元朗半天遊 ( 13-JUN-2009 )

( 13-JUN-2009  SAT )

今朝 Off 呀   超勁開心   因為可以瞓晏啲   又可以舒舒服服食早餐呢 ~

食完去百佳買嘢   我排隊比錢先知道   原來今日買滿 $88 送環保袋   唔怪得咁多人啦   收銀姐姐好好呀   幫我分兩張單   所以我有兩個環保袋呀 ~

呢日好焗好焗   所以我就唔開冷氣熨衫   熨到成身汗   雖然出咗一身汗   但焗到真係有啲頭暈暈嘅感覺呀 ~

突然收到里奧大人電話   話做嘢做到好醃悶   想出去行街喎 ~

仲話不如去元朗啦   見我成日想去元朗   順便搵埋家姐食 Lunch 再去佢屋企坐坐咁話喎   我當然話好啦   等埋里奧大人放工就一齊出發去元朗喇 ~ 

家姐就攞定位   我哋一嚟到就有得食㗎喇 ~

今次去呢間叫田中壽司刺身店    家姐話平時夜晚超多人㗎   所以想試下呢間囉   不過限時 45 分鐘   對於我哋就無所謂啦   諗住食少少嘢再去食綿綿冰呢 ~

估唔到有驚喜   食材新鮮又大件又抵食   我哋 3 個都食到好飽呀   我覺得係因為食三文魚係好漏囉 ~

天氣又熱喎   所以食埋綿綿冰就去家姐屋企喇 ~

村屋有樣好   地方大空氣好   但交通就唔方便囉   望見個大草原   有個大廚房又可以種盆栽   令我呢一刻真係好想住村屋呢 ~

家姐好鍾意八哥   總之係八哥嘅嘢就會好鍾意   所以隨處都見到八哥飾物   同埋佢好鍾意儲公仔   儲親都係一套套   有地方擺係唔同啲 ~

坐到 5 點半就走喇   同里奧大人行 Citimall   商場無咁熱嘛   我發覺元朗好似特別熱咁 ~

估唔到入元朗有收穫   里奧大人送咗 2 對羊皮拖鞋比我   佢自己買個 Laptop 背囊   得物有所用嘅感覺到真好喇 ~

行行下見到對面間鞋舖好舊式之餘   仲見到有間鞋舖好多好多鞋買   我第一次見到咁情境咋 ~

同里奧大人熱到無咩胃口   所以去勝利牛丸食晚餐就算喇 ~