( 5-jul-2009 sun )
今朝痴線啦 7 點半起身 因為我要去百佳買嘢 我想要 haagen dazs 嘅環保袋呀 但真係估唔到 呢間百佳 7 點半開始營業 我 7 點 9 去到 cashier 已經打哂蛇餅喇 個個一車車咁排 點解咁早都咁多人架
好在呢間百佳行到熟哂 我又諗定好買乜嘢 所以 10 分鐘就搞掂 但 每條龍尾都有四至五十人排緊 真係好恐怖呀 打風都無多人排呀
唉 咁多人要同一款袋喎 咁更係唔會有啦 不過另一款都唔錯嘅 好過無啦
番到屋企幾難先可以瞓番着呀 諗起都覺得自己顛呀 里奧大人去廁所番入黎嘅時候 我話我去完百佳買嘢啦 佢大笑話講大話 係咪發夢出去買嘢呀 噢
本來諗住番教會架 但我瞓到 10 點 9 先醒 趕唔切呀 所以落街食早餐再去買餸就番屋企 lu
呢一日無咁多嘢做 就咁熨衫就攪掂 我真係好想比自己星期日可以真真正正休息呀 但應該好難做到啊
兩點半先出去食 tea 唔想去茶餐廳 所以食燒賣 腸粉 粉果 牛肉呢 d 小食 不過都食到好飽啊
番到屋企煲定湯 之後就睇 "特務 s 嘜 " 嘅 dvd 得啖笑 依家生活緊張 睇下笑片笑下都好嘅
是日懶餐 - xo 醬炒脆肉瓜帶子 + 南瓜紅蘿蔔粟米粟子豬展湯
xo 醬炒脆肉瓜帶子 - 呢個餸超方便 最緊要係清咗之前嘅脆肉瓜 同埋我想快 d 清哂屋企嘅 xo 醬 呢隻 xo 醬喺台灣試食嘅時候係好辣 但唔知點解整親一 d 都唔辣 唔知係自己買咗無咁辣果隻 定係佢地比人試食時加咗指天椒呢
南瓜紅蘿蔔粟米粟子豬展湯 - 難得假期先可以煲老火湯 味道好濃好好飲呀
依晚開始轉食燕麥飯 希望真係可以降膽固醇啦
沒有留言:
發佈留言