燒汁燜薯仔金沙骨 + 芥蘭苗 ( 7-MAY-2025 )

尋晚食剩嘅肉餅飯

( 7-MAY-2025  WED )

感恩尋晚瞓得好好呀   今朝里奧大人起身都話瞓得好   同埋話可能校大咗冷氣   咁我話唔好再校冷氣度數喇   難得大家都瞓得好 ~

今朝里奧大人去買早餐   我話 1 份腿蛋治 Share 食就可以了 ~

菇場 3D   聽到溫總比船頭話喇   因為溫總 Hold 住條數   但溫總話 System 問題   但其實有問題就應該一早要解決啦   成日有條數 Hold 住做唔到嘢   之後小說就叫阿爽同溫總快啲傾下點樣搞掂   呢下好笑喇   阿爽咩都唔理又唔識   唔會落手落腳幫手做喎   所以我覺得溫總都好慘 ~

之後船頭話問溫總 1 個問題   但溫總會引申到 10 個問題問番佢   所以有時啲嘢要即時解決   一拖就好鬼煩囉 ~

同一時間   阿輸好大聲話阿怪發夢   佢喺度懵盛盛咁笑    原來佢開錯公司名呀   銀碼係幾百萬㗎   之後叫我改   話以前個 System 改到   我話以前吖嘛   之後我話會喺電腦寫明係妳比錯資料要取消   唔係啲人以為我開錯呀   我就知佢想毀屍滅跡   行咗兩轉叫我點做   我真係彩佢都傻呀 ~

Lunch Time 落雨   咁去一田行下啦   之後買埋麵包就番菇場開餐喇 ~

我覺得有時一田啲嘢都平   所以買咗美國新奇士橙 ($35) / 韓國迷你杏鮑菇 (特價 $10.8) / 湖池屋薯片 ($18/2 件)

無啦啦又好忙   之後再上下網   話咁快又放工 lu ~

掛住同阿花 Whatsapp   差啲唔記得落車   好在我突然間望下隻窗咋 ~

番到屋企即預備晚餐   但 7 點先開得餐呀 ~

是日晚餐 - 燒汁燜薯仔金沙骨 + 芥蘭苗

燒汁燜薯仔金沙骨 - 我真係好鍾意整呢個餸   方便簡單又好味 ~

芥蘭苗 - 唔想買瓜   又買番芥蘭苗喇 ~

洗埋碗就沖涼   抖陣就熨 1 機衫   本來熨 2 機   但熨咗 1 機衫之後覺得好熱   所以叫里奧大人熨喇 ~

差唔多 9 點半先睇 "協商的技術" 第 7 集   依家越嚟越好睇   不過睇 1 集已經差唔多 11 點   我要瞓喇   里奧大人就再睇多陣先瞓 ~