 300" & "亞波卡獵逃"   租完番屋企   唔想再周圍行   太熱喇   就算行商場都無心機 ~

番到屋企沖涼坐陣就番教會   之後再買餸就番屋企喇 ~ 

是日晚餐 - 蒜香芝士海鮮焗意粉 + 蒜蓉包

蒜香芝士海鮮焗意粉 - 太熱唔想食飯   又唔想食湯粉   所以又整意粉   第一次整蒜香意粉   有啲乾   有難度呀   呢碟意粉加咗金菇同尖椒   感覺好似健康啲咁 ~

蒜蓉包 - 無敵勁想食呀   唔整唔得呀 ~

今日真係好攰   整哂嘢就睇碟   想笑下睇 "賤狼 300"   呢套戲簡直浪費時間去睇呀   第一次睇啲咁嘅頂級爛片呀～

釀尖椒 + 煎魚餅 + 牛油香草粟米 + 蕃茄薯仔排骨湯 ( 24-JUL-2009 )

( 24-JUL-2009  FRI )

星期五啦   早餐要食得豐富啲   因為要迎合 Happy Friday 嘛 ~

番到菇場勁開心   因為期待緊星期六呀 ~

晏晝又可以同里奧大人一齊食   夜晚又一齊放工買餸   真係好開心   因為啲餸同生果加加埋埋真係好重㗎 ~

是日晚餐 - 釀尖椒 + 煎魚餅 + 牛油香草粟米 + 蕃茄薯仔排骨湯

釀尖椒 - 未試過尖椒   買幾隻試下   唔辣嘅   不過我覺得好食過青椒   青椒太厚又難煎啲咁 ~

煎魚餅 - 一物二用扮兩樣餸   唔錯吖   不過唔知點解唔金黃色嘅   已經落咗生粉㗎啦 ~

牛油香草粟米 - 因為要滾湯   唔想再開一個煲   炒粟米就最好喇 ~

蕃茄薯仔排骨湯 - 次次都覺得自己整得好好飲   唔知點解咁嘅呢 ~

依家 7 - 11 又有嘢換   問家姐有無儲印花   因為我屋企釘書機壞咗   想換個釘書機咁   但就唔好特登買嘢儲   點知第日打嚟話買咗比我   比佢激暈   嘥錢嘛   不過又好開心嘅   咁着緊妳喎   里奧大人都未必會啦   有呢個家姐   我真係覺得自己超級幸福呀 ~

譚仔 (三哥) 雲南米線 @ 大埔 ( 23-JUL-2009 )

( 23-JUL-2009  THU )

今朝又食五香肉丁腸仔米粉 + 凍奶茶   超飽呀   食完醒哂呀 ~

番到菇場悶到爆   都做咗 3 年啦   但一個知心嘅同事都無   真係好難得呀 ~

其實我真係覺得啲同事好怪   不過可能佢哋都覺得我怪啦 ~

有個同事渠王 (因佢啲口氣真係好勁   屎渠味咁㗎)   假到爆   喺公司入面就扮 Frd 懶好傾   但一出門口呢   就好似唔識妳咁   有兩次次我喺 Lift 入面等埋佢入嚟   佢唔該都無聲   不知所謂   我好憎人無禮貌嘛   自此之後我唔會再等佢 lu ~

又有兩位同事 L 同 W   佢哋好 Frd   因為做咗十幾年   有次 W 問 L   聽日 A/L 去邊度玩呀 ?!   L 好串話: A/L 一定去玩嘅咩   請 A/L 唔得㗎   我聽到 O 哂咀   Frd 嚟嘛   駛唔駛咁應人呀   不過   可能我喺度唔方便講啦   但我都覺得唔需要咁態度囉 ~

好在阿 Head 好人   又有得 MSN 同上網   唔係真係好難頂 ~

里奧大人感冒   所以早走番屋企休息   晏晝得番自己食   求其買燒賣 + 雜果沙律+ 忌廉番菇場食   但太高估自己食量    食完燒賣已經好脹胃   所以雜果沙律要慢慢慢慢龜速咁食   再加埋汽水   脹到個肚好唔舒服呀 ~

幾經辛苦先放工   今晚唔煮啦   無 Mood 呀   同里奧大人去食譚仔三哥雲南米線   哎呀   今次第 3 次去   但有 2 次係肚屙喎   係咪因為受唔到麻辣呢   係就慘啦   無哂人生樂趣喇 ~

( 20-JUL-2009 ) + ( 21-JUL-2009 ) + ( 22-JUL-2009 )

