奧爾良雞下肶 ( 13-OCT-2025 )

( 13-OCT-2025  MON )

今朝 6 點半起咗身去廁所   但背脊好痛呀   本身想請病假   但都係唔好住喇   所以再瞓到鬧鐘響   可能起身唔痛呢 ~

點知起身仍然痛呀   要即刻同西瓜請病假   咁我再瞓番   里奧大人就問咩事 ?!   之後我話請病假   佢問係咪瞓得唔好 ?!   我話背脊好痛呀   同埋抖唔到氣咁   其實我唔想講   費事佢擔心   不過佢繼續問就講啦 ~

瞓到 9 點 45 分都醒喇   里奧大人幫我打去診所掛號   我聽到佢約 4 點半   原來醫生今早有啲事只係開到 10 點   最快要 4 點半先有得睇呀 ~

我同里奧大人講話今次睇到醫生算好彩   因為我次次突然唔舒服   醫生多數係放假呀 ~

今次呢種痛法喺好耐之前試過   嗰時直頭連呼吸都痛   我仲記得係星期六放工先去法國醫院睇醫生   因為嗰時驚要住院   所以先去醫院睇咋   之後醫生佢話我係胃酸倒流   但唔記得有無照啲咩 ~

早餐食栗子千層包   好在有胃口食   哈哈 ~

食完抖陣就沖涼   之後睇下電視   HOY TV 套韓劇又幾好睇喎   啲劇情真係意想不到咁荒謬   但里奧大人話依家係咁㗎   我話真係唔知喎 ~

里奧大人話今日好好天就洗窗簾   我話無問題啦   你鍾意做咩就做咩啦   我坐喺度唔郁就得㗎喇 ~

我話想 1 點食 Lunch   唔想晏食又變咗晏食晚飯呀 ~

食完就睇 Youtube   睇到想瞓覺   同埋好凍呀   所以即入房瞓   其實我唔知自己有無瞓到   但里奧大人話我瞓到鋸鋸聲喎 ~

3 點幾出發去睇醫生   雖然 4 點半到咗   但要等多幾個先有得睇呀 ~

我同醫生講話背脊好痛   其實位置又唔痛   我話以前試過胃酸倒流係咁   佢話胰臟炎同膽生石都會痛   扯親又係會痛喎   所以開止痛藥食   如果再痛就要嚟睇下喇 ~

睇完就搭車番屋企   里奧大人話想食餈飯   不過就有車就唔食 lu   但其實佢頭先落車已經話想食   但等我睇完醫生先食   我話想食就食啦   佢話驚我唔舒服   唔想我周圍行   我話行下個人好似舒服啲咁   佢先話去食 ~

餈飯 ($20) + 豆漿 ($10)

食完就搭車番屋企   同平時放工時間差唔多   所以即係要即刻預備晚餐喇   哈哈 ~

是日晚餐 - 奧爾良雞下肶

奧爾良雞下肶 - 今晚點都要食啦   好在焗嘢真係好方便   就咁洗個焗盤就搞掂 ~

洗埋碗就開機洗衫   之後沖涼休息 ~

睇陣 Youtube   因為食咗藥好眼瞓   所以 10 點都瞓覺喇 ~