魚腐辣味拉麵 + 生菜苗 ( 17-OCT-2025 )

( 17-OCT-2025  FRI )

尋晚半夜比個夢嚇醒咗呀   個夢係我放工等 Lift   我將部電話貼住 Lift 門   點知跌咗落下一層呀   之後我仲同樓下個人講   我會嚟拎番   之後即刻搭另一部 Lift 去地下   但去到 1 樓係個大型商場   咁我周圍搵番平時個出口   之後嚇醒咗   醒嘅時候仲驚緊咁㗎   好在之後都好快瞓得番呢 ~

鬧鐘一響   里奧大人話唔舒服要番晏晝   好在我買咗麵包   咁佢一起就身可以食呢 ~

早餐食甜餐包搽花生醬   本身想食芝士   但想後都係想快啲清哂樽花生醬呀 ~

等巴士嘅時候   見到隻白鴿係橋底行嚟行去

家姐 Whatsapp 話肥妹今日走喇   我話唔係星期五咩 ?!   佢話今日咪星期五囉   哈哈   呢排成日搞亂哂啲時間 ~

菇場忙呀   做到差唔多 11 點先搞掂 ~

見到超市有筍嘢即同阿齋講啦   又傾下偈咁   我同阿齋話唔食雞蛋   佢用口型問我係咪因為個瘤 ?!   佢好多時見我唔食嘅嘢就會咁問㗎喇   之後後聽到船頭叫阿花食飯   我先知已經 11 點 45 分咋 ~

去 Mikiki 行下   順便買辣椒醬再去買防曬   最後買埋蕃薯就走喇 ~

唔知食咩好   所以食杯麵   估唔到阿花又係食杯麵   佢話糧尾呀   船頭話依家先月中咋喎   哈哈 ~

唔忙就做自己嘢   所以話咁快就放工喇 ~

放工即走   番到屋企已經見到里奧大人   諗住快啲煮飯   咁啱家姐打嚟傾買藥嘅嘢   原來佢靜靜雞幫我出去旺角買藥   真係比佢激死   不過最後我都唔買住   我要計下時間先 ~

是日晚餐 - 魚腐辣味拉麵 + 生菜苗

魚腐辣味拉麵 - 我仲係好飽   所以就咁煮個麵比里奧大人食就得喇   同埋依家想星期五煮麵   因為唔駛帶飯嘛   同埋成日買咗啲麵都擺到就嚟過期先記得食   咁不如逢星期五食仲好   哈哈 ~

生菜苗 - 之前剩咗啲蠔油冬菇   今晚食埋去   好在無壞咋 ~

洗埋碗就開機洗衫   之後沖涼休息喇 ~

秋月梨好清甜多汁呀   巧克力脆柿又好味   但今次口感係腍身   咁之前食嘅就爽脆   究竟本身應該係咩口感嘅呢   哈哈

睇下 Youtube 又玩上海麻雀   差唔多 11 點 20 分先瞓覺 ~