( 20-JUL-2009  MON )

每月一痛   所以晏晝請 S/L 番屋企休息   兩個半鐘頭嘅熟睡   真係好舒服呢 ~

夜晚又係里奧大人買外賣番屋企食   陰公咯   不過無辦法啦   等佢食多幾日   咁先真正領會到原來我嘅住家飯係十分十分之好味呢 ~

( 21-JUL-2009  TUE )

今日番工喇   好在身體都 OK   可以陪里奧大人食 Lunch   我就只飲例湯   因為熱辣辣又有味道嘛 ~

番到菇場開始唔舒服   所以大部份時間都係伏喺枱面休息   瞓下醒下就 5 點半   約埋里奧大人一齊番屋企   感覺舒服好多呀 ~

唔知點解次次每月一痛都好想食壽司   所以又去元綠壽司喇   其實元綠真係好唔抵食   不過貪近唔想行咁遠   無計啦 ~

( 22-JUL-2009  WED )

唔知點解瞓極都咁攰咁   又無胃口 ~

晏晝同里奧大人去大家樂食 Lunch   今次唔多人   所以覺得好舒服呢 ~

個肚無啦啦又赤赤痛   所以叫里奧大人買車仔麵番到屋企食算喇 ~

蜜糖雞翼 + 炒三色椒 ( 19-JUL-2009 )

( 19-JUL-2009  SUN )

呢個 9 號 "莫拉菲" 真係吹得好勁   瞓瞓下比 "Fing Fing Fung Fung" 聲嘈醒   最慘係啲聲好似包圍住妳咁   嘈咗個幾鐘頭   3 點幾先瞓得着   好在唔駛番工   唔係人都顛呀 ~

10 點 15 分起身   有啲攰但又瞓唔着   所以同里奧大人食早餐   經過商場   啲樹都吹到入商場裡面   可想而知幾大風呢 ~

番到屋企熨衫   之後沖涼再睇 DVD   今次翻睇 "超級零零狗"   因為覺得劉玉翠同王祖藍配音好搞笑   睇到真係開心好多呢 ~

今次又去譚仔雲車米線食 Tea   湯底要就番里奧大人   所以要麻辣 (5 小辣)   點知一啲都唔辣嘅   再加多碟尖椒皮蛋   麻麻哋   我唔多鍾意有啲醋味呀 ~

天陰陰   真係無乜 Mood 做嘢咁   所以就咁坐喺度睇報紙   睇下電視算喇 ~

是日懶餐 - 蜜糖雞翼 + 炒三色椒 + 蕃茄湯米線

蜜糖雞翼 - 煎香再加蜜糖   方便又好味   不過煎雞翼都要好多時間呀 ~

炒三色椒 - 就咁清清哋煎嚟食都唔錯喎    又係好方便呢 ~

蕃茄湯米線 - 喺百佳試食   覺得幾好味   蕃茄湯都幾濃   所以就買一 Pack   估唔到里奧大人都鍾意食呢  好彩 ~

飯後果 - 龍眼    拻哂殼   放入雪櫃雪凍超正㗎 ~

蕃茄海鮮意粉 + 腐竹糖水 ( 18-JUL-2009 )

( 18-JUL-2009  SAT )

教咗鬧鐘 6 點 20 分起身同媽咪去大家樂食早餐   但 6 點醒咗   都唔想再瞓 lu   早啲出去好過啦 ~

估唔到今次又唔太眼瞓喎   同媽咪食下傾下   兩個幾鐘好快就過   又要去番工喇 ~

星期六番工真係好悶   根本人在心不在   真係好無意思呢 ~

作打風   天氣勁悶熱   令人透唔到氣   加上等車又等咗半個鐘   上到架車又焗   真係有啲暈呀 ~

里奧大人 Off 唔駛等車之苦   我就焗到無哂胃口   又唔想食熱辣辣嘅湯粉   食辣嘢就最好不過喇 ~ 

番到屋企第一件事係沖涼呀   沖完成個人舒服哂   做乜都有心機啦 ~

里奧大人好鍾意喺屋企睇 DVD   覺得好 Relax 喎   加上我哋又 Join 咗影視會   嚟緊都係應該係睇 DVD 當係一個假期節目㗎喇 ~

今次睇 "妖夜尋狼前傳之狼神誕生 (Underworld)"   雖然血腥   但又幾好睇喎   因為無期待嘛 ~

是日懶餐 - 蕃茄海鮮意粉 + 腐竹糖水

蕃茄海鮮意粉 - 勁想食呢個意粉   所以覺得好好味   不過今次無加芝士粉去焗   諗住里奧大人會覺得漏   點知佢話點解無芝士粉   無芝士粉唔香喎   落又話漏   唔落又話唔香   點攪呀 ~

