滷水燜冬菇鵝掌 + 唐生菜 ( 5-NOV-2025 )

( 5-NOV-2025  WED )

感恩一覺瞓到 6 點 53 分都醒醒哋   最後懶床到 7 點 18 分都起身整早餐 lu ~

里奧大人話尋晚去咗廁所   我話完全唔知道呀   所以我係熟睡狀態呢 ~

早餐食千層吐司 + 朱古力麻糬   星期日買嘅麻糬嚟㗎   今朝點都要食埋去㗎喇 ~

菇場忙呀   如果日日係咁就好 lu ~

Lunch Time 出去行陣   買埋菜就番菇場開餐喇 ~

1 點收到里奧大人訊息話 Ivy 返咗天家   我真係忍唔住喊咗出嚟   上星期先話康復得唔錯   但又唔比我哋去醫院探佢   其實我哋都諗住搵晚探佢㗎喇   但估唔到走得咁突然   真係好難接受呀 ~

佢病咗都有 1 年   想探佢但佢唔得閒   到佢得閒就到我哋唔得閒   但之前兩個月都仲見到佢   仲話有胃口食嘢肥咗添 ~

我喺教會第一個識嘅姊妹就係 Ivy   同佢哋兩公婆真係零舍好傾   咁之前都有啲小誤會   但後尾都雨過天晴   嗰時里奧大人問我有無唔開心 ?!   我話梗係有啦   識咗咁多年   我好珍惜同佢嘅感情㗎   所以之後都有 Keep 番聯絡   但估唔到依家再無機會聯絡   我真係好傷心呀 ~

雖然今日好忙   但個腦真係實哂   好想快啲放工 ~

放工即走   里奧大人 6 點半番到屋企   可以即刻食得喇 ~

是日晚餐 - 滷水燜冬菇鵝掌 + 唐生菜

滷水燜冬菇鵝掌 - 好在比我睇到支滷水汁   咁就用佢嚟燜餸   其實星期日整咗㗎喇   所以肯定入味   連鵝掌都非常入味呀   等我再整多次係咪咁先   我好想整比家姐食呀 ~

唐生菜 - 呢度 3 棵只係 $6.2   份量又啱啱好 ~

洗埋碗就開機洗衫   之後沖涼休息喇 ~

心情仍然低落   想食啲甜嘢   咁食奇華換嘅五彩皮蛋酥   隻皮蛋乾到呢   同埋好少子薑   我記得以前好好食㗎

無咩心機睇 Youtube 就打機啦   里奧大人 10 點 10 分瞓覺   我就 10 點 50 分先瞓 ~