醬香雞 (外賣) + 雞絲炒意粉 + 辣菜脯炒福花 ( 12-MAY-2025 )

( 12-MAY-2025  MON )

感恩一覺瞓天光呀   話哂星期一嘛   都係好想精精神神咁呢   哈哈 ~

早餐食芝士條 + 和熟車打金文畢芝士包   我特登行去東海堂買㗎   因為記得上次食係好味道呢 ~

食完就靈修 20 分鐘   之後就番工喇 ~

菇場 3D   不過我都忙到 10 點幾   之後又做下自己嘢 ~

上次同阿花傾開 Mask   佢今日就比咗 1 塊比我   真係太客氣啦

Lunch Time 出去行陣   行咗半個鐘就番菇場開餐 ~

想食魚肉燒賣好耐   見到 $10/7 粒買嚟食喇   點知得番 3 粒魚肉燒賣   其他係豬肉燒賣   咁我照買啦   點知完全唔熱嘅   豉油又無味   之得聽船頭講話唔好幫襯呢間啦

唔忙就做自己嘢   不過突然間好眼瞓   所以沖杯齋啡飲喇   雖然 3D   但都好驚瞓着呀 ~

勁家莊嘅黑巧麥脆捧   估唔到好好食喎   上次跟團去大陸都買過佢哋嘅食品   都係唔錯嘅

放工即走   個胃有啲痛   但點都要煮飯   因為唔想再將啲餸留多日先煮呢 ~

番到屋企唔見里奧大人   以為佢仲喺公司   之後原來係喺 CH   不過番到屋企都仲未食得   今晚差唔多 7 點先食得呀 ~

煮完之後個胃真係好痛   所以都唔係咁想食嘢 ~

是日晚餐 - 醬香雞 (外賣) + 雞絲炒意粉 + 辣菜脯炒福花

醬香雞 (外賣) - 只係蒸雞肶雞翼呢啲   其他就用嚟煮意粉   估唔到啲雞肉都好入味   下次再有一定會買嚟食   真係好過自己整呀 ~

雞絲炒意粉 - 尋日買咗啲蔥蒜芹菜   咁點都要煮啦   用嚟炒意粉就最好呢 ~

辣菜脯炒福花 - 食埋今次福花要停下先   就算唔胃痛都已經連續食 4 餐   都有啲悶呀   哈哈 ~    

洗埋碗都抖陣先   因為個胃超級痛呀   我直頭要烏低個身嚟行   有一下真係痛到暈咁滯   好在喺屋企咋 ~

里奧大人話福花難消化   我話可能中午又飲咗杯齋啡   因為放工嗰陣已經胃痛呢 ~

抖陣先沖涼   之後同里奧大一齊睇 "協商的技術"   但睇睇下痛到要去嘔呀   之後又好似舒服少少咁   但仍然胃痛 ~

最後只睇咗半個鐘   10 點 10 分都要去瞓覺喇 ~