腐竹糖水 - 包腐竹開咗好耐   但未到期   所以煲埋嚟飲   最主要目的係想好瞓啲 ~

難得今晚早食飯   又好早攪掂哂所有嘢   所以睇多套 "地球停轉日  (The day the earth stood still )"   有奇洛做主角喎   靚仔又好身型   着住西裝靚仔到暈呀   睇佢已經足夠   乜嘢劇情都唔緊要啦 ~

燒肉粒黃薑炒飯 + 香煎七味豆腐 + 粟米蛋花湯 ( 17-JUL-2009 )

( 17-JUL-2009  FRI )

早餐食餐蛋治烘底 + 奶茶   已經少蛋走牛油   但都一樣好漏呀 ~

Happy Friday + 老闆放假 + 晏晝 Off 去覆診   邊樹有心情做嘢喎 ~

晏晝同里奧大人去麥記   食完就即走喇   Up to now 我都好唔鍾意出旺角   因為會路經朱朱間診所   不期然會好多嘢諗   個心好實   個人會好低落 ~

今次覆診時間算快喇   1 個鐘頭搞掂   諗住幫里奧大人去 LG 買電話電就走   但又覺得旺角可能有烘焙店   所以第一時間打比最熱心幫人嘅卡卡   得佢嘅好不情願嘅幫忙下   知道原來信和中心有一間烘焙店   太好啦   買下嘢開心啲嘛   事實上我又真係有嘢買嘛 ~

最開心係原來 LG 就係喺信和隔離間商業中心   一出電梯嘅 Shop 係裝修緊   再望兩邊又無 Shop 嘅   唔對路   嚇到我即刻按 Lift 制   唔理上定落   最緊要係搭到 Lift 呀 ~

落到樓下問 Counter   先知原來係再隔離間商業大廈   之得睇清楚先入啦   嘥時間又嚇餐死   又熱喎 ~

去到 LG 都有唔少人等   好在買電唔駛等   最怕一個人等呢 ~

雖然熱   但都照去花園街   睇下有乜靚生果   點知都唔係特別靚嘅   所以搭車番屋企 lu ~

番到屋企第一件事開冷氣再沖涼   之後再煲羅漢果茶比里奧大人潤下喇 ~

是日懶餐 - 燒肉粒黃薑炒飯 + 香煎七味豆腐 + 粟米蛋花湯

燒肉粒黃薑炒飯 - 將尋日食剩嘅燒肉切粒   循環再食   加埋蔥花黃薑粉去炒都幾好味   不過今日熱到傻  所以無乜點食呀 ~

香煎七味豆腐 - 又係尋晚買咗無整   唔知整乜好   所以就咁煎   超乾呀 ~

粟米蛋花湯 - 最好飲係呢個湯   易又口又健康嘛 ~

我平時喺屋企好少會一路食晚飯一路飲凍嘢   但今日實在流得太多汗   好似飲極都仲係唔夠咁   所以就整咗杯凍利賓納   爽呀 ~

今日真係出得太多汗好攰   所以整完哂嘢就食碗沙律   今次材料只得青瓜 + 椰果 + 菠蘿   本來無沙律食㗎   諗住用燒肉加青瓜粒炒飯   但又驚味道唔 Match   所以做沙律囉   好在自己識得急轉彎咋   哈哈 ~

燒肉 (外賣) + 芝士腸出前一丁 + 日式紅豆年糕 ( 16-JUL-2009 )

( 16-JUL-2009  THU )

早餐 - 沙爹牛肉包 + 奶茶   最鍾意食烘過嘅沙爹牛肉包   少少牛油   少少牛肉   少少生菜   好味呀   同埋最鍾意有飲管嘅熱奶茶   因為我覺得咁樣方便飲呀   飲完唔駛抹咀   超方便呀 ~

午餐 - 同里奧大人去茶餐廳食粉麵   雖然行得遠   但真係真係唔想喺公司附近食   好似成日困住喺一個地方咁   唔鍾意呀 ~

晚餐 - 燒肉 (外賣) + 芝士腸出前一丁

燒肉 (外賣) - 其實一早諗好咗整豆腐火腩煲   點知里奧大人早過我番屋企   費事要佢等啦   同埋見到啲皮脆卜卜燒肉   好想食呀   所以決定就咁食算喇 ~

