日式咖哩午餐肉意粉 + 粟米蛋花湯 ( 16-NOV-2025 )

( 16-NOV-2025  SUN )

感恩一覺瞓天光呀   臨醒個夢係焗緊雞翼   但其實我已買咗隻燒雞   隻燒雞仲擺咗好耐縮哂水添呀   所以我好肯定呢個夢係彩色   哈哈 ~

今朝同里奧大人食早餐   雖然早起身   但其實要我再瞓又瞓唔着 ~

食完就去家姐屋企   里奧大人就番工喇 ~

一開門就見到家姐   Berry 又係咁大叫同撲我喎   家姐幾咁羨慕呀 ~

之後到 U 姐好肉緊咁叫 Berry   語氣同聲調係同家姐一模一樣   真係搞到 Berry 神經衰弱   哈哈 ~

家姐今朝又要趕出貨   咁無問題   反正佢都係邊做邊傾 ~

叫佢跳上嚟佢又走   我走嘅時候佢又跳上嚟   真係玩嘢

家姐叫我摸下 Berry 啦   我話佢瞓緊覺呀

我點郁佢   佢都唔開眼呀   有無咁攰呀 ?!

Berry 個頭好巨咁

同家姐 11 點半出門口   因為里奧大人 1 點 15 分開會   我以為趕得切   所以話買飯比佢   點知最後要佢買呀   因為我 1 點先到佢公司   搞到佢好趕添 ~

Share 食雞扒腸仔飯 (黑椒汁)

里奧大人食完都要即刻去開會喇   我就陪阿妹到 1 點 50 分先走   番到屋企即做大清潔   搞掂都已經 3 點   要即熨 2 機半衫喇   估唔到 4 點就熨完   算係好快㗎喇   我覺得聽歌熨衫好過睇 Youtube 熨衫   因為我成日會掛住睇   熨都熨得慢過人㗎 ~

搞掂又再執呢樣嗰樣   又整到 5 點   我開始有啲眼瞓   所以瞓咗半個鐘 ~

差唔多 6 點就預備晚餐   里奧大人 7 點 15 分番到屋企   佢見我熨哂佢啲褲   係咁講唔該哂   今晚佢特別感激我咁   哈哈 ~

是日晚餐 - 日式咖哩午餐肉意粉 + 粟米蛋花湯

日式咖哩午餐肉意粉 - 今日好攰但唔想買外賣   所以就煮呢個超級簡單嘅意粉喇 ~

粟米蛋花湯 - 地們粟米湯真係完全唔覺得有粟米粒存在   之前 S&W 粟米湯又係少咗好多粟米粒   下次試下買金寶牌子先 ~

洗埋碗就沖涼休息   之後食金奇異果   擺咗好耐都仲唔係咁甜   好在里奧大人食到酸嘅生果咋 ~

今晚同里奧大人一齊睇 "中年好聲音 3 演唱會"   睇完就玩 "上海麻雀" ~

里奧大人 11 點 10 分瞓覺   我玩到 11 點 25 分先瞓覺 ~