梅菜蒸排骨 + 脆肉瓜 ( 13-MAY-2025 )

( 13-MAY-2025  TUE )

尋晚瞓覺嘅時候   個胃都係超級痛   側瞓平瞓都係痛   但算係快瞓得着㗎喇   感恩感恩 ~

臨起身前發咗個夢   我企喺樓梯排隊買飛入去廸士尼   咁到我嘅時候   要跨過一大級樓梯   但下面係個海   所以覺得好驚   諗緊點行嘅時候   鬧鐘就響 ~

今朝真係唔想起身囉   個人係超級攰呀   不過抖咗一陣都起身整早餐 lu ~

尋晚好早熄電話   我熄嗰下就諗家姐唔會搵我呀嘛   點知今朝一開機就見到家姐訊息   問我做咩咁早熄機   哈哈 ~

早餐都係食芝士條 + 和熟車打金文畢芝士包   仲要食埋聽朝先食完   好在都鍾意食芝士咋 ~

里奧大人陪我搭車   不過我要慢動作咁行 ~

菇場唔忙   可以做自己嘢 ~

Lunch Time 出去行陣   去大生買三角朱古力比阿花   買完就周圍行下   差唔多 12 點 20 分先番到菇場開餐 ~

放工即走   番到屋企即預備晚餐   里奧大人 6 點 45 分番到屋企   可以即刻食得喇 ~

是日晚餐 - 梅菜蒸排骨 + 脆肉瓜

梅菜蒸排骨 - 喺成興隆買嘅加拿大排骨粒真係唔錯   口感同新鮮豬肉無咩分別   呢度咁多排骨只係 $36   所以都好抵食 ~

脆肉瓜 - 里奧大人話我好鍾意食瓜   我話點解可以次次都咁講呢 ?!   我已經講咗好多次話因為帶飯先煮瓜囉 ~

洗埋碗就開機洗衫   抖陣就同里奧大人一齊睇"協商的技術" 大結局 ~

套劇唔算爛尾嘅   但覺得啲劇情拖得太長喇   不過個個演員都做得好好   所以我哋先有動力睇落去呢   哈哈 ~

睇完都係 10 點 20 分   但今晚有啲攰   所以都瞓覺喇 ~