蕃茄豬扒意粉 ( 1-OCT-2025 )

( 1-OCT-2025  WED )

今朝瞓到 9 點半呀   感恩瞓得都唔錯呀 ~

里奧大人話番公司做嘢   因為尋日無做過嘢   咁我即刻換番出街袋   可能食完早餐會去家姐屋企呢 ~

食完去惠康買菜   咁啱家姐 Whatsapp 問里奧大人駛唔駛番工 ?!   我話要呀   之後我問佢一個人 ?!   佢話係呀   姐夫出咗去   之後我即放低包菜   即刻飛去巴士站搭車   因為當時係 10 點 47 分呀   我記得 10 點 50 分有車呢 ~

11 點半去到家姐屋企   佢同工人以為邊個咁早按鐘   唔怪得佢同工人個樣咁驚咁啦   哈哈 ~

咁影到好瘦咁噃

成隻臘腸狗咁

眼瞓樣

傾下傾下都講番尋晚單嘢比家姐知   之後我又問佢如果姐夫激嬲妳會點 ?!   家姐做埋個樣出嚟先好笑   又話叫我唔好咁激氣   我話阿妹又係咁同我講   哈哈 ~

家姐話我成日都諗到啲搞笑嘢   話我其實個人都係開心嘅   咁我又確係開心底嘅   除咗媽咪同里奧大人可以激到我死死下   都無咩邊個咁樣可以激到我咁囉 ~

終於係上嚟喇

咁又講開同事啲嘢   家姐話糟糟介紹家姐比佢媽咪啲朋友識   係會講話舊同事個家姐   唔係講朋友   不過我介紹糟糟比叔叔都係講舊同事   之後我話我同阿妹講 CC 係我朋友   唔會講話係舊同事㗎喎 ~

家姐話有次同細 K 肥妹傾偈   家姐話細 K 係同事   細 K 好認真同家姐講話我當妳係朋友唔係同事   突然咁講真係唔知比咩反應   哈哈 ~

咁肥妹成日話自己多朋友   家姐話佢無朋友㗎   之後細 K 即刻話糟糟一個頂十個啦   成日都幫手   好朋友一個就夠   唔需要多囉   家姐話無諗過細 K 會咁講呀 ~

我同家姐都好驚按錯啲 Apps 功能   咁啱電視節目個主持解答唔知咩   話大家唔駛驚   真係好搞笑呀   好似同我哋講咁 ~

1 點半左右食午餐   我話其實未餓   但家姐一陣要去整嘢   我就陪佢食啦 ~

三十嘅燒賣都 OK 好味   我覺得英記辣椒油真係好香辣

知道開飯呀   即刻望住家姐

我哋食嘢   佢就喺枱底陪住我哋

食完又坐番梳化傾偈   今日我真係舒服過喺屋企呀   話哂食完唔駛洗嘛   哈哈 ~

捲埋就好似條蛇

今日影親佢個鼻都好長

咁咪乖囉   哈哈

2 點開始瞓   瞓到有鼻鼾聲

家姐問我隻手做咩咁 ?!   我話托住 Berry 瞓覺呀

佢一轉身   我就用對腳托住佢

睇唔到個肚腩真係呃到人   佢其實 42 磅㗎   要減肥呢

差唔多 3 點幾就同家姐一齊搭地鐵   咁架車終站係何文田   我同家姐講話轉車去黃埔   唔係上就落㗎啦   之後家姐話唔係喎   平時去黃埔都係同一班車嘅位置   無上同落喎   真係笑死我   我話如果我真係出鬼咗去真係勁低能呀   哈哈 ~

今日見到家姐   我個人真係開心番好多呀   感恩感恩   好感謝神   因為我好多時唔開心   我真係好需要搵人呻呀 ~

本來想行陣 AEON   但好多人又焗   真係唔會行囉 ~

5 點鬆啲番到屋企   抖到 6 點先開始煮飯 ~

家姐又比冬菇我喇

我無打比里奧大人問佢幾時番呀   因為我煮完都會自己食先   點知佢 6 點 40 分都番到嚟   同平時放工差唔多   不過我煮嘢真係慢哂   唔想成日急急趕趕咁 ~

是日晚餐 - 蕃茄豬扒意粉

蕃茄豬扒意粉 - 上次突然醒起買咗啲蕃茄醬汁   咁係時候拎出嚟煮喇   唔係過期就慘了 ~

洗埋碗就開機洗衫   之後沖涼休息喇 ~

睇 Youtube 又打機   唔覺唔覺又 11 點 15 分先瞓 ~