芝士腸出前一丁 - 好在自己醒咋   無啦啦打開雪櫃睇下   原來芝士腸 Expiry Date 係今日   再打開廚櫃   出前一丁就係 1/8    咁就一次過清哂啦   唔好浪費嘛 ~

甜品 - 日式紅豆年糕   用現成罐裝紅豆整   勁易整   年糕又勁韌   簡直超好味呀   食完呢個甜品真係好開心呀 ~

蝦醬蒸豬肉 + 節瓜鹹蛋肉片湯 + 韭菜豬肉水餃 ( 15-JUL-2009 )

( 15-JUL-2009  WED )

今朝無啦啦塞車   所以又要食番三文治喇   最緊要快 ~

番到菇場雖然好攰   但我唔會中眼瞓   我要好好珍惜老闆 Off   可以無限上網嘅日子嘛 ~

天氣唔多好   所以同里奧大人近近哋喺附近食算喇   最怕落雨整到對腳濕哂   周身唔舒服咁 ~

終於等到放工   坐車嘅時候有人放屁   臭到無人有   好後悔做乜唔坐上層呀 ~

是日懶餐 - 蝦醬蒸豬肉 + 節瓜鹹蛋肉片湯 + 韭菜豬肉水餃 + 芒果糯米磁

蝦醬蒸豬肉 - 10 蚊半肥瘦梅頭   一半用嚟蒸一半用嚟滾湯   唔好嘥嘢   先將蝦醬加指天椒炒   咁啲蝦醬先會香啲㗎   太耐無蒸豬肉   居然唔記得醃就去蒸   好在蝦醬夠味   唔係都幾難食呀 ~

節瓜鹹蛋肉片湯 - 2 個節瓜 + 5 蚊豬肉 + 1 隻鹹蛋 + 兩碗水   份量啱啱好 ~

韭菜豬肉水餃 - 係星期日晚食唔哂嗰啲嚟㗎   放入冰格可以擺到幾日嘅   估唔到仲係咁好味呀 ~

芒果糯米磁 - 我今餐無食飯   特登留肚食糯米磁   食咗 6 個   飽到呢   今次啲皮又係煙煙韌韌   超好味呀   下次想試整糖不甩   方便好多呢 ~

Shakey's Pizza @ APM ( 14-JUL-2009 )

( 14-JUL-2009  TUE )

今朝天氣唔錯   雖然好眼瞓   但我坐巴士嘅時候多數睇免費報紙   無咁悶嘛   又可以快啲知道有乜大事發生   同埋我好少一上車就瞓   明明沖完涼洗埋頭有啲精神   無理由又走去瞓家嘛 ~

加上 N 年前去旅行嘅時候   領隊就奇怪話唔明點解啲香港人一坐車就瞓   團友話因為坐長途車關係喎   領隊就話其實翻瞓仲攰㗎   就係佢咁講   所以我好少朝早坐車瞓覺呢   除非超級唔舒服囉 ~

今朝要食甜嘅早餐   因為甜甜哋開心啲   咁番工都開心啲嘛 ~

菇場真係一個催眠人嘅地方   就算妳幾精神 幾亢奮都好   坐多個幾鐘就會感覺到好眼瞓   因為靜得太交關喇   真係非筆墨可以形容呀 ~

晏晝同里奧大人去美心快餐   太焗喇   唔想行咁遠呀 ~

海鮮蟹柳喇沙拚雞翼 + 青檸梳打 - 我第一次食喇沙咋   因為我成日驚啲湯底好似冬蔭功咁   我接受唔到啲奶味呀   不過呢個喇沙湯底又 OK 喎   因為一啲都唔濃呀   但其實我唔知道真正喇沙嘅味道係點喎

肉醬意粉 - 里奧大人食咗一碗之後話好漏喎   同埋啲意粉好腍   我就最憎用個紙盒上   好肉酸咁   再食下啲肉醬   一啲都唔似有肉咁噃   難食難食

食到好飽   番到菇場好眼瞓   望住個鐘   好似無郁過咁嘅 ~

今晚放工約咗媽咪家姐同里奧大人去 APM 嘅 Shakey's Pizza 食晚餐呀   去到第一件事係 Re-Confirm 啲 Coupon 係咪可以通用   個 Waiter 話可以   之後佢同我講話我尋日喺呢度申請咗   我話無呀   佢仲繼續懶醒咁繼續話   妳尋晚嚟過   係我同妳整 Vip Card 家嘛   我當堂 O 哂咀   我話我唔係喺呢間申請㗎喎   佢樣衰衰咁走開 ~

