感恩一覺瞓天光呀 里奧大人話尋晚睇多集 "協商的技術" 差唔多 12 點先瞓 我話都估到啦 因為我入房嘅時候仲聽到電視有聲 ~
早餐食英式丹麥酥包 我覺得唔搽花生醬都好食 所以叫里奧大人自己搽花生醬 哈哈 ~
菇場忙呀 做到差唔多 11 點 抖陣又放飯 真開心 ~
Lunch Time 同船頭 阿花一齊去 DAISO 睇嘢 大家買咗啲嘢就各自走喇 因為我蒸咗飯要番菇場開餐呢 ~
唔忙就做自己嘢 放工去買雞骨草同炸魚皮 買完都即番屋企喇 ~
第一時間刨淮山皮 但搵唔到削皮刨 所以用刀批皮 之後里奧大人番到屋企 我同佢講尋日唔小心將削皮刨掉埋呀 之後里奧大人問係點樣㗎 ?! 我話係粉紅色嘅 原來佢掛咗喺另一個位置呀 好在同佢講咋 唔係我諗住聽日去買番個新㗎 ~
真係好邪 今日行 DAISO 先同阿花講 我鍾意睇廚房嘢 佢話廚房只可以得一個人話事 所以佢唔會買廚房嘢 我話咁又係呀 擺開個位置就一拿起手就用 第個用完唔放番原本位置又要嘥時間搵真係好煩 估唔到今晚即刻發生喺我身上 哈哈 ~
是日晚餐 - 燒汁燜鮮淮山金沙骨 + 蝦丸 + 辣菜脯炒福花 + 脆門鱔魚皮 (外賣)
燒汁燜鮮淮山金沙骨 - 尋晚食剩一半金沙骨 今晚加咗鮮淮山同埋半包迷你杏鮑菇 再加番啲燒汁同辣椒醬再煮 其實即係隔夜餸 哈哈 ~
蝦丸 - 之前買㗎 都好大粒嘅 呢 4 粒要 $54 我真係以為自己聽錯 因為無諗過咁鬼貴呀 ~
辣菜脯炒福花 - 將福花剪到一粒粒 咁里奧大人就鍾意食喇 食咗半碟呀 下次再咁整先 ~
脆門鱔魚皮 (外賣) - 好想食香口嘢但又唔想食薯片 所以買炸魚皮 又可以食 3 日 所以其實都好抵食 哈哈 ~
洗埋碗就開機洗衫 之後沖涼休息 ~
啲橙都甜呀 真開心
我自己睇 "協商的技巧" 先 因為里奧大人尋晚睇咗 咁我睇完再睇新 1 集 ~
咁我估到劇情 里奧大人個樣係超級驚訝 仲問我係咪睇咗 ?! 我話次次都係你開比我睇㗎啦 ~
雖然好睇 但睇到 10 點半都瞓覺 lu ~
沒有留言:
發佈留言