泰國金柚鮮蝦沙律 ($92) - 我真係第一次食咁好味嘅金柚沙律
豆醬炒椰菜苗 ($88) - 我成日覺得豆醬無咩味 估唔到又係咁好味 哈哈
冬蔭功蝦湯 ($88/小) - 菜仔一坐低就話要飲
都有唔少料
炭燒香茅魷魚 ($98) - 文西話有香茅味 同埋口感都彈牙 依家鍾意食魷魚 以前唔鍾意食㗎
炭燒沙爹雞牛豬 ($108) - 呢個都好味 但我哋 3 個食咗好少 要菜仔食埋去 最緊要佢唔嘥嘢 哈哈
芒果爆珠糯米飯 ($42/杯) - 芒果都甜 糯米飯係熱同埋腍呀
SINGHA ($28/支) - 叫咗 2 支 我叫里奧大人唔好飲咁多 唔係飲完眼瞓傾唔到偈 哈哈
( 29-OCT-2025 WED )
感恩瞓得都唔錯 同里奧大人瞓到自然醒 差唔多 9 點半都起身 沖埋涼又整呢樣嗰樣 10 點先出發食早餐 ~
今朝同里奧大人出去食早餐 因為一陣要體力勞動 我哋要食飽啲 ~
食完番屋企抖下 里奧大人洗冷氣機隔塵網 我就開機洗衫 晾埋衫就出發去 Y 姑屋企喇 ~
今日有大工程 所以姑奶同 Auntie C 都幫手 最搞笑佢哋話見到我覺得非常開心同驚喜 因為無諗過我會嚟幫手呀 ~
整到 3 點都有啲餓 但唔想食嘢住 最後大家都話餓 原來已經 4 點半 所以即叫下午茶喇 ~
5 個人食 3 個下午茶餐 最後食剩半盒炒飯同少少伊麵 我哋掛住傾偈都無咩點食 哈哈
Y 姑又燜咗鮑魚鴨掌同煲咗魚湯 我飲咗 3 碗細嘅 我仲食埋栗子蓮子 真係夠哂飽 ~
食完就要走喇 因為約咗菜仔 本身里奧大人約咗菜仔 3 點 之後再改 5 點 最後要 6 點先到 ~
估唔到見埋文西 同佢真係好耐無見啦 佢認唔到我呀 所以即刻叫里奧大人上前 唔係以為我係乜水 哈哈 ~
一路食榴槤月餅一路傾 其實我同里奧大人話食完晚餐先食啦 但菜仔係都要話依家食
傾到 7 點幾都走喇 菜仔話去新哥 我話不如試下翟道翟 不過我未去過喎 文西同里奧大人話去新哥啦 因為驚去到翟道翟無位要行番轉頭 之後菜仔係咁話要去翟道翟 文西咪話佢囉 頭先揀食咩就講咗幾次新哥 依家又係都要翟道翟 黐鬼線 ~
我再強調話未食過㗎 不過 CC 話食過幾好味 因為我好驚揀食店 上次尖沙咀嗰間好難食 ~
今晚 8 點先食晚餐 咁都好 因為其實仲飽緊 哈哈 ~
一齊影相最開心 之後又乜鬼都傾 太耐無見文西 都唔記得佢係咁 Talk 得 哈哈 ~
傾開食魚 佢哋話有人食錦鋰 我話唔係養嘅咩 ?! 之後文西話大家都係魚嚟啩 我話又唔見人食金魚 ?! 不過我以前聽過啲人話善字腸係金魚肉做嘅 嚇到我唔敢食 但其實又點會吖 邊嚟咁多金魚肉喎 ~
我問文西驚唔驚米奇同阿強 ?! 佢話梗係驚啦 咩妳唔驚咩 ?! 呢句好笑 我話問你唔代表我唔驚喎 呵呵 ~
菜仔話買咗件衫好耐 件衫好靚但唔捨得掉 我話依家仲啱着真係好喎 之後文西即問啱着但有無着先 ?! 菜仔話無 我哋即刻話捐咗去啦 頭先 Auntie C 先話佢老公話啲衫唔着 3 年就要捐 我話我依家唔着 1 年都捐喇 我依家斷捨離 如果諗緊仲着唔着到同用唔用到就即捐 因為真係要嘅話就唔駛諗啦 里奧大人都話我依家好狠呀 ~
文西同菜仔又係多數去日本 我話我朋友同公司同事又係 反而泰國真係少人去咗 不過依家咩都貴哂 我同佢哋講家姐上次按摩遇到不快事件呀 搞到我都唔想去按摩 ~
食下傾下又 9 點半 雖然間舖頭 10 點關門 但我哋坐到 9 點半都無哂客 咁我哋都唔好意思坐咁耐喇 ~
我哋覺得呢餐好味道呀 所以下次會約埋媚媚 之後我話下次都同 CC 轉嚟呢度食 哈哈 ~
食完就送文西搭車 我同里奧大人就要去菜仔舖頭拎嘢 之後又幫佢睇下嘢 差唔多 10 點先走 拎袋走嘅時候 菜仔講咗 2 次話好想摵我塊臉 真係黐鬼線 ~
番到屋企即沖涼喇 我日完全無睇到 Whatsapp 咁啱 CC 又問嘢 我 10 點幾先覆佢 佢以為我過咗關即覆佢嘢 我話得一日就肯定唔會去深圳啦 未得辛苦過咩 哈哈 ~
里奧大人 11 點 15 分瞓 我飲咗杯檸茶瞓唔着 差唔多 1 點 15 分先瞓呀 ~
沒有留言:
發佈留言