今次又係食 Set   再加多個脆薯 & 用 $8 Coupon 食一份原價 $98 嘅豬肋骨 ~

呢間嘢呢   真係個個都懶醒   我食之前比張 Coupon 佢哋   佢哋話埋單時先比   無問題吖   但我哋叫埋單   佢哋又唔埋嚟   話咁快就咁比張單嚟   大佬呀   我有 Coupon 家嘛   咁張單又無扣   又要去改   改完之後又無啦啦加多杯特飲價錢 ($12)   佢仲話收咗張 Credit Card 先去改張單   顛啦   我點知你有無改呀   一陣無改又簽咗卡咪麻煩   又嘥時間    乜服務態度嚟㗎   個個都活係自己世界咁嘅   恐怖 ~

諗住去滿記食甜品   點知 Food Court 坐滿哂人   咁唔等喇   所以各自番屋企休息 lu ~

味千拉麵 @ 大埔 + 自家制芒果糯米磁 ( 13-JUL-2009 )

蒜片豬軟骨拉麵 - 蒜片要分開上   否則會浸到腍哂就唔好味
便當 - 最鍾意係有金菇牛肉卷呢

( 13-JUL-2009  MON )

星期一啦   又新開始   雖然老闆 Off 好 Free   但都覺得好眼瞓   如果可以瞓陣妳話幾好呢 ~

晏晝同里奧大人食咖哩牛腩意粉 & 醬占多   好耐無食   好好味咁呀 ~

今日里奧大人可以 5 點 45 分放工   所以等埋一齊搭車番屋企   本來想煮   但里奧大人話難得咁早一齊番到屋企   唔好嘥時間煮   出去食好過喎 ~

佢想去味千拉麵   無問題吖   最緊要唔好食飯就得喇 ~

唔駛煮飯有啲 內疚   所以沖涼之後即刻整芒果糯米磁   今次用台灣唔知乜乜芒   超勁大個㗎   同我個頭差唔多咁大咁㗎   不過就無呂宋芒咁香甜囉 ~

韭菜豬肉水餃 + 鯊魚骨姬松茸滋補湯 ( 12-JUL-2009 )

( 12-JUL-2009  SUN )

星期日喇   要番教會喇   去教會附近茶餐廳食早餐   今次我食雞批做早餐   又係因為雜誌話好食   想試試   估唔到又好味喎   個皮好鬆化唔漏   但啲餡就無乜味   如果唔係就更好呢 ~

番完崇拜就去街市買嘢   之後即刻番屋企再沖涼   實在太熱喇 ~

喺屋企涼住冷氣   真係好唔想出街食 Tea   但自己又唔想整   無奈 ~

熱到唔知食乜好   無乜選擇   所以又去食米線   酸酸辣辣易入口嘛 ~

番到屋企又預備煲湯   之後就可以安心睇 DVD   今次睇 "Hancock"   又係有啲失望 ~

是日晚餐 -  韭菜豬肉水餃 + 鯊魚骨姬松茸滋補湯

韭菜豬肉水餃 - 大熱天時   真係唔想食飯   食餃子就最好啦   今次勁有心機包呀   之前包親實會有幾隻爆口   今次一隻都無   仲隻隻好靚   我真係不得不喺里奧大人面前 3 番 4 次讚揚自己呀   雖則佢只係點頭話係係係   但我都好開心㗎   呢個上湯其實只係加少少雞粉   叫做有啲味咁囉   再加埋韭王   真係靚仔好多   無咁寡嘛 ~

鯊魚骨姬松茸滋補湯  - 官燕棧湯包   加 $20 豬展 & 2 隻響螺頭   勁鮮甜呀 ~

飯後果 - 青瓜沙律   加咗青瓜嘅沙律真係好味好多呢   我好鍾意食㗎 ~

煙三文魚 (外賣) + 香煎帆立貝 + 蒿麥冷麵 ( 11-JUL-2009 )

( 11-JUL-2009  SAT )

