魚腐辣味拉麵 + 西蘭花 ( 24-OCT-2025 )

( 24-OCT-2025  FRI )

感恩一覺瞓天光呀   今朝同里奧大人出去食早餐   比自己抖下   哈哈 ~

里奧大人話剩番幾十蚊散紙就比我   話佢無咩機會用到現金   我話我買菜要用現金㗎   佢好愕然話唔係用八達通咩 ?!   我話我都想呀 ~

咁等車就聽歌啦   點知家姐叫我打比佢   最搞笑問我做咩用手機打比佢 ?!   我話搭緊車囉   因為差唔多 9 點   佢以為我已經番到公司   我話今日出去食早餐就會遲啲先番工呢 ~

菇場唔忙   又打番比家姐傾 20 分鐘   話咁快 10 點 ~

Lunch Time 蒸完飯就出去行下   咁行行下突然有個細路女衝埋嚟問我零售館喺邊 ?!   真係比佢嚇死   我問係咪啟德呀 ?!  因為 Mikiki 唔多覺喎   之後佢話係啟德   我話行條橋過去就得㗎喇   佢話佢就係唔知邊度係條橋呀   咁我即刻同佢行去橋嗰邊啦   之後再話佢知點行就走 lu ~

其實有幾次啲人問我路   好在我都識答咋   不過有次就唔識   我都會上網睇下邊度囉   如果喺附近都可以帶佢行嘅   將心比己   我唔識路嘅時候都想人幫到我嘛   嗰時唔識去表妹舖頭   我記得佢叫我喺街市街方向行   但我都唔知喺邊   咁啱有警察就問啦   但佢都唔識   我以為佢哋成日巡邏會識添   最後都係要問番路人   哈哈 ~

唔忙又做自己嘢   星期五係感覺特別快放工咁 ~

放工即走   今晚里奧大人晏少少放工   我就可以慢慢煮喇 ~

是日晚餐 - 魚腐辣味拉麵 + 西蘭花

魚腐辣味拉麵 - 我唔餓   所以煮個麵比里奧大人就得喇 ~

西蘭花 - 呢個要 $12   諗起好耐以前係 $10/3 個   仲要係大大人個添呀   往事真係只能回憶   哈哈 ~

洗埋碗就抖陣   之後同里奧大人去做機   今晚做 20 分鐘就夠   因為對腳有啲攰 ~

番到屋企即開機洗衫   沖埋涼就熨衫 ~

睇下 Youtube 又打機   差唔多11 點 35 分先瞓覺 ~