洋蔥肥牛炒意粉 + 油麥菜 + 粟米湯 + 粟米椰果沙律 ( 15-feb-2011 )

( 15-feb-2011 tue )
星期二喇   今朝超級唔願意起身   喉嚨又痛痛地喎   所以鬧鐘響咗再教遲 15 分鐘先起身   不過都係好唔夠瞓呀 ~ 

今朝食腿蛋治 + 咖啡   佢比單嘅時候   話加咗小小價   要 $16   其實我都唔記得佢本身幾錢   不過依家間間餐廳喺新年後都加哂價 lu   有 d 仲加咗 $2   不過我覺得 $18 之內嘅早餐真係算係平架喇   雖然麥當勞都有 d 特價早餐   但唔知點解   梗係覺得佢地 d 早餐唔多健康咁囉 ~ 
番到菇場都有 d 嘢做嘅   不過真係好攰   所以拖到臨尾一刻先做呢 ~

Lunch box 係尋晚打邊爐食剩果 d   又幾好味喎 ~ 
今晚一定要煮呀   因為仲剩咗 d 肥牛同菜   無理由咁嘥家嘛   雖然攰   但都要煮囉 ~
是日懶餐 - 洋蔥肥牛炒意粉 + 油麥菜 + 粟米湯 + 粟米椰果沙律
洋蔥肥牛炒意粉 - 剩餘物資   但又唔想去街市買金菇整肥牛卷   所以整炒意粉   最緊要快呀 ~ 

油麥菜 - 又係剩餘物資黎   就咁灼熟就算 lu   無拍薑   無點豉油   懶呀 ~
粟米湯 - 依家嘅 "地們" 粟米湯真係差哂呀   之前 d 粟米係原整一粒脹卜卜架   依家就溶溶爛爛咁   同埋粟米粒份量小咗好多呀   真係得番 2 湯匙嘅粟米粒架咋   唉   雞蛋又過期喎   如果唔係蛋花粟米湯會好飲好多囉 ~
粟米椰果沙律 - 唉   無睇包裝   開咗先知係粟米   平時都會整埋落粟米湯度嘅   不過今晚真係無咩胃口   唔想咁飽   所以用黎整沙律   好聰明呀 ~
今晚整咗沙律就打比家姐   問佢黎唔黎食   估唔到佢又黎食喎   順便比埋手信佢   good 呀 ~