今日 Off   平時里奧大人出咗門口之後   我多數瞓到 9 點就會醒   因為瞓得唔好   索性早啲起身好過 ~

但今朝 8 點幾醒咗   打電話比里奧大人   問佢番到公司未 ?!   之後我再瞓   但知道自己一路瞓 一路發夢   仲要係夢入面發緊夢   幾辛苦呢 ~

電話響   原來已經係 11 點 10 分   里奧大人仲以為我掛住行百佳唔打比佢添   因為我真係好少自己一個人瞓到咁晏呀 ~

求其去屋企對面茶餐廳食早餐算喇   因為得佢一間早餐時間係止到 12 點呢 ~

瞓晏咗   打亂哂啲做家務計畫   不過估唔到又可以喺兩個鐘頭之內攪掂哂喎   電視都抹到乾淨喎   勁到吖   坐喺一間乾乾淨淨嘅屋真係好舒服呀 ~

等埋里奧大人番嚟就去 Tea 喇   今次去大家樂   早少少去等位   估唔到又好快有位呀   真好呢   不過水準又差咗啦  之前嘅蜜糖雞翼好好味㗎   皮脆肉嫩   依家皮唔脆又無味   里奧大人話唔夠飽   所以加多包冷冷撈先夠喎 ~

食完去 Jusco 買定晚餐     番到屋企里奧大人就瞓晏覺   我就睇下報紙   預備晚餐咁囉 ~

是日懶餐 - 煙三文魚 (外賣) + 香煎帆立貝 + 蒿麥冷麵

煙三文魚 (外賣) - $59.9 一 Pack   諗諗下加多幾十蚊出去食晚餐好過   唔駛做嘛 ~

香煎帆立貝 - Jusco 買嘅即熟帆立貝   解凍之後抹乾   再煎兩分鐘   加啲蒜鹽就食得   超方便呀 ~

蒿麥冷麵 - 上次整得唔好食   又唔記得加紫菜   好唔開心   所以今次要整得好啲   將啲麵加埋冷麵汁一齊雪凍幾個鐘   真係好味好多呢 ~

攪掂哂   沖個靚涼就睇 DVD 啦   今次睇 "CIA 光碟離奇失竊案"   有啲失望 ~

清理剩餘物資餐 ( 10-JUL-2009 )

( 10-JUL-2009  FRI )

平時去開食早餐嘅餐廳   好多時都會見到老細兩公婆   不過佢哋鍾意坐門口面壁思過   我就鍾意坐中間嘅位   所以好少一齊坐   好彩 ~

番到菇場忘我境界啦   開大 Screen 上網   不知幾爽呀 ~

終於 Lunch Time 喇   同里奧大人去食米線   太熱喇   去到都無乜胃口添 ~

蒜香雞翼 (酸菜米線) - 見到啲雞翼真係唔開胃   粉漿厚吖   最憎係咁   乜 Mood 都無哂啦

南乳雞件 (榨菜上海麵) - 反而里奧大人呢個雞件好滑   唔錯喎

今晚里奧大人探奶奶   所以放工唔駛咁趕去買餸   食番尋晚剩嘅肉醬意粉就攪掂 ~

聽日 Off 好開心   所以去租碟同去 Jusco 超市買嘢   依家啲無鹽牛油好貴呀   我記得兩年前整曲奇都係 $19.9   依家要 $35.9 (特價 $29.9)   真係乜都貴哂   人工又唔見加幅得咁犀利喎~

番到屋企整炒番啲肉醬意粉   感覺好似自己整咁   如果整得咁靚咁好味就好喇 ~

食完就里奧大人打嚟話番緊屋企   所要又要整嘢比里奧大人食喇   不過今次好簡單   因為旨在清理剩餘物資   就係韭菜水餃同福字米粉喇   加啲麻油   好好味㗎 ~

Shakey's Pizza @ 大埔 ( 9-JUL-2009 )

是日餐湯 - 周打蜆湯

蒜蓉包

煙三文魚凱撒沙律

焗肉醬意粉

火星任務 (辣肉腸   火腿  意式肉腸  燒烤醬) - 薄批

日出椰林 (Colada - Pineapple juice & coconut cream blended together with ice topped with shredded coconut)

( 9-JUL-2009  THU)

尋晚 1 點 45 分電話響   我同里奧大人都係飛線番屋企嘅   所以呢   唔係打錯就唔方好嘢 ~

點知真係唔係好嘢   原來奶奶氣喘   話想見哂所有仔女   因為佢之前都係咁   總之一氣喘就會 Call 其中一個姑奶再 Call 齊人到醫院   好在去到醫院   醫生比咗氧氣罩就好好多   叫做無咁喘囉   奶奶係腎衰竭   所以有時會肺積水   肺積水又會令到氣喘   真係好煩呢 ~

