Hungry Korean @ 九龍灣 ( 1-NOV-2025 )

豆腐湯 ($54)

雞肉鐵板燒 ($64)

( 1-NOV-2025  SAT )

感恩一覺瞓到 7 點 17 分   不過唔想咁早起身   所以諗住瞓到 8 點   不過瞓到 7 點 50 分都起身 lu ~

早餐食茄汁薄餅   因為 1 點半先食午餐   所以要食飽啲 ~

食完就靈修 10 分鐘   之後就番工   逢星期六搭 Lift 搭車都非常暢順   所以唔駛咁急趕 ~

菇場忙呀   好在 10 點半搞掂 ~

今朝得幾個同事番工咋   因為好多同事去廣州   又有同事 Off 同請假呢 ~

又已經到 11 月   時間過得超級快

阿怪突然行去我個位   之後放粒朱古力落我張枱   我即刻笑住話多謝啦   但其實嗰下覺得好驚訝囉   唔知係咪頭先提佢做啲嘢   佢覺得我好人呢 ?!   因為佢講過公司所有人都針對佢㗎

放工即走   買埋午餐就去里奧大人公司一齊食喇 ~

我食豬耳酸辣米線   上次見有人食已經想食㗎喇   我今日要食一碗杯線呀   12 點半已經覺得餓喇   唔知係咪天氣凍咗呢

里奧大人食豬軟骨拚雲吞米線   我開嘅時候覺得有啲唔同   之後見到里奧大人無食啲肥豬肉   原來食店比錯咗豬腩肉呀   好在里奧大人都話好食   其實 8 卦同阿花都話豬腩肉好食   但我就無食過喇

食食下   叻叻突然開門衝入嚟   之後遞扎花比我   我同里奧大人都呆咗   初初仲以為有咩突發事發生要處理添 ~

我真係好感動又驚喜   佢買比阿妹又買埋比我   始終我唔係佢同事嘛   不過佢好多時咩都預埋我㗎   反而里奧大人就無   哈哈

好似個花樽咁

食完就幫里奧大人做啲嘢   之後就去 LA 活動   差唔多 4 點 50 分先完畢   去里奧大人坐多一陣又要出發去自己教會 lu ~

早到就同時時傾偈   點知係咁偈到完全唔記得做嘢添   TT 笑住話要做嘢喇   真係笑死 ~

之後 TT 又教我哋做運動   牧師笑哂問咩事 ?!   因為佢見我哋個個一齊做呀 ~

崇拜完畢就諗住等埋里奧大人先走   估唔到佢早到咗   之後同埋牧師傾咗 20 分鐘左右   其他弟兄姊妹見到里奧大人都覺得出奇   又個個嚟打招呼   好窩心呀 ~

差唔多 8 點就去食晚餐   食完就行陣德福   我要去奇華同馬莎買嘢   買完就走得   里奧大人話如果想行就繼續行都得㗎   不過我話今日踩咗成日有啲攰   想快啲番屋企呢 ~

番到屋企即沖涼   之後又執下嘢   呢排好懶呀   買完又唔願執   好在里奧大人睇唔到咋 ~

馬莎買嘅 70% 特濃牛奶朱古力脆餅 & 特濃牛奶朱古力薑餅 ($79/2 盒) - 我買盒脆餅比 TT   頭先佢話鍾意食朱古力   又話依家好快餓   咁我買呢啲小食就最好   不過我未試過   但睇個樣幾好味就買啦   我都想試下薑餅   所以呢盒留比自己喇

奇華嘅五彩皮蛋酥 ($28/個) - 用餅卡換㗎   只係補多 $6 就有 2 個   本來以為清哂奇華餅卡   但原來仲有 2 張   好在 2027 年先到期

睇下 Youtube   之後又打機打到 11 點半先瞓覺 ~