4 點先番到屋企   攰到眼癱癱 ~

無辦法啦   太攰喇   所以遲 15 分鐘先起身   趕到呢   食早餐要飲凍嘢啊呀 ~

番到菇場無耐   我另一個同事 MSN 我知   話佢尋晚聽到個衰同事唔知同 A/C 講咗啲乜   A/C 同事話唔可以咁樣講嘢㗎   同事嚟家嘛 ~

晏晝見到里奧大人即講呢單嘢呀   慶到吖   又熱喎   慶上慶呀 ~

諗住去食 Pizza Hut 又無位   美心又無位   所以又要行遠少少去大家樂   里奧大人話嗰度無乜人等喎 ~

估唔到依家有燒味飯食   好好味呀   最緊要係有杯珍珠奶茶   里奧大人知我超級無敵勁鍾意食珍珠   所以佢又叫多杯   比哂啲珍珠我食   勁感動   但呢啲珍珠唔煙韌囉 ~

霜花牛板燒飯 / 咖哩牛腩飯 / 珍珠奶茶

番到菇場問 A/C 同事單嘢攪成點   佢話 KO 咗   咁都好啲   知道唔關我事嘛 ~

但今日咁激一激   個頭有啲痛呀   無哂 Mood ~

放工同里奧大人講聲頭痛   煮啲簡單嘢算喇   其實根本唔想煮   不過睇佢有乜反應   佢隔咗陣先打嚟話叫我唔好煮   出去食   打得比你就要醒水啦   反應咁遲鈍嘅 ~

去到商場見到 Shakey's Pizza 寫住 $199 可做 VIP 優惠   即做啦   有 85 折又有 $1,000 Coupon   雖然只可用一樣   但計落到着數吖 ~

今次食個 Set 都係 $169 ( 85 折之後)   仲食唔哂碟肉醬意粉   打包留番聽晚食   唔駛煮   發達啦 ~

釀雙椒 + 勝瓜野生竹笙魚滑湯 ( 8-JUL-2009 )

( 8-JUL-2009  WED )

太熱喇   所以都係去番菇場附近食早餐算 lu ~

菇場無嘢做   悶到吽哂   好不容易先諗到晏晝食米線呀 ~

出面真係好熱呀   行到半路摸下里奧大人   隻手立黐黐   肯定好熱啦   因為平時佢只有凍唔會熱   佢知我想食米線   所以就繼續行   但我唔行啦   一陣佢仲暑就煩咯 ~

里奧大人夏天如果着裇衫嘅話   必定會長袖同埋着底衫或背心打底   佢話唔打底嘅話太多汗會啜住件裇衫好核突   但佢唔會着短袖裇衫   因為好有阿叔 Feel   情願摺袖喎   最後我格夾硬扯佢番轉頭去麥記食嘢算喇   食完行商場嘆冷氣舒服啲囉 ~

都唔明呢度啲同事做乜嘅   一有事就即刻推卸責任   淨係識講 "妳自己攪掂佢   唔關我事   妳自己攪掂去呀"   我最憎呢啲人    有問題係要解決   唔係搵邊個錯家嘛   何況我又無錯喎   講到好似我要負責咁   超討厭勁黑人憎呀 ~

呢單嘢會牽涉到 A/C   即係會牽涉到老闆   所以佢好驚   乜都話唔知   唔關佢事   好似我錯咁 ~

無厘心機   行步路都覺得無力咁呀   但都會煮飯   我想養到里奧大人肥肥白白   所以呢個係我煮飯嘅原動力呀 ~

是日晚餐 - 釀雙椒 + 勝瓜野生竹笙魚滑湯

釀雙椒 - 有鯪魚肉剩   所以釀椒就最好喇 ~

勝瓜野生竹笙魚滑湯 - 兩大條勝瓜 + 4 條野生竹笙 + 5 蚊鯪魚肉   用 4 碗水滾 20 分鐘   其實用 3 碗水最好   但因為太多瓜   要用 4 碗水先可以勉強過哂面呀   啲魚滑蘸豉油胡椒粉好好味呀   

下次就咁當湯飯食算喇   仲方便 ~

飯後果 - 哈蜜瓜   今次好甜呀   雪凍嚟食真係好好味呀 ~

酸梅麵豉蒸排骨 + 芥蘭 ( 7-JUL-2009 )

( 7-JUL-2009  TUE )

今朝好餓呀   所以食吉列魚柳餐呀   如果日日可以食   又唔厭又唔熱氣   又唔肥就好咯   唔駛煩嘛 ~

同里奧大人食到唔知食乜好呀   所以再行遠少少食嘢   熱到吖   真係食咗都補唔番呀 ~

呢啲天時咁熱   真係好唔鬼想煮飯   但又唔想出街食   所以整啲酸咪咪又辣辣哋嘅餸就最好喇 ~

是日懶餐 - 酸梅麵豉蒸排骨 + 芥蘭

酸梅麵豉蒸排骨 - $10 排骨就搞掂啦   仲食剩兩嚿   出街食肉無問題   但唔知點解次次自己煮都有啲抗拒唔想食咁㗎 ~

芥蘭 - 我鍾意食芥蘭   但又驚苦   所以今次試下落啲糖一齊煮   又好似真係唔苦咁   定係啲菜本應唔苦呢 ~

香港仔魚蛋粉 @ 油麻地 ( 6-JUL-2009 )

( 6-JUL-2009  MON )

早餐食沙爹牛肉包 + 奶茶   估唔到好好味呀   不過杯奶茶真係好唔掂   公司附近嘅茶餐廳   唔係間間奶茶都好飲   如果唔係可以有好多選擇囉   唔駛來來去去都係呢幾間 ~

星期一最苦悶   做乜都提唔起勁咁   如果番到菇場好似有番到家嘅感覺就好喇   大家一齊嘻嘻哈哈傾偈幾好呢   但呢度就唔會咁   因為佢哋多數用 MSN 溝通  所以成日都好靜咁囉 ~

最開心就係食 Lunch   其一可以見到里奧大人   其二係覺得好快可以放工咁 ~

唔知係咁食糭好滯呢   番到菇場勁眼瞓呀 ~

放工同里奧大人去醫院探奶奶   依家探病好嚴   只可以兩個探   仲要有阿姐喺門口派籌   想偷雞入去都唔得 ~

同埋姑奶 兒甥女同工人一齊去香港仔魚蛋粉食粉麵   坐緊門口位   越食越熱呀 ~

番到屋企附近食龜零膏清熱解毒   我就食糖不甩   最鍾意煙煙韌韌嘅嘢   但里奧大人話食麵粉咁   有乜好食喎 ~

XO 醬炒脆肉瓜帶子 + 南瓜紅蘿蔔粟米粟子豬展湯 ( 5-JUL-2009 )

( 5-JULl-2009  SUN )

今朝 7 點半起身   因為我要去百佳買嘢   我想要 Haagen Dazs 嘅環保袋呀   但真係估唔到   呢間百佳 7 點半開始營業   我 7 點 45 分去到   Cashier 已經打哂蛇餅喇   個個一車車咁排   點解咁早都咁多人㗎 ~

好在呢間百佳行到熟哂   我又諗定好買乜嘢   所以 10 分鐘就搞掂   但每條龍尾都有四至五十人排緊   真係好恐怖呀   打風都無多人排呀 ~

咁多人要同一款袋喎   咁更係唔會有啦   不過另一款都唔錯嘅   好過無啦 ~

番到屋企幾難先可以瞓番着呀   諗起都覺得自己顛呀   里奧大人去廁所番入嚟嘅時候   我話我去完百佳買嘢啦   佢大笑話講大話   係咪發夢出去買嘢呀 ~

  
本來諗住番教會   但我瞓到 10 點 45 分先醒   趕唔切呀   所以落街食早餐再去買餸就番屋企 lu ~

呢一日無咁多嘢做   就咁熨衫就攪掂   我真係好想比自己星期日可以真真正正休息呀   但應該好難做到呀 ~

2 點半先出去食 Tea   唔想去茶餐廳   所以食燒賣 + 腸粉 + 粉果 +牛肉   不過都食到好飽呀 ~

番到屋企煲定湯   之後就睇 "特務 S 嘜"   得啖笑   依家生活緊張   睇下笑片笑下都好嘅 ~

是日懶餐 - XO 醬炒脆肉瓜帶子 + 南瓜紅蘿蔔粟米粟子豬展湯

XO 醬炒脆肉瓜帶子 - 呢個餸超方便   最緊要係清咗之前嘅脆肉瓜   同埋我想快啲清哂屋企嘅 XO 醬   呢隻 XO 醬喺台灣試食嘅時候係好辣   但唔知點解整親一啲都唔辣   唔知係自己買咗無咁辣嗰隻   定係佢哋比人試食時加咗指天椒呢 ?!

南瓜紅蘿蔔粟米粟子豬展湯 - 難得假期先可以煲老火湯   味道好濃好好飲呀 ~

依晚開始轉食燕麥飯   希望真係可以降膽固醇啦 ~